Atyahy ne ti iry a
Ibrani-nare
Hulasokwe Ananke lan I ma byilak iry a manety Hulasokwe wasi nyanoare
1
Waikw o hatnimakw e! Heitlulswo seure rait mo Hulasokwe yal ksala salno salik nekre ma itun a yor ity ebnwo matrumat nekre, neke kyosy wasi manety nyanoare. 2 Keskye ti taras selsel ne ma nuske ktem ne kyala ma ktei ne, desikeo Hulasokwe itun a yor ity neke kyosy Ananke. Ode Hulasokwe yal Ananke ma yal ma yala nam ribun mamin ti lait o lasmyerke khaha ne mumu. Ode ihatetak ma yal nam iala desikre mumu ti Ananke ma syaa I ti. 3 Ode bisa ma the Hulasokwe wasi madelaf lan ne, ode wasi haret masalsyalik i ne, neke kyosy Ananke, kali Anan neke yola Ama bain-bain. Ode sew kyaki ne Anan neke yal tuna manety haretke ma yal ma tyenuk nam ribun iala nekre mumu, ma klyakut ma ktyoha irekkye bo. Ode kyoat syos irkye wasi lim o sal nekre maktei, desikeo yulak I bai wen sra eraske, ma tyaklulw ti Hulasow Mahareta Lan Lahukke seri wanke.† 4 Desike ne ksyusu ohe Anan desike wasi haretke lan ma kbyilak Hulasokwe wasi nyaso manosy laitare. Ode kmata Hulasokwe inal ti I desike kyety mdedan ma kbyilak kmata inal ti nyaso manosy laitare dakun.Hulasokwe Ananke lan lahuk I ma byilak nyaso manosy laitare
5 Ode the ktela desike, kali Hulasokwe lenla elik ma tyanuk ti wasi nyaso manosy laitare, kola ne itanuk ti Ananke ma ibohe,
“Oi neke Anakw a O, ode senweke kabrita ohe, Amamw a Yaw.”*
Ode Hulasokwe tyanuk huruk ma byohe,
“Yaw neke ana Ama Yaw, ode I neke ana Anakw a I.”*
6 Ode kyoat Hulasokwe yaso Anan sasasam ne ma myai nuske ktem ne, desikeo tyanuk ma byohe,
“Wasikw nyaso manosy laitare mumu neke, musti mo msyakitil ode myou ti Anakkwe.”*
7 Ode Hulasokwe ihes wasi nyaso manosy laitare ne ma byohe,
“Kala wasikw nyaso manosy laitare ma rola ne esumetkye ne, ode rola ne akye kamdirike ne.”*
8 Klala Hulasokwe tyanuk ti Ananke ma byohe,
“O Hulasow O! Oi neke mhwareta wasimw irire kola rajake nini nam ti kiba knaru ne. Ode muhareta wasimw irire ne mlay.
9 Ode mlwobak ktela mlaire, klala mumnisik ktela atyatare.
Ode khyali desy mane, wasimw Hulasow a Yaw ne, kbwitil O ma kswaa simakw ti O ma muka Raja, ma khyury ma ralamkwe kimukmuka kimarmara i. Dendye mety alalan ma kbyilak liamure mumu.”*
10 Ode Hulasokwe tyanuk ti Ananke huruk ma byohe,
“O Amam Lan O, khyehyeike Oi ne mala lasmyerke khaha ne, ode simamw knuanare kimin ti laitke dakun. 11 Ode nam ribun desikre ana kbyaa kbya nini atyat kola rabit a mtuke ti kisu-kimahy ne, ma nam ribun desikre mumu ne ana kiskyui-kiskyay ma lema kimin, klala Oi ne ana mumin nini nam ti kiba knaru ne.
12 Ode ana mala lait o lasmyer ne ma kitayar, kola ne mululuk rabit a mtuke ma mubisak ba ne. Ode ana mala lait o lasmyer harharkwe ma kyeluk a mtuke, kola dene irkye ihonak rabit harharkwe ma kyeluk rabit mtuke ne. Keskyede Oi ne ana wenwenwenamw bo, ode mmworif nini nam ti kiba knaru ne.”*
13 Ode Hulasokwe lenla elik ma tyanuk ti wasi nyaso manosy laitare, kola ne itanuk ti Ananke ma ibohe,
“Mtwaklulw ti serikw wanke, ma kala iry mamnisik Oare ma ana mswosa uno matat.”†*
14 Lemadendye Hulasokwe wasi nyaso manosy laitare ne esekar de? Sir neke Hulasokwe wasi makaryaare, ma yaso sir ma rma ma rsaluk iry a Hulasokwe iaorif sir toha matmyaty manal nini namke ne. Iry a Hulasokwe iaorif sir nekre ana ratot nam eras isosan kita sir ne.