Yesus neke Iry mabaa klen Lan Lahukke ti irkye yor Hulasokwe ma ktyoha tnyetak harharkwe
8
*Lemadendye waikw o hatnimakw e, ktela ribun dai nenmo kukesy desikre wasi kbuanke kolnye: Iry mabaa klen Lan Lahuk maoly desike imin de. I neke ity wait Iry a mabaa klen Lan Lahukke ti irkye yor Hulasokwe ma kbyilak mabaa klen nekre mumu, ode I neke tyaklulw ti kader maharetake, neke Hulasow Mahareta Lan Lahukke seri wanke,† o wen sra eraske. 2 Ode I neke ika mabaa klen ti irkye yor Hulasokwe, ma kyarya ti Hulasokwe ti Wen Nelnyelnyely lahukke, neke wen rasambayan a mlay tike, neke Hulasokwe Seike o wen sra eraske. Ode Sey desike, neke ity Ebut Hulasokwe I ne isadiri ne, de lema irkye i ne isadiri ne kola ne heitlulswo Musa isadiri Hulasokwe wasi Lasyerkye ne.3 Ode iry a Hulasokwe iilik sir mumu ti lasmyerke khaha ne, ma raka mabaa klen Lan Lahuk ti irkye yor Hulasokwe ne, musti mo ral heal o nam salik irire ranety ba ti Hulasokwe ne, ma ral ma rabar ti Hulasokwe. Koldyesy dakun ti Yesus a Iry mabaa klen Lan Lahukke ti irkye yor Hulasokwe ne. I ne dakun o musti mo yabar namke it ti Hulasokwe. 4 Ode kyoat Yesuske imin ti lasmyerke khaha ne, desikemo lema ika mabaa klen ti irkye yor Hulasokwe, kali ti lasmyerke khaha ne iry a rabaa klen ma rabar nam ti Hulasokwe ma ktyoha tnyetak Musake ne, neke ramin de. 5 Keskye mabaa klen desikre wait karyake, neke rkarya ti Hulasokwe wasi Lasyery mamin ti lasmyerke khaha ne, ma kola Hulasokwe wasi Sey mamin ti wen sra eraske. Kali kyoat lenla raala Lasyery desy, desikeo Hulasokwe tyanuk ti Musa ma byohe, “Mtwomolu mamak nam kutanuk ne. Musti mo myala Lasyery desike kyor wasi nam mamin ti krala nekre mumu ma ktyoha elik nam kyalake kususu ti o desy, ti kyoat mumin ti huar Sinaike desy.” Lemadendye rala Lasyery desike ma kola Hulasokwe wasi Sey mamin ti wen sra eraske.*
6 Keskyede selsel ne Yesuske byaa klen ti irkye yor Hulasokwe o wen sra eraske, desikeo karya Hulasokwe inal ti I desike kyety mdedan ma kbyilak karya inal ti iry mabaa klen mamin ti lasmyerke khaha ne. Ode Hulasokwe yal Yesuske ma yal ma yala tnyetak harharkwe ma ity dakun, ma ity neke bisa ma mlay a ity ti Hulasokwe. Tnyetak harharw desike eras ma kbyilak tnyetak heitlulswo Hulasokwe inal ti Musake. Kali kyosy Hulasokwe wasi tnyetak harharw desy, mane irire bisa ma ratot ktela erasare, ma kbyilak wasi tnyetak a mamunake.
7 Kali kolnye tnyetak mamuna desike bisa ma kyala irire ma mlay a sir ti Hulasokwe, desikemo Hulasokwe lema yala tnyetak harharkwe de ma kyeluk tnyetak mamuna desy. 8 Keskyede Hulasokwe yoit salke ti wasi irire, kali lema rtoha tnyetak mamuna inal ti Musa desy de, lemade ity Ebut Hulasokwe tyanuk ti sir ma byohe,
“Mtyomolu mamamak nam kutanuk nekre!
Ana kyait sekwe bonyo, kala tnyetak harharkwe kor bangsa Israelke, ode kor klolan Yehudake† dakun.
9 Ode tnyetak harharw desike, lema kola tnyetak kuala kunor ebnwo matrumat ti heitlulswo, ti kyoat kkwumak simatare ma keuk sir ma rbetik toha lasmyer Mesirke desy, kali lema rtomolu ode lema rtoha tnyetak kuhatetak kunor sir desy, dendye lema khwaduli kor sir de.
10 Keskyede selsel neke Yau ne ktwanuk ohe, ti sew ana mama nekre, kala tnyetak harharkwe kor iry a Israel-are, ma wasikw tnyetak desike kolnye:
Ana kala sir ma rrekan a rhe wasikw tnyetakare ma ranenenas, ode kkwesy tnyetak desikre ti ralat a kralanare ma rdakin ma rtoha.
Ode ana Yau neke wait Hulasow a Yaw, ode sir neke wasikw iry a sir.
11 Ode ana lema rajar wait o hatnimat nekre de, ma rhe ohe Yau neke wait Amam Lan Yaw, kali lan o kakan nekre raktemtem mumu ne rhe deny ohe, wait Hulasow a Yaw.
12 Kali biar ma heitlulswo rala ktela salare, keskyede ana kswusu ralakw eraske ti sir, ma kswos wait sal raala desikre ba. Ode ana lema knwenas wait lim o sal raala desikre de.”*
13 Lemadendye kyoat Hulasokwe byohe ana yala tnyetak harharkwe, desike kbuanke o tnyetak mamuna desike mtu de. Ode kolnye sai mtu de, desikemo ana kitayar ma desy.