Ktela rasambayan ti Hulasokwe wasi Lasyery mamin ti lasmyerke khaha ne
9
Waikw o hatnimakw e, heitlulswo kyoat Hulasokwe yal wasi tnyetak mamuna desy ti iry a Israel-are, desikeo yala tnyetak o ktela kubkubakke ma kyajar irire, ti kolkyabei ti rasambayan ti Hulasokwe wasi Lasyery mamin ti lasmyerke khaha ne. 2 *Ode kyoat iry Israel-are rsadiri Hulasokwe wasi Lasyery desy, desikeo rtah ti kbya enaru, ma kseri lulkwe ode kseri lyakwe. Ode rhaly kseri lulkwe kanike o Wen Nelnyelkye. Ode ti Wen Nelnyely desike roditi damarke kwenake it ti, ode roditi mejake it ti dakun. Ma ti meja desike kyalamo rtutuk rotire ti, neke roty a iry mabaa klenare raabar ti Hulasokwe ne. 3 Ode ti Wen Nelnyely desike rtola kain mal de mal ne it ma kyeteta kseri lyakwe, ma kseri lyaw desike rhaly a kanike o Wen a Nelnyelnyely Lahukke. 4 *Ode ti wen desike, roditi lat a ratunw natke kduduhan mahon a mtelaske ti desy. Ma lat desike ral blyawan kunkunkye ma rhul eta. Ode roditi batbatakke ti wen desy dakun, ma batbatak desike rhaly kanike o Hulasokwe wasi Batbatak Inahatetakke. Ma batbatak desike ral blyawan kunkunkye ma rhul keta o krala. Ode rluk a lkusy a blyawan kunkunkye ti batbatakke krala desy, ma rsosan kotw a rabohe manna ne ti lkusy desy kralake. Ode ti batbatak desy dakun o rsosan Harun wasi tektekanke ti kralake, ma tektekan desike heitlulswo kisitw. Ode ti batbatakke krala desike rsosan hatkwe enaru ti dakun, ma hatw a deru desike ne Hulasokwe ikesy a wasi tnyetakke hean ti khahake ne. 5 *Ode ti batbatakke khaha desy, neke rtutuk adarke enaru ti. Adar nekre raka sir toha blyawan kunkunkye dakun. Ode adar nekre raka sir ma rola Hulasokwe wasi nyaso manosy laitare. Ode adar nekre rhaly a sir o kerubare. Ode adar desikre anitare raru-raru ma kihelhela i ti batbatakke khaha desy. Ode Hulasow Mahareta Lan Lahukke imin ti anitare wasi klelan desy, neke wen a Hulasokwe isos irire wait lim o sal ba tike. Keskyede senweke lenla kika klelan ma kaklol ktela Hulasokwe wasi Lasyery desike kbuanare ratsam-ratsam ti e.
Batbatak a Inahatetakke (9:5)
6 *Dendye ti Hulasokwe wasi Lasyery desike, rtenuk nam desikre mumu ti ma desy. Ma sew kyaki ne, iry a mabaa klenare rsukar ei Hulasokwe wasi Lasyery desike kralake, ma rkarya wait karyaare ti Wen Nelnyely mamin lulw desy. 7 *Klala ti wen mamin lyakwe, neke Wen a Nelnyelnyely Lahukke, ma ktyoha Hulasokwe wasi tnyetakke mo, ti ainke kralake sasam, cuma mo iry mabaa klen Lan Lahukke myesan a syukar ei wen desy kdi a klatsam bo. Ode kyoat syukar ei wen desy kralake, desikeo musti mo yety a healare laratare ma yabar ti Hulasokwe, ma Hulasokwe syos wasi lim o sal ba aduk, maktei o nenmo Hulasokwe syos ribunke wait lim o sal ba dakun. Lim o sal raala desikre neke lema rhe toha lbwetat ohe, ktela raala desikre sal ma desy. 8 Ode kyosy a Hulasokwe wasi Lasyery mamuna desike wasi ksalanare, dendye Hulasokwe Memeanke ksyusu ohe, kolnye Lasyery desike kimin a nggora, desikemo iry a ity ne lenla bisa ma tsukar ei Wen a Nelnyelnyely Lahuk desy ma ti tsara Hulasokwe, kali sal tasukar bai Wen a Nelnyelnyely Lahuk desike lenla kimlakat.
9 Ode ktela heit a raala desikre mumu ne kola inahliakke bo, ma ksyusu ti ktela kidi ti taras selsel ne. Neke kbuanke o heit a irire ranety heal o nam salno salik ma ral ma rabar ti Hulasokwe ti Hulasokwe wasi Lasyery desy, keskyede nam raabar desikre lema bisa ma kyala iry manety desikre ralat a kralanare ma nelnyely ti Hulasokwe. 10 Kali ktela raabar nam desike, ktyabal nam rana o raenw nekre ma ktyoha wait ktela kubkubakke, ode ktela salno salik maola ktela ranal werke ma rut matat o simat o lwaut o nam salik nekre ma nelnyely ne, ma ktyoha wait ktela kubkubakke, desike ne cuma mo kyala tenat a mlosy nekre ma nelnyely bo, keskye lema bisa ma kyala kyal ralat a kralanare ma nelnyely. Keskyede wait ktela kubkubak desikre cuma mo klyakut nini Hulasokwe yala tnyetak harharkwe bony mane.
Kristus neke ika mabaa klen Lan Lahuk ma ity tor Hulasokwe neke eras ma kbyilak mabaa klen ida nekre mumu
11 Keskyede Kristuske mya de, ma selsel ne ika mabaa klen Lan Lahuk ti irkye yor Hulasokwe de, ma yety a ktela eras a Hulasokwe ihatetak ma ity desy. Ode syukar ei Hulasokwe wasi Lasyery Nelnyelnyelkye ti wen sra eraske. Ode lasyery desike lema irkye ika, ode lema kyosy nuske ktem ne dakun, de eras a ksyalik ma kbyilak lasyery Musa isadirike. 12 Ode kyoat Kristuske syukar ei Wen a Nelnyelnyely Lahuk desike kralake, desikeo lema yety a biby wamwankye larake ma yabar ti Hulasokwe, ode lema yety sabkye ananke larake dakun ma yabar ti Hulasokwe, kola iry mabaa klenare raala ti heitlulswo. De yety larake kmyesmesmesan ma syukar ei Wen a Nelnyelnyely Lahuk desike kralake kdi a klatsasam bo, ma yabar lara desy ti Hulasokwe, ma klyitan eta ity nini nam ti kiba knaru ne. 13 *Ode kolnye ktyoha tnyetak mamunake, desikeo iry mabaa klen ti irkye yor Hulasokwe ne, musti mo yal biby wamwankye larake, ta yal saby wamwankye larake, dete lemamo yal sabkye anan wamfwet a raehke wasi ahkwe, ode yal nam desikre ma ryitik ti iry a ktyoha ktela kubkubakke mo raray ne. Yala koldyesy ma ktela desike kyala iry maray desikre tenat a mlosire ma nelnyely ti Hulasokwe, ma bisa ma rawahuk sir a ror Hulasokwe wasi irire huruk. 14 Dendye kolnye ktyoha tnyetak mamunake, desikeo healare laratare bisa ma kyala irire tenat a mlosire ma nelnyely, apalai ti Kristuske larake de? Kristuske larake ne kiala irire ralat a kralanare ma nelnyely ne! Kali kyosy Hulasokwe Memean mamorif manal nini namke, desikeo Kristuske yal tenan a lema rakye tebibikan a kilatan ti elik ne, ma myaty ma yabar ti Hulasokwe. Ma lara mabo ei hah desike ne kyaditi ity toha ktela taala ma kinor ity ei mamaty rala ne, neke wen a akye kilehur tike. Ode lara desike ne kiala ity ralat a krala nekre ma nelnyely ne, ma bisa ma tsara Hulasow Mamorifke ma tsakitil ode tou ti I. 15 Khyali desike mane Kristuske byaa klen ti irkye yor Hulasokwe ti tnyetak harharkwe, mamode iry a Hulasokwe iilik sir de ma wasi iry a sir ne, bisa ma ratot eras Hulasokwe ihatetak ma isosan kita sir ne, neke ktela eras a lema kimres elik ne. Kali Kristuske myaty ma lyitan eta sir, ma yaditi sir toha wait lim o sal raala ti kyoat a tnyetak mamuna Hulasokwe inal ti Musa desike kilakut a nggora ne.
16 Ode inahatetak maoly desike, kola ne amamke it ma kyesy atyahy a inahatetakke it ti ananare, ma kyeluk nyatos ohe, kolnye myaty, desikeo wasi maloly itutuk kita sir ma ana rasaa sir tike ne. Keskye kolnye amat desike lenla myaty, desikeo ananare lenla bisa ma rahe wasi maloly desy. 17 Kali atyahy inahatetak desike wasi kisike lenla klyakut, kolnye iry makeskye myorif a nggora. Klala kolnye makesy atyahy inahatetak desike myaty de, desikeo nenmo atyahy desike klyakut. 18 Khyali desike mane tnyetak mamuna desike lenla kika kbuan, kolnye lenla rtabahunw healke it ma ral larake ma rabar ti Hulasokwe. 19 *Kali heitlulswo, kyoat Musa yabrita tnyetak a Hulasokwe inal ti ike mumu ti iry a Israel-are mumu ma ktei, desikeo nenmo yal sabkye ananke larake ode biby wamwankye larake, ode ihora kyor werke. Maktei o hyoin a tnyei hisopke ktenanare dum, ode yal dombake husi mermerare ma lyel ti ktutuke, maktei o hyuhuk ti lar ihora kinor werke desy, maktei o ryitik ti kitab raluluk a rakesy tnyetak Musake ti ne, ode ryitik dakun ti iry a Israel-are mumu. 20 Ode malmata yala koldyesy, desikeo tyanuk ti sir ma byohe, “Lar neke kyeluk nyatos ohe, tnyetak Hulasokwe inal ti e ne, neke nenmo kimin mane. Ode Hulasokwe hyareta e ma musti mo mtyoha tnyetak desy.” 21 *Maktei o, Musa yal lar desy huruk ma ryitik ti Hulasokwe wasi Lasyerkye dakun, ode ryitik ti nam mamin ti Hulasokwe wasi Lasyerkye krala desy mumu dakun, neke Hulasokwe wasi Lasyery desike klananare, ma kyalamo ranal ma rapake ma rasakitil ode raou ti Hulasokwe ne. 22 *Ode kolnye ktyoha tnyetak Musake, desikeo ral healare laratare ma kyala nam ribun desikre ma nelnyely ti Hulasokwe.† Kali musti mo larke kibo ei hahke ma rabar ti Hulasokwe, mamode Hulasokwe syos lim o sal ba. Kali kolnye lema kika lar mabo ei hahke, desikeo Hulasokwe lema syos lim o sal ba.
23 Lemadendye musti mo ral healare larat a raabar ti Hulasokwe ne, ma ral ma kyala nam sai ta sai mamin ti Hulasokwe wasi Lasyery mamin ti lasmyerke khaha desy ma nelnyely. Keskye nam mamin ti Hulasokwe wasi Lasyery desikre rahliak ti nam mamin ti wen sra eraske bo, dendye nam ranal ma kyala nam mamin ti wen sra eras desikre ma nelnyely ne, neke musti mo eras ma kbyilak healare laratare. 24 Kali Kristuske lema syukar ei Wen a Nelnyelnyely Lahuk a irkye ialake ti Hulasokwe wasi Lasyery mamin ti lasmyerke khaha ne. Wen desike cuma mo nenma kola Wen Nelnyelnyely mlakye o wen sra eraske. De Kristuske syukar ei wen sra eraske de, ma senweke syara Hulasokwe, mamode byaa klen ma ity tor Hulasokwe. 25 Neke Kristuske syukar ei wen sra eraske, ma lema kyaki-kyaki de klatsasam bo, ma yal tenanke kmyesan ma yabar ti Hulasokwe. Kristus neke lema yola iry mabaa klen Lan Lahuk mamin ti lasmyerke khaha ne. Kali mabaa klen Lan Lahuk mamin ti lasmyerke khaha desike ain kyaki-kyaki ne syukar ei Wen a Nelnyelnyely Lahukke, ti Hulasokwe wasi Lasyerkye, ma lema yety larake, de yety a heal a laratare ma yabar ti Hulasokwe. 26 Kali kolnye Kristuske yola iry mabaa klen Lan Lahuk mamin ti lasmyerke khaha ne, desikemo kyaki-kyaki ne musti mo Kristuske yety ti de yety ma ti masunkwe, neke kyala kyosy a sew a Hulasokwe iala nuske ktem ne, ma ti kyait senwe mane. Keskyede lema koldyesy, de selsel ne, neke ti kyoat nuske ktem ne kyala ma kilodur ne, desikeo Kristuske myai nuske ktem ne kdi a klatsasam bo, ma yal tenanke kmyesan ma myaty ma syos irkye wasi lim o sal ba.
27 Ode kola dene Hulasokwe yohut ohe, ana irkye myaty klatsam bo, maktei o nenmo Hulasokwe yukun tun ti sir. 28 *Koldyesy dakun o Kristuske yal tenanke ma myaty klatsam bo, ma lyitan eta iry ribunke ma syos wait lim o sal nekre ba. Klala ana kyoat myaa kla-ruake mai nuske ktem ne, desikeo lema mya ma syos irire wait lim o sal huruk de, de mya ma yaorif iry a makita I a kyor ralat a kusunare nini ima ma iaorif sir ne.