7
1 Erisa amûcookeria amwîra, “Mwathani ariuga ata rî, ‘Rûû thaa ta ino kiro ithatû cia mûtu ûra mûthongi mûno ûkeegua ûkiumaga sekeri îmwe, na kiro ithanthatû cia sayiri ikiumaga sekeri îmwe aaga mwîrîgaani wa Samaria.’ ” 2 Mûteetheeria ûyu wa mûnene aacookeria mûruti ngûgî wa Ngai amwîra, “Bûbu bûtiûmbîka. Wana kinya Mwathani wengwa akarugûra ndirica cia îgûrû, bûbu bûtiûmbîka!” Erisa abacookeria abeera, “Mantû mama bûkamoona na meetho meenu magîkarîka, îndî gûtirî kîo bûkaarûma.”Njûûrî ya Asîîria yakuthûka
3 I kwarî na antû bana baayîîtue mûtigiri bara baarî ome akubî na mwîrîga wa taûni. Nabo baûranagia, “I mbi îgaatûma tûkara aaga mwanka tûkua? 4 Twauga, ‘Tûthûûngîre taûni ndeeni,’ yûûra rîrîku, na tûgaakuîra ku. Wana twakara aaga, nwa rîgaatûrîa. Kwoogu îîndî, ga tûthi naara kambîîni ya Asîîria. Baabîtia gûtûûraga, tûtûûre mwoyo, na batûûraga nwaka tûgaakua.” 5 Kîûgoro kwaîraîrana, baanjîîria rûgendo bathiîte kambîîni ya Asîîria. Îndî bagûkinya beethîra gûtirî muntû nwa ûmwe aarî ku. 6 N'ûntû Mwathani n'aarî agûtûma njûûrî ya ndûa ya Asîîria yîîgua taka kwarî na mûrurumo ûmûnene wa nkaarî cia ndûa, mbaraathi na njûûrî înene, mwanka baanjîîria kwaranîria bongwa bakîîranaga, “Mûnene wa Isiraeri n'akomborire anene ba antû ba Aiti na anene ba Miisiri batuithûkîra.” 7 N'ûntû bwa ûguaya baakuthûka baûrîra mwinduuni baarûûkîra marema maao, mbaraathi ciao na mang'ooi. Baatiga into biao bionthe naagu kambîîni wa bûra biakari, na baakuthûka batikaûragwe. 8 Rîra antû baba baarî na mûtigiri baakinyire ara kambî yanjîîrîîtie, baathûngîra îremaani rîmwe baarîa na baanyua, baacooka baakamata fetha na thaabu na nguo, na baathi baciitha. Rîru baacooka baathûngîra îremaani rîngî baakamata into ku kinya bio baathi babiitha.
9 Rîru beerana, “Tûtikûrûtha bwega. Ntugû îno i ntugû ya ntheto imbega. Tûkaaya gûkira mwanka rûû rûkîîrî, tûkeegwa îkaanûkia. Îîndî tûthiini tûkeere antû bara barî nyomba ya mûnene.” 10 Kwoogu baathi beeta akaria ba mwîrîga wa taûni babeera, “Twauma kambîîni ya Aaramu na gûtirî muntû ûkwonekana kana eeguîka agu, nwa mbaraathi na mang'ooi mathaîkîîtwe na marema matigîîtwe woogu.” 11 Akaria ba mwîrîga baugîîria ntheto inu, na ciamenyithanua kîrî antû bara baarî nyomba ya mûnene. 12 Mûnene aûkîîra ûtugû, eera atongoria ba ûnene bwake, “Nkabwîra bûra Asîîria batûbangîrîîte. I baiyî i tûkûgwa i yûûra, i kîo gîtûmire baumagarûka kambîîni beebitha kîthakaani, bakîthûgaanagia rîra tûkauma taûni bagaatûgwata twinthe tûrî mwoyo na bathûngîre taûni.” 13 Ûmwe wa atongoria ba wathani bwake amwîra, “Antû bamwe i bathûkie mbaraathi itaano kîrî ira itigeere aaga taûni bathi bakoone bûra kûrî n'ûntû wana baakara aaga nwaka bagaakua.” 14 Baathuura antû baîrî baanenkerwa nkaarî ciîrî cia mbaraathi na mbaraathi cia cio, mûnene abatûma bathi kambî ya Aaramu kwona bûra gwakarîkîîte. 15 Baathiingatia njûûrî ya Aaramu mwanka Njorondani, na beethîra njîra înu yonthe yaûyûri nguo na into bira Asîîria baateeyaga i mpwî beetharîîte. Atûmwa babu baacooka, na beera mûnene. 16 Kwoogu antû baumagarûka baathi baataa into kambîîni ya Aaramu. Na kwoogu kiro ithatû cia mûtu ûra mûthongi cîatua kwendua sekeri îmwe, na kiro ithanthatû cia sayiri ciatua kuuma sekeri îmwe, ta bûra Mwathani augîîte. 17 Mûnene aiga mûtongoria ûra aarî mûteetheeria wake wa kûrûûngamîra antû bagîkûrûkîîra mwîrîgaani. Antû bakiumagarûka bamûkinyanga aakua, wa ta bûra mûruti ngûgî wa Ngai aaroreetie rîra mûnene eendamire aathi kîrî we. 18 N'ûntû Erisa n'aarî akwîra mûnene ata rî, “Rûû kagiita ta gaka kiro ithatû cia mûtu ûra mûthongi mûno ikeendua sekeri îmwe na kiro ithanthatû cia sayiri ikeendua sekeri îmwe aaga mwîrîgaani wa Samaria.” 19 Îndî mûtongoria ûyû aacookeria mûruti ngûgî wa Ngai, “Wana kinya Mwathani akarugûra ndîrîcia cia îgûrû bûbu bwaûmbîka?” Erisa n'we aarî akûmwîra, “Ûkoona na meetho maaku wengwa mantû mama magîkarîka, îndî gûtirî bio ûkaarîa.” 20 Bûbu bungwa i bu bwakarîkire kîrî we, n'ûntû antû baamûkinyangîîre mwîrîgaani mwanka aakua.