Wɩɩsɛ tɩɩ sɛ́ Zeezi wɩ́ɛ́ wéró
17
1 Ʋ ɛ́ tápʋlɛ balgo kal nɛ́, Zeezi isi yɩ́rɛ Pɩɛrɛ arɩ́ Zakɛ rɩ́rʋ́ maábio Zaŋ, a káŋwɔ́ kɛkɛ náŋa ná mɛ́, ɓa mʋ́ zɩ́ paalɩzeno oro nyúú.
2 Zeezi isi gɩ́nʋ́ tɩɩ ɓa sɩ́ɛ́ mɛ́ ráŋ.
Ʋ sɩ́ɛ́ wuu tʋ́tʋl anɛ wɩɩsɛ háá tʋl ɛ́, ʋ gɛnnɛ má wuu tʋ́ksɛ ɓɩpʋŋsɛ́ ɓɩ́lɓɩ́l, aá tʋl anɛ pʋmmɔ.
3 Ɓa ɔ́ɔ́ rɩ́wɔ́ cɛ́, rɩ Moyizi* rɩ́ Eli* ní kúé lɩɩ nyɩ́ɩ́sɩ́wɔ́ mɛ́, a ka Zeezi cɩ́ aá bʋl wɩ́ɛ́.
4 Ɛ́ nɛ́ Pɩɛrɛ wúrú nʋɔ mɛ́ a bʋlɛ́:
«Nyuutɩna, raá ké rɛɛ́, ʋ wér.
Rɩɩ nɛ́ sáŋɛ́, ŋ sɩ́ ciki táŋtɛwa botoro, ɩ nɔ́ŋɔ, Moyizi nɔ́ŋɔ, Eli má nɔ́ŋɔ.»
5 Pɩɛrɛ ha mɩŋ bʋlɛ́ mɛ́, rɩ duóbáŋtʋlɩ́ nɛ́ dé ko tɔ́wɔ́ mɛ́, ká ɓa nɛ Wɩɩsɛ liŋó duóbána ná sɩɛrʋ há sɛ́:
«Ŋ Bicolli ní nyɛ, ŋ sɩɛrʋ wuu ní tɔ́rʋ́ wɩ́ɛ́.
Ɩ́ zésú wɩ́ɛ́!»
6 Zeezi karmɩbɛlɛ ná há nɛ́ liŋó ná, héwíŋ kéŋwó, ɓa ɓallɛ a káŋwɔ́ sɩ́ɛ́ cú tíé.
7 Ɛ́ nɛ́ Zeezi tuu pérwó, a tɩ́kwɔ́ mɛ́ ká bʋlɛ́:
«Ɩ́ sɩ́ héwíŋ fá, ɩ́ isi.»
8 Ɓa há ísé, ɓa béló rɩ Zeezi dʋŋɔ nɛ́.
9 Ɓa há lɛ́ paalɔ ná nyúú aá tuwi ní, Zeezi sɩɛ́ bʋ́lwɔ́ rɩ́ fɩ́ɛ́ŋfɩ́ɛ́ŋ a bʋlɛ́:
«Ɩ́ sɩ́ɩ́wa wɩ́náálɛ nyáŋ wɩ́ɛ́ bʋ́l pá nɛ́ŋ wuu, a kaá já Nɩbiino Bio* sʋʋ ká bɩr'isé.»
10 Ʋ karmɩbɛlɛ sɩɛ́ bɔ́sʋ́ bʋlɛ́:
«Bee wɩ́ɛ́ rɛ́ Wɩɩsɛ kɛŋzɩnna sʋ́ʋ́ mɔhɔ̃́ rɩ́ Wɩɩsɛ wɩ́laabʋllɔ Eli ní la sɩ́ɛ́ ko kɛ́rɛ́?»
11 Ɛ́ nɛ́ Zeezi sɛ́:
«Taŋá, Eli ní mɔhɛ̃́ rʋ́ʋ́ la sɩɛ́ ko ɔsɛ wɩ́ɩ́ wuu.
12 Ŋ taŋá á ríŋ bʋl pɛ́ɩ́wa, rɩ́ɩ́wa zɩŋ rɩ́ Eli é kúó rí wáárɛ, ká nɩɛ wɩ kɩ́ɛ́lɛ́ zɩ́mʋ́, amá ɓa ɔ́ɔ́ ʋ ná wɩɩla ɛ́ ɓa há có.
Nɩbiino Bio má, ɓaá á rɩ́wɔ́ ɔ́ʋ́ ɛ́ nɛ́.»
13 Ɛ́ nɛ́ Zeezi karmɩbɛlɛ zɩŋ rɩ́ Zaŋ Batiisi wɩ́ɛ́ nɛ́ ʋ bʋ́bʋl ɛ́, a pi Eli wɩ́ɛ́ máŋsɛ.
Zeezi kírí bio oro nyúú kaŋtɔŋ
14 Zeezi rɩ́rʋ́ karmɩbɛlɛ ná botoro há kúé peri nɩkana ná, báálɔ oro de tuu peri Zeezi, a ɓírmú sɩ́ɛ́ ká bʋlɛ́:
15 «Nyuutɩna, fáŋ bio susu!
Ʋʋ́ ɓal ɓuŋɓúŋsi ní.
Ʋʋ́ ná wɩɩla wérí; tɛ́ŋ nɔ́ŋɔ mɛ́, ʋʋ́ púú yo níŋ mí, ɛ́ rá má nyii sɩɛrʋ.
16 Ŋ kenó kóí karmɩbɛlɛ rɩ́, amá ɓa wɩ wóllé dúórú.»
17 Ɛ́ nɛ́ Zeezi sɛ́:
«Kéké nɩbííne duo há wɩ yardá kené; ɩ́ ká nɩbɔ́má!
Ŋŋ́ á rɩ́ŋ mɩŋ arɩ́rɩ́wa dáánɛ mɔ ɛrɛ́ rɛ́, a sɩɛ́ nyámmɩ́wa wɩ́'állɛ nyáŋ?
Kánɩ́ bio ná ko rɛɛ́.»
18 Ɛ́ nɛ́ Zeezi ɓɛ kaŋtɔŋ ná mɛ́, ʋ lɛ ká tá bio ná, ʋ dúóri mʋ́l ná tɩɩ tɩɩ mɛ́.
19 Zeezi karmɩbɛlɛ ná dʋŋɔ sɩɛ́ tuu pérú a bɔ́sʋ́ bʋlɛ́:
«Beé rí tɛ á é wɩ wóllé kiri kaŋtɔŋ ná?»
20 Ɛ́ nɛ́ Zeezi bʋl pɔ́wɔ́ bʋlɛ́:
«Ɩ́ yardá há wɩ óŋ wuu mɔhɛ̃́ nɛ́ tɛ.
Taŋá nɛ́ ŋ bʋl aá pɛ́ɩ́wa, rɩɩ́wa yardá nɛ́ pérí anɛ mʋ́tárdɛ* bíí, ɩ́ sɩ́ wólli bʋlɛ́ paalɔ cúri mʋ́ cɔ́ŋsɛ rɛɛ rɩ́, rʋ́ʋ́ ɓɩɛ́na cúri.
Wɩ́ɩ́ wuu wɩ́ɩ́wa gɩrɛ.
21 [Amá wɩsʋlɔ́ rɩ́ nʋɔ vɔwɛ́* nɛ́ wo kaŋtɔ́ŋ né duo mí aá kiri.»]
Zeezi báá bʋ́lʋ́ sʋʋ rɩ́rʋ́ bɩr'isé wɩ́ɛ́
22 Zeezi rɩ́rʋ́ karmɩbɛlɛ há mɩŋ Galiile* tíé aá gʋɔrɛ, kal oro ʋ sɩɛ́ bʋ́lʋ́ karmɩbɛlɛ rɩ́ bʋlɛ́:
«Ɓa sɩ́ ka Nɩbiino Bio a hé nɩbííne nɛ́sɛ mɛ́,
23 rɩ́wɔ́ laa ɓʋ́; amá ʋ sɩ́ bɩr'isi sʋʋ mɛ́ tápʋlɛ botoro kal.»
Zeezi há bʋ́l ɛ́, ʋ karmɩbɛlɛ sɩɛrʋ zɔ́kɔ́ wérí.
Wɩcʋɔlɩjɩzeno loŋpó túme wɩ́ɛ́
24 Zeezi rɩ́rʋ́ karmɩbɛlɛ há mʋ́ɛ́ peri Kapɛrnayimi,* nɩɛ ná háá la Wɩcʋɔlɩjɩzeno* loŋpó kúó ná Pɩɛrɛ a bɔ́sʋ́ bʋlɛ́:
«Ɩ́ karmɩ'áná túŋ Wɩcʋɔlɩjɩzeno loŋpó rí?»
25 Ɛ́ nɛ́ Pɩɛrɛ sɛ́:
«Óó, ʋʋ́ túmú rí.»
Ká mʋ́ zʋ jaa, ɛ́ nɛ́ Zeezi la sɩ́ɛ́ bɔ́sʋ́ bʋlɛ́:
«Áŋwa rɛ́ mɔhɛ̃́ rɩ́wɔ́ túŋ táksɩwa rɩ́ loŋpó a pá dúníé kuóre?
Nɩhʋɔra nɛ́ yáá, tɔ́ɔ́ tɩ́náwa nɛ́?
Sɩmɔŋ, ɩ má ná beé rí?»
26 Ɛ́ nɛ́ Pɩɛrɛ sɛ́:
«Nɩhʋɔra nɛ́ mɔhɛ̃́ rɩ́wɔ́ túŋ.»
Ɛ́ nɛ́ Zeezi sɛ́:
«Rʋʋ ká ɛ́, tɔ́ɔ́ tɩ́náwa wɩ mɔhɛ̃́ rɩ́wɔ́ túŋ óŋ wuu.
27 Amá á sɩ́ wɩ́ɛ́ jáá pá nɩɛ ná háá la Wɩcʋɔlɩjɩzeno loŋpó ná.
Ɛ́ wɩ́ɛ́, isi pi naŋhɛŋ tuwi mʋʋ, a hé.
Dʋ́ŋdʋ́ʋ̃́ náŋwʋlɩ́ ná naŋhɛŋ háá á rʋ́ʋ́ ka, kánʋ́ nʋɔ wúri, ɩ sɩ́ ná meéwí ʋ nʋɔ mɛ́, a mɔ́ŋ rɩ́rɩ́ bɛllɛ nyúú túme, rɩ́ɩ́ lɩ́sɛ kaa ko túŋ.»