Atyahy ne ti iry a
Ibrani-nare
Tun a khatu nekre klyosu kitab ne kralake
Atyahy neke lema the ohe esei ne ikesy ne, kali iry makesy atyahy ne lema kyesy anike ti atyahy ne. Keskye mlay ma the ohe, iry makesy atyahy ne, neke iry a maka usu khatu ti iry matohak ti Yesuske it ne, ma hye bain-bain Hatetak Mamuna rakesy ti Kitab Lanke ne kisinare dakun, keskyede iry neke lema ity Ebut Yesuske wasi matoha Ike it ne (Ibr. 2:3).
Kyala kyosy heitlulswo atyahy ne kani a Atyahy ne ti iry a Ibrani-nare. Iry a Ibrani-nare neke sir ne iry a Israel-are, ode iry a Yahudi-nare. Ode mlay bain o lema the ohe atyahy ne rosa ti esekar, ode lema the ohe ramin ti kabei dakun. Keskyede kolnye tbaca atyahy ne kisike, desikeo the bain ohe, iry a raosa atyahy ne ti sir ne, neke iry matohak ti Yesuske, ma sir ne irire roban de rtaba sir, khyali wait tohtohak ratohak ti Yesuske ne. Ode ti sir neke dum a irire rakanak sir, ode dum a irire rluk sir ti sey metmetke kralake, ode dum a irire rasoruk wait lan o hnutat (Ibr. 10:32-34; 13:3, 13). Ode kyosy a masunw madan a sir desikre, dendye khyury ma ti sir neke dum a ralatare kakan ti ratohak ti Yesuske ne (Ibr. 12:12). Dendye dum a lema rbuma rawahuk sir a ror iry a matohak ti Yesuske ne ma rsambayan de (Ibr. 10:25). Ode dum a rbuma rulak sir ma rtoha iry Yahudi-nare wait kubkubakke huruk, ma khyury ma lema rou ma rtohak ti Yesuske de.
Iry a makesy atyahy ne, wasi ibuke enaat, neke kolnye: Byuma yajar sir. Ode byuma yalkyaw ralat a kralanare. Ode byuma tyerik sir. Ode byuma syurat sir ma rala ktela erasare.
Ode makesy atyahy ne byuma yajar sir ohe, Yesus neke Hulasokwe Ananke, ma I ne inety a Hulasokwe tunanare ti irkye ne. Ode Yesus neke lan lahuk I ma byilak Hulasokwe wasi nyaso manosy laitare, ode lan lahuk I ma byilak Musa manety Hulasokwe wasi nyano desy dakun (Ibr. 1:1–4:13). Yesus neke Iry a mabaa klen Lan Lahukke ma eras lan-lan ma kbyilak iry a mabaa klen manosy kubkubak Yahudike (Ibr. 4:14–7:28). Ode I neke wasi karyake ti Sey nelnyelnyely ne eras ma kbyilak iry a mabaa klenare ti iry Yahudi-nare wait karyake ti Hulasokwe wasi Lasyery mamin ti lasmyerke khaha ne. Ode I neke dakun o yal Hulasokwe wasi tnyetak harharkwe ti irire. Tnyetak harharw neke kyety eraske ma kbyilak tnyetak mamuna Musa inal ti irire ne (Ibr. 8:1–10:18).
Iry makesy atyahy ne yalkyaw iry a Ibrani-nare ralat a kralanare, ma rtohak manenen ti Yesuske. Ode yalkyaw sir ma raneti manenen ralat a kralanare ti masunkwe kidan a sir ne. Ode yalkyaw ralat a kralanare ma bisa ma rares ma rsara Hulasokwe ma rsambayan ma raten sai ta sai toha I, kali Yesuske I ne imuna ma iseruk salke ma ity ne, ma tba ti tait Hulasokwe (Ibr. 4:16; 6:20; 10:19-23). Ode iry makesy atyahy ne yalkyaw iry desikre ralat a kralanare, ma bisa ma ana rsukar ei “wen ramres ranor Hulasokwe tike” (Ibr. 3:10–4:11). Kbuan sai ne “ti tamres tanor Hulasokwe” ne de? Iry mahe Kitab Lanke kralake ne dum a rrekan a kbuanke ohe, kolnye tmaty, desikeo ana tbai wen sra eraske, ode tamres ti ity wait karya takarya ti nuske ktem ne. Ode iry mahe Kitab Lanke kralake ne dum huruk a rrekan a “ti tamres tanor Hulasokwe” ne kbuanke ohe, kete tmea ti ity wait ktela mesmesan taala ti nuske ktem ne de, de tal ity wait mormyorifare ti Hulasokwe ode tmea ti I, mamode yaorif a ity, desike ne ti tamres a tor Hulasokwe ma desy.
Iry makesy atyahy ne syurat iry a iosa atyahy ne ti sir ne, ma kete rsanyetat wait tohtohakke ti Yesuske. Ti atyahy ne kdi a kla-sim neke iry makesy atyahy ne syurat iry a iosa atyahy ne ti sir ne kyor tun malkyakaure (Ibr. 2:1-4; 3:7-19; 5:11–6:12; 10:26-39; 12:18-29). Iry makesy atyahy ne syurat iry desikre ma rnenas ral tun itanuk soru ti sir ma ibohe, ana Hulasokwe yukun iry a ma-la toha wait tohtohakke ti Yesuske ne.
Kitab ne kisike kolnye
1. Yesuske lan lahuk I ma byilak iry maka usu khatunare mumu ti heitlulswo rakesy sir ti Hatetak Mamunake kralake ne (Ibr. 1:1–10:18).
1.1 Yesuske lan lahuk I ma byilak iry a manety Hulasokwe wasi nyanoare (Ibr. 1:1-4).
1.4 Yesus neke ika mabaa klen Lan Lahuk ma kbyilak mabaa klen ti iry a Yahudi-nare ne (Ibr. 4:14–7:28).
1.5 Yesus Iry mabaa klen Lan Lahuk neke wasi karyake eras ma kbyilak iry mabaa klen ti iry Yahudi-nare wait karyaare (Ibr. 8:1–10:18).
2. Kete ta-la toha ity wait tohtohakke (Ibr. 10:19–12:29).
3. Tamorif ne musti mo tala Hulasokwe ralake ma kimukmuka i ( Ibr. 13)