2 Anene 9

Njeû etûûrîrua maguta atuîka mûnene wa Isiraeri

1 Rîru kîroria Erisa eeta ûmwe wa gîkundi kîa iroria amwîra, “Îîthuuranîre kûthi rûgendo, ûthûkie cûûba îno ya maguta ûthi n'yo ûmîgwete na njara mwanka Ramothi-Ngiriandi. 2 Rîra ûgaakinya noogo, ûcerie Njeû mwana wa Njeosafati wa Nimusi. Ûthi kîrî we, ûmûrute gatîgatî ga antû bara bangî ûmûthûûngîrie kanyomba ka ndeeni. 3 Rîru ûthûkie cûûba înu, ûmwîtûûrîrie maguta kîongo gîake ûkiugaga, ‘Mwathani ariuga, agûgwîtûûrîria maguta ûtuîka mûnene wa Isiraeri.’ Rîru ûrugûre mûrango uugie rwîro, na ûtigaakarakare.”

4 Kwoogu nthaka înu îra yarî kîroria, yaathi Ramothi-Ngiriandi. 5 Rîra aakinyire eethîra atongoria ba njûûrî cia ndûa barî mûceemanioni. Nwe abeera, “Ndî na ntûmwa yaku, Woû mûtongoria wa njûûrî,” Njeû amûûria, “Ûtûmîîtwe kîrî ûû kana i kîrî twinthe?” Kîroria kîamwîra, “Kîrî woû, aba.” 6 Njeû aûkîîra aathûngîra nyomba. Nthaka înu kîroria yamwîtûûrîria maguta kîongo îkîmwîraga, “Ûûgû i bu Mwathani Ngai wa Isiraeri akuuga, ‘Ngûgwîtûûrîrîa maguta ûtuîka mûnene wa antû ba Mwathani, Isiraeri. 7 Ûkaathiria mûciî wa mwathi waku Aabu, na kaingo ndîia nthakame ya aruti ngûgî baakwa iroria, na ya aruti ngûgî bonthe ba Mwathani, îra yatûûrirwe i Njesebeeri. 8 Mûciî wa Aabu gunthe ûkaathira, na nkaathiria antû arûme bonthe ba mûciî wa Aabu arî nkombo kana atarî nkombo baume Isiraeri. 9 Ngaatuîkithia mûciî wa Aabu ta ûra wa Njeroboamu mwana wa Nebati, kana ta mûciî wa Baasa mwana wa Aiya. 10 Gûtirî muntû akaathika Njesebeeri, akaarîîrwa i kurû naagu gîteere kîa Njesireeri.’ ” Rîru mûthaka ûyu kîroria aarugûra mûrango na augia.

11 Rîra Njeû aacookire kîrî atongoria bara bangî ba njûûrî cia mûnene wake, bamûûria, “Ga kûrî na thîîna? I mbi muntû ûyu wa nkoma akûûyîrîîte kîrî woû?” Abacookeria abeera, “I bûmwiyî na i bwiyî bûra aaragia.” 12 Bamwîra, “Bûbu n'ûrongo! Twîre bwega!” Njeû abeera, “Ambîîra ûûgû, ‘Mwathani ariuga agûgwîtûûrîria maguta ûtuîka mûnene wa Isiraeri.’ ” 13 Baûkîîra na mpwî baaruta tûbuuti twao bamwarîra nthî bantû aûkîîru, baacooka baaringa rûgoci na baugîîria bakiugaga “Njeû n'we Mûnene!”

Njeû aûraga Njoramu na Aasia

14 Kwoogu Njeû mwana wa Njeosafati wa Nimusi aabîîndîra Njoramu njûri. Kagiita gaka Njoramu na Isiraeri yonthe i baakarîîtie Ramothi-Ngiriandi îtikaathûkue i mûnene Acaeri wa Aramu. 15 Îndî mûnene Njoramu n'aarî agûcooka Njesireeri naara aatuumbagîrua akûgurarua i njûûrî ya Aramu rîra baarûaga na mûnene Acaeri. Njeû abeera, “Wegua i bu bûkwenda ûgu, gûtikaagîte muntû auma aaga athi kwaria ntheto ino Njesireeri.” 16 Njeû aatwa nkaarî yake ya ndûa aathi Njesireeri, naara mûnene Njoramu aamaami n'ûntû n'aarî ûmwayie. Mûnene Aasia wa Njunda n'aarî akûthi noogo kûmûraitha. 17 Mûkaria ûra aakarîîtie Taûni ya Njesireeri arî kîbayooni, akûraithîîria oona gîkundi kîînene kîîyîîte auga, “Inkwona mûkondo ûmûnene mûno ûûyîîte.” Mûnene Njoramu auga, “Tûmaani muntû ûmwe na mbaraathi abathagaane abaûrie, ‘Bûûyîîte na ûkiri?’ ” 18 Muntû aathi na mbaraathi aakomana nabo abaûria, “Bûûyîîte na ûkiri?” Njeû amûcookeria amûûria, “Ûkiri bwambi? Garûka ûrathîîre mûkondo nyuma yakwa.” Mûkaria ûra aarî kîbayooni aamenyithia mûnene amwîra, “Mûtûmwa nabakinyîîre îndî atigûcooka.” 19 Mûnene aatûma mûtûmwa wa baîrî aathi kîrî bo abeera, “Ûûgû i bu mûnene akûûria, ‘Bûûyîîte na ûkiri?’ ” Njeû amûcookeria amûûria, “Ûkiri bwambi? Garûka ûrathîîre mûkondo nyuma yakwa.” 20 Mûkaria ûra aarî kîbayooni aamenyithia mûnene amwîra, “Mûtûmwa n'abakinyîîre, îndî atigûcooka. Îndî ndîona ta Njeû mwana wa Nimusi ûûyîîte, n'ûntû n'we athiithagia nkaarî ta muntû wa nkoma.”

21 Njoramu abeera, “Thuuranîraani nkaarî yakwa.” Na bakûthuuranîra nkaarî yake ya ndûa, Njoramu mûnene wa Isiraeri na Aasia mûnene wa Njunda baumagarûka wa muntû arî na nkaarî yake baathagaana Njeû, na baakomana n'we mûndaani wa Nabothi Mûnjesireeri. 22 Rîra Njoramu oonire Njeû, amûûria, “Ûûyîîte na ûkiri?” Njeû amûcookeria amwîra, “Ûkiri bwambi! Warîra nyûkwe Njesebeeri atûmîîte antû batua kûromba mîbuanaano na kûroga?” 23 Njoramu aûndûra nkaarî yake ya mbaraathi augia aathi. Augiirie akîîraga Aasia, “Thirikaarî îkûgarûrwa, Aasia! Thirikaarî îkûgarûrwa!” 24 Njeû aakuuyia ûta na inya yake yonthe na aagera mûgwî aaratha Njoramu gatîgatî ga ituro mwanka mûgwî wamuunta nkoro, na aatang'ûka agu nkaarîîni yake ya mbaraathi ndeeni. 25 Njeû eera Bindikari, mûnene wa nkaarî ciake cia ndûa, “Mûûkîîrie ûmûrute nkaarîîni ûmûgere nthîgûrû naagu mûndaani wa Nabothi Mûnjesireeri. Na ûririkane bûra Mwathani augire îgûrû rîake rîra twathiithîîtie nkaarî cietû cia mbaraathi tûrî nyuma ya îthe Aabu. 26 Îno n'yo ntûmwa ya Mwathani, ‘N'ûntû bwa nthakame ya Nabothi na aana baake îra ndaroonire îgoro, îmunthî ingûkûrîia yo wa aaga kathakaani gaka.’ Kwoogu îîndî mûûkîîrieni bûmûgere aaga kathakaani gaka wa ta bûra Mwathani augire.”

Aasia mûnene wa Njunda aûragwa

27 Rîra Aasia mûnene wa Njunda oonire bûra gwakarîkire, aakuthûka atarîîte bwa Bethi-Agani. Njeû eengaîngana n'we akiugaga, “Mûrathe!” Bamûratha arî nkaarîîni yake ya mbaraathi arî barabaraani ya gwîtia Guri akubî na Ibureamu. Îndî naûmbire kuugia aathi mwanka taûni ya Megindo aakuîra noogo. 28 Aruti ngûgî baake baakamata mwîrî wake na nkaarî ya mbaraathi mwanka Njerusaremu na bamûthika amwe na biûyûûyû biake Taûni ya Ndaundi.

29 Mwankaani wa îkûmi na ûmwe wa wathani bwa Njoramu mwana wa Aabu, i rîo Aasia aanjîîrie kwathana Njunda.

Njesebeeri aûragwa

30 Rîru Njeû aathi Njesireeri. Rîra Njesebeeri eegiirue bûra gwaakarîka, eebaka rangi meetho, eethongamia kîongo gîake, na aarûngama ndîrîcaani aaraithîîria nja. 31 Warîra Njeû akîthûngîra mwîrîgaani ûgu, Njesebeeri amûgondokera nainya akîmwîraga, “Woû Simuri, mûûragani ûra aûragire mwathi wake, ûûyîîte na ûkiri?” 32 Njeû aacûûba îgûrû agu ndîrîcaani aûria, “N'ûû we arî rûteere rwakwa aaga?” Aruti ngûgî baîrî kana bathatû baakabe baumîîra kûmûcûûbîîria ndîrîcaani. 33 Abeera, “Mwarûkieni.” Kwoogu baarûkia Njesebeeri, agûkanyana nthî, nthakame yake yamincûkîra rûthingo na mbaraathi. Na mbaraathi inu ciakinyanga mwîrî wake. 34 Njeû aathûngîra nyomba ya mûnene aarîa na aanyua. Nyuma ya ûgu auga, “Wana wegua araarî muntû ûmûthûûku, mûthikeeni bwega n'ûntû araarî mwarî wa mûnene.” 35 Îndî rîra baathiire kûmûthika, gûtirî kîo beethîra oogo tatiga kîîndî gîa kîongo, na maîndî ma magûrû na ma biîî bia njara ciake. 36 Rîra baayire bamwîra bûra boona, aabacookeerie abeera, “Mwathani augîîte ûûgû, gûkûrûkîîra mûruti ngûgî wake Eriya Mûtisibi, ‘Naagu nthîgûrû ya Njesireeri i noogo kurû ikaarîîra nyama cia Njesebeeri. 37 Na kiimba kîa Njesebeeri gîkaanyagaara ta mai manyagaarîîtue mûndaani naagu Njesireeri, na gûtirî wee aûmba kûmûmenya.’ ”