Farɩzɩɛ̃wa rɩ́ Sadɩsɩɛ̃wa sɩ́ Zeezi a wɩ́nyána rɩ́wɔ́ ná
16
1 Ɛ́ nɛ́ Farɩzɩɛ̃wa* rɩ́ Sadɩsɩɛ̃wa* bamma tuu peri Zeezi, rɩ́wɔ́ bʋl wɩ́ɛ́ kánʋ́, a sɩɛ́ bʋlɛ́:
«A wɩ́nyána ráá ná, a zɩŋ rɩ́ɩ́ lɛ́ Wɩɩsɛ nɛ́.»
2 Ɛ́ nɛ́ Zeezi bʋl pɔ́wɔ́ bʋlɛ́:
«Rɩ wɩɩsɛ nɛ́ mʋ́ɛ́ aá zʋ ká rɩ́ɩ́wa ná mumulí rʋʋ fɛ́lɔ́, ɩ́ɩ́ bʋlɛ́:
‹Dɩhɩ̃́ sɩ́ pɔrɛ.›
3 Cɩ́cʋɔ fól má, rɩɩ́wa nɛ́ ná bána mʋ́l rʋʋ bíró, ɩ́ɩ́ bʋlɛ́:
‹Duóŋ sɩ́ ko.›
Ɩ́ ɛ̃ bána kɩ́ɛ́lɛ aá zɩŋ wɩ́ɩ́ ná háá á rʋ́ʋ́ a, ká ɩ́ wɩ wuo kɩ́ɛ́lɛ aá zɩŋ wɩ́ɛ́ ná háá a dúníé mí zaá né!
4 Zaa bɛlɛ bɔ́mɔ́, ɓa wɩ Wɩɩsɛ taŋá tɩŋ, káá ja nyána rɩ́wɔ́ ná.
Ɓa sɩɛ́ waá a rɩ́wɔ́ ná nyáná wuu, rɩ nyána ná há tʋ́ŋ Wɩɩsɛ wɩ́laabʋllɔ* Zona* mɛ́ duo rá.»
Ɛ́ nɛ́ ká Zeezi tɔ́wɔ́ ráŋ ká col.
Ɩ́ pɔ́ɩ́wa tɩɩ mɛ́ arɩ́ Farɩzɩɛ̃wa rɩ́ Sadɩsɩɛ̃wa
5 Zeezi karmɩbɛlɛ háá daarɛ mʋʋ cɔɔ nɔ́ŋɔ ná, ɓa fa sʋ́llɔ́ ɓa wɩ dɩpɛ́ŋ píé.
6 Ɛ́ nɛ́ Zeezi bʋ́lwɔ́ rɩ́ bʋlɛ́:
«Ɩ́ pɔ́ɩ́wa tɩɩ mɛ́ wérí arɩ́ Farɩzɩɛ̃wa rɩ́ Sadɩsɩɛ̃wa.
Ɓa nɩhɩ̃́ anɛ sɩbʋ́r* nɛ́.»
7 Ʋ karmɩbɛlɛ kaa ké aá cɔ́ksɩ́wɔ́ tɩɩ mɛ́, ká bʋlɛ́:
«Á há wɩ dɩpɛ́ŋ kené ná nɛ́ tɛ ʋ bʋl ɛ́.»
8 Zeezi ɛ̃ wɩ́ɩ́ ná ɓa háá bɩɩnɛ́, ɛ́ nɛ́ ʋ bɔ́sɩ́wɔ́ bʋlɛ́:
«Beé rí tɛ ɩ́ ka ɩ́ wɩ dɩpɛ́ŋ kené wɩ́ɛ́ ké aá pɔsɛ náŋá?
Ɩ́ yardá ɓɩɛ́na wɩ óŋ mɔhɛ̃́!
9 Wɩ́zɩmɛ ha tóíwa mɛ́?
Ŋ há pí dɩpɛ́ŋwa ná bɔmmʋ́ɔ́ a conni pá nɩɛ bʋ́ɩ́'ɔmmʋ́ɔ́ ná, ɩ́ pɔ́wɔ́ ɓɩdíkáánɛ sú kúrsi bɛŋmŋmɛ rɛ́?
Ɩ́ sʋ́llɔ́ nɛ́?
10 Ŋ sɩɛ́ báá há pí dɩpɛ́ŋwa balpɛ a pá nɩɛ ná bʋ́ɩ́wʋná, ɩ́ pɔ́wɔ́ má ɓɩdíkáánɛ sú fɩ́yáknɛ bɛŋmŋmɛ rɛ́?
11 Ŋ há sɩ́ɩ́wa pɔ́ɩ́wa tɩɩ mɛ́ arɩ́ Farɩzɩɛ̃wa rɩ́ Sadɩsɩɛ̃wa, ɓa nɩhɩ̃́ anɛ sɩbʋ́r nɛ́, beé rí tɛ ɩ́ bɩɩnɛ rɩ dɩpɛ́ŋ tɩɩ wɩ́ɛ́ nɛ́ ŋ bʋ́bʋ́lɩ́wa rɩ́?
Ɩ́ wʋ́ʋ́ mʋ́l nɩ́ɛ́?»
12 Ɛ́ nɛ́ Zeezi karmɩbɛlɛ ná sɩɛ́ zɩŋ rʋ́ʋ́ wɩ sɩ́wɔ́ káŋwɔ́ tɩɩ rɩ́ sɩbʋ́r ná ɓa há píé aá hé dɩpɛ́ŋ míŋ mí ní, amá ʋ sɩ́wɔ́ káŋwɔ́ tɩɩ wérí rɩ́ Farɩzɩɛ̃wa arɩ́ Sadɩsɩɛ̃wa karmɛ́ nɛ́.
Pɩɛrɛ sɛ́ Zeezi ní ká Kirisi
13 Zeezi lɛ ráŋ a mʋ́ Filipi Sezaare.
* Ʋ sɩɛ́ bɔ́sʋ́ karmɩbɛlɛ bʋlɛ́:
«Ŋ é Nɩbiino Bio,* nɩɛ sɛ́ rɩ́ŋ ká áŋ rɛ́?»
14 Ɛ́ nɛ́ ɓa sɛ́:
«Nɩɛ náŋa sɩ́ɩ́ ká Zaŋ Batiisi ní; náŋa sɩ́ɩ́ ká Wɩɩsɛ wɩ́laabʋllɔ Eli* ní; náŋa má sɩ́ɩ́ ká Wɩɩsɛ wɩ́laabʋllɔ Zeremi* ní, ɛ́ rá má Wɩɩsɛ wɩ́laabʋlla ná oro.»
15 Ɛ́ nɛ́ ʋ baa bɔ́sɩ́wɔ́ bʋlɛ́:
«Ká ɩ́ má sɩɛ́ sɛ́ rɩ́ŋ ká áŋ rɛ́?»
16 Rɩ Sɩmɔŋ Pɩɛrɛ sɛ́:
«Ɩ nɛ́ ká Kirisi,* Wɩɩsɛ ná há wómmó Bio.»
17 Ɛ́ nɛ́ Zeezi bʋl pɔ́ʋ́ bʋlɛ́:
«Zona bio Sɩmɔŋ, ɩ ná wér; bee wɩ́ɛ́ nɩbíŋ ra wɩ nyɛ mákɛ́ pɛ́ɩ́.
Ŋ Ana Wɩɩsɛ há mɩŋ bána nyúú ní mákɛ́ ɛ́ pɛ́ɩ́.
18 Ɛ́ wɩ́ɛ́, ŋ bʋ́lɔ́ aá pɛ́ɩ́:
ɩ ká Pɩɛrɛ* nɛ́, ʋ mʋ́l nɛ́ ká:
dɔ́wɩ́.
Bʋ́ɩ́ né nyúú ní sɩɛ́ ŋŋ́ á rɩ́ŋ sɔ́ŋ wɩcʋɔla púl.
* Sʋʋ má tɩɩ dóé waá a rʋ́ʋ́ ka ɛ́ púl tʋtʋmɩ́.
19 Ŋ sɩ́ pi Wɩɩsɛ kuótɔ́ɔ́ ná borwíé pɛ́ɩ́.
Wɩ́ɩ́ ná ɩ háá á rɩ́ɩ́ vɛ tíé nyúú, Wɩɩsɛ vɛ́ ɛ́ wɩ́ɩ́ rɛ́ bána nyúú má; ká wɩ́ɩ́ ná ɩ háá á rɩ́ɩ́ saŋ tíé nyúú, Wɩɩsɛ sáŋ ɛ́ wɩ́ɩ́ rɛ́ bána nyúú má.»
20 Ká Zeezi sɩɛ́ bʋl pɔ́ʋ́ karmɩbɛlɛ arɩ́ sɩ́fɩɛma a bʋlɛ́:
«Ɩ́ sɩ́ bʋ́l pá nɛ́ŋ wuu rɩ́ŋ nɛ́ ká Kirisi*.»
Zeezi bʋ́lʋ́ sʋʋ rɩ́rʋ́ bɩr'isé wɩ́ɛ́
21 Ɛ́ tɛ́ŋ mɛ́ nɛ́, Zeezi sɩɛ́ púl bʋl aá pɔ́ʋ́ karmɩbɛlɛ bʋlɛ́:
«Ʋ mɔhɔ̃́ rɩ́ŋ mʋ́ Zerizalɛmɛ,* rɩ́ tɔ́ɔ́ nɩhɩɛ̃́sɛ* rɩ́ Wɩɩsɛ vʋk'ɔɔsa* nɩhɩɛ̃́sɛ arɩ́ Wɩɩsɛ kɛŋzɩnna,* rɩ́wɔ́ a rɩ́ŋ ná wɩɩla wérí.
Ɓa sɩ́ ɓʋ́ŋ, ká rɩ́ŋ bɩr'isi sʋʋ mɛ́, tápʋlɛ botoro kal.»
22 Ɛ́ nɛ́ Pɩɛrɛ yɩ́rʋ́ a kaa gɛ́ŋŋɛ a bʋ́lʋ́ bʋlɛ́:
«Nyuutɩna, Wɩɩsɛ waá saŋ!
Nyɛ wɩ́ɩ́ mɩ́ɩ́ bil!»
23 Ɛ́ nɛ́ Zeezi bɩ́rɛ bʋl Pɩɛrɛ mɛ́ bʋlɛ́:
«Sɩtaanɛ,* kaa tuu lɩ́ŋ har rɩ́!
Ɩɩ́ gbáŋ naa rɛ́!
Bee wɩ́ɛ́ Wɩɩsɛ wɩ́ɛ́ tóí sabɩɩna mɛ́; nɩbííne wɩ́zɩmɛ dʋŋɔ nɛ́ mɩ́nɩ́ mɛ́.»
Zeezi har tɩŋɛ́
24 Ɛ́ nɛ́ ká Zeezi bʋl pɔ́ʋ́ karmɩbɛlɛ bʋlɛ́:
«Rɩ nɛrɔ wuu có rʋʋ tɩ́ŋɩ́ŋ é mí, rʋ́ʋ́ tɩ́na vɔ́ʋ́ tɩɩ wɩ́ɛ́ tá ráŋ, ká saŋ sʋʋ dagɛsɛ́* wɩɩla, a tɩ́ŋɩ́ŋ mɛ́.
25 Nɛrɔ ná wuu háá já rʋ́ʋ́ lowi kɛ́rʋ́ mɩɩsɛ mɛ́, ʋ tɩ́na sɩ́ gúlú mɩɩsɛ mɛ́; ká nɛrɔ ná wuu há yóú mɩɩsɛ tá ŋ wɩ́ɛ́, ʋ tɩ́na sɩ́ nóú mɩɩsɛ.
26 Nɩbííno há já dúníé onni wuu a pɔ́ʋ́ tɩɩ, ká ʋ dʋma yʋ́ksɛ, ʋ nyʋɔrɛ́ mɩŋ nɛ́ɛ́?
Nɩbííno á rʋ́ʋ́ pi beé duó rí a yɔwɛ lɔ́ʋ́ dʋma?
27 Kal ná Nɩbiino Bio háá á rʋ́ʋ́ ko arɩ́rʋ́ Ana Wɩɩsɛ píŋ rɩ́rʋ́ malɩ́kawa, ʋ sɩ́ túŋ nɛrɔ wuu, ʋ tʋmɛ́ mʋɔsɔ.
28 Taŋá nɛ́ ŋ bʋl aá pɛ́ɩ́wa, ɩ́ rɛɛ́ nɩcɩ́nɛ nyáŋ náŋa waá sʋsɛ, káá ka sɩ́ɩ́ rɩ́ɩ́ ná Nɩbiino Bio koe arɩ́rʋ́ kuorí.»