Sew a Hulasokwe ihatetak ma ana tamres a tanor I tike
4
Waikw o hatnimakw e, Hulasokwe ihatetak ma esei desike tyohak ti I, desikeo ana bisa ma syukar ei wen inamreske. Ode selsel ne Hulasokwe wasi inahatetak desike kimin a nggora. Lemadendye mijaga mamak a e, ma ei ne mumu neke msyukar ei wen inamres desy, de kete it a yei kserike. 2 Kali ti ity neke irire rabrita Brit Eras desike ma ttomolu de, kola ne heitlulswo irire rabrita Hulasokwe wasi inahatetak desike ti ity ebnwo matrumat ti wen malosy-loskye, ma ratomolu dakun ne. Keskyede inahatetak desike lema kika kbuan ti ity ebnwo matrumat desikre, kali rtomolu de, keskye lema rtohak brit desy. 3 Dendye ti ity a tatohak ti tun Hulasokwe itanukare ne, ity neke ana tsukar ei wen ana tamres tanor I tike. Klala ti iry a lema matohakare, Hulasokwe tyanuk ma byohe,“Kkweyer ma kuhwab ohe,
‘Iry nekre lema elik ma ana rsukar ei wen ramres ranor Yaw tike.’ ”*
Hulasokwe tyanuk koldyesy, biar ma wen inamres desike kimin kyala kyosy khyehyeike de, kali Hulasokwe syosan wen inamres desy ti kyoat iala lait o lasmyerke khaha ne. 4 Ode ity neke the ohe Hulasokwe syosan sew a inamreske de, neke sew itkwe. Kali rkesy ti Kitab Lanke ti khyali sew itw desy, ma ktyanuk de kbyohe,
“Kyoat kyait sew a itkwe bonyo, Hulasokwe imres ti wasi karya desikre mumu.”*
5 Keskyede mnyenas Kitab Lanke wasi ayat dai nenmo kukesy desy ti kibohe,
“Iry nekre lema elik ma ana rsukar ei wen ramres ranor Yaw tike.”*
6 Dendye the ohe, irire dum a ana rsukar ei wen inamres desy. Klala ti iry a raabrita kmuna brit eras desike ti sir ma ratomolu ne, sir desike lema rsukar ei wen desy, kali lema rtomolu ode lema rtoha Hulasokwe. 7 Kali koldyesike mane Hulasokwe tyenuk sew salikke it de, neke “Senwe.” Ode the ohe ktela desike mlay, kali kyala kyosy sew a iry desikre lema rasukar ei wen desy, ma ainare kieluk-kieluk i, ma ti kyait taras raja Daud, desikeo Hulasokwe tyanuk ti Daud ti khyali sew desy, ma Daud kyesy ti Kitab Lanke, kola ne nam dai kukesy desy ma kbyohe,
“Senweke kolnye mtyomolu Hulasokwe telake, desikemo kete myala ralamire ma ngkora ti I.”*
8 *Heitlulswo Yosua yor iry a Israel-are ma rsukar ei wen inamreske, neke lasmyer Kanaanke ma ramin ti, keskye lasmyer desike lema wen Hulasokwe ihatetak ma ana ramres a ranor I tike. Kali kolnye lasmyer desike wen inamreske desy bain-bain, desikemo ti kyoat taras raja Daudke, Hulasokwe lema tyenuk sew salikke it huruk ma ana rsukar ei wen desy de. 9 Lemadendye kika klelan a nggora ti Hulasokwe wasi iry a ity ne, ma ana tamres a tor I, kola ne Hulasokwe imres ti sew a itkwe ne. 10 *Kali esei desike syukar ei wen inamres desy de, desikeo imres ti wasi karyaare de, kola ne Hulasokwe imres ti wasi karyaare dakun ne. 11 Lemadendye mmya ma talkyaw ity bain-bain ma ana tsukar ei wen inamres desy, ma kete kyal nini irkye it a lema bisa ma syukar ei wen desy, kali lema tyomolu ode lema tyoha Hulasokwe, kola ne ity ebnwo matrumat ti heitlulswo ti lema ratomolu ode lema ratoha Hulasokwe ne.
12 Dendye talkyaw ity ma ttoha Hulasokwe tunanare mumu, kali Hulasokwe tuna nekre malkyakaw ode kyety mormyorifke. Ode tuna nekre mnas a mnas ma kbyilak sorib a mnas ti serit-serit ne dakun. Kali soribke bisa ma kyutw a ity hunw o atit nekre ma ksyobil ity lurnyo bebut nekre mumu dakun. Keskye Hulasokwe tuna nekre bisa ma kyutw sobil ity ralat a kralanare, ode nam tarekanare, ma ti ksyisy hela nam mahunik i nekre, ma ksyusu ma ity ohe nam tarekanare, ode nam tadakin ti ity ralat a kralanare ne, neke eras ta lemamo atyat.* 13 Ode ti lait o lasmyerke khaha ne mumu ne, lema namke it a kihunik a i ti Hulasokwe dakun, de nam nekre mumu ne kimlehleh ma Hulasokwe syeak ode hye mumu de. Ode I neke ana musti mo taktemtem ne tba ti tamdiry ma tsara I, ma it o it neke tlosu ity wait ktela eras o atyat taala ti nuske ktem ne mumu ti I.
Yesus neke ity wait Iry mabaa klen Lan Lahukke ti irkye yor Hulasokwe
14 Lemadendye senweke ity wait Iry a mabaa klen Lan Lahukke ti irkye yor Hulasokwe ne imin de, ma byai wen sra eraske ma ti yor Hulasokwe, neke Yesus a Hulasokwe Anan ne. Lemade mmya ma tkumak malkyakaw ity wait tohtohakke ti Yesuske, ode lema tamres ma tou ity wait tohtohak desy ti I. 15 Kali I neke ity wait Iry a mabaa klen Lan Lahuk I, ma lyobak a ity, kali bisa ma kyoman ode hye nam sai ta sai kidi ti ma ity a lema malkyakaw a ity ne. Kali kyoat imin ti nuske ktem ne ma yola irkye ne, desikeo hurhury sai ta sai bony ne khyury a I, kola ne kihury a ity dakun ne, keskye I neke lema dyi ei lim o sal. 16 Lemadendye waikw o hatnimakw e, kete tamtaut, de mmya ma tsara Hulasow a ihareta kyor rala eraske ne, ma tsambayan ti I. Mamode ti kyoat sew kabei ta kabei bo, ma ity neke nam dum ktyol ma ity, desikeo ana Hulasokwe syusu wasi loblobakke, ode rala eraske ma ity, ma syaluk a ity.