2 Anene 8

Mwekûrû Mûsunemu aacookerua kîthaka gîake

1 Erisa eera mwekûrû ûra Mûsunemu ûra aariûkîrîîtie kaana ata rî, “Thaama amwe na mûciî waku ûthi nthîgûrû îîngî wa îra ûkaathi, n'ûntû Mwathani n'areeteete yûûra nthîgûrû îno na rîgaakara mîanka mûgwanja.” 2 Kwoogu mwekûrû ûyu aarûtha wa ta bûra mûruti ngûgî wa Ngai aamwathîîte. Wee na mûciî wake baathaama baathi baatûûra nthîgûrû ya Afirisiti mîanka mûgwanja. 3 Na rîra mîanka mûgwanja yathirire, mwekûrû ûyu aacooka kuuma nthîgûrû ya Afirisiti, na aathi kwaria na mûnene mantû ma gûcookerua nyomba yake na mûnda wake. 4 Akîthi, eethîra mûnene akîaragia na Ngeasi mûruti ngûgî wa mûruti ngûgî wa Ngai, akîmwîraga, “Mbîîra monthe maanene mara Erisa arûthîîte.” 5 Na rîra Ngeasi eeraga mûnene bûra Erisa aariûkîîtie muntû ûmûkuû, warîru mwekûrû ûra aariûkîrîîtue mwana n'Erisa aakinya anjîîria kwaria na mûnene mantû ma nyomba yake na mûnda wake. Ngeasi eera mûnene, “Mwathi wakwa mûnene, mwekûrû ûra n'ûyû na mwana wake ûra Erisa aariûkiirie wan'we n'ûyû.” 6 Rîra mûnene aûriirie mwekûrû ûyu, amwîra bungwa bûra waakarîkîîte. Mûnene aathuura mûrûngamîîri ûmwe amwîra, “Raitha wone mwekûrû ûyû agûcookerua nyomba yake, mûnda wake, na into bionthe bira biaumire mûndaani ûyu kuuma rîra aathaamire mwanka îmunthî.”

7 Nyumaani Erisa aathi Ndamasiki. Mbeni-Andandi mûnene wa Aramu n'arî ûmwayie, na rîra mûnene eegiirue atî mûruti ngûgî wa Ngai n'aarî akûûya noogo, 8 mûnene aatûma Acaeri amwîra, “Thûkia kîewa gîkî ûthi nakîo kîrî mûruti ngûgî wa Ngai. Mwîre aambûûrîrie kîrî Mwathani wegua nkoora ndwari îno mbayîîtue kana ntiora?” 9 Kwoogu Acaeri aîkia nkamîîra mîrongo îna into bia mîthemba mwanya mwanya bira biega mûno bia kuuma Ndamasiki aathi. Rîra athiire akinya kîrî Erisa aarûngama mbere yake amwîra, “Mwana waku mûnene Mbeni-Andandi mûnene wa Aramu n'we aantûma kîrî woû, nkûûria, ‘Akaabua kuumania na ndwari îra ayîîtue?’ ” 10 Erisa amûcookeria amwîra, “Îthi ûmwîre, gûtirî na thîîna akaabua, îndî Mwathani n'aamboneetie na mma agaakua.” 11 Erisa nwe amûkûnûûrîra meetho kii, mwanka Acaeri eegua nthoni. Erisa aanjîîria kûrîra. 12 Acaeri amûûria, “I mbi n'ûntû mwathi wakwa ûkûrîra?” Erisa amûcookeria amwîra, “N'ûntû inkûmenya ûthûûku bûra ûkaarûthîra antû ba Isiraeri, ûkaabîîthia nthingo ciao, ûûrage nthaka ciao na ûtemange twana twao na ûteembûrange nda cia eekûrû baao bara barito.” 13 Acaeri amûûria, “N'ata kûûmbîka mbîgua ndî na inya îgana ûgu ya kûrûtha ûntû bûgana ûgu, na ndî muntû ûtarî gîtûmi?” Erisa amûcookeria amwîra, “Mwathani n'aamboneetie atî ûkeegua ûrî mûnene wa Aramu.” 14 Rîru Acaeri auma kîrî Erisa aathi kîrî Mbeni-Andandi. Mbeni-Andandi amûûria, “N'ata Erisa akwîrire?” Amûcookeria amwîra, “Ambîîrire gûtirî na thîîna na mma ûkaabua.” 15 Îndî rûûni rûkîîrî Acaeri aathûkia mûrîîngîti acurinda rûûyîîni aaguîka mûnene nau ûthiû mwanka aakua. Na Acaeri atuîka mûnene bantû aake.

Njeoramu mûnene wa Njunda

(2Karaaya 21:1-20)

16 Mwankaani wa îtaano wa wathani bwa Njoramu mwana wa Aabu, mûnene wa Isiraeri, Njeoramu mwana wa Njeosafati aatuîka mûnene wa Njunda. 17 Aarî na mîanka mîrongo îthatû na îîrî agîtuîka mûnene, na aathanire mîanka înaana arî Njerusaremu. 18 N'we aathingata mîkarîre ya anene ba Isiraeri, wa ta bûra mûciî wa Aabu waarûthîîte, n'ûntû aagûrîîte mwarî wa Aabu. Aarûthire mantû maathûûku mbere ya Mwathani. 19 Amwe na ûgu Mwathani atikîenda kûthiria Njunda n'ûntû bwa Ndaundi mûruti ngûgî wake. N'ûntû n'eeyanire wîrane atî akamûneenkera ûtongoria we na nciarwa ciake tene na tene.

20 Kagiita ka mûnene Njeoramu i rîo Endomu yaaregire kwathwa i Njunda, na yethuurîra mûnene wao bongwa. 21 I rîo Njeoramu aathiire taûni ya Sairi na nkaarî ciake cionthe cia ndûa aithûkîra Aendomu. Aendomu bamûthiûrûkîra îndî aumagara ûtugû kûrî na mwindu na atongoria ba nkaarî cia mbaraathi aithûkîra Aendomu. Îndî acikaarî baake baakuthûka beenûka. 22 Kwoogu Endomu yaarega kwathwa i Njunda mwaka îmunthî tûrî. Na kinya Taûni ya Ribuna yaaregire watho kagiitaani wa gaku.

23 Mantû mara mangî monthe Njeoramu aarûthire, i maandîkîîtwe îbukuuni rîa mûririkana rîa anene ba Njunda. 24 Rîru Njeoramu aakua na aathikwa amwe na biûyûûyû biake taûni ya Ndaundi. Na mwana wake Aasia aatuîka mûnene bantû aake.

Aasia mûnene wa Njunda

(2Karaaya 22:1-6)

25 Mwankaani wa îkûmi na îîrî wa wathani bwa Njoramu mwana wa Aabu arî mûnene wa Isiraeri, i rîo Aasia mwana wa Njeoramu atuîkire mûnene wa Njunda. 26 Aasia aarî wa mîanka mîrongo îîrî na îîrî rîra aanjîîrie kwathana, na aathanire mwanka ûmwe arî Njerusaremu. Gina eetagwa Atharia mwarî wa Aabu, mwana wa mwana wa mûnene Omuri wa Isiraeri. 27 Wan'we aakarire na mîkarîre ya mûciî wa Aabu, na aarûthire mantû maathûûku mbere ya Mwathani, wa ta bûra mûciî wa Aabu warûthîîte n'ûntû aarî mwana wa mwarî wa Aabu. 28 Mûnene Aasia baagwatana na mûnene Njoramu mwana wa Aabu baathi kûrûa na Acaeri mûnene wa Aramu naagu Ramothi-Ngiriandi, na Asîîria baaguraria mûnene Njoramu. 29 Mûnene Njoramu aacooka Njesireeri atumbîrua n'ûntû n'aagurarîîtue rîra aarûaga na mûnene Acaeri wa Aramu naara Rama. Aasia mûnene wa Njunda, mwana wa Njeoramu eendama aathi naagu Njesireeri kûraitha Njoramu mwana wa Aabu n'ûntû n'aarî ûmûgurarie.