6
Waikw o hatnimakw e, khyali desike mane kete cuma mo tajar a ktela mran mamuna taajar ti kihali Kristuske ne, de lemamo mmya ma tajar a ktela kiba demdemw nekre, ma kyala ity wait tohtohakke ma ktyabal a ktyabal ma malkyakaw. De kete kyaki-kyaki ne toly ma tajar ktela mamuna taajar desikre kmyesan bo. Ktela mamuna nekre ne: ktela tatunik ity totnyo yabit atyat kinor ity ei mamaty rala ne, ode tatohak ti Hulasokwe ne. 2 Ode kete toly dakun ma tajar ksala rababtis iry matohak ti Kristuske ne, ode ktela rasaa simat ti irire ne, ode ktela iry mamatire ana ramorif huruk ne, ktyabal ktela ana Hulasokwe yukun tun ti irire mumu ne, ma yohut wait tunare, ma tun iohut desikre kyal nini nam ti kiba knaru ne. 3 De kolnye Hulasokwe yal klelanke ma ity, desikeo ana tajar a ktela kiba demdemw nekre, ma kyala ity wait tohtohakare ma ktyabal a ktyabal ma malkyakaw.4 Kali iry a ma-la toha wait tohtohakare ne, neke lema irkye it a bisa ma yeuk sir ma rtunik wait lim o sal ba de. Iry desikre kola Hulasokwe lyakat huhutare ma rhe Brit Eraske o mlay de. Ode rkoman Hulasokwe rala eraske de. Ode Hulasokwe yal Memeanke ma kimin sir de. 5 Ode iry desikre kola rkoman Hulasokwe tunanare o eras dakun de. Ode rseak Hulasokwe wasi ktela masalsyalik iare de, ma rhe ohe ana Hulasokwe syusu wasi haretke ti taras ana mama ne dakun. 6 Dendye kolnye iry a Hulasokwe inal eras maoly desikre ti sir ne ra-la toha Kristuske de, desikeo lema bisa ma rtunik wait lim o sal ba de. Kali ktela raala desike kola dene sir neke rbakw a Hulasokwe Ananke ti tul masanwalw ike huruk ma desy, ode rahmwai Kristuske ti ribunke khahake.
7 Dendye iry a Hulasokwe inal eras maoly desikre ti sir ne, neke bisa ma tahliak ti boke. Neke Hulasokwe yala uske ma kyoras ma ktyubw lasmyer mamin ti bo desy, ma khyury ma lasmyer mamin ti bo desike kiisy, ma kotw mamin ti boke krala desike kisinare kyoat ti manoha bo desikre. Desike ne, Hulasokwe yal eraske ti bo maoly desy. 8 *Klala iry a ma-la toha Kristuske ne, rola ne lasmyer a wakw o sitw o karkyary kituhw ti ne, ma lema kiisy, biar ma uske kyoras ti bo desy dakun. Lemade ana Hulasokwe tyuhar bo desy, ma ana akye knya ma ktei.
9 Lemadendye waikw o hatnimakw kulobak e! Biar ma aramy mtyanuk tun maoly desikre ti e de, keskye aramy mtyohak ohe, ei neke lema mila toha Hulasokwe, kola iry maola bo a Hulasokwe ituhar ba desy. De aramy mtyohak ohe, ei neke myala ktela erasare ma ktyoha iry a Hulasokwe iaorif sir nekre wait ktela eras raalanare. 10 Kali mlay bain o Hulasow neke lema iseak mat, dendye lema imluak nam eras miala ti I nekre mumu. Ode Hulasokwe lema imluak ohe, ei neke msyusu wasimy loblobakke ti I, ti kyoat msyaluk wasi irire kyala kyosy khyehyei mitohak ti I desy, ma ti kyait senwe mane. 11 Keskyede aramy miten toha e bain-bain, ma it o it neke myalkyaw e ma msyusu ralamy eras desikre ti mimorif a nggora ne. Mamode ana mhye bain-bain ohe ana myal elik nam mikita desy, neke nam eras Hulasokwe ihatetak ti e desy. 12 Ode aramy miten ma ei neke kete mikbo ti wasimy tohtohakke, de myalkyaw e ma mtyoha iry matohakare wait mormyorifare, kali sir ne wait tohtohakke malkyakaw ode raneti ralatare manenen, ma rakita nam eras Hulasokwe ihatetak ti sirare, nini ratot nam desikre bo.
Hulasokwe wasi tnyetak itetakare lema bisa ma kihihi i
13 Waikw o hatnimakw e! Lema irkye it a lan i ma byilak Hulasokwe. Lemade ti kyoat Hulasokwe ihatetak ti Abraham, desikeo Hulasokwe yal Anike kmyesan ma ihwab, 14 ma tyanuk ti Abraham de byohe,
“Yaw neke ana kal eraske ti o ma mausw ksyalik, ode kala tesnwo natumw nekre ma ribun sir a ksyalik.”*
15 Lemade Abraham itomolu nam Hulasokwe ihatetak desy bonyo, ineti ralake manenen ma ikita bo, nini itot nam a Hulasokwe ihatetak ti i desy de.
16 Ode the ohe, kyalamo irkye ihwab, desikeo yal iry lan maka kmatake it anike ma ihwab. Yala koldyesy ma kyeluk nyatos ohe, ana tyoha nam itetak desy, mamode lema bisa ma irkye it syorw a i de. 17 Kola dene Hulasokwe dakun. Neke Hulasokwe byuma yalkyaw wasi tnyetak ihatetakke ti iry ana matot nam itetakke, dendye yal Anike kmyesan ma ihwab ti sir ma ksyusu ohe, ana yala nam itetak desy ma kdi ti elik. 18 Ode Hulasokwe wasi tnyetakke, ode wasi inahwabke lema bisa ma kihihi i, kali Hulasokwe lema ikakmet. Ode kyosy wasi ktela deru a lema kihihi i desy, Hulasokwe yalkyaw iry a ma-la kbya ti inait Hulasokwe ma iaoa i ne, ma iry desike myea ti Hulasokwe ma ana itot nam Hulasokwe ihatetak ti ike. 19 *Dendye tamea ti Hulasokwe ne, neke kola ne soarke khatuke ti kiusak i ma malkyakaw ne, ma biar ma besanare lan ma khyura dakun o lema kiwaway ma kihmua elik. Koldyesy dakun o tamea ti Hulasokwe ne malkyakaw ode ity wait tohtohakke lema kiwaway, de ttohak manenen ti I ohe, ana tatot nam ihatetak ma itkye. Ode khyali tamea ti Hulasokwe ne dakun o bisa ma tsukar ei Wen Nelnyelnyelkye, neke wen sra eras imin tike. Kola dene kyoat iry a Israel-are wait mabaa klen Lan Lahukke bisa ma syukar Hulasokwe Seike kralake ti nus Yerusalemke, ma ti kyahy a kain mal de mal ratola ma kieteta Wen Nelnyelnyelkye ne ei kserike, ma syukar ei Wen Nelnyelnyely desike kralake ma ti yait Hulasokwe. 20 *Dendye ity neke bisa ma ti tait Hulasokwe dakun, kali Yesuske bya ti yait I a kmuna ti wen sra eraske de, ma syusu salke ma ity mamode bisa ma ttoha I bai so. Ode selsel ne Yesus neke Iry mabaa klen Lan Lahukke ma ity tor Hulasokwe nini nam ti kiba knaru ne, ma kola ne Melkisedek, iry mabaa klen ti irkye yor Hulasokwe ne.