2 Anene 1

2 ANENE

Kîroria Eriya na mûnene Aasia

1 Nyuma ya gûkua kwa mûnene Aabu, antû ba Moabu baûmîria nthîgûrû ya Isiraeri kîongo. 2 Mûnene Aasia aarûka kuuma barandaani ya ome ya nyomba yake ya ngoroba ya nyomba yake îra yarî Samaria na aagurarua. Kwoogu aatûma atûmwa bathi kûûrithîria kîrî Mbaari-Sebubu, ngai ya Ekironi amenye wegua akaabua kuumania na kûgurarua wake kana atiibua. 3 Îndî Mûraîka wa Mwathani eera Eriya, kîroria gîa kuuma Tisibi, “Ûkîîra, ûthi ûrîîkane na atûmwa ba mûnene wa Samaria na ûbaûrie, ‘I ka gûtarî Ngai Isiraeri n'ûntû bwathi kûûrithîria kîrî Mbaari-Sebubu, ngai wa Ekironi?’ 4 Kwoogu ûûgû i bu Mwathani akuuga, ‘Ûtiigûrûka kuuma ûrîrî kaîrî, îndî na mma n'ûgaakua!’ ” Kwoogu Eriya aathi abeera ntûmwa.

5 Rîra atûmwa baacookire kîrî mûnene, mûnene abaûria, “I kî n'ûntû bwacooka?” 6 Bamûcookeria bamwîra, “Kûrî muntû ûtûtûngatûûngiirie atwîra tûcooke tûkwîre, ‘Mwathani arîûria ûûgû, I ka gûtarî Ngai ndeeni ya Isiraeri n'ûntû watûmana kûromba ûkûrû kîrî Mbaari-Sebubu ngai wa Ekironi? Ûtiigûrûka kuuma ûrîrî kaîrî, îndî na mma n'ûgaakua.’ ” 7 Mûnene abaûria, “I muntû wa mûthemba mûbi ûyu abûthagaanire abwîra mantû mama monthe?” 8 Bamûcookeria, “I muntû ûgwîkîrîîte kabuuti karûthîîtwe na guaya ya nyamû, na akwogeete mûcibi wa rûûo kauna.” Mûnene auga, “Ûyu n'Eriya Mûtisibi!”

9 Rîru mûnene aatûma mûtongoria wa acikaarî arî na acikaarî mîrongo îtaano bagîîra Eriya. Mûtongoria ûyu eethîra Eriya akari karîmaani îgûrû, amwîra, “Muntû wa Ngai, mûnene ariuga, twîndame.” 10 Îndî Eriya n'we amûcookeria amwîra, “Wegua ndî mûruti ngûgî wa Ngai, mwanki n'uume îgûrû ûkûrûûngûrie woû na antû baaku mîrongo îtaano!” Warîo mwanki wauma îgûrû, na wendama waûraga mûtongoria ûyu na antû babu baake mîrongo îtaano.

11 Mûnene aatûma mûtongoria ûngî kaîrî arî na antû mîrongo îtaano, bara bathiire beera Eriya, “Mûruti ngûgî wa Ngai, mûnene aathana auga wîndame naati na mpwî!” 12 Eriya abacookeria abeera, “Wegua ndî mûruti ngûgî wa Ngai, mwanki n'uume îgûrû ûkûrûûngûrie woû na antû baaku mîrongo îtaano!” Rîru mwanki wa Ngai wauma îgûrû, na wendama waûraga mûtongoria ûyu na antû babu baake mîrongo îtaano.

13 Kaîrî mûnene aatûma mûtongoria ûngî wa bathatû na acikaarî baake mîrongo îtaano. Mûtongoria woyu wa bathatû aathi eetia karîmaani na aaturia maru mbere ya Eriya na amwereka akîmwîraga, “Mûruti ngûgî wa Ngai, ndakwereka mbîgîîrua kîao amwe na antû baakwa, aruti ngûgî baaku. 14 Ta raitha mwanki waumire îgûrû warûngûria atongoria baîrî ba acikaarî bara baarî aaga mbere yakwa amwe na antû baao mîrongo îtaano wa kîra gîkundi. Îndî îîndî itû mbîgîîrua kîao.”

15 Mûraîka wa Mwathani eera Eriya, “Îndama ûthiiyanie n'we, na ûtikaamûkuthûke.” Kwoogu Eriya aûkîîra aathi beendamania na mûtongoria ûyu kîrî mûnene, 16 na amwîra, “Ûûgû i bu Mwathani akuuga, ‘N'ûntû watûmire atûmwa bathi kûromba ûkûrû kîrî Mbaari-Sebubu, ngai wa Ekironi rî, i ka gûtaarî Ngai Isiraeri wa kûromba ûkûrû? N'ûntû bwoogu, ûtiuma ûrîrî bwaku. Na mma n'ûgaakua.’ ”

17 Kwoogu Aasia aakua, kûringana na bûra kiugo kîa Mwathani kîra aarîîtie gûkûrûkîîra Eriya. Aasia ataarî na nthaka, kwoogu mûruagina Njoramu atuîka mûnene bantû aake mwankaani wa îîrî wa wathani bwa mûnene Njeoramu mwana wa Njeosafati, mûnene wa Njunda. 18 Mantû mara mangî monthe mûnene Aasia aarûthire, i maandîkîîtwe îbukuuni rîa mûririkana ria anene ba Isiraeri.