Zeezi máŋsɛ hájaasɛ rɩ́ háhuõsi wɩ́ɛ́
19
1 Zeezi há bʋ́l wɩ́ɛ́ nyáŋ ko tenni, ʋ lɛ́ Galiile* dɩtɩ́llɛ a mʋ́ Ziide dɩtɩ́llɛ, Zʋrdɛŋ fuo daarɛ́.
2 Nɩɛ ɓɩkana tɩ́ŋʋ́ mɛ́; ʋ dúóri pʋɔllɛ ɓɩkana ráŋ.
3 Farɩzɩɛ̃wa* sɩɛ́ ko rɩ́wɔ́ díŋ Zeezi, a sɩɛ́ bɔ́sʋ́ bʋlɛ́:
«Ŋmɛ́nɔ mɩ́nɔ́ rɩ́ báálɔ kírú háálɔ wɩ́ɩ́ wuu mí rí?»
4 Ɛ́ nɛ́ Zeezi sɛ́:
«Ɓa há pʋ́ŋsɛ ɛ́ Wɩɩsɛ Kɛnɔ sɩɛrʋ, ɩ́ wʋ́ʋ́ kármɛ́ ɓó?
Ɓa pʋ́ŋsɔ́ bʋlɛ́:
‹Púle mí, Wɩɩsɛ má nɩbííne:
báálɔ mɩŋ, háálɔ mɩŋ.›
5 Ɛ́ nɛ́ Wɩɩsɛ sɛ́:
‹Ɛ́ wɩ́ɛ́, báálɔ rɩ́ háálɔ sɩ́ lɩ́sɩ́wɔ́ tɩɩ,
ɓa ánáwa rɩ́wɔ́ maáwa mɛ́,
a má píwó wɩ́ɛ́ hé balá, a mɩŋ náŋá mɛ́,
a makɛ rɩ́wɔ́ bɛllɛ ná a nɩbíŋ balá.›
6 Ɛ́ wɩ́ɛ́, ɓa báá to nɩɛ bɛllɛ, amá ɓa ká nɩbíŋ balá nɛ́.
Nɩɛ ná sɩɛ́ Wɩɩsɛ há kené hé náŋá mɛ́ a tɩŋ hájaasɛ mʋ́l mɛ́, ʋ báá wɩ mɔhɛ̃́ rɩ́ nɛ́ŋ wuu káŋwɔ́ caksɛ náŋá mɛ́.»
7 Ɛ́ nɛ́ Farɩzɩɛ̃wa ná baa bɔsɛ Zeezi bʋlɛ́:
«Beé rí tɛ Moyizi* fa sɛ́:
‹Rɩ báálɔ nɩ́ɩ́ já rʋ́ʋ́ kírú háálɔ, rʋ́ʋ́ pʋ́ŋsɛ háhuõsi kɛnɔ a pɔ́ʋ́, ká kiri.› »
8 Ɛ́ nɛ́ Zeezi sɛ́:
«Ɩ́ sahaksɩ́ wɩ́ɛ́ nɛ́ tɛ Moyizi pɛ́ɩ́wa ŋmɛ́nɔ rɩ́ɩ́wa kíríwa háála.
Rɩ ɛ́ rá, dúníé púle mí, ɛ́ toó.
9 Ɛ́ wɩ́ɛ́, ŋ bʋ́lɔ́ aá pɛ́ɩ́wa, báálɔ ná wuu há já háálɔ, ʋ to hácɔ́rmʋ́ ká ʋ kiri tá ká ja nɔ́ŋɔ, ʋ́ʋ́ zɩŋ rʋ́ʋ́ tʋ́ŋ cɔ́rmʋ nɛ́ ɛ́.»
10 Ɛ́ nɛ́ Zeezi karmɩbɛlɛ sɛ́:
«Rɩ nyɛ é ní, rɩ báálɔ wɩ háálɔ jɛ́ɛ́ nɛ́ cúcó.»
11 Ɛ́ nɛ́ Zeezi bʋl pɔ́wɔ́ bʋlɛ́:
«Nɩɛ wuu wɩ wɩ́ɛ́ nyáŋ wuó tɩŋ, rʋʋ nɛ́ to nɩɛ ná Wɩɩsɛ há pɔ́wɔ́ dóé rɩ́wɔ́ wólli tɩŋ.
12 Wɩ́ɛ́ káŋ aá kɛ́rɛ báála rɩ́wɔ́ sɩ́ háála já:
náŋa, ɓaá lʋ́lwɔ́ ɛ́ nɛ́, ɓa wɩ háála wuó ja.
Náŋa má, ɓaá férwó ní, ɓa wɩ háála wuó ja; ká náŋa má tɩŋ Wɩɩsɛ kuótɔ́ɔ́ ná wɩ́ɛ́, a má wɩ háálá ja.
Nɛrɔ ná wuu há wo wɩ́ɛ́ nyáŋ aá saŋ, rʋ́ʋ́ tɩ́na saŋ.»
Zeezi hé bárka pá heŋbiisi
13 Ɛ́ har rɩ́ mɛ́, nɩɛ kɛ́sɛ́ heŋbiisi kaa ko Zeezi rí, rʋ́ʋ́ púú nɛ́ŋsa tɩ́kwɔ́ mɛ́, ká sʋl Wɩɩsɛ pɔ́wɔ́.
Ɛ́ nɛ́ Zeezi karmɩbɛlɛ bɛsɛ nɩɛ ná mɛ́.
14 Ɛ́ nɛ́ Zeezi bʋl pɔ́ʋ́ karmɩbɛlɛ ná bʋlɛ́:
«Ɩ́ lo rí heŋbiisi kóŋ rí, ɩ́ sɩ́wɔ́ mɛ́ kɛ́rʋ́; bee wɩ́ɛ́ nɩɛ ná há nɩhɩ̃́wɔ́ nɛ́ kéŋ dɩkéni Wɩɩsɛ kuótɔ́ɔ́ ná sɩɛrʋ.»
15 Ká pɔ́ʋ́ nɛ́ŋsa tɩ́kwɔ́ mɛ́ a sʋl Wɩɩsɛ pɔ́wɔ́, ká col.
Zeezi bʋ́l ɓɩɛ tɩ́náwa wɩ́ɛ́
16 Ɛ́ nɛ́ báálɔ oro tuu peri Zeezi a bɔ́sʋ́ bʋlɛ́:
«Karmɩ'ana, bee wɩ́wérí rí mɔhɛ̃́ rɩ́ŋ a, ká ná mɩɩsɛ ná há waá tenni?»
17 Ɛ́ nɛ́ Zeezi sɛ́:
«Beé rí tɛ ɩ bʋ́bɔ́sɩ́ŋ wɩ́were ɛɛ wɩ́ɛ́?
Wɩɩsɛ dʋŋɔ léŋ ní weré.
Rɩɩ nɩ́ɩ́ ja mɩɩsɛ ná há waá tenni, ɩ tɩŋ Wɩɩsɛ wɩ́máŋsɛ ná.»
18 Ɛ́ nɛ́ báálɔ ná bɔsɛ Zeezi:
«Wɩɩsɛ wɩ́máŋsɛ bammá rɛ́?»
Ɛ́ nɛ́ Zeezi sɛ́:
«Sɩ́ nɩɛ ɓʋ́ʋ́sʋ́; sɩ́ cɔ́rmʋ á; sɩ́ gá; sɩ́ nyɩɛrʋ nyɛ́ɛ́ hé nɛrɔ nʋɔ mɛ́;
19 zílí áná rɩ́rɩ́ maá; cóllí nɩbínɔ́ŋɔ anɩ́ tɩɩ.»
20 Ɛ́ nɛ́ báálɔ ná bʋl Zeezi rí bʋlɛ́:
«Ŋ tɩ́ŋ nyáŋ wuu ní; beé rí báá káánɛ́?»
21 Ɛ́ nɛ́ Zeezi bʋl pɔ́ʋ́ bʋlɛ́:
«Rɩɩ́ já rɩ́ɩ́ wɩ́ɛ́ wuu cɛ́rɛ cɩ́ wérí, ɩ mʋ́ a yɛ́llɩ́ ɓɩɛ wuu, a píwó meéwíé ɓa nɩyaara, ká ko tɩ́ŋɩ́ŋ mɛ́ a makɛ rɩ́ɩ́ ná kuóɓɩɛ Wɩɩsɛ dɩhɩ̃́.»
22 Zeezi há bʋ́l ɛ́ pá báálɔ ná, ʋ sɩɛrʋ zɔ́kɔ́ kɩ́ŋkáŋ, ʋ zuki sɩ́ɛ́ aá col; bee wɩ́ɛ́ ʋ fa kéŋ ɓɩɛ kɩ́ŋkáŋ.
23 Ɛ́ nɛ́ Zeezi bʋl pɔ́ʋ́ karmɩbɛlɛ bʋlɛ́:
«Taŋá nɛ́ ŋ bʋl aá pɛ́ɩ́wa, ʋ dúókó a pá ɓɩɛ tɩ́na rʋ́ʋ́ wólli Wɩɩsɛ kuótɔ́ɔ́ ná sɩɛrʋ zʋ.
24 Ŋ ha bʋ́lɔ́ aá pɛ́ɩ́wa, ʋ bɩ́rɔ́ a mɔlɛ́ a pá nyʋ́kma, rʋ́ʋ́ tɩŋ gɛhɛŋ gbel lɛ, ká a wɩ́dúó a pá ɓɩɛ tɩ́na, rʋ́ʋ́ wóllí zʋ Wɩɩsɛ kuótɔ́ɔ́ ná sɩɛrʋ.»
25 Zeezi karmɩbɛlɛ há nɛ́ ɛ́, ʋ vɔ́kwɔ́ kɩ́ŋkáŋ, ɛ́ nɛ́ ɓa sɛ́:
«Rʋʋ sɩɛ́ ká nyɛ, áŋ rɩ́ wo mɩɩsɛ ná há waá tenni aá ná?»
26 Ɛ́ nɛ́ Zeezi bélwó ká bʋl pɔ́wɔ́ bʋlɛ́:
«Ʋ ká wɩ́ɩ́ ná há gɩ́rɛ́ nɩbííne ní, amá wɩ́ɩ́ toó aá gɩrɛ Wɩɩsɛ é.»
27 Ɛ́ nɛ́ Pɩɛrɛ bʋl Zeezi rí bʋlɛ́:
«Ká á má, Karmɩ'ana?
Ná, á é vɛ́rá ɓɩɛ rɩ́rá nɩɛ wuu tá, ká tɩ́ŋɩ́ mɛ́.»
28 Ɛ́ nɛ́ Zeezi bʋl pɔ́wɔ́ bʋlɛ́:
«Taŋá nɛ́ ŋ bʋl aá pɛ́ɩ́wa, Nɩbiino Bio* háá á rʋ́ʋ́ kénú píŋ kuóɓasa ná nyúú, dúníé fɛlɔ ná mɛ́, ɩ́ má nɩɛ ná há tɩ́ŋɩ́ŋ mɛ́, ɩ́ má sɩ́ ké kuóɓaŋsa fí rí bɛllɛ nyúú, a dí Ɩzɩrayɛl jɩmʋ́ʋ́la ná fí rí bɛllɛ sarɩ́ya.
29 Ká nɛrɔ ná wuu há lóú jɩɩsɛ, ʋ mááláwa, ʋ maábɛlɛ, ʋ nátolé, ʋ áná, ʋ maá, ʋ háálɔ, ʋ bɛlɛ, ɛ́ rá má ʋ baksɛ, ŋ wɩ́ɛ́, ʋ tɩ́na sɩ́ bɩrná kɩ́llɛ ɛ́ kɩ́ŋkáŋ, arɩ́ mɩɩsɛ ná há waá tenni.
30 Ɩ́ taŋa zɩŋ rɛ́ nɩɛ ná há lá sɩ́ɛ́, dɩkáŋ sɩ́ ko tɩŋ har, ká nɩɛ ná há tɩ́ŋ har, rɩ́wɔ́ má dɩkáŋ ko la sɩ́ɛ́.»