Kathoka Keereera
6
1 Ntugû îmwe gîkundi kîa aana ba iroria kîera Erisa ata rî, “Ta cûûba wone, bantû aaga tûtûûraga ruungu rwa ûtongoria bwaku, atigûtûgana n'ûntû n'aniini. 2 Tûthiini muurooni wa Njorondani, na woora ûmwe wacietû ateme gîtugî na twake bantû a gûkaraga noogo.” Abacookeria abeera, “Îthiini.” 3 Rîru ûmwe waciao eereka Erisa akîmwîraga, “Itû îtîgîîria kûthiiyania naati tiû aruti ngûgî baaku.” Eetîgîîria abeera, “Nkaathi.” 4 Kwoogu aathiiyania nabo. Bagûkinya Njorondani baanjîîria gûtema itugî. 5 Îndî wa bûra ûmwe wao aatemaga gîtugî, kathoka gaacingûka kaagwa rûûyîîni, anjîîria kuuga mbu akiugaga, “Mwathi wakwa i ga kûromba gakûrî.” 6 Mûruti ngûgî wa Ngai amûûria, “I kû kagwîre?” Akûmwonia bantû ara kagwîre, Erisa aatemire kamûtî akagera oogo, na kathoka keereera. 7 Eera muntû ûyu, “Thûkia.” Aatambûrûkia njara yake akathûkia.Njûûrî ya Aramu yaturwa
8 Kagiita kamwe mûnene wa Aramu aarûaga na Isiraeri, naathiire nkireeba na atongoria ba njûûrî ciake abeera, “Bantû ana na ana noogo mbangîîte kambî yakwa yîîgua îrî.” 9 Îndî mûruti ngûgî wa Ngai aatûmana kîrî mûnene wa Isiraeri akîmwîraga, “Îîmenyeere ûtigaakûrûke aaga n'ûntû Asîîria i beendamîîte noogo.” 10 Kwoogu mûnene wa Isiraeri aatûmana kîrî antû bara baatûûraga naara mûruti ngûgî wa Ngai agweteete. Kagiita na kagiita Erisa aakaraga agîkaanagia mûnene wa mbarî înu kaingo antû bakaraga beethuuranîrîîte.
11 Mûnene wa Aramu aathûûra mûno akwona ûgu. Kwoogu eethîrania atongoria ba njûûrî ciake bonthe abeera, “Ta mbîîraani, n'ûû gatîgatî geetû akûgwatanîra na mûnene wa Isiraeri?” 12 Mûruti ngûgî ûmwe wake amwîra, “Gûtirî we, mûnene mwathi wakwa, îndî Erisa kîroria kîra kîrî Isiraeri, i kîîraga mûnene wa Isiraeri biugo bira waragia kinya ûrî nyomba yaku ya kûmaama.” 13 Mûnene abeera, “Îthiini bûtuîrîîrie bûmenye ara arî, ntûme antû bathi bamûcîgîîrie bamûgwate.” Mûnene eerwa, “Erisa arî Ndothani.” 14 Kwoogu aatûma njûûrî înene mûno noogo îrî na mbaraathi na nkaarî cia ndûa. Baathi ûtugû baacîgîîria Taûni înu.
15 Rîra mûruti ngûgî wa mûruti ngûgî wa Ngai aûkîîre rûkîîrî aumagarûka, oonire njûûrî înene îrî na mbaraathi na nkaarî cia ndûa îthiûrûkîrîîte Taûni yonthe. Mûruti ngûgî ûyu aûria, “Yîî kûrû mwathi wakwa, n'ata tûkaarûtha?” 16 Erisa amûcookeria amwîra, “Ûtikaamake, n'ûntû bara tûrî nabo i bo baingî kîrî bo.” 17 Rîru Erisa aromba Ngai akiugaga, “Mwathani ingûkûromba mûkunûre meetho aûmbe kwona.” Mwathani aarugûra mûruti ngûgî ûyu wa Erisa meetho, akûraitha oona kîrîma kîonthe kîûyûri mbaraathi na nkaarî cia ndûa cia mwanki ithiûrûkîrîîte Erisa. 18 Rîra Asîîria baamwithûkîîre, Erisa aarombire Mwathani auga ûûgû, “Mwathani tuîkithia antû baba ntûngi.” Na Mwathani abatuîkithia ntûngi wa ta bûra Erisa aarombire. 19 Rîru Erisa abeera, “Bûkûbîtia njîra, na taûni îno t'îra bûkûthiîte, îndî nthingataani mbwonie muntû ûra bûgûceria.” N'we abatongoreeria abaira bwa Samaria.
20 Wa bakûthûûngîra Samaria, Erisa aaromba auga, “Mwathani rugûra antû baba meetho kaingo baûmba kwona.” Rîru Mwathani abarugûra meetho na bakîraitha î, boona i Samaria gatîgatî barî. 21 Rira mûnene wa Isiraeri aaboonire, aûria Erisa, “Baaba, mbaûrage? Baaba mbaûrage?” 22 Erisa amûcookeria amwîra, “Arî, ûtikaabaûrage. Ûtirataa antû baba ndûani, kwoogu ûtibatîîrue kûbaûraga? Barûmie irio na ûbakundie rûûyî, barîe na banyue, rîru ûbarekeerie bacooke kîrî mûnene wao.” 23 Kwoogu mûnene abarûthîra kîatho kîînene mûno. Na bakûrîîkia kûrîa na kûnyua, abarekeeria baathi kîrî mûnene wao. Na kuuma kagiita gaku Aaramu bataithûka nthîgûrû ya Isiraeri kaîrî.
Samaria yacîgîîrua
24 Nyumaani Mbeni-Andandi mûnene wa Aramu eethîrania njûûrî yake yonthe eetia aathi aacîgîîria Samaria. 25 Bathiûûrûkîrîîte Samaria woogu, kwagîa yûûra rîînene mûno taûni înu, mwanka kîongo kîa îng'ooi gîatua kwendua sekeri mîrongo înaana cia fetha na robo ya mûkebe wa mai ma macea sekeri itaano cia fetha. 26 Ntugû îmwe mûnene wa Isiraeri akûrûkîîrîîte rûteere rwa rûthingo rwa taûni înu, mwekûrû ûmwe amûrîrîra akîmwîraga, “Nteethia itû mûnene mwathi wakwa!” 27 Amûcookeria amwîra, “Mwathani Ngai akarega gûgûteethia rî, ngûteethia ata niû, na ntirî na ngano kana ndibei? 28 Thîîna yaku i mbi?” Mwekûrû ûyu amûcookeria amwîra, “Mwekûrû ûyû arambîîrire, ‘Tûrîe kaana gaaku îmunthî na rûû tûrîe gaakwa.’ 29 Kwoogu i tûrarugire kaana gaakwa twarîa. Na îmunthî mwîrire areete gaake tûrîe, îndî atirareeta n'aithire.” 30 Rîra mûnene eegiirue ntheto cia mwekûrû ûyu, aakua nkoro aateembûranga nguo ciake. Wa bûra mûnene aakûrûkîîrîîte rûthingooni antû i boonaga eekîrîîte mathaango ndeeni ya nguo ciake. 31 N'we auga ata rî, “Ngai arombûraga wegua Erisa mwana wa Safati atiigiitwa kîongo mbere ya riûa rîthûa.” 32 Erisa aakari waagu nyomba yake, na kûrî akûrû baarî amwe n'we. Mûnene aatûma mûtûmwa kîrî we, îndî mbere ya mûtûmwa akinya, Erisa eera akûrû babu, “Mûûragani ûra agûtûma muntû aaya kûûmbûraga. Îndî aakinya aaga, bwinge mûrango na bûtikaamûrugûrîre. N'ûntû mûnene wengwa akeegua arî waagu nyuma yake.” 33 Erisa akîaragia woogu mûtûmwa wa mûnene aakinya. Amwîra, “Thîîna îno yonthe yumanîîtie na Mwathani! Mbeteereete Mwathani wa mbi kaîrî?”