Melkisedek neke iry mabaa klen ti irkye yor Hulasokwe ma kbyilak klolan Lewike
7
*Waikw o hatnimakw e! Heitlulswo Melkisedek neke ika raja ti nus Salemke, ode i neke iry mabaa klen ti irkye yor Hulasokwe, neke Hulasow Lan Lahukke. Ti kyoat desike dakun o Abraham rba ti rsorw raja-nare ror wait suldatare ma ramdiriat, desikeo Abraham rala ral raja desikre ror wait suldatare. Lemade kyoat Abraham nenmo yolik i toha inamdiriat desy, desikeo Melkisedek neke bya ti byalan i, ode iten toha Hulasokwe ma yal eraske ti Abraham. 2 Lemade Abraham yal sasam toha heanke toha nam isoruk mumu toha raja desikre ti kyoat ramdiriat desy, ma yal ti Melkisedek. Ode any a Melkisedek ne kbuanke o “raja mlakye.” Ode wasi nuske kani Salem, ma wasi kbuanke o “nus manety inaka eraske.” Dendye bisa ma tbohe, Melkisedek neke “raja inaka eraske.” 3 Ode lema rkesy ti kitabke it ma the ohe Melkisedek ne ena o ama esei, ode yosy klolan kabei, kali i neke lema radur i. Ode i neke lema myaty dakun. Ode khyali desike mane, i neke ika iry mabaa klen ti irkye yor Hulasokwe nini nam ti kiba knaru ne, kola dene Hulasokwe Ananke dakun.4 Dendye bisa ma the ohe Melkisedek ne iry lan i bain, kali ity ebnwo matrumat Abraham neke yal sasam toha heanke toha nam isoruk desikre, ma yal ti Melkisedek. 5 *Keskyede ktyoha tnyetak Musake mo, iry a Israel-are musti mo ral sasam toha heanke toha maslyesatare, ma ral ti iry manosy klolan Lewike, kali klolan neke sir ne rabaa klen ti irkye yor Hulasokwe ne. Ode biar ma iry a Israel-are ror klolan Lewike raktemtem mumu ne Abraham tesnwo natu sir dakun, keskye wait o hatnimat iry Israel desikre musti mo ral sasam toha heanke ma ral ti iry mabaa klen desikre. 6 Klala biar ma Melkisedek neke lema Lewi tesnwo natu i, keskye Abraham yal sasam toha heanke toha nam isoruk desikre, ma yal ti Melkisedek. Ode biar ma Abraham yal hatetakke toha Hulasokwe de, keskye Melkisedek neke iten Hulasokwe ma yal eraske ti Abraham. 7 Ode the ohe, iry a maten Hulasokwe ma yal eraske ti iry salik ne, neke lan i ma byilak iry a Hulasokwe inal eraske ti i ne.
8 Ode iry manosy klolan Lewi a raka iry mabaa klen ti irkye yor Hulasokwe ne, sir ne rakita ma ral sasam toha heanke toha iry a Israel-are. Keskye iry a Lewi nekre iry a sir bo, ma ana rmaty. Klala Melkisedek ne itot sasam toha heanke dakun, keskyede kola dene Melkisedek ne myorif nini nam ti kiba knaru ne, kali lema irkye it a bisa ma tyanuk ma byohe, Melkisedek ne myaty de. 9 Dendye iry manosy klolan Lewike kyalamo rakita ma ral sasam toha heanke toha iry a Israel-are ne. Keskyede kyoat Abraham yal sasam toha heanke ma yal ti Melkisedek, desikeo kola ne Lewi ral sasam toha heanke ma ral ti Melkisedek dakun ma desy. 10 Kali biar ma Lewi lenla radur i ti kyoat taras a Melkisedekke, keskyede i desike Abraham tesnwo natu i. Dendye kyoat Melkisedek mya ma yait Abraham, desikeo kola ne Melkisedek mya ma yait Lewi dakun ma desy, kali Lewi i desi Abraham.
Yesus neke Iry mabaa klen Lan Lahukke ma kbyilak iry mabaa klen nekre mumu
11 Dendye heitlulswo ti kyoat Hulasokwe yal tnyetak Musake ti iry a Israel-are, desikeo yilik Lewi tesnwo natu, ma rbaa klen ti irkye yor Hulasokwe, ma rajar tnyetak Musake ti iry a Israel desikre ma rtoha. Keskyede iry mabaa klen manosy Lewi tesnwo natu desikre wait karyake lema bisa ma kyala irire ma mlay a sir ti Hulasokwe. Lemadendye Hulasokwe yilik iry mabaa klen salikke it, ma yola Melkisedek. Ode iry mabaa klen salik desike lema yosy a Lewi tesnwo natu kola ne Harun.† 12 Dendye kolnye Hulasokwe yilik iry mabaa klen salik desy ma yeluk iry mabaa klen manosy Lewi wasi klolan desikre, desike kbuanke o, tnyetak harharkwe musti mo kyeluk tnyetak a Hulasokwe inal ti Musa desy dakun. 13 Ode iry mabaa klen salik kutanuk I ti ne, neke ity Ebut Yesuske, ma lema yosy a klolan Lewike, de yosy a klolan salik. Ode ktyoha tnyetak Musake, lenla kika iry manosy klolan salikke it ma rbaa klen ti irkye yor Hulasokwe, ma rkarya ma rabar heal ti lat raeh heal tike. 14 Ode the ohe, ity Ebut Yesuske yosy a klolan Yehudake. Keskye Musa lema elik ma tyanuk de byohe, klolan Yehudake bisa ma raka mabaa klen ti irkye yor Hulasokwe.
15 Ode mlay bain o the ohe, iry mabaa klen salik desike mya ma yeluk iry mabaa klen manosy Lewi wasi klolan desikre, kali iry mabaa klen maola Melkisedek desike imin de. 16 I neke ity Ebutke, ma I ne ika Iry mabaa klen, neke lema kali yosy a klolan Lewike ma ktyoha tnyetak Musake ti kibohe, iry mabaa klen nekre musti mo Lewi tesnwo natu sir. De I neke ika mabaa klen, kali haretke kimin a I, ma myorif nini nam ti kiba knaru ne. 17 Kali rkesy ti Kitab Lanke de, ma Hulasokwe tyanuk ti Iry mabaa klen Lan Lahuk desike ma byohe,
“Oi neke muka iry mabaa klen ti irkye yor Hulasokwe nini nam ti kiba knaru ne, ma kola ne Melkisedek, iry mabaa klen ti irkye yor Hulasokwe ne.”*
18 Lemadendye tnyetak mamuna ti khyali iry mabaa klen desike, neke Hulasokwe hyasana de. Kali tnyetak mamuna desike lema kika kbuan ma ity, kali lema bisa ma kyala ity ma tney a Hulasokwe. 19 Ktwanuk koldyesy, kali tnyetak Musake lema bisa ma kyala irkye ma mlay a i ti Hulasokwe. Dendye selsel ne lema tmea ti tnyetak Musake de, de tmea ti Yesuske, kali syusu salke ma ity, ma bisa ma tba ti tney a Hulasokwe.
20 Ode kbyilak ti desy dakun o the ohe, Yesuske ika iry mabaa klen Lan Lahuk ma kbyilak iry mabaa klen nekre mumu, kali kyoat Hulasokwe yilik Yesuske ma ika mabaa klen ti irkye yor Hulasokwe, desikeo yal Anike ma ihwab. Klala kyoat yilik Lewi tesnwo natu ma rbaa klen ti irkye yor Hulasokwe, desikeo lema ihwab. 21 Keskye kyoat Hulasokwe yilik Yesuske ma ika iry mabaa klen ti irkye yor Hulasokwe, desikeo ihwab ma byohe,
“Hulasow Yaw ne kuhwab ode kuhatetak ma ktei de, ode ana lema kuhihi wasikw hatetak ne elik. Wasikw hatetak neke ne:
Oi neke muka iry mabaa klen ti irkye yor Hulasokwe nini nam ti kiba knaru ne.”*
22 Kali koldyesike mane, ity neke bisa ma the ohe tnyetak harharw manosy Hulasokwe ne, eras ma kbyilak tnyetak a mtu desy, neke tnyetak Musa desy. Kali Yesus neke I ne iala Hulasokwe wasi tnyetak harharw desy ma ana kidi ti elik ne.
23 Ode bisa ma talalau tnyetak a mtu desy kyor tnyetak harharkwe huruk, neke kolnye: Heitlulswo iry mabaa klen ti irkye yor Hulasokwe ne musti mo ribun a sir, ma kolnye it a myaty, desikeo musti mo it a yeluk iry mamaty desy, ma kyarya karya desy bai lulkwe. 24 Keskyede Yesuske byaa klen ti irkye yor Hulasokwe ti kiba knaru ne, ode lema irkye it a yeluk I dakun, kali Yesus neke myorif nini nam. 25 Lemadendye Yesuske myesan wasi haretke ma bisa ma yaorif iry a mama ma manait Hulasokwe ne ma rmorif nini nam, neke iry a ranety ral sasamke ranor Yesuske ne. Kali Yesus neke I ne myorif nini nam, mamode kyaki-kyaki ne byaa klen ti sir a ror Hulasokwe.
26 Ode Yesus neke myesan a byer o tyahal bain-bain ma ika mabaa klen Lan Lahuk ma ity tor Hulasokwe. Kali I neke nelnyely a I, ode I neke lema ika sala, ode lema ika wasi lim o sal elik-elik. Ode Hulasokwe yala I ma soso I toha iry a maala lim o sal nekre, ode syalak I bai wen sra eraske, neke ti wen atat lahukke. 27 *Ode Yesus neke lema yola iry mabaa klen Lan Lahuk ida nekre, ma sew kyaki nekre musti mo rtabahunw heal ma ral ma rabar ti Hulasokwe, ma Hulasokwe syos mabaa klen desikre wait lim o sal ba aduk, maktei o nenmo ral heal irire ranety ba ti sir ne, ma ral ma rabar ti Hulasokwe dakun, ma Hulasokwe syos iry manety heal desikre wait lim o sal ba dakun. Klala Yesuske myesan a yabar tenanke ti Hulasokwe, ma Hulasokwe syos irkye wasi lim o sal ba. Yesuske yala koldyesy klatsasam bo, ma ti kyal nini nam ti kiba knaru ne. 28 Keskye irire raka mabaa klen Lan Lahuk ti irkye yor Hulasokwe ma ktyoha tnyetak Musake, neke iry desikre iry a sir bo, ma lema malkyakaw a sir, dendye rala lim o sal. Lemadendye ainare kieluk i bonyo, Hulasokwe ihwab ma yala tnyetak harharkwe. Neke yilik Ananke ma ika Iry mabaa klen Lan Lahuk, ma kyal nini nam ti kiba knaru ne, kali lema ika wasi lim o sal elik-elik.