Kîroria Mikaya aakaania Aabu
(2Karaaya 18:2-27)
22
1 Gwa kagiita ka mîanka îthatû gûteethîrwa kûrî na ndûa gatîgatî ka Aaramu na Aisiraeri. 2 Îndî mwankaani wa îthatû Njeosafati mûnene wa Njunda eendama kwona mûnene wa Isiraeri. 3 Mûnene wa Isiraeri n'arî akûûria aruti ngûgî baake, “I bwiyî kana Ramothi-Ngiriandi n'yetû, na nwaka tûkiri tûtakûmîthûkia kuuma njaraani cia mûnene wa Aramu?” 4 Na Aabu aûria Njeosafati, “Ûkaathiiyania naani tûkarûe Ramothi-Ngiriandi?”Njeosafati nwe acookeria mûnene wa Isiraeri amwîra, “Gûtirî mwanya wakwa na woû, antû baakwa nwa ta baaku, mbaraathi ciakwa i ta ciaku.”
5 Îndî Njeosafati aacooka eera mûnene wa Isiraeri, “Mbere ceria mataaro kuuma kîrî Mwathani.” 6 Kwoogu mûnene wa Isiraeri eethîrania iroria ta magana mana amwe, nwe abiûria, “Nthi nkarûe na Ramothi-Ngiriandi kana ntîîre?” Nabo bamûcookia bamwîra, “Îthi, n'ûntû Mwathani akamînenkanîra njaraani cia ciaku.” 7 Îndî Njeosafati aûria, “Gûtirî kîroria kîngî kîa Mwathani aaga tûûmba kûûria?” 8 Mûnene wa Isiraeri acookia Njeosafati amwîra, “N'atigeere ûmwe, eetagwa Mikaya mwana wa Imura, îndî ntimwendeete n'ûntû atindoragîria mantû meega, i maathûûku akî.” Njeosafati amwîra, “Ti bwega mûnene kuuga ûgu.” 9 Rîru mûnene wa Isiraeri eeta ûmwe wa aruti ngûgî baake amwîra, “Îthi ûndetere Mikaya mwana wa Imura na mpwî.”
10 Kagiitaani gaku, mûnene wa Isiraeri na Njeosafati mûnene wa Njunda beekîrîîte nguo ciao cia ûnene baakarîîte itîîni biao bia ûnene rwaraani rwa kûbûûrîra mwîrîgaani wa taûni ya Samaria. Na iroria bionthe bikîroragia agu mbere yao. 11 Sendekia mwana wa Kenaana aarûtha ngoci cia îthaga auga, “Mwathani ariuga ûûgû, ‘Ino i cio ûgaatindîka nacio Asîîria mwanka ûbathirie.’ ” 12 Kinya iroria bira bingî biaroria woogu, bikiugaga, “Îthi ûkaithûkîre Ramothi-Ngiriandi na ûkaûmbana. Mwathani akamîeyana njaraani ciaku.”
13 Mûtûmwa ûra aatûmîîtwe gwîta Mikaya amwîra, “Iroria bira bingî bionthe birî amwe, biroreerie mûnene kûûmbana. Itû kinya woû guuge tabo, ûmûrorerie mantû meega.” 14 Îndî Mikaya auga, “Wa ta bûra Mwathani atûûraga mwoyo, nkauga bûra Mwathani akambîîra.” 15 Rîra aakinyire, mûnene amûûria, “Mikaya, tûthi tûkarûe na Ramothi-Ngiriandi, kana tûtîîre?” Amûcookia amwîra, “Îthi na ûkaûmbana, n'ûntû Mwathani akamîeyana njaraani ciaku.”
16 Îndî mûnene amwîra, “I maita magana ngaakûthiîtithia nkwîre ûkîaria naani waaragie ûmma riîtwani rîa Mwathani?”
17 Rîru Mikaya auga, “Ndaroonire antû ba Isiraeri bonthe banyageere irîmaani ta ng'ondu itarî na mûrîîthi. Na Mwathani auga, ‘Baba batirî na mûtongoria, ka wa kîra muntû acooke gwake mûciî na ûkiri.’ ”
18 Na mûnene wa Isiraeri aûria Njeosafati, “Ntikwîrire atindoragîria mantû meega, i maathûûku akî?” 19 Mikaya aathi na mbere kuuga, “Wegua n'ûûgu thikîîriani kiugo kîa Mwathani. Ndaroonire Mwathani akari gîtîîni gîake kîa ûnene na njûûrî ya îgûrû yonthe îrûngi rûteere rwake rwa njara ya ûrîo na ya ûmotho. 20 Mwathani nwe aûria atarî, ‘N'ûû ûkeeneeria Aabu kaingo athi kûrûa aûragîrwa Ramothi-Ngiriandi?’ Ûmwe auga ûûgû ûra ûngî akauga bûngî. 21 Rîru kwaumîîra kîrundu, kîarûngama mbere ya Mwathani kîauga, ‘Nkamweneeria.’ 22 Mwathani amûûria, ‘Na njîra îrîkû?’ Amwîra, ‘Nkaathi ntûme iroria bia Aabu bionthe birorie ûrongo.’ Mwathani amwîra, ‘Ûkamweneerie na ûkaûmbana. Îthi ûrûthe ûgu wauga.’ 23 Kwoogu îîndî, Mwathani i ka eekîrîîte kîrundu kîa ûrongo tûnyuani twa iroria bibi biaku bionthe. Mwathani n'akûbangîrîîte ûthûûku îgûrû rîaku.”
24 Rîru Sendekia mwana wa Kenaana aathi akubî na Mikaya amûringa rwî rwa ûthiû, amûûria, “I kuuma rî Kîrundu wa Mwathani aumire kîrî niû akîîya gûkwarîria?” 25 Mikaya amûcookia amwîra, “Ûkaamenya ntugû îra ûkaathûngîra kanyomba ka ndeeni kwîbitha.”
26 Na mûnene wa Isiraeri auga, “Gwataani Mikaya, bûmûcookie kîrî Amoni mwathi wa taûni, na kîrî Njoasi mwana wa mûnene, 27 ‘Bûbeere mûnene ariuga bûthûngîrie muntû ûyû nceera, apeeyagwe mûgaate na rûûyî runka, mwanka rîra agaacooka mayîîga.’ ” 28 Na Mikaya auga, “Wona wacooka mayîîga nkaamenya ti Mwathani warîîtie naani.” Acooka ongeera auga, “Gwataani mîgambo yakwa, biû bwinthe!”
Aabu aûragîrwa Ramothi-Ngiriandi
(2Karaaya 18:28-34)
29 Kwoogu Aabu mûnene wa Isiraeri na Njeosafati mûnene wa Njunda baathi kûrûa na Ramothi-Ngiriandi. 30 Mûnene wa Isiraeri eera Njeosafati, “Niû nkeegarûra bûra nkari ntikaaye kûmenyeka na nthi ndûani, îndî woû wîkîre nguo ciaku cia ûnene.” Kwoogu mûnene wa Isiraeri eegarûra na aathi ndûani.
31 Îgiita warîru, mûnene wa Aramu n'athiîte na atongoria ba nkaarî cia mbaraathi cia ndûa mîrongo îthatû abeera, batikaarûe na muntû nwa ûrîkû, ûmûnene kana ûmûniini, tatiga mûnene wa Isiraeri wenka. 32 Rîra atongoria ba nkaarî cia mbaraathi cia ndûa boonire Njeosafati, bauga, “Ûmma ûyû n'we mûnene wa Isiraeri.” Kwoogu baagarûka kûrûa nwe, na Njeosafati aarîra auga mbu. 33 Rîra atongoria babu ba nkaarî cia ndûa boonire ti mûnene wa Isiraeri, baûndûka baatiga kwîngana nwe. 34 Îndî muntû ûmwe aakuuyia ûta bwake gûtarî muntû eerekereetie, na aaratha mûnene wa Isiraeri mwanyaani ûra warî gatîgatî ka nguo ciake cia mathaga cia ndûa. Rîru mûnene eera mûthiithia wa nkaarî yake ya mbaraathi, “Garûra nkaarî îno ya mbaraathi ûndute ndûani n'ûntû nkûgurarua mûno.” 35 Na ndûa yaanenea mûno ntugû înu, mûnene nwe atiirîkanîîtue nkaarîîni yake ya ndûa eerekereete Aaramu, mwanka ûgoro rîra aakuire. Nthakame îra yaaruaga kuuma agu aarathîîtwe yeetîgîîte nkaarîîni ndeeni. 36 Riûa rîkûthûa, kwaugîîrua na kayû kaanene gûku njûûrîîni kunthe kwerwa, “Woora muntû acooke taûniini yake, na nthî yake!”
37 Kwoogu mûnene Aabu aakua na aareetwa Samaria, na bamûthika noogo. 38 Baathambîria nkaarî yake ya ndûa kariani kaarî Samaria ara marwaya maathambagîra, kurû ciacûna nthakame yake, kûringana na mûgambo wa Mwathani ûra aarî kwaria.
39 Mantû mara mangî ma Aabu, na monthe mara aarûthire, na nyomba ya mîguongo îra aakire, na taûni ira aakire, monthe maandîkîîtwe îbukuuni rîa mûririkana rîa anene ba Isiraeri. 40 Aabu agûkua, mwana wake Aasia aathana bantû aake.
Njeosafati aathana Njunda
(2Karaaya 20:31-21:1)
41 Njeosafati mwana wa Asa aanjîîria kwathana Njunda mwankaani wa îna wa Aabu mûnene wa Isiraeri. 42 Njeosafati aarî na ûkûrû bwa mîanka mîrongo îthatû na îtaano akîanjîîria kwathana, na aathana mîanka mîrongo îîrî na îtaano arî Njerusaremu. Gina eetagwa Asuba mwarî wa Sirii. 43 Aathingatire mîthiîre ya îthe Asa na ataûndûka amîtiga. Aarûthaga bûra kûbatîîrue mbere ya Mwathani. Îndî gûntû kûra gûûkîîru gwa kûgongerwa gûtaarutarutwa oogo, na antû nwa baarutaga igongwana na kûbîîthîria macoco gûntû gûku gûûkîîru. 44 Njeosafati kinya we eegua arî na ûkiri na mûnene wa Isiraeri.
45 Ngûgî ira ingî cia Njeosafati, na inya yake îra oonaniirie, na bûra aarûire ndûa, i maandîke îbukuuni rîa mûririkana rîa anene ba Njunda. 46 Na matigari ma marwaya ma antû arûme, bara baatigeere ntugûûni cia îthe Asa, Njeosafati abeengatia bauma nthî înu.
47 Nthî ya Endomu îtaarî na mûnene, i mûniini wa mûnene aathanaga.
48 Njeosafati aarûtha meeri inene cia kûthi Ofiri kûgîîra thaabu, îndî itaathi n'ûntû iciombokanîîre Esioni-Ngeberi. 49 Rîru Aasia mwana wa Aabu eera Njeosafati, “Ka aruti ngûgî baakwa bathi na aruti ngûgî baaku matarûûni,” Îndî Njeosafati aarega.
50 Na Njeosafati aakua aathikwa amwe na biûyûûyû biake taûni ya Ndaundi, na mwana wake Njeoramu aathana bantû aake.
Aasia mûnene wa Isiraeri
51 Aasia mwana wa Aabu aanjîîrie kwathana Isiraeri arî Samaria mwankaani wa îkûmi na mûgwanja wa Njeosafati mûnene wa Njunda, na aathana mîanka îîrî. 52 Îndî aarûtha ûthûûku mbere ya Mwathani, aathingatîîra mîthiîre ya îthe na ng'ina na ngerekano ya Njeroboamu mwana wa Nebati, ûra aatûmire Isiraeri beeyia. 53 Aatûmîkîîre na aagonga ngai ya mûbuanaano ya Mbaari na aathûûria Mwathani Ngai wa Isiraeri, wa ta bûra îthe aarûthire.