Mmya ma tseak toha iry a heitlulswokre wait tohtohakke ti Hulasokwe ma ttohak kola sir
11
Waikw o hatnimakw e! Tatohak ti Hulasokwe ne, neke kolnye: Kolnye ttohak ti Hulasokwe, desikeo the bain-bain ohe ana tatot nam Hulasokwe ihatetak ma ana inal ma ity nekre, biar ma lenla tatos nam takita nekre dakun. 2 Ode ti heitlulswo khyali ity ebnwo matrumat nekre wait tohtohakke, dendye Hulasokwe you ohe, sir neke mlay a sir.3 *Ode khyali tatohak ti Hulasokwe ne, dendye the ohe, Hulasokwe yal tunanare ma yal ma yala lait o lasmyer ne. Dendye nam ribun Hulasokwe iala ma tatos o tamatakit nekre, neke yala toha nam a lema tamatakitare.
4 *Ode khyali Habel tyohak ti Hulasokwe, dendye nam iabar ti Hulasokwe ne eras ma kbyilak nam a wai ausw Kain iabarke. Ode khyali Habel wasi tohtohak desy, dendye Hulasokwe you nam iabar desy, ma ksyusu ohe Habel neke iry mlakye. Ode biar ma Habel ne myaty soso de, keskye wasi tohtohakke ksyurat snurat erasare ma ity ti taras selsel ne, ma ttoha ma tala kola i dakun.
5 *Kola ne Henokh dakun, ma khyali wasi tohtohakke ti Hulasokwe, dendye imormyorif ne Hulasokwe syalak i bai wen sra eraske ma lema myaty, ma ti lasmyerke khaha ne lema irkye it a myatakit i de. Kali kyoat Hulasokwe lenla syalak i bai wen sra eraske, desyo Hulasokwe tyanuk ohe, Henokh neke yala Hulasokwe ralake ma kimukmuka i. 6 Dendye kolnye irkye lema tyohak ti Hulasokwe, desikeo iry desike lema bisa ma yala Hulasokwe ralake ma kimukmuka i. Kali kolnye esei desike byuma mya ma yait Hulasokwe, desikeo musti mo tyohak ohe Hulasokwe imin. Ode musti mo tyohak dakun ohe, ana Hulasokwe yal ksewanke ti iry a iobak Hulasokwe kyor ralake kusuke ne.
7 *Ode khyali Nuh tyohak ti Hulasokwe, dendye kyoat Hulasokwe lyosu ktela ana madi ti sew ana mama nekre ti i, desikeo Nuh tyomolu ode tyoha Hulasokwe wasi haret desy, dendye ika kabal lan ne ma kola batbatakke, ma yor wasi sekye kralake ramin ti, ma kete rmaty, biar ma Nuh neke lenla yatos ktela ana madi ti desy dakun. Ode khyali wasi tohtohakke ti Hulasokwe, dendye Hulasokwe byohe Nuh neke iry mlakye. Ode Nuh wasi tohtohak desike dakun o ksyusu ohe, iry mamin ti nuske ktem ne sal sir, mane Hulasokwe iukun sir ne, kali lema rtomolu ode lema rtoha Hulasokwe kola Nuh.
8 *Kola ne Abraham dakun, ma khyali wasi tohtohakke ti Hulasokwe, dendye kyoat Hulasokwe yaso i ma tyutuk wasi nuske ma byai lasmyer salik a Hulasokwe ihatetak ti i ma ana wasi ne, desikeo tyomolu ode tyoha nam Hulasokwe itanuk ti i desy ma bya bo, biar ma lema hye lasmyer iba ti desy dakun. 9 *Ode khyali Abraham wasi tohtohakke ti Hulasokwe, dendye myorif kola ne mwakun i ti lasmyer a Hulasokwe ihatetak ti i desy, ode imin ti wasi lasyery inetkye bo. Ode anan Ishak yor ebu Yakub rmorif kola ne mwakun sir dakun, ma ramin ti lasyerire ti lasmyer desy bo. Kali lasmyer a Hulasokwe ihatetak ma inal ti Abraham desy, neke Hulasokwe ihatetak ma yal ti Abraham anan Ishak, ode ebu Yakub dakun. 10 Ode Abraham ineti manenen ralake ma myorif koldyesy, kali ikita nus mamin ti wen sra eraske ma ana kyal nini nam, kali Hulasokwe I ne myesan a syadiri nus desy ma ktyoha wasi rekryekkye.
11 *Ode khyali Abraham wasi tohtohakke ti Hulasokwe, dendye biar ma yor sawa Sara ne enmosw o amosw a sir de, ode Sara dakun o myakw ma lema ika anan, keskyede Hulasokwe yal malkyakakwe ti deruke ma raka anat. Hulasokwe yala koldyesy, kali Abraham tyohak ohe, ana Hulasokwe yala Abraham tesnwo natu ma ribun sir ma ktyoha wasi inahatetak ihatetak inor Abraham desy. 12 *Lemadendye khyali iry sasam ne, neke Abraham ne ma biar ma amosw a i ma iluh de, ma kola dene tenanke kmyaty de, keskyede nenmo ika anan ma tesnwo natu nekre ribun sir kola ne ftunare o laitke, ode laranke ti namwatake, ma lema taki tal aryaritke elik.
13 * Ode iry a ratohak ti Hulasokwe desy, neke rmaty mumu de, biar ma lenla ratot nam Hulasokwe ihatetak ti sir desikre. Keskyede rtohak ohe, nam ribun a Hulasokwe ihatetak ti sir desy, ana yala ma kdi ti. Kola dene rmatakit ktela desikre ma kdi ti de, dendye iry desikre ramukmuka sir ma rakita bo. Ode rtanuk ohe sir desike ramorif ti lasmyerke khaha ne, neke iry salik sir ma cuma mo ramwakun ti lasmyerke khaha ne bo. 14 Iry matanuk maoly desikre ksyusu ohe, sir desike rmaboka wenke it ma ana ramin ti ma rmon ti desy. 15 Keskyede wen ramaboka ma ti ramon ti ne, neke lema kola wen a raba ode ratutuk desy. Kali kolnye ranenenas wen a ratutuk desy nggora, desikeo kika klelan ti sir ma rulak sir bai wen desy huruk. 16 De wen a iry desikre ramaboka ma ramin ti ma ramon ti desy ne, neke ti wen sra eraske ma desy. Neke wen desy eras ma kbyilak wen raba ode ratutuk desy. Desike mane Hulasokwe lema myay ti iry desikre rabohe wait Hulasow a I ne, kali syosan nuske it ti wen sra eraske kita sir de, ma ana ramin ti ma rmon ti.
17 *Ode khyali Abraham wasi tohtohakke dakun, dendye Abraham you ma tyabahunw anan Ishak ma yabar i ti Hulasokwe, ti kyoat Hulasokwe yobak ma hye Abraham wasi tohtohakke. Ode Abraham you ma yabar anan sasasam desy, biar ma Hulasokwe ihatetak ti i ma ana yala Abraham tesnwo natu ma ribun sir ti i. 18 *Kali ti Abraham neke, Hulasokwe ihatetak ma byohe, “Ana tesnwo natumw ribun nekre kyosy Ishak.” 19 Ma biar ma koldyesy dakun, keskyede Abraham you ma yabar Ishak ba ti Hulasokwe bo, kali Abraham tyohak ohe, Hulasokwe wasi haretke ma yala iry mamatire ma rmorif huruk. Lemade kyoat Hulasokwe tyanuk ti Abraham ma kete tyabahunw Ishak, desikeo kola ne Ishak myorif huruk toha matmyatkye ma Abraham yal i huruk.
20 *Ode khyali Ishak wasi tohtohakke, dendye kyoat Ishak amosw a i de, desikeo ihatetak ti anan Yakub ode Esau ohe, ti kibai lulkwe ne ana ratot eras manosy Hulasokwe.
21 *Ode khyali Yakub wasi tohtohakke, dendye kyoat yala ma myaty, desikeo kyumak wasi tektekanke ma tyom a i ma imdiry, ma syambayan ode you ti Hulasokwe, ode iten Hulasokwe ma yal eraske ti Yusuf ananare.
22 *Ode khyali Yusuf wasi tohtohakke, dendye kyoat Yusuf amosw a i ma yala ma myaty, desikeo tyanuk ti iry a Israel-are ohe ana rbetik toha Mesir, ma rulak sir bai lasmyer Kanaanke, ma ktyoha nam Hulasokwe ihatetak ti sirke. Dendye syurat sir ma byohe, “Kala ma kmwaty mane, dendye kolnye kmwaty de, ode kyait ma mbyetik toha Mesir, desikeo mnyenas ma musti mo myal a lurikure ma mbya o myety.”
23 *Ode khyali Musa ena o ama-na wait tohtohakke, dendye lema ramtaut raja Mesirke de rsorw a i ti wasi haretke. Neke wasi haret a iaso Mesir-are ma ratabahunw a Israel-are anat wamwany nenmo radur ti sir nekre. Dendye kyoat radur ti Musa, desikeo Musa ena-na yor ama de ratina i hulke enatelw, kali ratos i o eras i a ksyalik.
24 *Ode khyali Musa wasi tohtohakke, dendye biar ma lyean ma lan a i ti raja Mesirke wasi sekye, keskye lema you ma irire rbohe i neke raja Mesirke anan wamfwetke anan a i de. 25 De yohut ma yety ral sasamke yor Hulasokwe wasi irire, ma byohe lemamo masunkwe kdyan ia yor sir, desike ne eras ma kbyilak imorif mo ikoman senanke yor iry a lim o sal desikre, ti ana sekwe enai ne bo. 26 Ode ryekan huruk ma byohe, lemamo irire rahmway i, kali tyohak ti Iry a Hulasokwe isusu I ma ika Raja ode iaorif irkye ne, desike ne eras ma kbyilak ti kolnye ranal maloly ribun mamin ti Mesir ne ti i ne. Kali myea ti Hulasokwe bo, ma ikita ksewan a ana Hulasokwe inal ti i ne.
27 *Ode khyali Musa wasi tohtohakke ti Hulasokwe, dendye lema imtaut ohe ana raja Mesirke kyeyer a i, de byetik toha Mesir. Ode ineti manenen ralake ma byetik toha Mesir, ma lyakut ba, kali kola dene myatakit Hulasokwe de, biar ma Hulasokwe irkye lema bisa ma myatakit I elik. 28 *Ode khyali Musa wasi tohtohak desy, dendye yaso iry a Israel-are ma rala sew lan Paskahke, ma rtabahunw dombake, ma ral larake ma rritik ti wait holholatare. Rala koldyesy mamode kolnye Hulasokwe wasi nyaso manosy lait a, ana ima ma itabahunw naman wamwany ausure ne mya, desikeo lema tyabahunw iry a Israel-are anat ausure.
29 *Ode khyali iry Israel-are wait tohtohakke ti Hulasokwe, dendye bisa ma rlakut ti Tasi Mermerke kralake ma ti rait seridake, kola dene kele ralakut ti lasmyerke khaha bakbak ne bo. Klala kyoat iry Mesir-are robak ma radoha iry a Israel-are ma rlakut ti Tasi Mermer desy dakun, keskye tasi desike kmya ma kkyahat eta sir, dendye rmaty mumu.
30 *Ode khyali iry Israel-are wait tohtohakke, dendye kyoat rlakut a raklelela nus Yerikhoke sekwe itw, desikeo ruby a Yerikho desikre klyily mumu.
31 Ode khyali Rahab wamfwet atyat desy wasi tohtohakke ti Hulasokwe, dendye ti kyoat iry a Israel-are raso wait seseakke enaru ma rbai nus Yerikhoke, ma ti raka seseak ti Rahab wasi nus desy, desikeo Rahab yal sir ei wasi sekye kralake ma itina sir ti. Ode khyali Rahab itohak ti Hulasokwe desy, dendye iry a Israel-are lema rtabahunw a i, ti kyoat rtabahunw a iry a mamin ti Rahab wasi nus Yerikho desy mumu, kali iry a Yerikho desikre lema rtohak ti Hulasokwe.
32 *Ode kolnye kswaur tunakure ma kuhes iry salik wait tohtohakke mumu ti e dakun, desikeo ana soso a ksyalik. Dendye lema kbwuma kaklol a Gideon, Barak, Simson, Yefta, Daud, Samuel, rtabal iry a manety Hulasokwe wasi nyano idanare dakun, ti wait tohtohakke dakun ti atyahy ne. 33 *Ode khyali iry desikre wait tohtohakke, dendye dum a rala ral bangsa raja-nare rahareta nekre, ode dum a rahareta irire ne mlay, ode dum a Hulasokwe ihatetak nam ti sir, desikeo ratot nam ihatetak ti sir desy, ode dum a rluk sir ei singanare wenatke, keskye singanare lema bisa ma ranat sir. 34 *Ode dum a irire rotuk sir ei ay malehurke kralake, keskye ay desike lema knyaa khyunw a sir. Ode dum a lema rmaty ti kyoat irire ral krakye ma robak ma rhet a rhunw a sir. Ode dum a lema malkyakaw sir, keskye Hulasokwe yalkyaw sir. Ode Hulasokwe yala dum ma rambrebat ma ramdiriat, ma rala ral suldat manosy bangsa salik nekre. 35 *Ode khyali wamfwetare dum a wait tohtohakke, dendye Hulasokwe yala wait iry mamaty ti sey krala nekre ma dum a rmorif huruk de.
Klala iry matohak idanare masunw madan sir neke lema kyaditi i toha sir, ma ti kyal irire roban de rtaba sir khyali wait tohtohakke nini rmaty. Iry desikre rkumak manenen wait tohtohakke biar ma masunkwe kdyan sir dakun, kali rrekan ohe kolnye kyait ma rmaty, desikeo ana rmorif huruk o wen sra eraske, ma ratot mormyorif eras lan-lanke o so. 36 *Ode khyali iry salik wait tohtohakke, dendye dum a irire rahmway sir, ode irire ral oboban raala toha healare iblutare ne, ma roban sir nini ramnu a ramlarit. Ode dum a irire rkumak sir ode ral ranteke ma rdalun sir, ode rluk sir ei sey metmetke kralake. 37 *Ode dum a irire ral hature ma ratdya sir nini rmaty. Ode dum a irire ral ketkyetire ma rkety ohut sir ma rmaty. Ode dum a irire ral kraire ma rhet a rhunw a sir. Ode dum a lema raka wenat ma ramin ti, de ti de ba de ma sir koldyesy bo, ode rhonak rabit raala toha biby o domba iblutare ne, kali lema rait ei sra o hah, de ramin ti masekanke, ode irire rahdawan sir ma masunkwe kdyan sir. 38 Sir desike rba ti de rba ma ti wen a kele ratelin ma soso toha ribunke ne, ode rba ti de rba ma ti huarare dakun. Ode ramin ti hatu kuranare, ode ramin ti bob a kralanare dakun. Keskyede iry desikre sir ne eras sir ma kbyilak iry mamin ti nuske ktem a kibenw ti ktela atyat ribun nekre, dendye nuske ktem ne lema kbyer o ktyahal ma iry matohak desikre ramin ti.
39 Ode iry matohak maoly desikre mumu ne Hulasokwe you ohe, sir neke mlay a sir, kali rtohak ti I. Ode biar ma koldyesy, keskyede iry desikre ral nini rmaty ti rba dakun o, lenla ratot nam a Hulasokwe ihatetak mumu ti sir ne. 40 Kali Hulasokwe syosan nam eraske it kita matohak ity ne de, neke nam desike eras ma kbyilak nam iry matohak desikre bisa ma ratot ti taras heitlulswo ramorif ti nuske ktem ne. Hulasokwe yala koldyesy, ma sir desike rakita ma ror ity ne bisa ma taktemtem mumu ne tatot nam eras ihatetak desy, mamode ity ne mumu ne mlay a ity ti Hulasokwe.