Kristuske yal tenanke kmyesan ma yabar ti Hulasokwe kdi a klatsasam bo ma ksyos irkye wasi lim o sal ba ti kiba knaru ne
10
Waikw o hatnimakw e, tnyetak Musa neke cuma mo kwenwenanke ne bo, ti ktela eras ana tatot toha Kristuske ti sew ana mama nekre. Kali ktela eras tatot toha Kristuske ne lema kimin ti tnyetak Musake. Lemadendye biar ma ain kyaki-kyaki ne iry a mabuma ranait Hulasokwe ne musti mo rety healare ma rtabahunw a sir, ma rabar ti Hulasokwe ma ktyoha tnyetak Musake, keskyede ktela raala desike lema bisa ma kyala iry desikre ma mlay a sir ti Hulasokwe. 2 Kali kolnye ktela raala desike bisa ma kyala sir ma nelnyely a sir ti Hulasokwe de, desikemo ana rrekan o Hulasokwe syos wait lim o sal ba ti kiba knaru ne de. Koldyesikemo ana ramres ma lema rabar heal ti Hulasokwe de. Keskyede the ohe lema rrekan koldyesy, kali ain kyaki-kyaki ne tetap ma rba ti rabar heal ti Hulasokwe bo. 3 Keskyede nam raabar desikre, neke ne kisusu ti sir ti ain kyaki-kyaki ne ma ranenenas ohe, sir desike iry a lim o sal sir. 4 Kali saby a wamwankye larake, ta lemamo biby a wamwankye larake, neke lema bisa ma ksyos irkye wasi lim o sal ba.5-6 Kali koldyesike mane ti kyoat Kristuske myai nuske ktem ne, desikeo tyanuk ti Hulasokwe ma byohe,
“O Hulasow O, Oi neke lema mdwakin ma irire ral heal a laratare ma rabar ti O, dete lemamo ral nam salik ma rabar ti O. Ode ralamkwe lema ksyenan ti kolnye irire ral healare ti lat raeh heal tike ma reh a heal desikre ma rabar ti O, ta lemamo ral heal salik ma raabar ti O ne, ma klyitan eta irkye toha wasi lim o sal. De Oi neke mswosan tenakkwe de, ma ana kabar ti O.
7 Lemade ktwanuk ma kbwohe, ‘O Hulasow O, Yau ne! Kmwai ne ma kala ktela mubuma kualake, ma kola ne nam rakesy ti Kitab Lanke ti kihali Yau ne.’ ”*
8 Ode Kristuske tyanuk a kmuna de, ma byohe, “O Hulasow O, Oi neke lema mdwakin ma irire ral heal a laratare ma rabar ti O, ta ral nam salik ma rabar ti O, dete lemamo ral healare ti lat raeh heal tike ma reh a heal desikre ma rabar ti O, ta ral heal salik ma rabar ti O, ma klyitan eta irkye toha wasi lim o sal. Kali nam desikre mumu ne lema kyala ralamkwe ma ksyenan.”
Irire rala koldyesy ma rtoha tnyetak Musake, keskye nam raala desikre lema kyala Hulasokwe ralake ma ksyenan.
9 Maktei o Kristuske tyanuk huruk ma byohe, “O Hulasow O, Yau ne! Kmwa ma kala nam mubuke.”
Dendye Kristuske hyasana tnyetak mamunake, ti khyali ksala raabar nam ti Hulasokwe ne, ma yala tnyetak harharkwe de, ma kyeluk tnyetak mamuna desy. 10 Ode kali Yesus Kristuske tyoha nam Hulasokwe ibuke, dendye myesan a yabar tenanke ti Hulasokwe kdi a klatsasam bo, ma Hulasokwe syos ity wait lim o sal ba. Ode kyosy tenan iabar ti Hulasokwe desy, mane ity neke nelnyely a ity de, ma wasi iry a ity ma kyal nini nam ti kiba knaru ne.
11 *Ode sew kyaki nekre, iry a Yahudi-nare wait iry a mabaa klen ti irkye yor Hulasokwe, neke sir ne mumu ne ramdiry ma rkarya wait karya kyaki-kyaki ne rakaryake, neke musti mo rtabahunw heal a kyalamo ratabahunw nekre ma rabar ti Hulasokwe ne. Keskyede nam raabar desikre lema bisa ma ksyos irkye wasi lim o sal ba. 12 *Klala Kristuske lema yala koldyesy, de myaty ma yal tenanke kmyesan ma yabar ti Hulasokwe, ma ksyos irkye wasi lim o sal ba. Ode Kristuske yala koldyesy neke kdi a klatsasam bo, ma kyal nini nam ti kiba knaru ne. Ode Kristuske yala ktela desy ma ktei, desikeo syai bai wen sra eraske, ma tyaklulw ti Hulasokwe seri wanke.† 13 Ode kyala kyosy sew desy ma kyait senwe, Kristuske ikita ma ana Hulasokwe yala iry a mamnisik Kristuske ne, ma Kristuske syosa iry desikre uno matat.† 14 Ode khyali Kristuske iabar tenanke kdi a klatsasam desy bo, mane ne Kristuske yala wasi irire ma nelnyely a sir, ode mlay a sir ti Hulasokwe ti kiba knaru ne de.
15 Ode Hulasokwe Memeanke dakun o klyosu ma ity ohe nam desike mlay, kali ktyanuk ti Kitab Lanke kralake ma kbyohe,
16 *“Ity Ebut Hulasokwe tyanuk ma byohe, ‘Ti sew ana mama nekre, ana kala tnyetak harharkwe kor sir, neke wasikw tnyetak desike kolnye:
Ana kswosan wasikw a tnyetakare ti ralat a kralanare ma rtoha, ode kkwesy tnyetak desikre ti huhutare dakun ma rrekan a rhe ma ranenenas.’ ”
17 Ode tyanuk huruk ma byohe,
“Ana lema knwenas wait lim o sal raalanare de, ode ana lema knwenas totnyo yabit raala ma kbyilak a wasikw tnyetakare ne dakun de.”
18 Lemadendye kolnye Hulasokwe syos ity wait lim o sal ba koldyesy de, desikeo tamres ma lema tabar nam ti I de, ma ksyos ity wait lim o sal ba.
Mmya ma tsara Hulasokwe kyor ity ralat a kusunare ode ttohak manenen ti I bain-bain
19 Lemadendye waikw o hatnimakw matohak e, kali khyali Yesuske larake kibo ei hahke ti khyali ity ne, lemadendye lema tamtaut ma tba ti tsara Hulasokwe de, kola dene tsukar ei Wen a Nelnyelnyely Lahukke. 20 Ode bisa ma ti tait Hulasokwe ma tsara I, kali Yesuske myuna ma syeruk sal harharkwe ma ity de, neke sal manety mormyorif manal nini namke ma ity ne. Neke kyoat yal tenanke ma imaty desy, kola ne iahy a kain mal de mal ratola ma kieteta Wen a Nelnyelnyely Lahukke ti Hulasokwe Seike kralake ne, ma bisa ma tsukar ma ti tait Hulasokwe. 21 Dendye senweke, Iry mabaa klen Lan Lahuk ma ity tor Hulasokwe ne imin de, neke Yesuske, ma ika usu khatu ti Hulasokwe wasi irire mumu. 22 *Lemadendye mmya ma tsara Hulasokwe kyor ity ralat a kusunare, ode ttohak manenen ti I bain-bain. Kali Yesuske yal larake ma ksyos ity wait lim o sal ba de, ma yala ity ralat a kralanare ma nelnyely de, ode I neke yala ity tenat nekre ma nelnyely dakun de, neke kyor wer nelnyelkye, ti kyoat a rababtis ity ne. 23 Ode mmya ma tkumak malkyakaw ity wait tohtohakke ti I, ode lema tamres ma tlosu ohe tou ti nam tamea ti desy ti ribunke khahake. Kali Hulasokwe lema bisa ma imluak wasi tnyetakke it elik, de nam ihatetakare mumu ne tetap ma yala ma kdi ti. 24 Ode mmya ma trekan ti kolkyabei ma ity neke bisa ma it de yalkyaw it rala, ma it de lyobak it, ode tala ktela erasare tor esei ta esei bo. 25 Ode kete tamres ma ti tawahuk ity ma tsambayan, kola iry a ratsam a kyalamo makbo ma ti rasambayan ne. De musti mo tandil ma tawahuk a ity, ma it de yalkyaw it rala, ode it de syurat it. Ode musti mo tala nam desikre mumu ma ktyabal a ktyabal toha, kali the ohe, sew a ity Ebut Yesuske ana ima huruk ne kyarasy de.
Kete ta-la toha ity wait tohtohakke ti Yesuske
26 Kali kolnye the Brit a mlay manosy Kristuske de, keskye ta-la toha Brit desy ma lema thaduli de, de tala lim o sal bo, desikemo ana lema kika nam ma tal ma tabar ti Hulasokwe de, ma ksyos ity wait lim o sal desikre ba. 27 *Dendye kolnye tmorif koldyesy, desikeo musti mo tamtaut ma ksyeman ity, ti takita ma ana Hulasokwe yukun tun ma ity ne. Kali ana Hulasokwe tyunik tnyetak matmyatkye ti iry masorw Iare, neke ana kola ne akye knyaa khyunw a sir ma desy. 28 *Kali heitlulswo kolnye irkye it a lema byuma tyoha tnyetak Musake, ode irkye enaru ta enatelw ne rseak a kmuna ma rhe ma rlosu ohe, iry desike yala sal, desikeo ana iry maohut tunke lema syusu loblobakke ti iry desy, de tyunik tnyetak matmyatkye ti i bo. 29 *Dendye kolnye Hulasokwe yukun iry masorw a tnyetak Musake koldyesy, desikemo iry a mahmwai Hulasokwe Ananke ne, ana Hulasokwe yukun sir o mdedan ma kbyilak! Iry desikre sir ne rarekan o Yesuske lara mabo ei hah desike lema kika kbuan, biar ma Yesuske lara mabo desike Hulasokwe yal ma yala wasi tnyetak harharkwe, ma lar desike ne kyala ity ma nelnyely a ity ne. Ode iry desikre sir ne rakanak Hulasokwe Memean a kisusu rala eraske ma ity ne dakun. Iry maoly desikre sir ne ana Hulasokwe yukun sir o mdedan ma kbyilak. 30 *Kali ity neke the ohe Hulasokwe tyanuk ma byohe,
“Yau ne haretke kimin Yaw, ma ana koil ti sir,
ode ana kukun sir ma ktyoha wait ktela atyat raalanare.”
Ode rkesy huruk ti Kitab Lanke ma kbyohe,
“Ity Ebutke ana yukun tun ti wasi irire mumu.”
31 Edoo! Kolnye Hulasow Mamorif ne wasi ukunke kdi ti esei desy, desikeo iry desike kyoman o ksunw ksyalik ma kiseseman i!
32 Keskyede waikw o hatnimakw e, musti mo mnyenas ti lulswoke ti kyoat nenmo Hulasokwe lyakat huhumire ma mihe Brit Eraske ti kihali Kristuske desy. Ti kyoat desike masunw ribun lan ne kdyan e, keskyede kyalake mineti manenen ralamire, ma mkyumak malkyakaw wasimy tohtohakke ti Kristuske. 33 Ode ti seure rait ne irire rahmway e, ode roban de rtaba e ti ribunke khahake. Ode seure rait mo ei ne dakun o, mtyoha ma mkyoman masunw maoly desikre, ti kidan ity wait o ity hatnimat matohak ti Yesuske ne. 34 Ode ei ne dakun o kyalake msyaluk irire ode mkyoman nam madi ti sirke, neke iry mamin ti sey metmetke kralake ne, kali rtohak ti Yesuske. Ode heit a kolnye irire rasoruk lan o hnutamy, desikeo mimukmuka mimarmara e bo, kali mhye ohe wasimy malolkye kimin o wen sra eraske de, neke eras ma kbyilak lan o hnutamy a irire rasoruk desikre. Ode wasimy maloly mamin ti wen sra eras desike kyal nini nam ti kiba knaru ne.
35 Lemadendye waikw o hatnimakw e, kete mila toha wasimy tohtohakke, de mkyumak malkyakaw wasimy tohtohak desy, kali mhye ohe ana Hulasokwe yal ksewanke ti e o lan a ksyalik. 36 Dendye musti mo mineti manenen ralamire ti wasimy tohtohakke, ma mtyoha ode myala nam Hulasokwe ibuke. Koldyesikemo ana mitot nam ribun Hulasokwe ihatetak ti eke. 37 *Kali rkesy ti Kitab Lanke ma kbyohe,
“Ana lema soso bonyo, Iry a ana mama ne yait de,
ode lema lyaluk wasi mamake de.
38 Ode wasikw irire, neke iry a kubohe mlay a sir ne, neke ana rmorif nini nam, kali rtohak ti Hulasokwe.
Keskyede kolnye iry desikre rsanyetat Yaw, desikemo ana lema kou sir ti ralakkwe.”
39 Keskyede ity neke lema tola iry desikre ti ralakut rasanyetat Hulasokwe ne, ma ana yotuk sir bai mamaty rala. De ity neke ttohak ti Hulasokwe, mane ana yaorif a ity.