Zeezi bʋ́l Wɩɩsɛ wɩ́ɛ́ sɩɛrʋ wérnáárɔ wɩ́ɛ́
5
1 Zeezi há ná nɩkaŋdɔ́ɔ́ ná, ʋ zɩ́nɔ́ ké paalɔ nyúú, ʋ karmɩbɛlɛ tuu pérú,
2 ká ʋ sɩɛ́ wúrú nʋɔ mɛ́ aá karmɛ nɩɛ ná a bʋlɛ́:
3 «Nɩɛ ná tɩɩ há ɩ́ɔ̃́ zɩŋ rɩ́ ɓaá yáárʋ́, ɓa ná wér,
bee wɩ́ɛ́ ɓa nɛ́ tɛ Wɩɩsɛ kuótɔ́ɔ́ ná.
4 Nɩɛ ná háá wié, ɓa ná wér,
bee wɩ́ɛ́ Wɩɩsɛ sɩ́ mʋ́ʋ́rɩ́wɔ́ sɩ́mɩɩrʋ.
5 Nɩɛ ná há pɔ́rɛ́, ɓa ná wér,
bee wɩ́ɛ́ Wɩɩsɛ sɩ́ a rɩ́ tíé ɔ́wɔ́ liwe.
6 Nɩɛ ná háá hɩɛ̃nɛ Wɩɩsɛ tékétéké wɩ́ɛ́, aá hɛ́sʋ́ wɩ́ɛ́,
ɓa ná wér,
bee wɩ́ɛ́ Wɩɩsɛ sɩ́ a rɩ́wɔ́ nówó wɩ́jaalɩ́.
7 Nɩɛ ná háá fá susu, ɓa sɩ́ ná wér,
bee wɩ́ɛ́ Wɩɩsɛ sɩ́ fɔ́wɔ́ susu.
8 Nɩɛ ná sɩɛrʋ há pʋ́mmɔ́, ɓa ná wér,
bee wɩ́ɛ́ ɓa sɩ́ ná Wɩɩsɛ.
9 Nɩɛ ná háá jɛɛ́ rɩ́ tɛŋfɩ́ɛ́l mɩ́ŋwɔ́ kílo wuu,
ɓa ná wér,
bee wɩ́ɛ́ ɓa sɩ́ káŋwɔ́ aá yɩ́rɛ Wɩɩsɛ bɛlɛ.
10 Nɩɛ ná háá tɩŋ Wɩɩsɛ tékétéké aá ná wálmɛ,
ɓa sɩ́ ná wér,
bee wɩ́ɛ́ ɓa nɛ́ tɛ Wɩɩsɛ kuótɔ́ɔ́ ná.
11 «Rɩ nɩɛ nɩ́ɩ́ tʋ́ksɩ́wa, aá wálmɩ́wa, a nyɛ nyɩɛnnɛ bʋl wɩ́tɩɛnnɛ rɩ́wɔ́ duó wuu aá héíwa mɛ́, ŋ wɩ́ɛ́, ɩ́ ná wér.
12 Ɩ́ jɩ́jʋɔsɛ kɩ́ŋkáŋ, bee wɩ́ɛ́ ɩ́ sɩ́ ná ker ɓɩzeno Wɩɩsɛ zʋ́ɔ́ mɛ́.
Bee wɩ́ɛ́ tésíé mí, ɓa fa wálmɛ Wɩɩsɛ wɩ́laabʋlla* ná há lɛ́ɩ́wa sɩ́ɛ́ ɛ́ tɩɩ nɛ́.
Ɩ́ nɩhɩ̃́ tíé nyúú yɛsɛ rɩ́ dúníé pʋmmɔ nɛ́
13 «Ɩ́ nɩhɩ̃́ tíé nyúú yɛsɛ nɛ́.
Amá rɩ yɛsɛ nɛ́ lɩ́ɩ́sɛ́, ɓaá a ɛrɛ́ rɛ́ rʋ́ʋ́ ŋmɔ́ŋsɛ?
Ʋ báá wɩ wɩ́'aalɩ́ wuu kené, ɓaá pii yoo tá pʋmmɔ nɛ́, nɩɛ nʋɔsɛ aá va.
14 «Ɩ́ nɩhɩ̃́ dúníé pʋmmɔ nɛ́.
Tɔ́ɔ́ ná há mɩŋ paalɔ nyúú, ʋ wɩ wuó féŋsi.
15 Ɓa wɩ caanɔ́ nyɩ́kɛ́ a pi táása aá cú, amá ɓaá pii sakɛ caanɔ́ dɩsakɩ́ nɛ́, ʋ pʋmmɔ caanɛ nɩɛ ná wuu há mɩŋ jaa sɩɛrʋ.
16 Ɛ́ wɩ́ɛ́, ɩ́ lo rɩ́ɩ́wa pʋmmɔ caanɛ nɩɛ ɛ́, a makɛ rɩ́wɔ́ ná wɩ́were ná ɩ́ háá ɛɛ́, a píŋsíwa Ana Wɩɩsɛ ná há mɩŋ bána nyúú.
Zeezi kármɛ́ Wɩɩsɛ kíŋse wɩ́ɛ́ pá nɩɛ
17 «Moyizi* má há pʋ́ŋsɛ Wɩɩsɛ kíŋse* ná, arɩ́ Wɩɩsɛ wɩ́laabʋlla há kármɛ́ wɩ́ɛ́ ná, ɩ́ sɩ́ bɩ́ɩ́nʋ́ rɩŋ kúó ríŋ gírwó ní.
Ŋ wʋ́ɔ́ giré mí ní kúé, amá ŋ kúó rɩ́ŋ lɩ́sɩ́wɔ́ mʋ́ʋ́la tɩɩ nɛ́.
18 Taŋá nɛ́ ŋ bʋl aá pɛ́ɩ́wa, bána rɩ́ tíé dáánɛ mɛ́, Wɩɩsɛ kíŋse ná pʋ́ŋsɩbíwie arɩ́wɔ́ pʋ́ŋsɛ nyɩnɛ balá má tɩɩ waá giri, a kaá ja dúníé isé.
19 Ɛ́ wɩ́ɛ́, nɛrɔ ná wuu há sɩ́ vɛ wɩ́máŋsɛ ná sɩɛrʋ ɓɩwɩɛla nɔ́ŋɔ, ká pi ɛ́ karmɛ nɩɛ ɓa má tɩŋ ɛ́, ʋ tɩ́na sɩ́ a nɩwié Wɩɩsɛ kuótɔ́ɔ́ ná mɛ́.
Amá nɛrɔ ná wuu há sɩ́ tɩŋ wɩ́máŋsɛ ná, ká píwó karmɛ nɩɛ ɓa má tɩ́ŋwɔ́, ʋ tɩ́na sɩ́ a nɩpíŋí Wɩɩsɛ kuótɔ́ɔ́ ná mɛ́.
20 Ɩ́ lo rɩ́ŋ bʋl pɛ́ɩ́wa, rɩɩ́wa tékétéké ní wɩ Wɩɩsɛ kɛŋzɩnna* rɩ́ Farɩzɩɛ̃wa* kɛ, ɩ́ wɩ Wɩɩsɛ kuótɔ́ɔ́ ná sɩɛrʋ wuó zʋ.
Zeezi bʋ́l cɔwɩɩlɔ́ wɩ́ɛ́
21 «Á naabálwa máŋsɩ́rá wɩ́ɛ́ ná, ɓa há bʋ́lɛ́ pɔ́wɔ́ a bʋlɛ́:
‹Sɩ́ nɛrɔ ɓʋ́.
Nɛrɔ ná wuu há ɓʋ́ nɛrɔ,
ɓaá dúú sarɩ́ya nɛ́.›
22 Amá ŋ é bʋ́lɔ́ aá pɛ́ɩ́wa, nɛrɔ ná wuu há dé dí cɔwɩɩlɔ́ ʋ maábinɔ́ŋɔ nyúú, ɓa sɩ́ dúú sarɩ́ya; nɛrɔ ná má wuu há dé tʋ́ksʋ́ maábinɔ́ŋɔ bʋlʋ́ ká oŋyɔ́ɔ́, ɓa sɩ́ kánʋ́ lɛ Zuwifiwa sɩ́dííre sɩ́ɛ́; nɛrɔ ná má wuu há dé tʋ́ksʋ́ maábinɔ́ŋɔ bʋlʋ́ ká nɩcʋʋlɛ́, ʋ rɩ́ níŋjaa* zʋɩ nɛ́ cɛ́rɛ́.
23 «Ɛ́ wɩ́ɛ́, rɩɩ nɛ́ kéŋ zilé mʋ́ koro* sɩ́ɛ́ rɩ́ɩ́ pá Wɩɩsɛ, rɩ́ɩ́ líísí tɩɩ ráŋ, rɩɩ maábinɔ́ŋɔ kéŋ wɩ́ɩ́ arɩ́rɩ́,
24 ɩ lóí zilé ná koro ná sɩ́ɛ́ ráŋ, ká mʋ́ rɩ́ɩ́ rɩ́rɩ́ maábinɔ́ŋɔ ná bʋl hé náŋá mɛ́ kɛ́rɛ́, ká rɩ́ɩ́ zɩŋ ko píí zilé ná pá Wɩɩsɛ.
25 «Rɩ nɛ́ŋ rɩ́ yɩ́rɩ́ sarɩ́ya mɛ́, rɩ́ɩ́wa hé náŋá mʋ́mʋ́, pi fól a rɩ́ɩ́wa bʋl hé náŋá mɛ́ ŋmɛ́nɔ mɛ́ ɓalaɓala, a makɛ rʋ́ʋ́ sɩ́ɩ́ káá pɔsɛ rɩ́ɩ́ mʋ́ sarɩ́yadííro sɩ́ɛ́, rɩ́ sarɩ́yadííro píí hé polísi nɛ́sɛ mɛ́, rɩ́wɔ́ tɔ́ɩ́ bɩnajaa.
26 Taŋá nɛ́ ŋ bʋl aá pɛ́ɩ́, rɩ ɓa tɔ́ɩ́, rɩɩ wɩ kɩŋ ná ɓa há pɛ́ɩ́ wuu túmé tenni, ɩ waá lɛ.
Zeezi bʋ́l cɔ́rmʋ wɩ́ɛ́
27 «Á naabálwa máŋsɩ́rá wɩ́ɛ́ ná, ɓa há bʋ́lɛ́ pɔ́wɔ́ a bʋlɛ́:
‹Sɩ́ cɔ́rmʋ tʋ́mʋ́.›
28 Amá ŋ é bʋ́lɔ́ aá pɛ́ɩ́wa, báálɔ ná wuu há bélú nɔ́ŋɔ háálɔ a hɩ́ɛ̃́nʋ́, ʋ tɩ́na zɩŋ rʋ́ʋ́ sabɩɩna mɛ́, ʋ tʋ́ŋ cɔ́rmʋ nɛ́ ɛ́ arɩ́ háálɔ ná.
29 Rɩɩ néduu sɩ́ɩ́ nɛ́ yíkí rɩ́ɩ́ aá zɔkɛ Wɩɩsɛ mɛ́, ɩ kánʋ́ lɩ́sɛ yoo tá dɩbólí.
Ɩ tɛŋ naŋdaa balá há yʋ́ksɛ́ nɛ́ cúcó, ɩ há kení tɛŋ nʋɔ mɛ́ a mʋ́ zʋ níŋjaa.*
30 Rɩɩ néduu nɛ́sɛ nɛ́ yíkí rɩ́ɩ́ aá zɔkɛ Wɩɩsɛ mɛ́, ɩ cókú yoo tá dɩbólí.
Ɩ tɛŋ naŋdaa balá há yʋ́ksɛ́ nɛ́ cúcó, ɩ há kení tɛŋ nʋɔ mɛ́ a mʋ́ zʋ níŋjaa.
Zeezi bʋ́l háhuõsi wɩ́ɛ́
31 «Á naabálwa máŋsɩ́rá wɩ́ɛ́ ná, ɓa há bʋ́lɛ́ pɔ́wɔ́ a baa bʋlɛ́:
‹Nɛrɔ ná wuu háá já rʋ́ʋ́ kírú háálɔ, rʋ́ʋ́ pʋ́ŋsɛ háhuõsi kɛnɔ pɔ́ʋ́ ká kiri.›
32 Amá ŋ é bʋ́lɔ́ aá pɛ́ɩ́wa, báálɔ ná wuu há kírú háálɔ, rʋʋ nɛ́ to cɔ́rmʋ wɩ́ɛ́, ʋ yíkí ɛ́ háálɔ hé cɔ́rmʋ mɛ́ nɛ́ ɛ́; ká nɛrɔ ná má há já háhuõsí, ʋ má tʋ́ŋ cɔ́rmʋ nɛ́ ɛ́.
Zeezi bʋ́l ŋmɩ́ɛ́sɛ wɩ́ɛ́
33 «Á naabálwa máŋsɩ́rá wɩ́ɛ́ ná, ɓa há bʋ́lɛ́ pɔ́wɔ́ a baa bʋlɛ́:
‹Ɩ há ŋmɩ́ɛ́sɛ́ bʋlɩ́ sɩ́ a wɩ́ɩ́ ná, sɩ́ ló rʋ́ʋ́ tá,
amá a wɩ́ɩ́ ná ɩ há ŋmɩ́ɛ́sɛ́ pá Nyuutɩna bʋlɩ́ sɩ́ a.›
34 Amá ŋ é bʋ́lɔ́ aá pɛ́ɩ́wa, ɩ́ sɩ́ ŋmɩ́ɛ́sʋ́ má wuu.
Ɩ́ sɩ́ bána yɩr mɛ́ ŋmɩ́ɛ́sʋ́, bee wɩ́ɛ́ Wɩɩsɛ kuóɓasa nɛ́.
35 Ɩ́ sɩ́ tíé má yɩr mɛ́ ŋmɩ́ɛ́sʋ́, bee wɩ́ɛ́ Wɩɩsɛ naasɛ dɩsakɩ́ nɛ́.
Ɩ́ sɩ́ Zerizalɛmɛ má yɩr mɛ́ ŋmɩ́ɛ́sʋ́, bee wɩ́ɛ́ kuózeno Wɩɩsɛ tɔ́ɔ́ nɛ́.
36 Sɩ́ɩ́ nyúú má yɩr mɛ́ ŋmɩ́ɛ́sʋ́, bee wɩ́ɛ́ ɩ wɩ́ɩ́ nyúpʋ́na balá má wuo a ʋ tʋ́tʋ́ksɛ, ɛ́ rá má ʋ bíbíri.
37 Ɩ́ lo rɩ́ɩ́wa óó a óó; rɩ́ɩ́wa aɩ́ má a aɩ́.
Ŋmɩ́ɛ́sɛ súúre é, ʋ lɛ́ Sɩtaanɛ* nɛ́.
Zeezi bʋ́l bɔ́ŋbɔ́ŋ aa túme wɩ́ɛ́
38 «Á naabálwa máŋsɩ́rá wɩ́ɛ́ ná, ɓa há bʋ́lɛ́ pɔ́wɔ́ a bʋlɛ́:
‹Rɩ nɛrɔ lɩ́sɩ́ sɩ́ɩ́, ɩ má lɩ́sɛ tɩ́na sɩ́ɩ́;
rɩ nɛrɔ gírí nyɩl, ɩ má gíri tɩ́na nyɩl.›
39 Amá ŋ é bʋ́lɔ́ aá pɛ́ɩ́wa, rɩ nɛrɔ ɛ́ɩ́ bɔ́ŋbɔ́ŋ, ɩ sɩ́ bɔ́ŋbɔ́ŋ áá túŋ tɩ́na.
Rɩ nɛrɔ ŋmɔ́wɩ́ néduu tɛ́ŋgbɛlɩ́ mɛ́, ɩ ka nágʋɔ tɛ́ŋgbɛlɩ́ má bɩ́rɛ pɔ́ʋ́ rʋ́ʋ́ ŋmɔwɛ.
40 Rɩ nɛrɔ kení mʋ́ rɩ́wɔ́ díí sarɩ́ya, a lɛ́ɩ́ gɛwie pɔ́ʋ́, ɩ wúrkí kapóóti má pɔ́ʋ́.
41 Rɩ nɛrɔ fɩ́kɩ́ rɩ́ɩ́ kánʋ́ va kííló balá, ɩ kánʋ́ va kííló bɛllɛ.
42 Rɩ nɛrɔ sʋ́lɩ́ óŋ, ɩ pɔ́ʋ́; rɩ nɛ́ŋ já rʋ́ʋ́ kɩ́mɩ́ óŋ, ɩ sʋ́ʋ́ vɔ́mʋ́.
Zeezi bʋ́l dɩŋdɔma cólle wɩ́ɛ́
43 «Á naabálwa máŋsɩ́rá wɩ́ɛ́ ná, ɓa há bʋ́lɛ́ pɔ́wɔ́ a bʋlɛ́:
‹Cóllí nɔ́ŋɔ, ká bɛ́rɩ́ dɩŋdɔmɔ.›
44 Amá ŋ é bʋ́lɔ́ aá pɛ́ɩ́wa, ɩ́ cóllíwa dɩŋdɔma.
Ɩ́ sʋl Wɩɩsɛ bárka pá nɩɛ ná háá wálmɩ́wa,
45 a makɛ rɩ́ɩ́wa ɛ́ɩ́wa Ana Wɩɩsɛ ná há mɩŋ bána nyúú bɛlɛ, bee wɩ́ɛ́ ʋ ɔ́ɔ́ wɩɩsɛ poŋ aá pá nɩwere rɩ nɩbɔma wuu ní, a a duóŋ má kúko nɩtékétékéwa rɩ́ nɩɛ ná há to tékétékéwa wuu yɩr mɛ́.
46 Ɛ́ wɩ́ɛ́, rɩɩ́wa nɛ́ có nɩɛ ná há cóíwa dʋŋɔ nɛ́, ɩ́ sɩ́ túme yɩ́ɛ́lʋ́ Wɩɩsɛ rɩ́.
Loŋpolaara máá tʋŋ ɛ́ tɩɩ nɛ́.
47 Rɩɩ́wa maábináŋa dʋŋɔ nɛ́ rɩ́ɩ́wa bʋ́bɔ́llɛ, ʋ to wɩ́nyáná.
Nɩɛ ná há wɩ Wɩɩsɛ tɩŋ, ɓa máá tʋŋ ɛ́ tɩɩ nɛ́.
48 Ɛ́ wɩ́ɛ́, ɩ́ lo rɩ́ɩ́wa wɩ́ɛ́ wuu cɛ́rɛ cɩ́ wérí, anɛ ɩ́ Ana Wɩɩsɛ há mɩŋ bána nyúú wɩ́ɛ́ wuu há cɛ́rɛ́ cɩ́ wérí ɛ́.