Yesuske lan lahuk I ma byilak Musa
3
Waikw o hatnimakw e! Hulasokwe yilik e ma wasi iry a e de, ode yabuk e dakun de, ma ana msyukar ei wen sra eraske. Lemadendye musti mo mtyeka matamire manenen ti Yesuske, kali Hulasokwe wasi nyaso I, ode I neke Iry a mabaa klen Lan Lahukke ti irkye yor Hulasokwe. Ode I neke, I ne tatohak o taou ti I ne. 2 *Ode Yesus neke tyomolu ode tyoha Hulasow a mailik I ne, kola ne heitlulswo Musa dakun ti itomolu ode itoha Hulasokwe ne, ti kyoat ikarya ma iseak ti Hulasokwe wasi irire mumu ne.3 Keskye Yesus neke byer o tyahal ma irire ralan I ode rleru Anike, ma kbyilak Musa. Kola ne iry a maaka sekye ma isadiri ne, neke irire ralan i ma kbyilak sey a isadiri desy. 4 Kali the ohe sey o sar nekre mumu ne irkye ika ma syadiri. Klala maala nam mamin ti lait o lasmyerke khaha ne mumu ne, neke Hulasokwe I ne imesan iala ne.
5 Ode Musa ne tyomolu ode tyoha Hulasokwe, ti kyoat ikarya ma iseak ti Hulasokwe wasi irire mumu ne, kola dene iry makaryake kyaki-kyaki ne kyarya ma ktyoha wasi amam lanke ibuare, ti amam lanke wasi sekye. Ode Musa wasi karyake ksyusu ti Brit Eras ana Hulasokwe ilosu ti taras a ity ne. 6 Klala Yesus Kristuske† neke Hulasokwe Anan a I, ma tyomolu ode tyoha Ama Hulasokwe, ma ika usu khatu ti Ama-na wasi sekye. Ode iry a ity ne Hulasokwe wasi sey a ity, kolnye kyaki-kyaki ne ity neke tkumak malkyakaw ity wait tohtohakke ti I, ode tamukmuka ity ma tmea ti I, ma takita nam eras ana inal ma ity ne.
Snuratke ma kete ity ralatare ngkora ti Hulasokwe
7 Lemade waikw o hatnimakw e! Mtyomolu mamak a Hulasokwe Memeanke wasi snurat a rakesy ti Kitab Lanke kralake ti kibohe,
“Senwe kolnye mtyomolu Hulasokwe telake,
8 desikemo kete myala ralamire ma ngkora ti I,
kola ebnwo matrumamy ti rasorw a I ne, ode rahury a I ma ikeyer ti wen malosy-loskye ne.
9 Kali Hulasokwe tyanuk ma byohe,
‘Ti soke ebnwo matrumamy nekre rsorw a Yaw, ode rhury a Yaw ma kuka keyer, biar ma ainke hean at (40) maba soke ratos ktela ribun kuala ti sir nekre de.’
10 Khyali desike mane kkweyer a sir, lemade ktwanuk ma kbwohe,
‘Iry nekre kyaki-kyaki ne ti ralat a kralanare ne lema rbuma rtomolu Yaw, ode lema rbuma rtoha Yaw, ode lema rbuma rhe tunakure dakun.’
11 Dendye kkweyer ma kuhwab ohe,
‘Iry nekre lema elik ma ana rsukar ei wen ramres ranor Yaw tike.’ ”*
12 Lemadendye waikw o hatnimakw e, mijaga mamak a e, mamode ti ei neke kete irkye it a ralake atyat ma lema byuma tyohak ti Hulasokwe de, ma khyury ma ila toha Hulasow Mamorif ne. 13 De sew kyaki nekre, kolnye kika klelan ti e a nggora, neke ti sew a rabohe “Senwe,” ei ne musti mo it de yalkyaw it rala, mamode ti ei neke kete kyal nini dum a wasimy lim o sal kyulak de ktyalik a e, ma khyury ma ralamire ngkora ti Hulasokwe. 14 Ode musti mo myala koldyesy, kali ity neke tety ral sasamke tor Kristuske de. Dendye ana tatot nam eras Hulasokwe inal ti Kristuske desy dakun, asal ma tkumak malkyakaw ity wait tohtohakke, ti kyoat nenmo tatohak ti Hulasokwe ne, nini ti kyait teike. 15 Mnyenas nam rakesy ti Kitab Lanke ti kibohe,
“Senweke kolnye mtyomolu Hulasokwe telake, desikemo kete myala ralamire ma ngkora ti I, kola ne ebnwo matrumamy ti rasorw a I ne.”*
16 *Ode esekar ne iry nekre de, ma rtomolu Hulasokwe telake de, keskyede rasorw a I ne de? De lema iry desikre mumu ne, sir ne Musa inety lulkwe ti sir ma rabetik toha Mesir ne e? 17 Ode esekar ne Hulasokwe ikeyer a sir ainke hean at (40) ne de? De lema iry desikre sir ne raala lim o sal, mane kihury ma ramaty rabyatbata ti wen malosy-loskye ne e? 18 Ode esekar ne Hulasokwe ihwab ma tyanuk ti sir ohe, ana lema rsukar ei wen ana ramres ranor I tike ne de? De lema iry desikre sir ne lema ratomolu ode lema ratoha Hulasokwe ne e? 19 Lemadendye kyala kyosy desike the ohe, iry desikre lema bisa ma rsukar ei wen inamres desy, kali lema rtohak ti Hulasokwe.