2 Anene 5

Naamani oorua mûtigiri

1 Naamani mûtongoria wa njûûrî cia ndûa cia mûnene wa Aramu, aarî muntû wa gîtîîyo na wendeetwe mûno i mwathi wake, n'ûntû gûkûrûkîîra we Mwathani n'anenkanîrîîte ûûmbani bûûnene kîrî antû ba Aramu. Wana wegua aarî ncamba îrî na inya n'yarî na mûtigiri. 2 Kagiita kamwe, antû ba Aramu i baithûkîrîîte antû ba Isiraeri, baataa mwana wa mwarî kuuma nthîgûrû înu aatua gûtûmîkagîra mwekûrû wa Naamani. 3 Mwarî ûyu eera mwekûrû wa Naamani, “Ûtakîîgua mwathi wakwa nwa athi kîrî kîroria kîra kîrî Samaria! Nwa kîmworie mûtigiri.” 4 Rîra Naamani eegiirue ntheto inu, aathi eera mwathi wake mûnene wa Aramu, bûra kaarî gaku ga kuuma Isiraeri kaugîîte. 5 Mûnene wa Aramu amûcookeria amwîra, “Îthi noogo, na ngûtûma baarûa kîrî mûnene wa Isiraeri.”

Kwoogu aathi akamatîîte mûthere wa mbia cia fetha ngiri mîrongo îthatû, Sekeri ngiri ithanthatû cia thaabu na nguo cia macencania îkûmi. 6 Aira baarûa kîrî mûnene wa Isiraeri. Baarûa yaugaga, “Baarûa îno n'ya gûkûmenyithia atî, ndaatûma mûruti ngûgî wakwa Naamani gwaku kaingo ûmworia mûtigiri.”

7 Rîra mûnene wa Isiraeri aathoomire baarûa înu, aateembûranga nguo ciake akîûragia, “Ka ndî Ngai mpeyanaga mwoyo kana gîkuû, atî muntû ûyû arîtûmana ntûmwa akiugaga mworerie muntû wake mûtigiri? Nwaka ma agûncwîra ûgîti?”

8 Îndî rîra Erisa mûruti ngûgî wa Ngai eegiirue atî mûnene wa Isiraeri n'aratembûrangire nguo ciake, aatûmîra mûnene ûyu ntûmwa îkiugaga, “I kî n'ûntû ûrateembûrangire nguo ciaku? Muntû ûyu naaye kîrî niû kaingo amenya atî kûrî na kîroria nthîgûrû ya Isiraeri.” 9 Kwoogu Naamani aaya na mbaraathi ciake na nkaarî cia ndûa aarûngama mwîrîgaani wa nyomba ya Erisa. 10 Erisa aatûma mûtûmwa kîrî we, amwîra, “Îthi ûthambe Muuroni wa Njorondani maita mûgwanja na mwîrî waku ûgaacookanîra na ûkaatherua.” 11 Îndî Naamani athûûra na aathi akiugaga, “Î niû ndiugaga na mma akaumagarûka aaye ara nkûrî na arûngame eete riîtwa rîa Mwathani Ngai wake, acooke ainainie njara yake îgûrû rîa gûntû kûra kwayîîtue na amborie mûtigiri. 12 Anga Abana na Faripari miuro ya Ndamasiki, t'yo mîega nkûrûki ya ndûûyî cionthe cia Isiraeri? Ntikîthamba ku na nkathera?” Kwoogu nyuma ya kuuga ûgu aûndûka agwata njîra aathi athûûri. 13 Îndî aruti ngûgî baake baathi kîrî we bamwarîria bamûûria ata rî, “Baaba, ûkeegua kîroria gîkî i gîakwatha ûrûtha ûntû bûûmo kana bûûnene rî, ûtikîburûtha? Îîndî i mbi îkûgiria ûrûtha wa bûbû bûûkai akwîra, ‘Thamba ûthere?’ ” 14 Kwoogu aacooka eendama eetombeka Muuroni wa Njorondani maita mûgwanja, wa ta bûra mûruti ngûgî wa Ngai aamwîrîîte, na mwîrî wake wacookanîîra wakara ta wa kaana kaniini na oora.

15 Rîru Naamani amwe na antû baake bonthe bara aarî nabo baacooka kîrî mûruti ngûgî wa Ngai. Naamani aaya aarûngama mbere yake amwîra, “Wabu nkûmenya gûtirî Ngai ûngî nthîgûrû îno yonthe tatiga ndeeni ya Isiraeri. Itû îtîgîîria kîewa kuuma kîrî mûruti ngûgî waku.” 16 Erisa amûcookeria amwîra, “Wa ta bûra Mwathani ûra ndutagîra ngûgî atûûraga mwoyo, gûtirî kîo ngeetîgîîria.” Naamani amûkinyîîria eetîgîîria îndî amwe na ûgu Erisa aarega. 17 Rîru Naamani amwîra, “Wegua t'ûgu, itû mbîtîgîîria niû mûruti ngûgî waku nneenkerwe mûthetu ûûmba gûkamatwa i nyûmbû ciîrî, n'ûntû mûruti ngûgî waku atikoororutîra ngai cia ûrongo Kîgongwana gia kûbîîthua kaîrî tatiga Mwathani. 18 Îndî Mwathani ûroorekera mûruti ngûgî waku ûntû bûbû bûmwe, rîra mûnene mwathi wakwa akaathûngîra nyomba ya ngai îra îîtagwa Rimoni kûgongera ku, tûthiiyanîîtie n'we, wana niû nkuamîîrie na gîtîîyo nyomba wa înu ya Rimoni, Mwathani Ngai aroondekera ûntûûni bûbû niû mûruti ngûgî wake.” 19 Erisa amûcookeria amwîra, “Îthi na ûkiri.”

Îtanûka rîa Ngeasi

Îndî Naamani akûthiiyanga bantû atarî aaraaya, 20 Ngeasi, mûruti Ngûgî wa Erisa mûruti ngûgî wa Ngai, eebîîra ûûgû, “Mwathi wakwa akûrekia Mûaramu ûyû, Naamani aathi mana atathûkîîtie nwa mbi kuuma intooni bira akûmweyaga. Wa ta bûra Mwathani atûûraga mwoyo, ndiugia rwîro mûgwatagwate aampe nwa mbi kuuma kîrî we.” 21 Kwoogu Ngeasi aathingata Naamani. Rîra Naamani oonire muntû amuumîîte nyuma na rwîro, aathûngûtha kuuma nkaarîîni yake ya ndûa amûthagaana amûûria, “Ga kûrî na thîîna?” 22 Amwîra, “Arî, îndî mwathi wakwa aantûma ambîîra nkwîre ata rî, ‘Iroria biîrî bia gîkundi kîa iroria biaya wendî biumîîte bwa nthîgûrû ya irîma ya Eburaimu, itû nnenkera mûthere wa mbia cia fetha ngiri ithatû na nguo cia macencania maîrî mbairîre.’ ” 23 Naamani amûcookeria amwîra, “Itû îtîgîîria kûthûkia mûthere wa mbia cia fetha ngiri ithanthatû.” Naamani aakinyîîria Ngeasi aciîtîgîîria, agûciîtigîîria, Naamani eekîra mûthere wa mbia inu cia fetha ngiri ithanthatû biondooni biîrî, amwe na nguo ciîrî cia gûcencania. Aaneenkera aruti ngûgî bamwe baake baîrî bamûkamatîra barî mbere ya Ngeasi. 24 Rîra baakinyire karîmaani ara Erisa aatwîre, Ngeasi aathûkia mîbuko înu îîrî aakamata aathûngîria nyomba. Rîru eera aruti ngûgî ba Naamani bacooke. 25 N'we aacooka aathûngîra nyomba na aarûngama mbere ya mwathi wake Erisa. Erisa amûûria, “Ngeasi, i kû ûkûrî?” Amûcookeria amwîra, “Mûruti ngûgî waku gûtirî bantû arathi” 26 N'we Erisa amûûria, “Ga ntakûrî naawe na njîra ya Kîrundu rîra muntû ûra akinyûkire nkaarîîni yake ya mbaraathi aaya gûkûthagaana? Îîndî, gaka i ko kagiita gakûthûkia mbia, nguo, miinda ya mîceituuni na ya mîcabiibû, ng'ondu na ng'ombe na nkombo cia arûme na cia aka? 27 Na n'ûntû bwa ûgu, mûtigiri wa Naamani ûgaakûgwata, na ûtaambe kîrî nciarwa ciaku tene na tene.” Rîru Ngeasi auma agu mbere ya Erisa arî na mûtigiri athereete ce ta îra.