Erisa Aateethia Mwekûrû wa Ntigwa
4
1 Mwekûrû ûmwe ntigwa, aarî mwekûrû wa muntû ûmwe wa gîkundi kîa iroria aarîrîra Erisa akîmwîraga, “Mûkûrû wakwa, ûra araarî mûruti ngûgî waku n'arakuire, na n'wiyî atî n'aratîyîîte Mwathani. Îndî îîndî mwîrandû wake n'aayîîte kûthûkia twana twakwa tûrî twîrî tûtuîka nkombo ciake.” 2 Erisa amûûria, “N'ata ûkwenda ngûteethia? Ta mbîîra, i mbi ûrî n'yo gwaku?” Mwekûrû ûyu amûcookeria amwîra, “Mûruti ngûgî waku gûtirî kîo arî nakîo nyomba tatiga tûguta tûniini twa mîceituuni tûrî kathiriini.” 3 Erisa n'we amwîra, “Îthi kîrî atûûri baaku bonthe, ûrombe mîtûngi îmiingî îmîtheri. 4 Rîru ûthûûngîre nyomba yaku wîbingîre amwe na aana baaku. Na wonorie tûguta tûtu mîtûngiini înu, wa kîra mûtûngi waûyûra, ûgacuûmbia rûteere.” 5 Kwoogu mwekûrû ûra auma agu aathi eebingîra nyomba na aana baake, aana babu baake baamûnenkagîîria mîtûngi agîîkagîra maguta ku. 6 Rîra mîtûngi yaûyûrire yonthe, eera mwana wake, “Ndetera bantû angî a gwîkîra.” Mwana amûcookeria amwîra, “Gûtirî mûtûngi ûngî ûtigeere.” Akuuga ûgu, maguta maatiga kuuma. 7 Mwekûrû ûyu aaya eera mûruti ngûgî wa Ngai bûra wakarîkaanga. N'we muntû ûyu amwîra, “Îthi wendie maguta mamu ûrîe marandû maaku, na mara magaatigara bûtûmîre na aana baaku.”Erisa na mwekûrû Mûsunemu
8 Ntugû îmwe Erisa n'athiire aakûrûkîîra taûni ya Sunemu. Na i kwarî na mwekûrû ûmwe gîtonga aatwîre ku, na amûthookia gwake aarîa biakûrîa. Kwoogu rionthe rîra aathiiyaga Sunemu aathûkagîra agu kûrîa irio. 9 Mwekûrû ûyu eera mwene, “Iimenyeete muntû ûyû aayagîîra aaga îgiita na îgiita i mûruti ngûgî wa Ngai ûmûtheru. 10 Tûmwakîre kanyomba kaniini aaga îgûrû ngorobaani tûgeekîre ûrîrî, meetha, gîtî na taa, kaingo rîra akaayaga gwetû akanogokaga oogo.”
11 Ntugû îmwe rîra Erisa aathiire noogo, eetiirie kanyomba gaku aaraara ku. 12 Eera mûruti ngûgî wake Ngeasi ata rî, “Mbîtîra mwekûrû ûyu Mûsunemu.” Kwoogu agwîtwa, aaya aarûngama mbere ya Erisa. 13 Erisa eera Ngeasi, “Mûûrie bûra eenda tûmûrûthîra n'ûntû bwa bûra eenyamaarîîtie agîtûmenyeera bûgana ûûgû, n'aata eenda arûthîrwa? Kûrî bu eenda aarîîrua kîrî mûnene kana kîrî mûtongoria wa njûûrî cia ndûa?” Mwekûrû ûyu aacookia auga, “Niû ntirî na thîîna, iimenyagîîrwa bwega n'antû beetû.”
14 Rîru Erisa aûria Ngeasi, “N'ata aûmba kûrûthîrwa?” Ngeasi amûcookeria amwîra, “Mwekûrû ûyû atirî na mwana na mwene n'ûmûkûrû mûno.” 15 Erisa eera Ngeasi, “Mwîte aaye aaga.” Rîra eetirwe aayire aarûngama mwîraango. 16 Erisa amwîra, “Kagiita ta gaka mwanka ûyu ûngî ûkeegua ûgwete kaana ga kaîyî na njara ciaku.” Mwekûrû ûyu amûcookeria amwîra, “Itû arî mwathi wakwa, itû mûruti ngûgî wa Ngai, tiga kweneeria mûruti ngûgî waku.”
17 Mwekûrû ûyu aagîa nda. Na mwanka ûyu wathingatîîrîîte kagiitaani wa ta gaku wa ta bûra Erisa aamwîrîîte aaciara kaana ga kaîyî. 18 Mwana ûyu agûkûranga mma, ntugû îmwe aathingata îthe mûndaani naara aakethaga na aruti Ngûgî. 19 Aanjîîria gûkaya akîîraga îthe, “Kîongo i gîgûtuuma! Kîongo i gîgûtuuma!” Îthe eera mûruti ngûgî wake, “Mûkamate ûmuire kîrî gina.” 20 Mûruti ngûgî agûkamata mwana ûyu amwira kîrî gina, mwana ûyu aakarire bierooni bia gina mwanka mûthenya gatî, na aakua. 21 Gina agakamata aathi akamaamia ûrîrî bwa mûruti ngûgî wa Ngai Erisa, ainga mûrango na aathi. 22 Eeta mûrûmoe amwîra, “Ntûmîra mûruti ngûgî ûmwe aandeetere îng'ooi, kaingo nthiyanga na mpwî kîrî muntû wa Ngai na ncooke kaîrî.” 23 Mûrûme amûûria, “I kî n'ûntû wathi kîrî we îmunthî, na ti kîatho gîa kûyiûka kwa mweri kana gîa Sabatû?” Mwekûrû ûyu amûcookeria amwîra, “Gûtirî na thîîna.” 24 Akûrîîkia gûtandîka îng'ooi, eera mûruti ngûgî wake, “Ugithia îng'ooi tûthi, na ûtikaareke rîthi mpoora nwa aniini ntakwîrîîte.” 25 Kwoogu auma aathi, na eethîra Erisa mûruti ngûgî wa Ngai kîrîmaani gîa Karimeri. Rîra mûruti ngûgî wa Ngai aamwonire aayîîte, eera mûruti ngûgî wake Ngeasi ata rî, “Ta raitha wone, n'ûûra mwekûrû ûra Mûsunemu aayîîte. 26 Ugia rwîro ûrîîkane n'we ûmûûrie, ‘N'ata ûrî? Mûkûrû waku n'ûmwega? Î kaana gaaku ko i keega?’ ” Mwekûrû ûyu amûcookeria amwîra, “Mantû monthe i meega.” 27 Rîra aakinyire kîrî Erisa ara aakari Kîrîmaani, mwekûrû ûyu amûgwata mbayo. Ngeasi n'we aathiiyanga aakubî akîendaga kûmûruta oogo. Îndî mûruti ngûgî wa Ngai amûkaania amwîra, “Tigana n'we, n'ûntû arî na ûrûrû bwingî mûno, îndî Mwathani n'aambithire atirambîîra.” 28 Mwekûrû ûyu amûûria, “Mwathi wakwa ndarakûromba mwana? Ntaakwîrire ûtige kûûmbeneeria?”
29 Rîru Erisa eera Ngeasi ata rî, “Îîthuuranîre kûthi rûgendo, ûthûkie mûraagi wakwa ûthi ûcugwete na njara, na muntû wonthe ûra ûgaakomana naawe njîraani ûtikaamûkeethie, na ûra agaagûkeethia ûtikaamûkeetheke. Ûthi na mpwî waigîîre mûraagi ûyu ûthiûni bwa kaana gaku.” 30 Rîru gina wa kaana gaku eera Erisa, “Wa ta bûra Mwathani atûûraga mwoyo, na ta bûra woû wengwa ûtûûraga mwoyo, ntiithi ngûtiga aaga.” Kwoogu Erisa aûkîîra amûthingata. 31 Ngeasi aathi arî mbere aigîîra mûraagi ûthiûni bwa kaana kara, îndî gataang'unyia kana nwa koonania taka karî mwoyo. Ngeasi aacooka kîrî Erisa amwîra, “Kaana gatiraûkîîra.”
32 Rîra Erisa aakinyire, eethîîre kaana gaku kaamaami ûrîrî bwake karî gakuû. 33 Aathûngîra nyomba arî wenka ainga mûrango, na aaromba Mwathani. 34 Rîru aatwa ûrîrî aamaamîra kaana gaku aatiirithania kanyua gaake na gaako, meetho maake na maako, njara ciake na ciako. Wa akamaamîîrîîte woogu, mwîrî wa kaana gaku wagîa mûrugutîra kaîrî. 35 Erisa aagûrûka ûrîrî, aangaanga nyomba gûku ndeeni, aacooka aatwa ûrîrî na eetambûrûkia îgûrû rîako kaîrî. Îgiita rîru kaana gaku kaathimûra maita mûgwanja na kaarancûkia meetho. 36 Erisa eeta Ngeasi amwîra, “Îta Mûsunemu ûyu.” Ngeasi amwîta, na rîra mwekûrû ûyu aayire, Erisa amwîra, “Thûkia mwana waku.” 37 Mwekûrû ûyu aaya eegwîthia nthî magûrûûni ma Erisa atiirithîîtie ûthiû bwake nthîgûrû kwonania gîtîîyo. Rîru aathûkia mwana wake aumagarûka eendama.
Erisa aarûtha irio biarî na cûmû biabua
38 Rîra Erisa aacookire Girigari, i kwarî na yûûra nthîgûrûûni înu. Na wa bûra gîkundi kîa iroria kîethîreene agu mbere yake, eera mûruti ngûgî wake, “Tega nyûngû înene ûrugîre gîkundi gîkî kîa iroria biakûrîa barîe.” 39 Ûmwe wa gîkundi gîku aathi mûndaani gûtua nyani cia kîthaka, eethîra rûûngû rwa kîthaka aatua mîûngû aaya aagiitangîra nyûngûûni atakûmenya i mbi. 40 Beekîîra antû babu kaingo barîa. Îndî bakwanjîîria kûrîa, banjîîria gûkaya bagîîtanaga, “Mûruti ngûgî wa Ngai irio bibi birî na cûmû!” Baaremwa i kûbirîa. 41 Erisa abeera, “Wegua nûûgu reteeni mûtu.” Aamincaminca nyûngûûni auga, “Îkîîra antû îîndî barîe.” Na irio bira biarî nyûngûûni biabua.
Erisa agaagûra antû îgana rîmwe
42 Muntû ûmwe aaya kuuma Mbaari-Sarisa areeterete mûruti ngûgî wa Ngai irio bia maciaro ma mbere. Yaarî mîgaate mîrongo îîrî ya sayiri na nkunia ya mathuke maîthî. Erisa eera aruti ngûgî baake, “Nenkeraani antû barîe.” 43 Mûruti ngûgî wake amûûria, “N'ata mbûûmba kûgaîra antû îgana mîgaate îno mîkai ûûgû?” Erisa aacookeeria kaîrî auga, “Nenkera antû barîe, n'ûntû ûûgû i bu Mwathani akuuga, ‘Bakaarîa na batigarie.’ ” 44 Kwoogu mûruti ngûgî ûyu abaneenkera na barîa, na baatigaria, kûringana na bûra kiugo kîa Mwathani kîaugîîte.