Baka tʋtʋnna sɩ́ŋsʋ́ɔ́lɔ
20
1 Ká Zeezi sɩɛ́ sʋ́ɔ́lɛ pɔ́wɔ́ bʋlɛ́:
«Wɩɩsɛ kuótɔ́ɔ́ ná nɩhɩ̃́ anɛ báálɔ oro há kenú baka, a sɩɛ́ cɔŋ fól lɛ rʋ́ʋ́ pa tʋtʋnna hóú baka ná mɛ́ rɩ́wɔ́ tʋŋ.
2 Ʋ rɩ́ tʋtʋnna ná sɩɛ́ bʋl hé déníé* balá kál, ká ʋ tɔ́wɔ́ ɓa mʋ́ baka.
3 «Cɩ́cʋɔ bɩ́ŋbɩlɩ́ nɛ́mɛ́ cɛ́rɛ, ʋ baa lɛ a ná tʋtʋnna náŋa rɩ ɓa ké yɔ́ɔ́, tɔ́ɔ́ nɩɛ náŋá dɩcémi.
4 Ɛ́ nɛ́ ʋ bʋ́lwɔ́ rɩ́ bʋlɛ́:
‹Ɩ́ má mʋ́ tʋ́mɩ́ŋ baka mɛ́, ká rɩ́ŋ túmíwa ɛ́ ná há mɔhɛ̃́.›
Ɛ́ nɛ́ ɓa mʋ́.
5 Wɔhɔ bɩ́ŋbɩlɩ́ fí rí bɛllɛ cɛ́rɛ, baka tɩ́na ná baa lɛ, a ná nɩɛ náŋa, ʋ rɩ́wɔ́ má bʋl ɛ́ tɩɩ tɩɩ, ká ɓa mʋ́ baka.
Ʋ baa lɛ gbaŋ bɩ́ŋbɩlɩ́ botoro, a baa ná nɩɛ náŋa má, ʋ rɩ́wɔ́ má bʋl ɛ́ tɩɩ tɩɩ, ká ɓa má mʋ́ baka.
6 Gbaanɛ bɩ́ŋbɩlɩ́ bɔmmʋ́ɔ́ cɛ́rɛ, ʋ baa ha lɛ a ná tʋtʋnna náŋa rɩ ɓa ké yɔ́ɔ́, tɔ́ɔ́ nɩɛ náŋá dɩcémi.
Ɛ́ nɛ́ ʋ bʋ́lwɔ́ rɩ́ bʋlɛ́:
‹Beé rí tɛ ɩ́ ké yɔ́ɔ́ nyɛ cɩ́cʋɔ wuu?›
7 «Ɛ́ nɛ́ ɓa sɛ́:
‹Nɛ́ŋ wuu há wɩ́rá pɛ́ɛ́ ráá tʋŋ.›
«Ɛ́ nɛ́ baka tɩ́na ná sɛ́:
‹Rʋʋ ká ɛ́, ɩ́ mʋ́ tʋ́mɩ́ŋ baka mɛ́.›
Ɛ́ nɛ́ ɓa mʋ́.
8 «Gbaŋ gbaanɛ, baka tɩ́na ná yɩ́rʋ́ oŋbello a bʋ́lʋ́ rɩ́ bʋlɛ́:
‹Yɩ́rɛ tʋtʋnna ná a túŋwó.
Taŋa púl túŋ nɩɛ ná ŋ há tɩ́ŋ har pa nɛ́, a mʋ́ tenni nɩɛ ná ŋ há lá sɩ́ɛ́ pa mɛ́.›
9 «Ɛ́ nɛ́ gbaŋ bɩ́ŋbɩlɩ́ bɔmmʋ́ɔ́ nɩpaalɛ́ ná ko, a la nɛ́ŋ wuu déníé balá.
10 Ɛ́ nɛ́ sɩ́laara ná má ko, a bɩɩnɛ rɩ ɓa sɩ́ túŋwó é kɩ́llɛ ɛ́; amá ɓa túŋwó má nɛ́ŋ wuu déníé balá nɛ́.
11 Ɓa há dé la, ɓa dé gɩ́gáásɛ wɩ́ɛ́ nɛ́ baka tɩ́na ná rɩ́,
12 a bʋlɛ́:
‹Nɩɛ nyáŋ há tɩ́ŋ har ko, ɓa tʋ́ŋ lɛ́ɛ́rɛ balá dʋŋɔ nɛ́, ká á é tʋŋ cɩ́cʋɔ rɩ́ wɔhɔ wuu, lʋmɔ mɛ́, ká á rɩ́wɔ́ wuu túme balá.›
13 «Ɛ́ nɛ́ baka tɩ́na ná bʋ́lwɔ́ nɔ́ŋɔ rɩ́ bʋlɛ́:
‹Ŋ naŋnɔ́ŋɔ, ŋ há wɩ́ɩ́ vɩ́rɛ́.
Ŋ rɩ́rɩ́ bʋ́lɔ́ hé rɩ́ɩ́ tʋŋ ká la déníé balá nɛ́ kál.
14 Lɛ́ɩ́ túme cúcol.
Ŋ há túmí ɛ́, nɛrɔ ná má há tɩ́ŋ har ko, ŋŋ́ túmú má ɛ́ nɛ́.
15 Ŋ wɩ ŋmɛ́nɔ kené rɩ́ŋ kánɩ́ŋ meéwíé tʋ́mɩ́ŋ satɔrɔ́ nɛ́ yáá, ŋ há kéŋ zilé ná nɩ́ɩ́ wɩ́ɩ́ mɛ́?›
16 «Ɛ́ wɩ́ɛ́, hatɩŋna sɩ́ bɩrmɛ sɩ́dííre, ká rɩ́ sɩ́dííre bɩrmɛ hatɩŋna.»
Zeezi báá bʋ́lʋ́ sʋʋ rɩ́rʋ́ bɩr'isé wɩ́ɛ́
17 Zeezi háá zɩ́ Zerizalɛmɛ, ŋmɛ́nɔ nyúú, ʋ yɩ́rʋ́ karmɩbɛlɛ ná fí rí bɛllɛ gɩɩkɛ, a bʋl pɔ́wɔ́ bʋlɛ́:
18 «Ɩ́ zesi, á háá mʋ́ Zerizalɛmɛ nyɛ, ɓa sɩ́ ká Nɩbiino Bio* pá Wɩɩsɛ vʋk'ɔɔsa* nɩhɩɛ̃́sɛ, arɩ́ Wɩɩsɛ kɛŋzɩnna,* rɩ́wɔ́ dúú sarɩ́ya bʋlɛ́ rɩ́wɔ́ ɓʋ́ʋ́,
19 ká púú hé nɩɛ ná há to Zuwifiwa nɛ́sɛ mɛ́ rɩ́wɔ́ sáákʋ́, a ŋmɔ́wʋ́, ká ɓásʋ́ dagɛsɛ́* daha rʋ́ʋ́ sʋwɛ; amá tápʋlɛ botoro kal, ʋ sɩ́ bɩr'isi sʋʋ mɛ́.»
Zakɛ rɩ́ Zaŋ sʋ́l dɩkéŋsi Zeezi rí
20 Ɛ́ nɛ́ Zebede háálɔ kɛ́sʋ́ bɛlɛ bɛllɛ:
Zakɛ* rɩ́ Zaŋ,* a tuu peri Zeezi, a ɓírmi tíé ʋ sɩ́ɛ́ rʋ́ʋ́ sʋ́lʋ́ sáŋɛ.
21 Ɛ́ nɛ́ Zeezi bɔ́sʋ́:
«Beé rí ɩ jɩ́ja?»
Ɛ́ nɛ́ ʋ sɛ́:
«Rɩɩ kúó díí kuorí ná, ɩ lo rɩ́ŋ bɛlɛ nyáŋ bɛllɛ kéní laka, nɔ́ŋɔ ɩ néduu, nɔ́ŋɔ má ɩ nágʋɔ.»
22 Ɛ́ nɛ́ Zeezi sɛ́:
«Ɩ́ wɩ́ɩ́wa háá sʋl omo ná ɛ̃.
Wɩɩla ná duo ŋ háá á rɩ́ŋ dí, ɩ́ sɩ́ wóllú dí?»
Ɛ́ nɛ́ ɓa sɛ́:
«Óó, á sɩ́ wólli.»
23 Ɛ́ nɛ́ Zeezi bʋ́l pɔ́wɔ́ bʋlɛ́:
«Ɩ́ ɓɩɛ́na sɩ́ wólli dí wɩɩla ná ŋ háá á rɩ́ŋ dí.
Amá ŋ ra wɩ mɔhɛ̃́, rɩ́ŋ tʋɔsɛ nɩɛ ná há mɔhɛ̃́ rɩ́wɔ́ kéníŋ néduu rɩ́rɩ́ŋ nágʋɔ.
Nɩɛ ná ŋ Ana Wɩɩsɛ há bɩ́rmɛ́ ɛ́ dɩkéŋsi rʋ́ʋ́ pá, ɓa nɩ́ɩ́ kéŋwó mí.»
24 Zeezi karmɩbɛlɛ ná fí há nɛ́ Zakɛ rɩ́ Zaŋ wɩ́bʋlɩ́ ná, ɓa cɔ́ɛ́ wɩ́wɔ́ nyúú.
25 Ɛ́ nɛ́ Zeezi yɩ́rwɔ́ wuu a bʋlɛ́:
«Ɩ́ tɩɩ ɩ́ɔ̃́ zɩŋ rɩ́ tíé nyúú rɛɛ́wa, dúníé kuóre rí nɩpiŋe ní kéŋ tɔ́ɔ́ ké.
26 Amá ɩ́ é dɩhɩ̃́ ʋ wɩ mɔhɛ̃́ rʋ́ʋ́ nɛ ɛ́.
Taŋa ɩ́ sɩɛrʋ nɛrɔ ná wuu háá já rʋ́ʋ́ púú tɩɩ makɛ nɔhɔ̃́, ʋ nɛ́ mɔhɛ̃́ rʋ́ʋ́ ɛ́ɩ́wa wuu tʋtʋnnɔ.
27 Ká rɩɩ́wa sɩɛrʋ oro já rʋ́ʋ́ nɛ́ ɛ́ɩ́wa sɩ́laarɔ má, ʋ nɩ́ɩ́ bɩ́rmɩ́wa wuu yómo.
28 Nɩbiino Bio wɩ kúé rʋ́ʋ́ ké ká rɩ́wɔ́ tʋŋ pɔ́ʋ́, amá ʋ kúó rʋ́ʋ́ tʋŋ nɛ́, ká púú mɩɩsɛ yɔwɛ la nɩkana.»
Zeezi wúri nyʋmma bɛllɛ sɩ́sɛ
29 Zeezi rɩ́rʋ́ karmɩbɛlɛ há lɛ́ Zeriko* mí, nɩɛ ɓɩkana tɩ́ŋwɔ́ mɛ́.
30 Nyʋmma bɛllɛ má sɩɛ́ fa ké ŋmɛ́nɔ nʋɔ.
Ɓa há nɩ́ɛ́ rɩ Zeezi ní tɩ́ŋ ráŋ aá daarɛ, ɛ́ nɛ́ ɓa de cáási bʋlɛ́:
«Nyuutɩna, kuóro Davidi Bio,* fárá susu!»
31 Ɛ́ nɛ́ nɩkana ná de isi bɛ́sɩ́wɔ́ mɛ́ bʋl rɩ́wɔ́ tɔ́wɔ́ nʋʋsɛ mɛ́.
Ɛ́ nɛ́ nyʋmma ná ɔsɛ cáási kɩ́ŋkáŋ bʋlɛ́:
«Nyuutɩna, kuóro Davidi Bio, fárá susu!»
32 Ɛ́ nɛ́ Zeezi cɩ́ ká yɩ́rwɔ́ a bɔ́sɩ́wɔ́:
«Ɩ́ có rɩŋ á beé rí pɛ́ɩ́wa?»
33 Ɛ́ nɛ́ ɓa sɛ́:
«Nyuutɩna, wúrírá sɩ́sɛ párá.»
34 Ɓa susu ka Zeezi, ɛ́ nɛ́ ʋ tɩ́kwɔ́ sɩ́ɛ́ mɛ́.
Mʋ́l ná tɩɩ tɩɩ mɛ́, rɩ ɓa sɩ́sɛ wúnnó, ɓa tɩŋ Zeezi mí.