Hulasokwe yilik Yesuske ma ika Iry mabaa klen Lan Lahuk ti irkye yor Hulasokwe nini nam ti kiba knaru ne
5
Waikw o hatnimakw e! The ohe, kolnye kyait ma Hulasokwe yilik irkye ma ika iry mabaa klen Lan Lahuk ti irkye yor Hulasokwe ne, desikeo yilik i toha iry mamin ti nuske ktem ne. Iry desike wasi karyake, neke byaa klen ti irkye yor Hulasokwe ti kyoat irire rba ti rsambayan ode rou ti Hulasokwe, desikeo i ne isambayan ne. Ode ikita ma yal heal o nam salik irire ranety ba ti Hulasokwe ne, ma yal ma yabar ti Hulasokwe, ma Hulasokwe syos iry manety desikre wait lim o sal ba. 2 Ode iry mabaa klen desike hye ohe, i neke iry a i bo, ma lema malkyakaw a i. Dendye bisa ma yala ral lublubke yor iry a lema rahe nam a mlaire ne, mane kihury ma rala ktela salare ne. 3 Ode kali iry mabaa klen desike iry a i bo, dendye musti mo yabar heal ti Hulasokwe, ma Hulasokwe syos wasi lim o sal ba aduk, ma kola ne inal heal irire ranety ba ti Hulasokwe ne, ma yal ma yabar ti Hulasokwe, ma Hulasokwe syos iry desikre wait lim o sal ba dakun. 4 *Ode lema irkye it a bisa ma syusu tenanke kmyesan ma ika mabaa klen Lan Lahuk ti irkye yor Hulasokwe, de cuma mo Hulasokwe myesan a syusu irkye ma ika mabaa klen Lan Lahuk ti irkye yor Hulasokwe, kola dene heitlulswo Hulasokwe yilik Harun ma ika mabaa klen ne. Harun neke iry mamunmuna ma ika mabaa klen Lan Lahuk ti irkye yor Hulasokwe ne.5 Kola ne Kristuske dakun, ma lema syusu tenanke kmyesan ma ika mabaa klen Lan Lahuk mamode yety alalan, de Hulasokwe I ne isusu Kristuske ma ika mabaa klen Lan Lahuk ti irkye yor Hulasokwe ne. Ma Hulasokwe tyanuk ti Kristuske ma byohe,
“Oi neke Anakw a O, ode senweke kabrita ohe, Amamw a Yaw.”*
6 Ode ti ayat salik nekre Hulasokwe tyanuk huruk ma byohe,
“Oi neke muka iry mabaa klen ti irkye yor Hulasokwe nini nam ti kiba knaru ne, ma kola ne Melkisedek,† iry mabaa klen ti irkye yor Hulasokwe ne.”*
7 *Ode kyoat Yesuske myorif ti nuske ktem ne, desikeo syer ode yatela ma syambayan ti Hulasokwe, ma iten toha Hulasokwe ma syaluk I. Kali hye ohe, Hulasokwe wasi haretke lan ma bisa ma yaorif I toha matmyatkye. Ode khyali Yesuske tyomolu ode tyoha Hulasokwe, dendye Hulasokwe hyalas wasi sambayan desikre. 8 Ode biar ma Yesus neke Hulasokwe Anan a I, keskyede kyosy masunw madan I desy, dendye kyoman ma hye ohe, kolkyabei ma tyomolu ode tyoha Ama Hulasokwe ti kyoat yola irkye ne. 9 Lemade kyosy masunw madan Yesuske desy, lemadendye Hulasokwe yala I ma ika mabaa klen Lan Lahuk ti irkye yor Hulasokwe. Kali koldyesike mane Yesuske bisa ma yety mormyorif manal nini namke ti iry a matomolu ode matoha I ne. 10 Kali Hulasokwe yilik I ma ika mabaa klen Lan Lahukke ti irkye yor Hulasokwe, ma kola ne Melkisedek iry mabaa klen ti irkye yor Hulasokwe ne.
Snuratke ma talkyaw ity ma lan ity ti ity wait tohtohakke
11 Waikw o hatnimakw e! Ktelanare ribun neke kbwuma kuhes ti e a nggora, ti khyali Yesuske yor Melkisedek. Keskyede ktela nekre ksunw ksyalik ma kaklol ti e, kali senweke ei neke lema mbyuma myalkyaw e ma mhye kbuanare, kola heitlulswo de. 12 *Mlay bain o ei ne mtyohak ti Yesuske soso de. Lemade kyait sekwe mane, ma musti mo mika tuanggurw ma myajar Hulasokwe tunanare ti iry salik, keskyede kyal nini kyait senwe mane desyo lenla bisa myajar Hulasokwe tuna desikre, kali nenmo mhye tebikan bo. Dendye musti mo kyaki-kyaki ne iry dum a rajar e a nggora ti ktela mamuna tahe Hulasokwe tunanare ne. Lemade ei ne myola ne naman a enatare rasusw sir a nggora nekre, ma lenla bisa ma ra kotw a ngkoranare. Kbuanke o mbyuma mhye Hulasokwe tuna lema maba demdemw nekre bo, klala lenla bisa ma mhye Hulasokwe tuna maba demdemw nekre kbuanare. 13 Kali kolnye esei desike syusw nggora, desikemo iry maoly desike lenla bisa ma yilik a hye mlakye toha salke, kali kakan i a nggora ti wasi tohtohakke. 14 Klala iry mabuma mahe Hulasokwe tunanare ne, neke iry a ralkyaw sir ma rhe Hulasokwe tuna maba demdemw nekre, sir desike rola dene lan sir de, ma rabuma rana kotw a ngkoranare ne. Dendye sir desike bisa ma rilik a rhe eraske toha atyatke de, kali rmesan rajar tenatare ma rala koldyesy.