Snuratke ma musti mo tkumak malkyakaw ity wait tohtohak a tatohak ti Yesuske ne ma tamorif ne nelnyely a ity ti Hulasokwe
12
Lemadendye waikw o hatnimakw e, mmya ma tseak toha iry ribun matohak desikre ma ttohak ti Hulasokwe kola sir dakun. Iry desikre rola ne irire ti ratoha inabolkye ne, ma ralkyaw sir ma ra-la ma ti rait teike de. Ode senweke ratos ity ma taboly dakun mane. Dendye musti mo taditi nam a kiadedan a ity nekre ba, ode totuk lakhidik ity wait lim o sal maba etno eta ity nekre ba dakun. Ode musti mo ity neke talkyaw ity ma ttoha inaboly a Hulasokwe iohut ma ity desy, ma ta-la ma ti tait teike. 2 Dendye mmya ma tteka ity matatare manenen ti Yesuske, kali I ne yety lulkwe ma syeruk salke ma ity. I neke yal tohtohakke ma ity, ode yala ity wait tohtohak desy ma ktyabal a ktyabal ma malkyakaw, ma ana ti kyait teike, desikeo ity wait tohtohak desy lema ktyol elik. Ode Yesus neke ineti manenen ralake ma hyar masunkwe nini myaty ti tul masanwalw ike. Ode biar ma irire rahmway I ti imaty ti tul masanwalw ike desy, keskye lema hyaduli elik inahmwai desy. Yesuske yala koldyesy, kali hye ohe ana ti wen sra eraske, desikeo imukmuka imarmara I. Lemadendye senweke tyaklulw ti kader maharetake, ti Hulasokwe wasi kader maharetake kseri wanke ma hyareta. 3 Ode biar ma heit a iry a lim o salare rsorw Yesuske koldyesy ma masunw maoly desikre kdyan I, keskye Yesuske ineti manenen ralake ma hyar masunw lan desikre bo. Dendye waikw o hatnimakw e, ti kyoat masunkwe kdyan e, desikeo musti mo mryekan ti ktela Yesuske iala desike, mamode kete ralamire kakan, de mtyohak manenen ti I bo. 4 Kali biar ma ei neke myalkyaw e ma msyorw a ktela atyat kiobak ma kiala e ma midi ei lim o sal ne ma myaditi ba, keskyede lenla msyorw a ktela atyat maoly desikre nini mmyaty kola Yesuske.5 *Ode kete mimluak Hulasokwe wasi snurat itanuk ma ity ma kialkyaw ity ralat a kralanare ne. Snurat desike kola ne amamke it a syurat ananke ma byu de byohe,
“Anakw o, kete muhmwai ity Ebut Hulasokwe wasi snurat isurat ti o desy.
Ode kolnye tyerik a o, desikeo kete ralamkwe kakan.
6 Kali kolnye ity Ebut Hulasokwe syurat ode tyerik a irkye it, desike ne ksyusu ohe lyobak iry desy ma desy.
Ode kolnye ity Ebutke yoban a irkye it, desike ne ksyusu ohe ity Ebutke yal iry desike ma anan a i ma desy.”
7 Dendye kolnye masunkwe kdyan e, desikeo musti mo mineti manenen ralamire, kali Hulasokwe yajar e ma desy. Hulasokwe yajar e koldyesy, neke kola ne amamke isurat ode iterik ananke ne. Ode the ohe, ti kabei ta kabei bo amamare rsurat ode rterik anatare. 8 Keskye kolnye Hulasokwe lema syurat ode tyerik a e, kola ne Hulasokwe iajar ananare mumu ne, desike ne ksyusu ohe ei neke Hulasokwe lema anan elik a e. 9 Ode biar ma ity amat mamin ti lasmyerke khaha ne dakun o rsurat ode rterik a ity kyor obobanke, keskye tetap ma taalan a sirke bo. Dendye kolnye talan a sir koldyesy, apalai ity Amat mamin ti wen sra eraske de! Musti mo talan ode tou ti I ma kbyilak ity amat mamin ti lasmyerke khaha ne. Khyali desike mane, bisa ma tatot mormyorif manal nini namke. 10 Kali ity amatare ti lasmyerke khaha ne rsurat ode rterik ity ma ktyoha ktela rarekan o eras nekre, ti kyoat a kakan a ity nggora ne. Klala kyoat Hulasokwe syurat ode tyerik ity, desike ne eras ma ity ma kbyilak, mamode bisa ma nelnyelnyely a ity kola I dakun. 11 Ode ti sew kabei ta kabei bo, ma Hulasokwe isurat ode iterik ity desy, desike ne lema kyala ity ralatare ma ksyenan, de kyala ity ralatare ma ksyal. Keskye Hulasokwe isurat ode iterik ity desy, neke kyajar ity ma the toha ktela desy. Kali ana kalyauke o ktela desike kyala ity ma tala ktela mlaire, ode kyala ity ralatare ma ktyeka i.
12 *Lemadendye waikw o hatnimakw e, kete mkyoman makolkye, de myalkyaw ralamire bain-bain ma mtyohak ti Yesuske, kola ne iry a mabolkye ne, ma musti mo yalkyaw sima lema malkyakaw desikre, ode yalkyaw suskwatu mamlulurw desikre. 13 Ode musti mo mijaga e ma mlyakut ti sal a mlakye,* mamode iry a wait tohtohakare lenla malkyakaw ti Hulasokwe ne, bisa ma ratos ma rtoha e ma rlakut ti sal a mlay desy dakun, ma wait tohtohakare ktyabal a ktyabal ma malkyakaw ti Hulasokwe, ma kola e dakun.
14 Ode musti mo myalkyaw e ma mmyorif ti inaka eraske myor esei ta esei bo. Ode musti mo myalkyaw e ma mimorif ne nelnyely a e ti Hulasokwe. Kali kolnye esei desike wasi mormyorifke lema nelnyely ti ity Ebut Hulasokwe, desikeo ana lema myatakit a I. 15 Lemade mijaga mamak a e, ma ti ei ne mumu ne kete irkye it a ila toha wasi tohtohakke ti Yesuske, ma syanyeta Hulasokwe rala eras a isusu ma ity ne de. Kali iry a masanyeta Hulasokwe ne, ana yala ktela lema erasare ma khyury ma kdyaul e, ma ei neke wasimy mormyorifare lema eras dakun. Kola ne kbaike it ti kisukar iry matohak e ne,† ma kyety atyatke ti e ma mdyi ei lim o sal. 16 *Ode mijaga mamak a e ma kete myala kola wamfwetare ranor wamwanire it de hyury a it koi-kay ma rala ktela atyatare ne. Ode mijaga mamak e ma kete myola Esau, ma lema yalan Hulasokwe ti kmata ausw Hulasokwe inal ti ike, de kyeta wasi kmata ausw desy ti wai amury Yakub, khyali kotw a mbinan sasam ne bo. 17 *Ode mhye ohe kyoat yala koldyesy maktei bonyo, Esau ne byuma yal a yolik eras desy huruk toha ama, keskye ama-na lema you, kali lema kika ksala de, ma ama-na yal a yolik eras desike ti i de, biar ma syer daku ama dakun.
Ana tbai huar Sionke o wen sra eraske mane, dendye kete tsanyetat Hulasokwe kola ne ity ebnwo matrumatare ti kyoat rba ti rait I o huar Sinaike ne
18 *Waikw o hatnimakw e, kyoat mbyuma mmya ma myait Hulasokwe, ei neke lema myola iry a Israel-are ma heitlulswoke rbai huar Sinaike, ma ti rait Hulasokwe ti so. Ma ti huar desike akye klyehlehur ti, ode kelerakokke lan a ksyalik ma kkyahat eta huar desy, ktyabal a eskwe mety ksyalik ti huar desy, ma khyury ma kyety matatwaut a ksyalik. 19 Ode kyoat desy dakun o rtomolu strompetke ma kdudu, ma kryutuk a sir. Ode rtomolu Hulasokwe telake dakun, dendye ral ralat a kralanare bain-bain ma raten toha Musa ma myesan a itun a yor Hulasokwe bo, kali ramtaut ma Hulasokwe itun a yor sir, 20 *kali ramtaut haret dai manosy tel desy ti kibohe, “Kolnye ti ei ne, ma esei ta esei bo, ma ti kyal heal sai ta sai bo, ma biar ma kyen huar desy bo, desikeo musti mo myal hature ma myatdya a mhyunw a i.” 21 *Ode ktela iry a Israel-are raatos ti huar desike kyala sir ma ramtaut ma ksyeman sir, ma ti kyal Musa dakun o tyanuk ma byohe, “Kumtaut ma ksyeman yaw ksyalik ma kamlulurw mane.”
22 Keskyede waikw o hatnimakw e, ei neke lema myola sir ti heitlulswo ma mbyai huar desy, de mmyai huar Sionke ma ne. Kali Yesuske syeruk sal harharkwe ma ity de, ma bisa ma ti tait Hulasokwe ma tsara I. Desike ne kola dene tmai Huar Sionke ma desy. Huar Sion neke nus a Hulasow Mamorifke imin tike, neke nus a Yerusalem mamin ti wen sra eraske. Ode ti soke minal a myor nyaso manosy laitare, neke ribun sir a ksyalik, ma rawahuk sir ti desy, ma ramukmuka ramarmara sir ma rleru Hulasokwe Anike. 23 Ode ti soke, miwahuk e a myor iry a matohak mamuna ma Hulasokwe inal sir mumu ma anan elik sir ne, neke iry a Hulasokwe ikesy anitare o wen sra eraske ne de. Ode ti soke minal a myor Hulasow a maukun tun ti irire mumu ne. Ode minal a myor iry a heitlulswo ramaty ne, neke smwaknatare, neke iry a kyoat ramorif ti nuske ktem ne, neke mlay a sir ti Hulasokwe ne, ma senweke Hulasokwe yala sir ma nelnyelnyely a sir de. 24 *Ode ti soke minal a myor Yesuske. I neke byaa klen ti irkye yor Hulasokwe ti tnyetak harharkwe, kali myaty ma larake kibo ti tul masanwalw ike. Ode Yesuske lara desike nelnyely ma kbyilak Habel larake. Kali Habel larake ne kyatela kyosy lasmyerke kralake ti Hulasokwe, ma Hulasokwe yoil ti iry a matabahunw a i ne, klala Yesuske larake ne kisos irire wait lim o sal ba ne.
25 *Lemadendye musti mo mijaga mamak e ma kete msyanyetamy Hulasokwe, ma lema mbyuma mtyomolu tun itanuk ti e nekre de. Kali heitlulswo kyoat iry a Israel-are lema rbuma rtomolu Musa, ti kyoat Hulasokwe inal Musa ma itun a yor sir ma iterik sir ti nuske ktem ne, desike ne kihury ma Hulasokwe iukun sir ne. Dendye kolnye iry desikre lema bisa ma ra-la toha wasi ukunke, apalai ity ne de? Ana Hulasokwe yukun ity o mdedan ma kbyilak, ti kolnye lema tabuma tatomolu I ne, ti kyoat itun a yosy wen sra eraske ma ity ne. 26 *Ode kyoat heitlulswo Hulasokwe itun a yor iry a Israel-are ti huar Sinaike desy, desikeo Hulasokwe tela desike kyoha lasmyerke khaha desy. Keskyede ihatetak de, ma byohe, “Ana kala lait o lasmyer ne ma kele roha klatsam huruk, neke lema lasmyerke khaha ne kmyesan bo, de ktyabal a laitke dakun.” 27 Ode tunke khatu Hulasokwe ibohe “klatsam huruk” desy, neke ksyusu ohe, nam sai ta sai iala ti lait o lasmyerke khaha ne, ana yala ma kele roha, ma kiskyui-kiskyay. Hulasokwe yala koldyesy mamode nam sai desike lema kyoha i ma kiskyui-kiskyay, desikemo nam desike ne ana kimin a nggora, ma kyal nini nam ti kiba knaru ne.
28 Lemadendye waikw o hatnimakw e, musti mo tsalak eraske ba ti Hulasokwe, kali yal ity ma taka iry a Hulasokwe ihareta kola Rajake ne ti kiba knaru ne, ma wasi kmata Raja desike ne lema ohoh elik. Lemade mmya ma tsambayan ma tou ti Hulasokwe, ma ktyoha ksala taalan I ne ode tamtaut I ne. Ma desike ne kyala ralake ma kimukmuka i. 29 *Kali ity wait Hulasow ne, wasi haretke ma yukun irire, kola akye ti kihnutuk nam sai ta sai bony ne.