Eriya Aathûkua eetithua îgûrû
2
1 Kagiita gagûkinya ka Mwathani Kûthûkia Eriya amwîtithia îgûrû na kîbuubani, Eriya na Erisa baathiyanîîtie njîraani baumîîte Girigari. 2 Wa barî njîraani, Eriya eera Erisa, “Kara aaga, n'ûntû Mwathani agûntûma Betheri.” Îndî Erisa amûcookeria amwîra, “Wa ta bûra Mwathani atûûraga mwoyo, na wa ta bûra woû wengwa ûtûûraga mwoyo ntigûtiga.” Kwoogu beendama baathi mwanka Betheri. 3 Gîkundi kîa iroria kîra kîarî Betheri kîathi kîrî Erisa kîamûûria, “N'wiyî kana Mwathani akaathûkia mwathi waku îmunthî agûtige?” Erisa abacookeria abeera, “Yîî imbiyî, îndî tigaani kwaria ntheto inu.”4 Rîru Eriya eera Erisa, “Itû îîndî tigwa aaga, Mwathani aantûma ambîîra nthi Njeriko.” Îndî Erisa amûcookeria amwîra, “Wa ta bûra Mwathani atûûraga mwoyo, na wa ta bûra woû wengwa ûtûûraga mwoyo ntigûtiga.” Kwoogu baathiiyania barî baîrî mwanka Njeriko.
5 Gîkundi kîa iroria kîra gîakaraga Njeriko kîaûria Erisa, “N'wiyî Mwathani akaathûkia mwathi waku îmunthî agûtige?”
Erisa abacookeria abeera, “Yîî imbiyî, îndî tatiga kwaria ntheto inu.”
6 Rîru Eriya eera Erisa, “Itû bai tigwa aaga, Mwathani agûûntûma ambîîra nthi bwa muuro wa Njorondani.” Îndî Erisa amûcookeria amwîra, “Wa ta bûra Mwathani atûûraga mwoyo, na wa ta bûra woû wengwa ûtûûraga mwoyo ntigûtiga.” Kwoogu barî baîrî baathi na mbere na rûgendo rwao. 7 Na antû mîrongo îtaano kuuma gîkundiini kîa iroria babathiingata mwanka Njorondani. Eriya na Erisa baarûngama agu rûgombeeni rwa muuro wa Njorondani, na iroria bibu mîrongo îtaano biarûngama gataaria mma kuuma kîrî bo. 8 Rîru Eriya aaruta kabuuti gaake agakûnja ariinga rûûyî nako. Rûûyî rwatûîkana, mwanka bariinga muuro ûyu ûtarî na rûûyî. 9 Bakûringa, Eriya eera Erisa, “Mbîîra bûra ûkwenda nkûrûthîra mbere ntirathûkua mbathûranwa naawe.” Erisa amwîra, “Ingûkûromba ûmpe maita maîrî ma rûgai rwa inya yaku îra îgaatûma ntuîka mûrîa ûkua waku.”
10 Eriya amûcookeria amwîra, “Ûkûromba ûntû bûrî na inya mûno. Îndî nwakûmbîke wegua ûkambona nkîthûkua kuuma kîrî woû. Îndî wegua ûtiimbona bûtiûmbîka.”
11 Wabathiîte woogu bakîaragia, waagu nkaarî ya mbaraathi îkîrîrîmbanaga mwanki îkuuyîîtue i mbaraathi yarîrîmbanaga mwanki kinya yo, yabaumîîra na yaaya gatîgatî kaao yabaathûrana. Na Eriya eetithua îgûrû arî kîbuubaniini. 12 Rîra Erisa oonire nkaarî înu, augîîria nainya agîîtaga Eriya, “Baaba! Baaba! Mûrwîrîîri ûrî inya wa Isiraeri! Ûkûthi!” Na ataacooka kûmwona kaîrî. Arî na mûthûûro, Erisa aathûkia kabuuti gaake wengwa agateembûrania icuncî biîrî. 13 Rîru ooya kabuuti kara kaagwîre nthî kuuma kîrî Eriya na aacooka nyuma aathi aarûngama rûgombeni rwa muuro wa Njorondani. 14 Rîru aathûkia kabuuti ka Eriya kara kaagwîte nthî kuuma kîrî we, aaringa rûûyî nako auga, “Arîkû Mwathani Ngai wa Eriya?” Akûringa rûûyî nako, rwagaûkana, aringanîria aathi rûgongo rûra rûûngî.
15 Gîkundi kîa iroria bira mîrongo îtaano bia Njeriko bakwona Erisa arî gataaria mma, bauga, “Kîrundu wa Eriya arî îgûrû rîa Erisa!” Baathi kûrîîkana n'we, na beendamîîra mbere yake, 16 na bamwîra, “Tiû aaga tûrî mîrongo îtaano, twinthe tûrî na inya. Twîtîgîîrie tûthi tûgacerie mwathi waku. Kwaûmbîka ûkeegua Kîrundu wa Mwathani aramûkamatire amwaiga bantû kîrîmaani kana kîguruuni.” Erisa abacookeria abeera, “Arî bûtikaathi.”
17 Îndî rîra baamûkinyîîrie mwanka eegua nthoni, abeera, “Îthiini.” Kwoogu antû babu mîrongo îtaano baathi gûceria Eriya. Baamûceriirie bantû a ntugû ithatû, îndî bataamwona. 18 Na bagûcooka kîrî Erisa naara aabeeteereete Njeriko, abaûria, “Anga ntaabwîrire bûtikaathi?”
Biama bia Erisa
19 Antû bamwe kuuma Njeriko baathi kîrî Erisa bamwîra, “wa ta bûra ûkûmenya mwathi wetû, taûni îno n'îmbega, îndî rûûyî i rûthûûku na rûtirekaga into bia nthîgûrû îno biciarana.” 20 Abeera, “Îkîraani mwonyo mbakûriini yaimbia, na bûûndetere yoo.” Kwoogu bamûreetera yoo. 21 Rîru aathi agu kîthimaani aaminca mwonyo rûûyîîni, akiugaga, “Ûûgû i bu Mwathani akuuga, ‘Ngûtuîkithia rûûyî rûrû rwega, na rûtikoororeeta gîkuû kana rûtûma into bia nthîgûrû îno birega gûciarana kaîrî.’ ” 22 Na rûûyî rûru rwatuîka rwega kuuma ntugû înu wana kinya îmunthî, wa ta bûra Erisa augire gûgaakara.
23 Erisa auma Njeriko na eetia aathi Betheri. Wa arî njîraani athiîte twîyî tûmwe twauma bwa taûni twanjîîria kûmûnyûrûnta tûkiugaga, “Uma aaga, gîpanda gîkî! Uma aaga, gîpanda gîkî!” 24 Erisa aûndûka abarûmîîria meetho abaruma riîtwani rîa Mwathani. Rîru Ndûba cia nka ciîrî ciauma waagu kiunguuni ciatembûranga twîyî tûtu mîrongo îna na twîrî. 25 Na kuuma agu Erisa aathi bwa Kîrîma gîa Karimeri na nyumaani aacooka bwa Samaria.