Zeezi ní ká fɩɛlɛ́ tápʋl Nyuutɩna
6
1 Zuwifiwa fɩɛlɛ́ tápʋl* oro, Zeezi rɩ́rʋ́ karmɩbɛlɛ pí ŋmɛ́nɔ aá va, ɓa ŋmɛ́nɔ mʋ́ zʋ oŋparɛ́ sɩɛrʋ.
Ɛ́ nɛ́ Zeezi karmɩbɛlɛ sɩɛ́ coki ɓɩɛ ná, a káŋwɔ́ nɛ́ŋsa ŋmʋʋmɛ aá tʋŋ.
2 Rɩ Farɩzɩɛ̃wa* náŋa mɩŋ ráŋ, ɛ́ nɛ́ ɓa bʋ́lwɔ́ rɩ́ bʋlɛ́:
«Beé rí, ɩ́ ɩ́'a nyɛ; á kíŋse sɩɛrʋ, ŋmɛ́nɔ toó, rɩ́ nɛrɔ tʋŋ Zuwifiwa fɩɛlɛ́ tápʋl, ká ɩ́ tʋŋ.»
3 Ɛ́ nɛ́ Zeezi bʋl pɔ́wɔ́ bʋlɛ́:
«Kal oro, losu há kéŋ Davidi* rɩ́rʋ́ nɩɛ ʋ ɔ́ʋ́ ná, ɩ́ wʋ́ʋ́ kármɛ́ ɓó?
4 Davidi mʋ́ɔ́ zʋ Wɩɩsɛ táŋtɛ* jaa sɩɛrʋ, a pi dɩpɛ́ŋwa ná ɓa há píé pá Wɩɩsɛ, a coki dí, ká pii pɔ́ʋ́ har nɩɛ má ɓa dí.
Ká, á kíŋse sɩɛrʋ, ŋmɛ́nɔ toó rɩ́ nɩyɔ́ɔ́ dí ɛ́ dɩpɛ́ŋwa, rɩ Wɩɩsɛ vʋk'ɔɔsa dʋŋɔ rá.»
5 Zeezi baa bʋl pɔ́wɔ́ bʋlɛ́:
«Nɩbiino Bio* ní ká fɩɛlɛ́ tápʋl Nyuutɩna.»
Zeezi dúóri nɛ́sʋwɩ́ tɩ́na Zuwifiwa fɩɛlɛ́ tápʋl
6 Zuwifiwa fɩɛlɛ́ tápʋl* oro báá, Zeezi zʋ́ Zuwifiwa cémejaa,* a karmɛ Wɩɩsɛ wɩ́ɛ́ aá pá nɩɛ, rɩ báálɔ oro má mɩŋ ráŋ.
Ɛ́ báálɔ néduu sʋ́wɔ́.
7 Ɛ́ nɛ́ Wɩɩsɛ kɛŋzɩnna rɩ́ Farɩzɩɛ̃wa ná há mɩŋ ráŋ, ɓa sɩɛ́ kɩ́kɩ́ɛ́lɛ Zeezi mí bʋɔbʋɔ rɩ́wɔ́ ná, rʋʋ váárɛ nɛrɔ fɩɛlɛ́ tápʋl, rɩ́wɔ́ tɩŋ ráŋ mɛ́ bʋlʋ́ zɔ́kɛ́ wɩ́ɩ́.
8 Zeezi sɩɛ́ há ɩ̃́wɔ́ sabɩŋsɛ, ɛ́ nɛ́ ʋ bʋl báálɔ ná nɛ́sɛ há sʋ́wɛ́ rɩ́ bʋlɛ́:
«Isi dahá, a cɩ́ nɩɛ ná wuu sɩ́sɩ́ɛ́nnʋ́wa ráŋ ná.»
Ɛ́ nɛ́ báálɔ ná isi cɩ́ dahá.
9 Ká Zeezi sɩɛ́ bʋl pɔ́wɔ́ bʋlɛ́:
«Ŋŋ́ á rɩ́ŋ bɔ́sɩ́wa wɩ́ɩ́ rɛ́:
Á kíŋse kɛnɔ sɛ́ rɩ́ fɩɛlɛ́ tápʋl, ráá a wérí ní yáá, ʋ sɛ́ ráá a bɔ́ŋbɔ́ŋ nɛ́?
Nɛrɔ mɩɩsɛ laatɛ́ nɛ́ weré yáá, nɛrɔ ɓʋ́ɩ́ nɛ́ weré?»
10 Zeezi há bʋ́l ɛ́ ko tenni, ʋ bél nɩɛ ná wuu balá baláwa, ká baa bʋl nɛ́sʋwɩ́ ná tɩ́na rɩ́ bʋlɛ́:
«Kánɩ́ nɛsɛ tɩ́ɛ́nɛ.»
Ʋ kaa tɩ́ɛ́nɛ, nɛ́sɛ ná de dúóri.
11 Amá nɩɛ ná cɔ́ɛ́ wɩ́ɔ́ kɩ́ŋkáŋ, ɓa vʋ́vʋʋrɛ rɩ́wɔ́ ná, ɓa háá pi wɩ́ɩ́ ná rɩ́ɩ́ tʋŋ Zeezi mí.
Zeezi tʋ́ɔ́sʋ́ karmɩbɛlɛ fí rí bɛllɛ
12 Ɛ́ tɛ́ŋ mɛ́, Zeezi zɩ́ paalɔ nyúú rʋ́ʋ́ cʋɔlɛ Wɩɩsɛ; a cʋɔlɛ Wɩɩsɛ tɩ́taŋ wuu tɔ́ɔ́ pʋl.
13 Tɔ́ɔ́ há pʋ́lɛ́, ʋ yɩ́rʋ́ karmɩbɛlɛ ɓa kóú rí; ʋ tʋ́ɔ́sɩ́wɔ́ sɩɛrʋ nɩɛ fí arɩ́ bɛllɛ, rɩ́wɔ́ nɛ́ ɔ́ʋ́ nɩtʋmɛ́* rʋ́ʋ́ tʋŋ, rɩ́wɔ́ mʋ́ bʋl Wɩɩsɛ wɩ́ɛ́ aá pá nɩɛ.
14 Ɛ́ nɩtʋmɛ́ ʋ há lɩ́sɛ́ nɛ́ nyɛ:
Sɩmɔŋ,* Zeezi há kené aá yɩ́rɛ Pɩɛrɛ,*
rɩ́rʋ́ maábio Aŋdɩrɩ,
Zakɛ* rɩ́ Zaŋ,* Filipi rɩ́ Bartelemi.
15 Matie rɩ́ Toma, Alfe bio Zakɛ* rɩ́ Sɩmɔŋ* ɓaá yɩ́rɛ
kajáŋtɩɩnɔ,
16 Zakɛ* bio Ziidi arɩ́ Zɩdaasɛ* há lɛ́ Isikariyo,
nɛrɔ ná há bɩ́rmɛ́ Zeezi kaapáárɔ.
Zeezi kármɛ́ nɩɛ, ká dúóri pʋɔllɛ
17 Ɛ́ nɛ́ Zeezi rɩ́rʋ́ nɩtʋmɛ́ ná lɛ paalɔ ná nyúú tuwi, a cɩ́ tíé dɩpaŋtaŋɩ́ oro, rɩ Zeezi hatɩŋna ɓɩkana má mɩŋ ráŋ.
Nɩkana bamma má fa mɩŋ ráŋ, a lɛ Ziide dɩtɩ́llɛ wuu, arɩ́ Zerizalɛmɛ, náŋa lɛ mʋʋ nʋɔ tɔ́nɛ:
Tiiri* rí Sɩdɔŋ.*
18 Ɓa kúó rɩ́wɔ́ zesi Zeezi wɩ́bʋlɛ́ nɛ́, ká rʋ́ʋ́ dúóríwó.
Nɩɛ ná kaŋtɔmɔ há zɩ́nɛ́ a káŋwɔ́ aá wálmɛ, ʋ dúóríwó.
19 Nɩɛ wuu sɩɛ́ de wɩ́wálmɛ rɩ́wɔ́ tɩkɛ Zeezi mí, bee wɩ́ɛ́ rɩ ɓa nɛ́ tɩ́kʋ́ mɛ́, dóé de lʋ́ʋ́ mɛ́ nɛ́, aá dúóríwó wuu.
Zeezi bʋ́l wérnáárɔ rɩ́ wɩlnáárɔ wɩ́ɛ́
20 Ɛ́ nɛ́ Zeezi bélú karmɩbɛlɛ ká bʋlɛ́:
«Ɩ́ ná wér, ɩ́ nɩɛ ná há ká súmmé,
bee wɩ́ɛ́ ɩ́ nɛ́ tɛ Wɩɩsɛ kuótɔ́ɔ́ ná!
21 Ɩ́ ná wér, ɩ́ nɩɛ ná losu há kené mʋ́l néé mí,
bee wɩ́ɛ́ ɩ́ sɩ́ vɔksɛ!
Ɩ́ ná wér, ɩ́ nɩɛ ná háá wié mʋ́l néé mí,
bee wɩ́ɛ́ ɩ́ sɩ́ mɔŋ.
22 Rɩ nɩbííne ní bɛ́rɩ́wa, a vɛ́ɩ́wa,
aá tʋ́ksɩ́wa káá bʋ́lɩ́wa bɔ́ŋbɔ́ŋ,
aá zɔ́kɩ́wa yɩr,
ɩ́ há ká Nɩbiino Bio* karmɩbɛlɛ wɩ́ɛ́,
ɩ́ ɓɩɛ́na ná wér.
23 Rɩ ɛ́ kúó rʋʋ péríwa, ɩ́ jɩ́jʋɔsɛ kɩ́ŋkáŋ,
bee wɩ́ɛ́ ɩ́ sɩ́ ná zilé ɓɩzeno Wɩɩsɛ zʋ́ɔ́ mɛ́.
Ɓa naabálwa faá bɛŋsɛ Wɩɩsɛ wɩ́laabʋlla ɛ́ tɩɩ tɩɩ nɛ́.
24 Amá ɩ́ ná wɩɩla, ɩ́ nɩɛ ná há kéŋ ɓɩɛ,
bee wɩ́ɛ́ ɩ́ wér ɓóŋ ní ɛ́.
25 Ɩ́ ná wɩɩla, ɩ́ nɩɛ ná há vɔ́ksɛ́ mʋ́l néé mí,
bee wɩ́ɛ́ losu sɩ́ kánɩ́wa!
Ɩ́ ná wɩɩla, ɩ́ nɩɛ ná háá mɔmɛ́ mʋ́l néé mí,
bee wɩ́ɛ́ sazɔkɔ́ sɩ́ péríwa, ɩ́ sɩ́ wi, a hiĩni!
26 Ɩ́ ná wɩɩla, rɩ nɩbííne wuu níí bɩ́ɩ́wa mɛ́,
bee wɩ́ɛ́ ɓa naabálwa fa pí ɛ́ tɩɩ tɩɩ nɛ́,
aá tɩŋ nɩɛ ná há sɛ́ ɓa ká Wɩɩsɛ wɩ́laabʋ́llá,
káá nyɛ nyɩɛnnɛ mɛ́.»
Ɩ́ cóllíwa dɩŋdɔma
27 «Amá ŋ bʋ́lɔ́ aá pɛ́ɩ́wa, ɩ́ nɩɛ ná háá zésíŋ wɩ́bʋlɛ́, ɩ́ cóllíwa dɩŋdɔma; ɩ́ a wérí pá nɩɛ ná há bɛ́rɩ́wa.
28 Ɩ́ sʋl Wɩɩsɛ bárka pá nɩɛ ná há bʋ́rɛ́ aá héíwa mɛ́, ká sʋl Wɩɩsɛ rʋ́ʋ́ sáŋ nɩɛ ná háá bɛ́ŋsɩ́wa mɛ́.
29 Rɩ nɛrɔ ŋmɔ́wɩ́ tɛ́ŋgbɛlɩ́ mɛ́, ɩ ka nɔ́ŋɔ bɩ́rɛ rʋ́ʋ́ ŋmɔwɛ.
Rɩ nɛrɔ kení kapóóti la, ɩ wúrkí gɛwie má pɔ́ʋ́.
30 Rɩ nɛrɔ wuu sʋ́l óŋ ɩ dɩhɩ̃́, ɩ pɔ́ʋ́, ká rɩ nɛrɔ lɛ́ɩ́ omo má, ɩ sɩ́ bɔ́sɩ́ la.
31 Ʋ ná há súúré ní ká:
ɩ́ háá jɛɛ́ rɩ́ nɩɛ a wɩ́ɛ́ ná pɛ́ɩ́wa, ɩ́ má a ɛ́ wɩ́ɛ́ pá nɩɛ.
32 «Rɩɩ́wa nɛ́ có nɩɛ ná há cóíwa dʋŋɔ nɛ́, ʋ ɛ́ mɔhɔ̃́ rɩ́wɔ́ bɩ́ɩ́wa mɛ́ rɛ́?
Aɩ́, nɩɛ ná má há wɩ Wɩɩsɛ tɩŋ, ɓa má có nɩɛ ná há cówó rí!
33 Rɩɩ́wa á wérí, aá pá nɩɛ ná há á wérí aá pɛ́ɩ́wa dʋŋɔ nɛ́, ʋ ɛ́ mɔhɔ̃́ rɩ́wɔ́ bɩ́ɩ́wa mɛ́ rɛ́?
Aɩ́, bee wɩ́ɛ́ nɩɛ ná má há wɩ Wɩɩsɛ tɩŋ, ɓa máá tʋŋ ɛ́ nɛ́!
34 Rɩɩ́wa pííwa ɓɩɛ aá kɩŋ nɩɛ ná, ɩ́ há kéŋ yɩɛla rɩ ɓa sɩ́ túmíwa dʋŋɔ nɛ́, ʋ ɛ́ mɔhɔ̃́ rɩ́wɔ́ bɩ́ɩ́wa mɛ́ rɛ́?
Aɩ́, nɩɛ ná há wɩ Wɩɩsɛ tɩŋ, ɓa má píwó ɓɩɛ aá kɩŋ nɩɛ ná há wɩ Wɩɩsɛ tɩŋ náŋa nɛ́, a makɛ rɩ́wɔ́ túŋ ɛ́ tɩɩ tɩɩ pɔ́wɔ́.
35 Amá ɩ́ ná ɛ́ há mɔhɛ̃́ rɩ́ɩ́wa a:
Ɩ́ cóllíwa dɩŋdɔma, ɩ́ a wérí pɔ́wɔ́; ɩ́ pííwa ɓɩɛ kɩŋ nɩɛ, ká sɩ́ yɩɛla kánʋ́ rɩ ɓa sɩ́ túŋ.
Rɩɩ́wa tʋ́ŋ ɛ́, ɩ́ túme sɩ́ a ɓɩzéní, ká rɩ́ɩ́wa nɩɛsɛ Wɩɩsɛ ná há kɛ onni wuu bɛlɛ, bee wɩ́ɛ́ Wɩɩsɛ á wérí aá pá nɩɛ ná há wɩ die ɛ̃, arɩ́ nɩbɔma wuu ní.
36 Ɛ́ wɩ́ɛ́, ɩ́ fɩ́fá nɩɛ susu, anɛ ɩ́ Ana Wɩɩsɛ háá fá nɩɛ susu ɛ́.
Sɩ́ɩ́ náŋa sarɩ́ya dí
37 «Ɩ́ sɩ́ nɩɛ sarɩ́ya dí, a makɛ rɩ́ Wɩɩsɛ má sɩ́ɩ́wa sarɩ́ya dí.
Ɩ́ sɩ́ wɩ́zɔkɛ́ píí cɩ́ɩ́nɛ nɩɛ, a makɛ rɩ́ Wɩɩsɛ má sɩ́ɩ́wa wɩ́zɔkɛ́ píí cɩ́ɩ́nɩ́wa.
Ɩ́ pi nɩɛ wɩ́zɔkɛ́ cɛ́wɔ́, a makɛ rɩ́ Wɩɩsɛ má pííwa wɩ́zɔkɛ́ cɛ́ɩ́wa.
38 Nɩɛ háá ja onni ná ɩ́ rɩ́, ɩ́ aa pɔ́wɔ́, a makɛ rɩ́ Wɩɩsɛ má pɛ́ɩ́wa onni ná ɩ́ háá jɛɛ́.
Wɩɩsɛ sɩ́ pɛ́ɩ́wa kɩ́ŋkáŋ, rɩ́ɩ́wa sɩ́ wóllí ka má tɩɩ.
Oŋ'máŋsɛ ná ɩ́ há píé máŋsɛ aá pá nɩɛ, Wɩɩsɛ sɩ́ pi ɛ́ oŋ'máŋsɛ tɩɩ a máŋsɛ pɛ́ɩ́wa.»
39 Ká Zeezi baa máŋsɛ sɩ́ŋsʋ́ɔ́lɔ pɔ́wɔ́ a bʋlɛ́:
«Nyʋmmɔ wʋ́ʋ́ nyʋmmɔ nɔ́ŋɔ wuó tɩɛsɛ, ɛ́ rá?
Rʋʋ á ɛ́, ɓa wuu bɛllɛ sɩ́ ɓallɛ butuo mí.
40 Karmɩbíí wuu wʋ́ʋ́ karmɩ'áná kɛ; amá rɩ karmɩ'áná nɛ́ pí wɩ́ɛ́ ná wuu karmɩbio há mɔhɛ̃́ rʋ́ʋ́ máŋsɛ, a makɛ karmɩbio é, ʋ rɩ́rʋ́ sɩ́ mɔ náŋá.
41 «Ɛrɛ́ rɛ́ ɩ sɩ́ wólli bel ná mɔ́wie ɩ nɔ́ŋɔ sɩ́ɩ́ mɛ́, ká dol mɩ́nɩ́ tɩɩ sɩ́ɩ́ mɛ́, ká ɩ wʋ́ʋ́ ná?
42 Ɛrɛ́ rɛ́ ɩ sɩ́ wólli bʋ́lɩ́ nɔ́ŋɔ rɩ́ bʋlɛ́:
‹Ŋ maábinɔ́ŋɔ, ná mɔ́wie ní ɩ sɩ́ɩ́ mɛ́, lóŋ kaa lɩ́sɛ tá,› ká dol mɩ́nɩ́ tɩɩ sɩ́ɩ́ mɛ́, ká ɩ wʋ́ʋ́ ná má tɩɩ?
Ɩ ká nɩbínʋŋmɔ́ŋyɔ́ɔ́, sɩ́ɩ́ tɩɩ nyɩ́sʋ́, la sɩ́ɛ́ lɩ́sɛ dol ná há mɩ́nɩ́ tɩɩ sɩ́ɩ́ mɛ́ kɛ́rɛ́, ká makɛ rɩ́ɩ́ sɩ́ɛ́ nɩ́ná ráŋ wérí, rɩ́ɩ́ wólli mɔ́wie ná há mɩ́nɩ́ maábinɔ́ŋɔ sɩ́ɩ́ mɛ́ a lɩ́sɛ.»
Tuu rɩ́rʋ́ nɔnɔ
43 Zeezi baa sʋ́ɔ́lɛ bʋlɛ́:
«Tuwero wɩ nɔŋbɔmɔ́ nɔŋ, ká tubɔmɔ má wɩ nɔŋweré nɔŋ.
44 Ɓaá tɩŋ tuu nɔŋ mɛ́ nɛ́, a zɩ́mʋ́ tuduo.
Ɓa wɩ pirnɔnɔ́ ɓɔ́rɛ sokóle nyúú, ɓa wɩ pɩlɛ máá ɓɔ́rɛ saamɔ nyúú.
45 Nɩweró a wɩ́were ní, bee wɩ́ɛ́ ʋ sɩɛrʋ wéró, amá nɩbɔmɔ máá a wɩ́bɔmɔ nɛ́, bee wɩ́ɛ́ ʋ sɩɛrʋ bɔ́mɔ́.
Wɩ́ɛ́ ná há sú nɩbííno sɩɛrʋ, ɓa nɩ́ɩ́ lʋ́ʋ́ nʋɔ mɛ́.»
Jɩsɔɔra bɛllɛ sɩ́ŋsʋ́ɔ́lɔ
46 Zeezi báá ha sʋ́ɔ́lɔ́ bʋlɛ́:
«Beé rí tɛ ɩ́ yɩ́yɩ́rɩ́ŋ, Nyuutɩna, Nyuutɩna, ká wɩ́ɛ́ ná ŋ há mákɛ́ pɛ́ɩ́wa ɩ́ wʋ́ɔ́ tɩŋ?
47 Nɛrɔ ná wuu há kóŋ rí a zésíŋ wɩ́bʋlɛ́, a tɩ́ŋwɔ́, ŋ sɩ́ makɛ tɩ́na há nɩhɩ̃́ ɛ́, a pɛ́ɩ́wa.
48 Ʋ tɩ́na nɩhɩ̃́ anɛ nɛrɔ háá sɔ́ʋ́ jaa, a huri mʋ́l ɓɩlúŋí a tuwi yakɛ bʋ́ɩ́ mɛ́, a sɩɛ́ bil jaa ná mʋ́l, a sɔ nɛ́.
Ɛ́ nɛ́ nyii gíri, a sú polnaa a lɩɩ waalɛ ɛ́ jaa, amá ʋ wɩ zíksé, bee wɩ́ɛ́ jaa ná tɩ́na fa sɔ́ʋ́ wérí.
49 Amá nɛrɔ ná há zésíŋ wɩ́bʋlɛ́ ká wʋ́ɔ́ tɩ́ŋ, ʋ tɩ́na nɩhɩ̃́ anɛ nɛrɔ há bíl jaa mʋ́l tíé kuŋkulo daha a sɔ nɛ́, ká wɩ mʋ́l húré.
Ɛ́ nɛ́ nyii gíri, a sú polnaa a lɩɩ waalɛ ɛ́ jaa, mʋ́l ná tɩɩ tɩɩ mɛ́, rʋʋ mʋ́ʋ́nɔ́ a yɛ́rkɛ búkébúké.»