Áŋ rɩ́ ká nɔhɔ̃́
18
1 Ɛ́ tɛ́ŋ mɛ́ nɛ́ Zeezi karmɩbɛlɛ tuu pérú, a bɔ́sʋ́ bʋlɛ́:
«Áŋ rɩ́ ká nɔhɔ̃́ Wɩɩsɛ kuótɔ́ɔ́ ná sɩɛrʋ?»
2 Ɛ́ nɛ́ Zeezi yɩ́rɛ biwie, a kánʋ́ ʋ cɩ́ŋwɔ́ sɩ́sɩ́ɛ́nnʋ́wa,
3 ká ʋ bʋl pɔ́wɔ́ bʋlɛ́:
«Taŋá nɛ́ ŋ bʋl aá pɛ́ɩ́wa, rɩɩ́wa nɛ́ wɩ bɩ́rsɛ́ rɩ́ɩ́ nɛ heŋbiisi, ɩ́ waá wóllí zʋ Wɩɩsɛ kuótɔ́ɔ́ ná sɩɛrʋ.
4 Ɛ́ wɩ́ɛ́, nɛrɔ ná wuu há múúrú tɩɩ anɛ biwie né, ʋ tɩ́na nɩ́ɩ́ a nɩpiŋo Wɩɩsɛ kuótɔ́ɔ́ ná sɩɛrʋ.
5 «Ká nɛrɔ ná há tɩ́ŋɩ́ŋ wɩ́ɛ́ a ka biwie né nɔ́ŋɔ wérí, ŋ tɩɩ nɛ́ tɩ́na ka wérí ɛ́.
Ɩ́ pɔ́ rɩ́ɩ́wa sɩ́ wɩ́bɔma á
6 «Amá rɩ nɛ́mmúrtɩɩna nyáŋ há láŋ wɩ́ɛ́ dí nɔ́ŋɔ nɛ́ rɩ́ nɛ́ŋ a rʋ́ʋ́ nyɔ́rkɛ Wɩɩsɛ ŋmɛ́nɔ mɛ́, rɩ ɓa pí nɔŋbúzeno vɔwɛ tɩ́na baŋ mɛ́, a kánʋ́ mʋ́ yoo hé mʋʋ sɩɛrʋ nɛ́ cúcó.
7 Wɩɩla sɩ́ peri dúníé, bee wɩ́ɛ́ wɩ́ɛ́ kánɔ́, a a nɩɛ aá nyɔ́rkɛ Wɩɩsɛ ŋmɛ́nɔ mɛ́.
Wɩ́ɛ́ ná há ɛ́ɛ́ nɩɛ aá nyɔ́rkɛ Wɩɩsɛ mɛ́, ɓa mɩ́nɔ́ tɛ́ŋ wuu mí.
Nɛrɔ ná sɩɛ́ há lóé ɓa tɩ́ŋɩ́ mɛ́ nɛ́, ɩ tɩ́na sɩ́ ná wɩɩla!
8 «Rɩɩ nɛ́sɛ nɛ́, ɛ́ rá má rɩɩ naa nɛ́ yíkí rɩ́ɩ́ aá zɔkɛ Wɩɩsɛ mɛ́, ɩ conni yoo tá.
Ɩ há kéŋ vakul, ɛ́ rá má nakul, ká mʋ́ mɩŋ Wɩɩsɛ laka, ʋ nɛ́ wérí há kéŋ nɛ́ŋsa bɛllɛ, ɛ́ rá má naasɛ bɛllɛ, ká mʋ́ zʋʋ mɩŋ níŋdʋsɩ́rá sɩɛrʋ.
9 Rɩɩ sɩ́ɩ́ má nɛ́ yíkí rɩ́ɩ́ aá zɔkɛ Wɩɩsɛ mɛ́, ɩ kánʋ́ lɩ́sɛ yoo tá.
Ɩ há kéŋ sɩ́too mʋ́ mɩŋ Wɩɩsɛ laka, ʋ nɛ́ wérí há kéŋ sɩ́ɛ́ bɛllɛ, ká mʋ́ zʋʋ mɩŋ níŋjaa sɩɛrʋ.
Peyʋ́ksɛ sɩ́ŋsʋ́ɔ́lɔ
10 «Ɩ́ pɔ́ rɩ́ɩ́wa sɩ́ ɛ́ nɛ́mmúrtɩɩna oro wuu káá gbésí tá.
Ŋ bʋ́lɔ́ aá pɛ́ɩ́wa rɩ́ɩ́wa zɩŋ rɩ́ Wɩɩsɛ malɩ́kawa ná háá bélwó mí, ɛ́ malɩ́kawa mɩ́nɩ́ŋ Ana Wɩɩsɛ laka nɛ́ tɛ́ŋ wuu mí, bána nyúú.
11 [Nɩbiino Bio* kúó rʋ́ʋ́ la nɩɛ ná há yʋ́ksɛ́ nɛ́ tá.]»
12 Ká Zeezi sʋ́ɔ́lɛ pɔ́wɔ́ bʋlɛ́:
«Rɩ nɛ́ŋ kéŋ pieŋse zɔlɔ, rɩ́ balá yʋ́ksɛ, ʋʋ́ a ɛrɛ́ rɛ́?
Ɩ́ bɩɩnɛ ná!
Ʋ wɩ pieŋse mɛɛ́sɩbaná rɩ́ fí rí nɛ́mɛ́ ná tá rɩ́wɔ́ dídí, káá bɩ́rmʋ́ rɩ́ɩ́ ja peyʋ́ksɛ ná?
13 Taŋá nɛ́ ŋ bʋl aá pɛ́ɩ́wa, rʋʋ nɛ́ túkú mí, ʋ sɩɛrʋ sɩ́ tɔrɛ ɛ́ peyʋ́ksɛ nyúú, a kɩ́llɛ pieŋse mɛɛ́sɩbaná rɩ́ fí rí nɛ́mɛ́ ná há wɩ yʋ́ksɛ́.
14 Ʋ sɩɛ́ ká ɛ́ nɛ́; ɩ́ Ana Wɩɩsɛ má há mɩŋ bána nyúú, ʋ waá ja rɩ́ nɛ́mmúrtɩɩna nyáŋ oro yʋ́ksɛ.
Wɩ́zɔkɛ́ bʋl ɔsɛ́
15 «Rɩɩ maábinɔ́ŋɔ á wɩ́ɩ́ zɔkɛ, ɩ mʋ́ bʋl pɔ́ʋ́, a mákʋ́ dɩzɔkɩ́; amá lo rʋ́ʋ́ ɛ́ɩ́ rɩ́rʋ́ dʋŋɔ bɛllɛ pɛ́kɛ nɛ́.
Rʋʋ nɛ́ nɛ́ mʋ́ʋ́la, wɩ́ɩ́ ná ɔ́sɔ́.
16 Ká rʋʋ nɛ́ wɩ mʋ́ʋ́la nɩ́ɛ́, ɩ ja nɛ́ŋ balá, ɛ́ rá má nɩɛ bɛllɛ súúrí tɩɩ mɛ́, rɩ́ɩ́wa mʋ́ nóú a ɔsɛ wɩ́ɩ́ ná, nɩɛ bɛllɛ, ɛ́ rá má nɩɛ botoro sɩ́ɛ́, rɩ́wɔ́ a dáŋsɩ́ɛ́wa.
17 Rɩɩ́wa bʋ́lɔ́ rʋʋ ha wɩ mʋ́ʋ́la nɩ́ɛ́, ɩ bʋl pá wɩcʋɔla púl nɩɛ.
Rɩ wɩcʋɔla púl nɩɛ má bʋ́lɔ́ rʋʋ ha wɩ mʋ́ʋ́la nɩ́ɛ́, ɩ púú makɛ nɛrɔ ná ha wɩ Wɩɩsɛ wɩ́ɛ́ lɛ́ɛ́ dí, ɛ́ rá má loŋpolaarɔ.
18 «Taŋá nɛ́ ŋ bʋl aá pɛ́ɩ́wa, wɩ́ɩ́ ná wuu ɩ́ háá á rɩ́ɩ́wa vɛ tíé nyúú, Wɩɩsɛ vɛ́ ɛ́ wɩ́ɩ́ rɛ́ bána nyúú má; ká wɩ́ɩ́ ná wuu ɩ́ háá á rɩ́ɩ́wa saŋ tíé nyúú, Wɩɩsɛ sáŋ ɛ́ wɩ́ɩ́ rɛ́ bána nyúú má.
Ɩ́ hé náŋá mɛ́ aá sʋl Wɩɩsɛ
19 «Taŋá nɛ́ ŋ ɔsɛ bʋl aá pɛ́ɩ́wa, rɩɩ́wa sɩɛrʋ nɩɛ bɛllɛ tʋ́ŋ nʋɔ mɛ́ tíé nyúú, rɩ́ɩ́ sʋl óŋ, ŋ Ana Wɩɩsɛ há mɩŋ bána nyúú sɩ́ pɛ́ɩ́wa.
20 Bee wɩ́ɛ́ rɩ nɩɛ bɛllɛ, ɛ́ rá má nɩɛ botoro hé náŋá mɛ́ ŋ yɩr mɛ́, ŋ mɩ́nɔ́ arɩ́wɔ́.»
Zeezi pí tʋtʋnnɔ há vɔ́ʋ́ nɔ́ŋɔ suúri hé wɩ́ɛ́ sʋ́ɔ́lɛ
21 Ɛ́ nɛ́ Pɩɛrɛ tuu peri Zeezi a bɔ́sʋ́ bʋlɛ́:
«Nyuutɩna, rɩŋ maábinɔ́ŋɔ nɛ́ á wɩ́ɩ́ rɩ́ɩ́ zɔ́kɩ́ŋ mɛ́, naasɩ́ bɛŋmŋmɛ rɛ́ mɔhɛ̃́ rɩ́ŋ hóú suúri?
Naasɩ́ balpɛ nɛ́?»
22 Ɛ́ nɛ́ Zeezi sɛ́:
«Aɩ́, naasɩ́ balpɛ dʋŋɔ rá, amá a kaá ja naasɩ́ mɛɛ́sɩbotoro rí fí buke balpɛ.»
23 Ká Zeezi sʋ́ɔ́lɛ bʋlɛ́:
«Wɩɩsɛ kuótɔ́ɔ́ ná nɩhɩ̃́ anɛ kuóro há ísé bʋlʋ́ tʋtʋnna ko ɔ́wɔ́ kʋ́ŋtáwa nɛ́.
24 Ʋ sɩɛ́ há púlé aá a kʋ́ŋtáwa ná, ɓa kéŋ tʋtʋnnɔ nɔ́ŋɔ kaa kóú rɩ́.
Ɛ́ tʋtʋnnɔ fa dúú kɩŋ a mʋ́ aá peri meéwíé bʋ́ɩ́zɔlɔwa.
25 Tʋtʋnnɔ ná wɩ kɩŋ ná wuó túŋ má tɩɩ.
Ɛ́ nɛ́ kuóro ná sɛ́:
‹Ɩ́ kánʋ́ rɩ́rʋ́ háálɔ arɩ́rʋ́ bɛlɛ wuu yɛ́llɛ, a yɛ́llʋ́ ɓɩɛ má wuu a túmú kɩŋ ná.›
26 «Ɛ́ nɛ́ tʋtʋnnɔ ná ɓírmi tíé kuóro ná sɩ́ɛ́ a jɛ́nnʋ́ bʋlɛ́:
‹[Nyúútɩ́na,] dí nyamma, ŋ sɩ́ túŋwó wuu.›
27 Ʋ susu kánʋ́ nyúútɩ́na ná wérí, ʋ pi kɩŋ ná cɛ́ʋ́, ká lóú ʋ col.
28 «Tʋtʋnnɔ ná lɛ ɛ́, a mʋ́ cémú nɔ́ŋɔ fa há dúú má kɩŋ a peri meéwíé bʋ́ɩ́ fí.
Ɛ́ nɛ́ ʋ de kánʋ́ nɔ́ŋɔ ná gɛbaŋ mɛ́ ká bʋlɛ́:
‹Túmíŋ kɩŋ ná!›
29 «Ʋ nɔ́ŋɔ ná ɓírmi tíé ʋ sɩ́ɛ́ a jɛ́nnʋ́ bʋlɛ́:
‹Dí nyamma, ŋ sɩ́ túmí.›
30 «Ɛ́ nɛ́ tʋtʋnnɔ ná bɩ́ɩ́lɛ, ká a ɓa kánʋ́ nɔ́ŋɔ ná tɔ́ bɩnajaa mɛ́ a kaá ja kɩŋ ná túme.
31 Ʋ tʋtʋ́nnɩ́náŋa há ná ɛ́, ɓa sɩɛnnɛ zɔ́kɔ́ kɩ́ŋkáŋ; ɓa mʋ́ cesi wɩ́ɛ́ ná wuu pá kuóro.
32 «Ɛ́ nɛ́ kuóro ná a ɓa yɩ́rʋ́ tʋtʋnnɔ ná ʋ ko, ʋ bʋl pɔ́ʋ́ bʋlɛ́:
‹Tʋtʋnnʋtɔk, ɩ há jɛ́nnɩ́ŋ, ŋ píí kɩŋ wuu ní a cɛ́ɩ́.
33 Ɩ má sɩɛ́ fa mɔhɔ̃́ rɩ́ɩ́ fɛ́ɩ́ nɔ́ŋɔ ná susu rí, anɛ ŋ há fɛ́ɩ́ susu ɛ́.›
34 Kuóro ná dí cɔwɩɩlɔ́, a a ɓa kánʋ́ tʋtʋnnɔ ná tɔ́ bɩnajaa mɛ́, a kaá jɔ́ʋ́ kɩŋ ná wuu túme.»
35 Zeezi sɩɛ́ súúri bʋlɛ́:
«Rɩɩ́wa nɛ́ wɩ́ɩ́wa maábináŋa suúri hé, arɩ́rɩ́wa sɩɛrʋ wuu, ká ná, ŋ Ana Wɩɩsɛ há mɩŋ bána nyúú, ʋ máá ɛ́ɩ́wa nyɛ nɛ́.»