Snuratke ma tkumak mamamak Brit Eraske
2
Waikw o hatnimakw e, kali Yesuske lan I ma kbyilak nyaso manosy laitare mumu ne, dendye musti mo tkumak mamamak Brit Eras kyalake tatomolu ne, mamode kete nam dum a khyury a ity ma kbyaa kbya nini soso ity toha ity wait tohtohak a tatohak ti Yesuske ne. 2 Kali the ohe Hulasokwe wasi tnyetak heitlulswo inal ti wasi nyaso manosy laitare ne, ma ratanuk ti ity ebnwo matrumat ne, desike ne mlay ode musti mo ttoha. Dendye kolnye esei desike lema tyoha tnyetak desy, de byilak tnyetak desy, desikeo ana Hulasokwe yukun i ma ktyoha totnyo yabi ialanare. 3 Keskye the ohe Brit Eras ti khyali Yesus a iaorif irkye ne, neke eras ma kbyilak tnyetak Musake. Koldyesikemo kolnye lema tlabir o thaduli ma tal Brit Eras desy, desikeo ana Hulasokwe yukun ity mo mdedan ma kbyilak ukun inal ti ity ebnwo matrumat desy. Ity Ebut Yesuske yabrita Brit Eraske a kmuna, maktei o iry matomolu Brit Eraske toha I ne rlosu nam ratomolu desikre ma ity de. Kali koldyesike mane the ohe, Brit Eras desike mlay bain-bain. 4 Ode Hulasokwe dakun o myesan a yala ktelanare ma ksyusu ohe, Brit Eras desike mlay, neke kyosy wasi ktela masalsyalik ialanare, ktyabal wasi nyatos salno salik nekre dakun, ode kyosy wasi ktela kisusu wasi haretke ne, ode kyosy ktela inal hehe malkyakaw manosy Memeanke ti wasi irire ma ktyoha ibuke ne dakun. Nam desikre mumu ne ksyusu ohe, Brit Eras desike mlay.Yesuske mya kola irkye ma yaorif ity toha ity wait lim o sal
5 Waikw o hatnimakw e! Hulasokwe lema yal haretke ti nyaso manosy laitare ma rhareta nuske ktem harharw a ana kima ma aramy mihes ti e ne, de yal haretke ti iry a ity ne, ma ana ity ne thareta nuske ktem harharw ne. 6 Ode the ktela desy, kali ti Kitab Lanke kralake irkye it a tyanuk ti Hulasokwe ma byohe,
“Esei ne irkye, mane museak aramy ne de? Ode esekar ne irkye anan aramy ne, mane muharak aramy ne de?
7 Ode Hulasow O, kola mnwauk irkye ma babaf aramy ti nyaso manosy laitare, keskye lema soso bonyo mbwitil aramy ma atat aramy kola rajake, ode mala aramy ma irire rleru o ralan aramy.
8 Ode mal haretke ma aramy ma aramy mhyareta nam nekre mumu de.”*
Desike kbuanke o Hulasokwe yala irire ma rhareta nam Hulasokwe iala desikre mumu, ma lema lyura sasam ma kyei kserike dakun. Keskyede senweke lenla tatos ktela desy ma kdi ti, ti iry a ity ne. 9 De tatos ktela desy ma kdi ti, ti Yesuske. Kali the ohe, ti kyoat Yesuske ima kola irkye ne, Hulasokwe nyauk I ma babaf I ti nyaso manosy laitare, keskye lema soso bonyo Hulasokwe byitil I ma tyaklulw ti wen manety alanke de, ma irire rleru o ralan I, kali Yesus neke yety ti de yety ma ti masunkwe nini myaty. Lemadendye Yesuske kyoman matmyaty desy de, ma lyitan eta iry a ity ne mumu, ma ksyusu ohe Hulasokwe ralake eras ma ity.
10 Ode Hulasokwe I ne iala lait o lasmyerke khaha ne, ktyabal nam mamin ti krala nekre mumu. Ode nam desikre mumu ne kimin ma klyeru I. Dendye Hulasokwe ryeky ma yor wasi irire ma rmorif ror I ti wasi madelafke. Kali koldyesike mane yohut de, ma Yesuske musti mo yety ti de yety ma ti masunkwe nini myaty. Ode nam Hulasokwe iohut desike mlay, kali kyosy a masunw madan Yesuske desy, dendye Hulasokwe yala Yesuske ma bisa ma ika Iry a Maorif irkye. 11 Desike mane Yesuske yala iry a ity ne ma nelnyely a ity de, ma ity ne Hulasokwe wasi iry a ity. Dendye Yesuske ode iry a iala ity ma nelnyely a ity ne, neke taktemtem ne ity Amatke sasam, neke Hulasokwe. Kali koldyesike mane Yesuske lema myay ma you ity ohe, wai o hatnima ity. 12 Kola dene Yesuske tyanuk ti Hulasokwe ma byohe,
“Ana kabrita O ti waikw o hatnimakw nekre,
neke ana kuora ma klweru O daku sir ti kyoat rawahuk sir.”*
13 Ode Yesuske tyanuk ti irire ma byohe,
“Ana kmwea ti Hulasokwe myesan bo.”
Ode tyanuk huruk ma byohe,
“Yau ne kunor a naman Hulasokwe inal sir ma yaw nekre.”*
14 Dendye Yesuske myai nuske ktem ne kola irkye, kali Hulasokwe anan desikre iry a sir bo, ma ana rmaty. Dendye Yesuske yola irkye ma bisa ma myaty dakun, mamode wasi matmyaty desike kyawelak kyal ngkeskwaure wait uskwe khatuke wasi haretke, ma lema bisa ma hyareta yal matmyatkye ti irkye de. 15 Ode Yesuske yala koldyesy ma yaditi ity toha matmyaty a kihareta iry a ity ne. Kali kyala kyosy heitlulswo ma ti kyait senwe, irire ramtaut ma rmaty. Dendye sew kyaki ne matatwat desike khyareta sir, kola dene amam lanke hyareta wasi atare ne. 16 Kali mlay bain o, Yesuske ima ne lema mya ma syaluk nyaso manosy laitare, de mya ma syaluk Abraham tesnwo natu ity ne. 17 Lemadendye Yesuske musti mo yola irkye bain-bain ti ktela sai ta sai bo, neke yola iry a ity ne ma tahatnima ity, mamode ika Iry a mabaa klen Lan Lahuk ti irkye yor Hulasokwe. Iry mabaa klen Lan Lahuk neke loblobakke kimin a I, ode kyaki-kyaki ne tyomolu ode tyoha Hulasokwe ibuke. Ode ika Iry mabaa klen Lan Lahuk, mamode lyitan eta ity, ma syos ity wait lim o sal ba. 18 Ode kyoat hurhurkye khyury a ity ma tala ma tadi ei lim o sal ne, desikeo I neke bisa ma syaluk ity, ma kete tdi ei lim o sal, kali masunkwe kdyan I, ode hurhurkye kyobak ma khyury a I ma dyi ei lim o sal dakun, keskye lema dyi ei lim o sal.