1 Anene 1

1 ANENE

Andoniya aageria wîtuikithia mûnene

1 Mûnene Ndaundi aarî agûkûra mûno na ateegagua mûrugutîra wana aaguîkwa na nguo. 2 Kwoogu, aruti ngûgî baake bamwîra, “Mûnene, gatûcerie mwarî akarage naawe na akûmenyagîîre. Akaamaamaga akubî naawe kaingo akûrugutagîîria.” 3 Kwoogu, bathiûrûûka Isiraeri yonthe bagîceragia mwarî ûmûthongi, na boona Abisagi Mûsunemu, na bamûreeta kîrî mûnene. 4 Mwarî ûyu aarî ûmûthongi mûno, na aanjîîria kûrutîra mûnene ngûgî na kûmûmenyeera, îndî ataamama n'we.

5 Kagiitani gaku, Andoniya ûra gina eetawa Agithi, aanjîîria gwîkumia akiugaga, “Ngaatuîka mûnene.” Kwoogu, eerûthîra nkaarî cia ndûa na athiithia ba mbaraathi, na antû mîrongo îtaano bara bakaathi bamûtongoreereetie. 6 Îndî îthe atooro amûkaania kana amûûria, “I kî n'ûntû ûrûthîîte ûûgû?” Andoniya aarî ûmûthongi na aarî mûruna wa Abusaromu. 7 Andoniya aaranîria na Njoabu mwana wa Seruya na Abiathari mûthînjîri wa Ngai, na beetîgîîria kûmwigîka. 8 Îndî Sandoki mûthînjîri wa Ngai, Benaya mwana wa Njeoyanda, kîroria Nathani, Simei, Rei na akaria ba Ndaundi bataawatanîra na Andoniya.

9 Andoniya aaruta biewa bia ng'ondu, ng'ombe na tûyaû tûûnoru iigaani rîa Coerethi rîra rîarî akubî na kînyaka kîa Eni-Rongeri. Aathookiirie aruagina bonthe, bara baarî nthaka cia mûnene na antû bonthe bara baarî atongoria ba Njunda. 10 Îndî ataathookia kîroria Nathani, Benaya, akaria ba mûnene kana mûruagina Soromoni.

11 Rîru Nathani aûria Bathiseba, gina wa Soromoni, “Ûtireegua Andoniya mwana wa Agithi agûtuîka mûnene na mwathi wetû na mûnene Ndaundi atikûmenya ntheto ino? 12 Kwoogu îndî, gankwathe bûra ûûmba kwonokia mwoyo waku na mwoyo wa mwana waku Soromoni. 13 Îthi kîrî mûnene Ndaundi ûmwîre, ‘ûtanthiîtîîrie niû mûruti ngûgî waku, mwathi wakwa mûnene atî Soromoni mwana waku akaathana nyuma yaku, na agaakarîra gîtî gîaku kîa ûnene? I kî aabu n'ûntû Andoniya aatuîka mûnene?’ 14 Na bûrî waagu bûkîaragia na mûnene, nkaathûngîra na nkinyîîrie mîgambo înu yaku.”

15 Kwoogu, Bathiseba aathi kwona mûnene nyomba yake ya kûmaama, kûra Abisagi ûra Mûsunemu aamûmenyagîîra n'ûntû n'arî ûmûkûrû mûno. 16 Bathiseba eendamîîra na gûturia maru mbere ya mûnene. Mûnene amûûria, “I mbi ûkwenda?” 17 Amûcookeria, “Mwathi wakwa, woû wengwa wanthiîtîîrie niû mûruti ngûgî waku mbere ya Mwathani Ngai waku atî mwana waku Soromoni akaathana nyuma yaku na agaakara gîtîîni gîaku kîa ûnene. 18 Îndî îîndî Andoniya n'aratuîkire mûnene, na woû, mwathi wakwa mûnene ûtikûmenya mantû mama. 19 N'arutîîte îgongwana biingî bia ng'ombe, tûyaû tûûnoru na ng'ondu na aathookia nthaka cionthe cia mûnene, Abiathari mûthînjîri wa Ngai na Njoabu mûnene wa njûûrî, îndî atirathookia mûruti ngûgî waku Soromoni. 20 Kwoogu, mwathi wakwa mûnene, Aisiraeri bonthe ibagweteereete kaingo ûbeera ûra agaakarîra gîtî kîa Mwathi wakwa mûnene nyuma yaku. 21 Wegua t'ûgu, rîra woû Mwathi wakwa mûnene ûgaakua, niû amwe na mwana wakwa Soromoni tûgaatarwa ta anthû.” 22 Wa akîaragia na mûnene, Nathani ûra aarî kîroria aakinya. 23 Na beera mûnene, “Kîroria Nathani arî aaga.” Kwoogu, aathi mbere ya mûnene na eendamîîra na atiirithia ûthiû bwake nthîgûrû.

24 Nathani auga, “Mwathi wakwa mûnene, ka ûraugire Andoniya n'we agaatuîka mûnene nyuma yaku na agaakarîra gîtî gîaku kîa ûnene? 25 Îmunthî narutire kîgongwana kîa ng'ombe, tûyaû tûûnoru na ng'ondu na eeta nthaka cionthe cia anene, anene ba njûûrî na Abiathari mûthînjîri wa Ngai. Îîndî ûgu ka bakûrîyanîra na kûnyuunyanîra nwe bakiugaga, ‘Ûrootûûra mûnene Andoniya!’ 26 Îîndî niû mûruti ngûgî waku amwe na Sandoki ûra mûthînjîri wa Ngai, na Benaya mwana wa Njeoyanda, na Soromoni mûruti ngûgî waku, atiratwîta. 27 Ka Mwathi wakwa mûnene arûthîîte ûntû bûbû ateerîîte aruti ngûgî baake bamenya ûra agaakarîra gîtî kîa Mwathi wakwa mûnene nyuma yake?”

Ndaundi aatuîkithia Soromoni mûnene

28 Rîru mûnene Ndaundi auga, “Mbîtîra Bathiseba.” Kwoogu, Bathiseba aathi akubî na mûnene na kûrûngama mbere yake. 29 Mûnene athiîtia akiugaga, “Wa ta bûra Mwathani atûûraga mwoyo, ûra aambonokeetie kuuma thîînaani cionthe, 30 wa ta bûra ndaakûthiîtîîrie na riîtwa rîa Mwathani, Ngai wa Isiraeri, mwana waku Soromoni agaatuîka mûnene nyuma yakwa na agaakarîra gîtî gîakwa kîa ûnene.”

31 Bathiseba eendamîîria ûthiû bwake mwanka nthîgûrû, na wa aturîîtie maru mbere ya mûnene auga, “Mwathi wakwa mûnene Ndaundi arootûûra tene na tene!”

32 Mûnene Ndaundi auga, “Mbîtîra Sandoki mûthînjîri wa Ngai, kîroria Nathani na Benaya mwana wa Njeoyanda.” Bagûkinya kîrî mûnene, 33 abeera, “Thûkiani aruti ngûgî ba Mwathani na bûtwethie Soromoni mwana wakwa îgûrû rîa nyûmbû yakwa bûmwire mwanka Ngioni. 34 Rîru Sandoki mûthînjîri wa Ngai na kîroria Nathani beetûûrîrie Soromoni maguta naagu atuîke mûnene wa Isiraeri. Bûcooke bûriinge karumbeta na buuge nainya, ‘Mûnene Soromoni arootûûra îgiita rîîraaya!’ 35 Rîru bûmûthingate aayîîte gûkarîra gîtî gîakwa kîa ûnene, n'ûntû agaatuîka mûnene nyuma yakwa. Nkûmûthuura ta mûnene wa Isiraeri na Njunda.” 36 Benaya mwana wa Njeoyanda acookeria mûnene amwîra, “Aameni! Mwathani Ngai wa mwathi wakwa mûnene, arouga wa ûgu. 37 Wa ta bûra Mwathani aarî amwe na mwathi wakwa mûnene, neegue arî amwe na Soromoni na atûme gîtî gîake kîa ûnene kîgîe inya nkûrûki ya gîtî kîa mwathi wakwa mûnene Ndaundi.”

38 Kwoogu, Sandoki mûthînjîri wa Ngai, kîroria Nathani, Benaya mwana wa Njeoyanda, Akerethi na Aperethi beendama na baatwethia Soromoni kîrî nyûmbû ya mûnene Ndaundi na bamuumagaria mwanka Ngioni. 39 Sandoki mûthînjîri wa Ngai aathûkia rûgoci rwa maguta kuuma îremaani na eetûûrîria Soromoni. Rîru baaringa karumbeta na antû bonthe bauga, “Ûrootûûra îgiita rîîraaya mûnene Soromoni!” 40 Na antû bonthe bamûthingata, bakîriingaga mîtûûrirû bakiinaga nainya na bakeneete mûno mwanka nthîgûrû yainaina.

41 Andoniya na antû bara baarî beete beegiirue gîtuma gîa antû babu rîra kîatho kîao gîkîthira. Rîra Njoabu eegiirue kayû ga karumbeta, aûria “Gîtuma gîkî kîonthe kîrî taûni i kîa mbi?” 42 Wa akîaragia woogu, Njonathani mwana wa Abiathari mûthînjîri wa Ngai aakinya. Andoniya amwîra, “Thûngîra. Muntû ûrî gîtîîyo ta woû nwa mwanka wîgue areeteete ntheto imbega.” 43 Njonathani acookeria Andoniya amwîra, “Arî ntireeteete ntheto imbega, mûnene wetû Ndaundi n'atuîkithîîtie Soromoni mûnene. 44 Mûnene aatûma Soromoni aathiiyania amwe na Sandoki mûthînjîri wa Ngai, kîroria Nathani, Benaya mwana wa Njeoyanda, Akerethi na Aperethi, na bamûtwethia îgûrû rîa nyûmbû ya mûnene. 45 Bagûkinya Ngioni, Sandoki mûthînjîri wa Ngai na kîroria Nathani bamwîtûûrîria maguta aatuîka mûnene. Kuuma agu baathi bakeneete mûno bagîkûngwagîîra, na kuumania na gîkeno gîku, i kîo gîtuma ûkwîgua taûni. 46 Amwe na ûgu, Soromoni n'we akarîrîîte gîtî kîa ûnene. 47 Atongoria ba ûnene i baayire gûkumîîria mûnene wetû Ndaundi bakiugaga, ‘Mwathani arootûma riîtwa rîa Soromoni rîgîa îgweta nkûrûki ya rîaku na aneneithie gîtî gîake kîa ûnene nkûrûki ya gîaku.’ Na mûnene eendamîîra nthî arî gîtandaani gîake 48 na auga, ‘Mwathani arookumua, Ngai wa Isiraeri, ûra atûmîîte mbona ûra athuurîîte kûthûkia kaanya gaakwa.’ ”

49 Ageni bonthe bara beetîîtwe n'Andoniya baûkîîra barî na ûguaya bwingî mûno baanyagaarania. 50 Îndî Andoniya arî na ûguaya n'ûntû bwa Soromoni, aathi aathûngîra îremaani rîra rîtheru na agwata ngoci cia kîthînjîro. 51 Soromoni eerwa, “Andoniya arî na ûguaya n'ûntû bwaku na agweete ngoci cia kîthînjîro, akiugaga, ‘Ndîenda mûnene Soromoni anthiîtîria îmunthî atî atiûraga mûruti ngûgî wake na rûûyiû.’ ”

52 Soromoni acookia, “Akaaya kwîbonania i muntû ûmwagîru, wana rûtundu rwake rwa kîongo rûtiigwa nthîgûrû, îndî ûthûûku bwonekana kîrî we, ka agaakua.” 53 Rîru mûnene Soromoni aatûma antû bamûkinyûkia kuuma kîthînjîrooni. Andoniya aathi na kwîndamîîra nthî kîrî mûnene Soromoni, nwe mûnene amwîra, “Înûka mûciî waku.”