Zeezi pí dɩpɛ́ŋwa balpɛ rɩ́ náŋwʋlɛ́ mʋɔ́, pá nɩɛ ɓɩkana ɓa dí
8
1 Kal oro rí nɩɛ ɓɩkana baa ko pú Zeezi laka, ká wɩ óŋ kené aá dí; ɛ́ nɛ́ ʋ yɩ́rʋ́ karmɩbɛlɛ a bʋlɛ́:
2 «Nɩɛ nyáŋ susu wuu ní keníŋ; bel ná, tápʋlɛ botoro ní nyɛ, ɓa há kúé kéníŋ laka rɛɛ́, ká ɓɩdííli toó rɩ́wɔ́ dí.
3 Rɩŋ sɩ́wɔ́ mʋ́ jɩɩsɛ rɩ́ losu né, ɓa waá peri; ɓa sɩ́ɛ́ sɩ́ bíri, rɩ́wɔ́ ɓallɛ ŋmɛ́nɔ mɛ́; ɓa náŋa dɩlɩ́ ból.»
4 Ɛ́ nɛ́ ʋ karmɩbɛlɛ bʋ́lʋ́ rɩ́ bʋlɛ́:
«Áá ráá a ɛrɛ́, ká ná dɩpɛ́ŋwa gɩ́r né sɩɛrʋ, a pá nɩɛ nyáŋ wuu rɩ́wɔ́ dí vɔksɛ?»
5 Zeezi bɔ́sɩ́wɔ́:
«Ɩ́ kéŋ dɩpɛ́ŋwa bɛŋmŋmɛ?»
Ɓa sɛ́ rɩ́ ɓa kéŋ balpɛ.
6 Ɛ́ nɛ́ ʋ a nɩɛ ná wuu ké tíé, ká ʋ la dɩpɛ́ŋwa ná balpɛ a bɔ́llɛ Wɩɩsɛ, ká kaa conni a pɔ́ʋ́ karmɩbɛlɛ, rɩ́wɔ́ laa ɓa; ɓa laa ɓa nɩkana ná wuu.
7 Ɓa fa kéŋ náŋwʋlɛ́ má mʋɔ́, Zeezi bɔ́llɛ Wɩɩsɛ ká a ɓa píwó má ɓa nɩɛ ná.
8 Ɓa dí vɔksɛ, ká ɓa pa díkákáánɛ a sú fɩ́yáknɛ balpɛ.
9 Nɩɛ ná wuu fa pérí bʋ́ɩ́wʋná.
Ká Zeezi sɩɛ́ tɔ́wɔ́ ɓa col jɩɩsɛ́.
Farɩzɩɛ̃wa sɛ́ Zeezi a wɩ́nyána rɩ́wɔ́ ná
10 Ká ʋ má rɩ́rʋ́ karmɩbɛlɛ sɩɛ́ isi zʋ nyiidaborwie, a daarɛ Dalmanita rɩ́ cɔɔ.
11 Ɛ́ nɛ́ Farɩzɩɛ̃wa* isi ko bʋl wɩ́ɛ́, aá tɔ tɩ́ŋtɔ́ɛ́; ɓa háá ja Zeezi mʋ́l kanɛ́, ɛ́ nɛ́ ɓa sɛ́ rʋ́ʋ́ a wɩ́nyána, rɩ́wɔ́ zɩŋ rʋ́ʋ́ lɩ́ Wɩɩsɛ rɩ́ nɛ́.
12 Zeezi sɩɛrʋ zɔkɛ, ʋ hiẽsi, ká bʋlɛ́:
«Beé wɩ́ɛ́ rɛ́ zaa bɛlɛ jɩ́ja wɩ́nyáŋsɛ rɩ́wɔ́ ná?
Taŋá nɛ́ ŋ bʋl aá pɛ́ɩ́wa, ŋ báá wɩ nyána wuu áá pɛ́ɩ́wa zaa bɛlɛ.»
13 Ɛ́ nɛ́ Zeezi tɔ́wɔ́ ráŋ, ká bɩrkuosi daarɛ daarɛ́ nɔ́ŋɔ, ʋ rɩ́rʋ́ karmɩbɛlɛ.
Ɩ́ pɔ́ɩ́wa tɩɩ mɛ́ arɩ́ Farɩzɩɛ̃wa rɩ́ Erodi naanɩɛ
14 Ʋ karmɩbɛlɛ sʋ́llɔ́ ɓa wɩ pɛ́ɛ́ pi dɩpɛ́ŋ; balá dʋŋɔ rɛ́ fa mɩ́ŋwɔ́ rɩ́, ɓa nyiidaborwie sɩɛrʋ.
15 Ɛ́ nɛ́ Zeezi sɩɛ́ pi wɩ́máŋsɛ a cáánɩ́wɔ́ a bʋlɛ́:
«Ɩ́ pɔ́ɩ́wa tɩɩ mɛ́ wérí arɩ́ Farɩzɩɛ̃wa rɩ́ Erodi* naanɩɛ.
Ɓa nɩhɩ̃́ anɛ sɩbʋ́r* nɛ́.»
16 Ʋ karmɩbɛlɛ kaa ké aá cɔ́ksɩ́wɔ́ tɩɩ mɛ́ a bʋlɛ́:
«Á há wɩ dɩpɛ́ŋ kené ná nɛ́ tɛ ʋ bʋl ɛ́.»
17 Zeezi ɛ̃ wɩ́ɩ́ ná ɓa háá bɩɩnɛ́, ɛ́ nɛ́ ʋ bɔ́sɩ́wɔ́:
«Beé rí tɛ ɩ́ ka ɩ́ wɩ dɩpɛ́ŋ kené wɩ́ɛ́ ké aá pɔsɛ náŋá?
Wɩ́zɩmɛ ha tóíwa mɛ́?
Ɩ́ ha wɩ wɩ́ɛ́ mʋ́ʋ́lá nɛ?
Ɩ́ ká dɩlhɔɔ tɩ́náwa rɩ́ yáá?
18 Ɩ́ kéŋ sɩ́ɛ́ ká wɩ ráŋ ná, a ka dɩlla ká wɩ wɩ́ɛ́ nɛ?
19 Ɩ́ wɩ nyúkʋ́ʋ́la kéné aá bɩɩnɛ wɩ́ɛ́?
Ŋ há pí dɩpɛ́ŋwa ná bɔmmʋ́ɔ́ a conni pá nɩɛ bʋ́ɩ́'ɔmmʋ́ɔ́ ná, ɩ́ pɔ́wɔ́ ɓɩdíkáánɛ sú kúrsi bɛŋmŋmɛ rɛ́?»
Ɛ́ nɛ́ ɓa sɛ́:
«Fí rí bɛllɛ.»
20 «Ŋ sɩɛ́ báá há cónní dɩpɛ́ŋwa balpɛ, a pá nɩɛ ná bʋ́ɩ́wʋná, ɩ́ pɔ́wɔ́ má ɓɩdíkáánɛ sú fɩ́yáknɛ bɛŋmŋmɛ rɛ́?»
Ɛ́ nɛ́ ɓa sɛ́:
«Balpɛ.»
21 Ɛ́ nɛ́ ʋ bɔ́sɩ́wɔ́ bʋlɛ́:
«Ɩ́ sɩɛ́ báá ha wɩ nɩ́ɛ́?»
Zeezi váárɛ nyʋmmɔ Bɛtɩsayɩda mɛ́
22 Ɓa mʋ́ peri Bɛtɩsayɩda,* ɛ́ nɛ́ ɓa tɩɛsɛ nyʋmmɔ oro ko Zeezi rí, a sʋ́lʋ́, rʋ́ʋ́ pɔ́ʋ́ nɛ́ŋsa tɩ́kʋ́ mɛ́.
23 Zeezi ka nyʋmmɔ ná nɛ́sɛ mɛ́, a kánʋ́ mʋ́ baka rɩ́, a a mɩŋtʋɔrʋ laarɛ báálɔ ná sɩ́ɛ́ mɛ́, a pɔ́ʋ́ nɛ́ŋsa tɩ́kʋ́ mɛ́, ka bɔ́sʋ́, rʋ́ʋ́ ná ráŋ rɛ́?
24 Nyʋmmɔ bel ká bʋlɛ́:
«Ŋ béló ná nɩbííne rɩ ɓaá válʋ́, ɓa taŋa dé nɛ tuuni ní.»
25 Ɛ́ nɛ́ Zeezi baa pɔ́ʋ́ nɛ́ŋsa tɩkɛ báálɔ ná sɩ́ɛ́ mɛ́; ʋ firki sɩ́ɛ́ bel, a de dúóri, a bel zɩŋ onni wuu aá caksɛ.
26 Ɛ́ nɛ́ Zeezi sʋ́ʋ́ mʋ́mʋ́ jaa, rʋ́ʋ́ sɩ́ zʋ́ʋ́ gʋɔrɛ tɔ́ɔ́ sɩɛrʋ.
Pɩɛrɛ sɛ́ Zeezi nɛ́ ká Wɩɩsɛ Nɩlɩsɛ
27 Zeezi rɩ́rʋ́ karmɩbɛlɛ zʋʋ col Filipi Sezaare* laka tɔ́nɛ.
Ɛ́ nɛ́ ɓaá va ŋmɛ́nɔ mɛ́, ʋ bɔ́sɩ́wɔ́ bʋlɛ́:
«Ɩ́ nɩɩ mɛ́, nɩbííne sɛ́ rɩ́ŋ ká áŋ rɛ́?»
28 Ɛ́ nɛ́ ɓa sɛ́:
«Náŋa sɛ́ rɩ́ɩ́ ká Zaŋ Batiisi* ní, náŋa sɛ́ Wɩɩsɛ wɩ́laabʋllɔ Eli* ní, ká náŋa má sɛ́ Wɩɩsɛ wɩ́laabʋlla ná nɔ́ŋɔ nɛ́.»
29 Ɛ́ nɛ́, ʋ baa bɔ́sɩ́wɔ́:
«Ká, ɩ́ má tɩɩ sɩɛ́ sɛ́ rɩ́ŋ ká áŋ rɛ́?»
Ɛ́ nɛ́ Pɩɛrɛ sɛ́:
«Ɩ nɛ́ ká Kirisi*.»
30 Ɛ́ nɛ́ Zeezi bʋl pɔ́wɔ́ rɩ́ sɩ́fɩɛma a bʋlɛ́:
«Ɩ́ sɩ́ ɛ́ wɩ́ɩ́ bʋ́l pá nɛ́ŋ wuu.»
Zeezi bʋ́lʋ́ wɩɩla, rɩ́rʋ́ sʋʋ, arɩ́rʋ́ bɩr'isé wɩ́ɛ́
31 Ɛ́ nɛ́, ʋ sɩɛ́ púl, a bʋl aá pɔ́ʋ́ karmɩbɛlɛ, rɩ́wɔ́ zɩŋ rɩ́, ʋ mɔhɔ̃́ rɩ́ Nɩbiino Bio* ná wɩɩla wérí.
Ká rɩ́ nɩhɩɛ̃́sɛ* rɩ́ Wɩɩsɛ vʋk'ɔɔsa* rɩ́ Wɩɩsɛ kɛŋzɩnna* vɔ́ʋ́ wɩ́ɛ́; ɓa sɩ́ ɓʋ́ʋ́, ká rɩ́ tápʋlɛ botoro kal, rʋ́ʋ́ bɩr'isi, a a nɩwómmí.
32 Ʋ bíl ɛ́ wɩ́ɛ́ wuu pɔ́wɔ́ nyaamɩ́.
Ɛ́ nɛ́ Pɩɛrɛ yɩ́rʋ́ kaa gɛ́ŋŋɛ, a bʋl rʋ́ʋ́ sɩ́ ɛ́ bʋ́bʋ́lʋ́.
33 Ɛ́ nɛ́ Zeezi bɩ́rɛ bélú karmɩbɛlɛ ná náŋa, ká bɛsɛ Pɩɛrɛ mɛ́ bʋlɛ́:
«Sɩtaanɛ,* kaa tuu mʋ́ har rɩ́!
Wɩɩsɛ wɩ́ɛ́ tóí sabɩɩna mɛ́; nɩbííne wɩ́zɩmɛ dʋŋɔ nɛ́ mɩ́nɩ́ mɛ́.»
Zeezi har tɩŋɛ́ wɩɩla
34 Ɛ́ nɛ́ ká ʋ yɩ́rʋ́ karmɩbɛlɛ arɩ́ nɩkana wuu ɓa ko, ʋ bʋl pɔ́wɔ́ bʋlɛ́:
«Rɩ nɛrɔ wuu có rʋʋ tɩ́ŋɩ́ŋ é mí, rʋ́ʋ́ tɩ́na vɔ́ʋ́ tɩɩ wɩ́ɛ́ tá ráŋ, ká saŋ sʋʋ dagɛsɛ́* wɩɩla, a tɩ́ŋɩ́ŋ mɛ́.
35 Nɛrɔ ná wuu há lówé aá kɛ́rʋ́ mɩɩsɛ mɛ́, ʋ sɩ́ gúlú mí, ká nɛrɔ ná há yóú mɩɩsɛ tá ŋ é wɩ́ɛ́, arɩ́ Labaarɩwero ná wɩ́ɛ́, ʋ tɩ́na sɩ́ nóú mɩɩsɛ.
36 Nɩbííno há já dúníé onni wuu a pɔ́ʋ́ tɩɩ, ká ʋ dʋma yʋ́ksɛ, ʋ nyʋɔrɛ́ mɩŋ nɛ́ɛ́?
37 Nɩbííno á rʋ́ʋ́ pi beé dúó rí, a yɔwɛ lɔ́ʋ́ dʋma?
38 Nɛrɔ ná wuu háá fáŋ mɛ́ tɩ́ŋɛ́ hɩɩ̃sɛ, aá fáŋ wɩ́bʋlɛ má bʋlɛ́ hɩɩ̃sɛ, zaa nɩbííne nyáŋ há ká wɩ́bɔŋ'áárá, a wɩ Wɩɩsɛ ja, sɩ́ɛ́ mɛ́, Nɩbiino Bio má kal ná háá kóó dúú Ana Wɩɩsɛ kuorí, ká rʋ́ʋ́ malɩ́kawa kílú, ʋ má sɩ́ fá tɩ́na hɩɩ̃sɛ.»