Tamorif ne musti mo tala Hulasokwe ralake ma kimukmuka i
13
Waikw o hatnimakw matohak e, musti mo kyaki-kyaki ne it de lyobak a it. 2 *Ode musti mo myal mwakunare ei wasimy sey kralanare, biar ma lema mhye sir dakun. Kali irire dum a ral mwakunare ei wait sey kralanare, keskyede lema rhe ohe, mwakun ranal sir ei wait sey krala desikre, neke nyaso manosy laitare sir desy. 3 Ode musti mo mnyenas ma msyaluk iry mamin ti sey metmetke kralake ne, ma miktemtem a mkyoman masunw madan sir desy dakun, kola dene kolnye raluk e koldyesy ei sey metmetke kralake dakun ne. Ode musti mo mnyenas ma msyaluk iry a irire rahdawan sir ma masunkwe kidan sir ne, ma miktemtem a mkyoman masunw madan sir desy dakun, kola dene kolnye irire rahdawan e koldyesy dakun ne.4 Ode iry masaare mumu ne musti mo rajaga mamak wait insa desikre ma klyakut eras, de kete wamwankye ti yenaf yor wamfwet salik dete lemamo yenaf yor irire sawatare, ode wamfwetke dakun o kete ti yenaf yor wamwany salik dete lemamo yenaf yor irire laitare. De musti mo saw o lay ne renaf ti wen sasamke bo. Kali iry a maldoture mumu ne ana Hulasokwe yukun sir. Ode wamfwetare ranor wamwanire ma it de yala tot atyat ti it koi-kay ne, neke ana Hulasokwe yukun sir mumu dakun. 5 Ode kete mryekan ti kubanke kmyesan bo, de lemamo mryekan ohe nam mamin ti e nekre mumu ne kyoat ti e de, dendye mimukmuka e. Kali Hulasokwe tyanuk de, ma byohe,
“Ana lema klwura e elik ma mmyesan,
ode ana lema ktwutuk e ma mmyesan dakun.”*
6 Lemadendye ity neke tares ma ttanuk ma tbohe,
“Hulasokwe syaluk yaw, dendye lema kumtaut.
Ode ana lema kumtaut ti sai ta sai a iry mamin ti nuske ktem ne bisa ma raala ma yaw ne, kali Hulasokwe yor yaw.”*
7 Ode waikw o hatnimakw matohak e, musti mo mnyenas iry manety lulw ti ity wait kubkubak a tatohak ti Yesuske ne, ti ain maba sokre raabrita Hulasokwe tunanare ti e desy. Neke musti mo mryekan mamak ti wait ktela eras ramorif mo raalanare nini ramaty ne, ma msyeak toha wait tohtohak ratohak ti Yesuske ne, ma myala kola dakun. 8 Kali Yesus Kristuske neke lema ihihi I elik, kyala kyosy heitlulswo, ode selsel ne, ma kyal nini nam ti kiba knaru ne. 9 Dendye kete mlyura ma irire dum a rakakmet a e a kyor nam salno salik raajar a lema mlay desikre, ma khyury ma lema mtyoha sal a mlakye. Ma ti kyal tnyetak raajar ti kihali kotw o abw desikre, kali ktela kotw o abw desikre lema kika kbuan ma ksyaluk e, ma ralamy kralanare malkyakaw ti Hulasokwe. De eras lan-lanke, neke Hulasokwe I ne ialkyaw ralamy kralanare kyor rala eraske ne. 10 Kali Yesuske myaty ma lyitan eta ity toha ity wait lim o sal. Ode kyosy wasi ktela iala desy, desikeo I neke yola dene nam tanal ma taabar ti Hulasokwe ne, ti lat raeh heal tike. Keskyede ti iry matohak ti tnyetak Musake a nggora ne ma rabohe heal rabar desikre kisos wait lim o sal ba ne, iry desikre lema bisa ma ratot eras a tatot toha Yesuske ti imaty desy.
11 *Kali heitlulswo ti Hulasokwe wasi Lasyerkye, neke iry mabaa klen Lan Lahukke ti irkye yor Hulasokwe ne, musti mo rtabahunw heal ma ral laratare ma rety ba ti rritik ti Wen Nelnyelnyely Lahukke kralake, ma ksyos irire wait lim o sal ba. Klala heal ratabahunw desy, ror i ma rbetik toha hnuke, ma rbai hnuke kserike ti reh a i nini iahw. 12 Kola ne Yesuske dakun, ma yety ti de yety ma ti masunkwe nini byetik ma bya ti myaty ti nus Yerusalemke kserike, ma lara mabo ei hahke desy, neke ksyos wasi irire wait lim o sal ba, ode kyala sir ma nelnyely a sir. 13 Lemade mmya ma ttoha Yesuske wasi ktela ibetik ma iba ti imaty o nus Yerusalemke kserike ne. Neke kbuanke o iry a Yahudi ity ne, musti mo ttutuk ity wait tnyetak o ktela kubkubak a lema kiaorif ity desy, ma ttoha Yesuske bo, biar ma irire rahmway ity ti tatohak ti I ne, kola ne irire rahmway I dakun ne. 14 Kali ti lasmyerke khaha ne lema kika wen ma tamin ti ma tmon ti. De ity wenat a tamaboka ma ti tamon ti ne, neke so wen sra eraske.
15 Lemadendye khyali Yesuske imaty ma ilitan eta ity ne, kola ne yeluk nam raabar ma kisos ity wait lim o sal ba ne, dendye mmya ma kyaki-kyaki ne tleru Hulasokwe Anike, ode tou ohe I neke ity wait Hulasow a I. Desike ne kola ne tabar nam ti Hulasokwe ma desy. 16 Ode kete mimluak ma myala ktela erasare, ode msyaluk iry salik a kitol ti sir nekre kyor nam mamin ti e nekre. Kali ktela taala desikre dakun o kola ne taabar nam ti Hulasokwe ne, ma kyala Hulasokwe ralake ma kimukmuka i ma desy.
17 Ode musti mo mtyomolu ode mtyoha iry manety lulw ti ity wait kubkubak a tatohak ti Yesuske ne, ode myou ma mtyoha wait haretare. Kali kyaki-kyaki ne rajaga e ti wasimy tohtohakke ma malkyakaw ti Hulasokwe, ma kyait sekwe desikeo rba ti rsara Hulasokwe ma rlosu wait karya desy ti I. Dendye musti mo mtyomolu ode mtyoha sir, ma bisa ma rkaryaa kyor ralat mamukmuka iare. Klala kolnye lema mtyomolu ode lema mtyoha sir, desikeo ana ralatare ksyal, ma khyury ma wait karya desike ana lema kyety eraske ti e.
18 Waikw o hatnimakw e, aramy mhye ohe ktela aramy miala nekre, aramy myala kyor ara ralamy kusunare, ode aramy dakun o aramy mbyuma aramy myala ktela mlaire ti sai ta sai bo. Dendye kuten ma kyaki-kyaki ne mnyenas ma msyambayan ma aramy. 19 Ode kbyilak ti desy dakun o, kal ralakkwe kralake ma kuten toha e, ma msyambayan ma miten Hulasokwe ma yaditi nam maba etno eta yaw nekre, ma bisa ma kutot a ksala mlakye it ma adoko kbwa ti kait a e huruk ti desy.
Sambayan o nyano manosy lyakwe
20 Waikw o hatnimakw e! Yesuske myaty ma lara mabo ei hahke desy, neke kyeluk nyatos ohe, tnyetak Hulasokwe inal ma ity ne, neke nenmo kimin mane, ma kyal nini nam ti kiba knaru ne. Ode khyali lara desy, dendye Hulasokwe yala ity Ebut Yesuske ma myorif huruk, ma ika usu khatu ma ity, kola ne ika Iry lan lahuk ti iry majaga dombanare, ma I neke ijaga wasi domba ity ne. Dendye kuten toha Hulasow a manal wasi inaka eraske ma ity ne, 21 ma yal eras sai ta sai bo, ma yal ti e ma ksyaluk a e, ma myala sai ta sai mo ktyoha ibuke. Ode kuten ma Hulasokwe kyarya ti ity ralat a kralanare mumu, ma tamorif ne mo tala Hulasokwe ralake ma kimukmuka i, neke khyali Yesus Kristuske isaluk a ity ne. Lemadendye mmya ma taktemtem ne tleru Yesus Kristuske Anike nini nam ti kiba knaru ne! Amin.
22 Waikw o hatnimakw e, kuten toha e ma mtyomolu mamamak wasikw a snurat kukesy ti atyahy ne mumu, kali wasikw atyahy ne lema narnarw.
23 Ode kbwuma klwosu ti e ma mhye ohe, ity wait Timotius neke byetik toha sey metmetke kralake de. Ode kolnye myaa mtew ma yait yaw, desikeo ana ara miru mbya ti msyeak a e ti desy.
24 Ode mlyosu wasikw salamke ti wasimy iry manety lulw ti ity wait kubkubak a tatohak ti Yesuske ne mumu, ode ti Hulasokwe wasi irire mumu ne ti desy dakun. Ode ity wait matohak manosy propinsi Italiake rosa wait salamke ti e dakun.
25 Ode kuten ma eras manosy Hulasokwe kyor miktemtem mumu ti desy.
Teike desy de.