Nabothi na mûnda wake wa mîcabiibû
21
1 Nabothi Mûnjesireeri n'aarî na mûnda wa mîcabiibû naagu Njesireeri akubî na nyomba ya ûnene ya Aabu mûnene wa Samaria. 2 Na Aabu aaria na Nabothi amwîra atarî, “Mpa mûnda waku wa mîcabiibû ncutuîkithie mûnda wakwa wa nyani, n'ûntû ûrî akubî na nyomba yakwa. Ngakûa mûnda ûngî wa mîcabiibû ûmwega nkûrûki, kana wenda mbia ngakûrîa kûringana na ûgûri bwa uu.” 3 Îndî Nabothi eera Aabu, “Mwathani arombûraga wegua ngakwaa rûgai rûra baaba aangaîrîîre.” 4 Na Aabu aathi mûciî ainyîîrîkîîte na athûûri n'ûntû bwa ûgu Nabothi ûyu Mûnjesireeri aamwîrîîte, “Ntikûa rûgai rûra ngaîrîîtwe i ba baaba.” Kwoogu aathi aamaama gîtandaani gîake araithîîte rûthingo na aarega kûrîa.5 Mwekûrû wake Njesebeeri aaya amûûria, “I kî n'ûntû winyîîrîkîîte, kinya waaremwa i kûrîa irio?” 6 Amwîra, “I bûra mbariirie na Nabothi ûra Mûnjesireeri ndamwîra ambenderie mûnda wake wa mîcabiibû, kana eenda mûkûûranîrie na mûnda ûngî. Îndî nwe ambîîra, ‘Ntikûa mûnda wakwa.’ ” 7 Mwekûrû wake Njesebeeri amûûria, “Anga ti woû waathaga Isiraeri? Ûkîîra ûrîe irio, na ûrigicûke. Ngakûthûkîria mûnda wa mîcabiibû, wa Nabothi Mûnjesireeri.”
8 Kwoogu Njesebeeri aandîka baarûa riîtwani rîa Aabu na aciringa mûûni wa mûnene. Rîru acitûma kîrî akûrû na antû ba gîtîîyo bara baatûûraga na Nabothi ntûûra yake. 9 Aandîkîîte baarûani ûûgû,
Buugîîrie ntugû ya gûtîîrîra kûrîa, na bûkarithie Nabothi bantû a gîtîîyo mbere ya antû. 10 Bûcerie imaramari biîrî beerekanîrîîte nwe, na bûreke bakûûyîîre ûrongo îgûrû rîake bakiugaga atî narumîîte Ngai na mûnene. Rîru bûmûrute ome na bûmûûrage na maiga.
11 Na antû ba ntûûra yake, akûrû na antû ba gîtîîyo bara baatwîre taûni yake, baarûtha bûra Njesebeeri aabeerîîte. Wa bûra kwandîkîîtwe baarûani ira aabatûmîrîîte, 12 baugîîria ntugû ya gûtîîrîra kûrîa, na baiga Nabothi bantû a gîtîîyo mbere ya antû. 13 Amaramari baîrî baaya baakara beerekanîrîîte nwe na baatuîrîîra Nabothi mbere ya antû bakiugaga, “Nabothi narumîîte Ngai na mûnene.” Kwoogu bamûruta ome ya taûni na bamûringanga na maiga bamûûraga. 14 Rîru baatûmana kîrî Njesebeeri bauga, “Nabothi akûûragwa na maiga.”
15 Njesebeeri akwîgua Nabothi akûûragwa na maiga, eera Aabu, “Îthi ûthûkie mûnda ûra wa mîcabiibû wa Nabothi Mûnjesireeri, ûra aaregire gûkwenderia. N'ûntû Nabothi atirî mwoyo îîndî nûmûkuû” 16 Rîra Aabu eegiirue Nabothi agûkua, aûkîîra aathi kûthûkia mûnda wa mîcabiibû wa Nabothi.
17 Rîru Mwathani eera Eriya wa kuuma Tisibi, 18 “Ûkîîra, wîndame ûgakomane na Aabu mûnene wa Isiraeri, ûra arî Samaria. Îîndî arî mûndaani wa mîcabiibû wa Nabothi ûra aathi kûthûkia. 19 Ûmwîre Mwathani ariuga ûûgû, ‘Ka waûraga muntû na wathûkia kinya into biake?’ Kaîrî mwîre, Mwathani ariuga, ‘Bantû ara kurû ciacûnîîre nthakame ya Nabothi, noogo igaacûnîra yaku kinya woû.’ ”
20 Aabu aûria Eriya, “Mûnthû wakwa, ûkûngwatithania?”
Nwe amûcookeria amwîra, “Îî ngûkûgwatithania, n'ûntû nwîbendeetie warûtha ûthûûku mbere ya Mwathani. 21 Kwoogu Mwathani arîkwîra, ‘Nkaareeta kînyamaara kîrî woû. Ngakûthiria na nthirie muntû mûrûme wonthe wa mûciî waku arî nkombo kana atarî nkombo baume ndeeni ya Isiraeri. 22 Nkaathiria mûciî waku ta mûciî wa Njeroboamu mwana wa Nebati na ûra wa Baasa mwana wa Aiya, n'ûntû n'ûnthûûrîîtie na waatûma Isiraeri îîyia.’ 23 Na îgûrû rîa Njesebeeri Mwathani auga ata rî, ‘Kurû ikamûrîîra nthingooni cia Njesireeri.’ 24 Muntû wa Aabu wonthe ûra agaakuîra taûni akaarîîgwa i kurû, na ûra wonthe wake agaakuîra kîthakaani akaarîîgwa i nyoni cia îgûrû.”
25 Gûtirî muntû ûngî nwa ûmwe webendia kûrûtha ûthûûku mbere ya Mwathani ta Aabu, eengîîrîîtwe i mwekûrû wake Njesebeeri. 26 N'arûthire mantû maarî mûgiro mûno ma kûgonga ngai cia mîbuanaano, ta îra Aamori baarûthîîte, bara Mwathani eengatiirie mbere ya antû ba Isiraeri.
27 Rîra Aabu eegiirue mîgambo ya Eriya, aatembûranga nguo ciake, eekîra mathango na aatîîrîra kûrîa n'ûntû bwa maromba. Na aamaama mathangooni, na aangaangaga eenyiîtie.