Peyʋ́ksɛ sɩ́ŋsʋ́ɔ́lɔ
15
1 Kal oro, loŋpolaara rɩ́ málbɔma tɩ́náwa wuu túó peri Zeezi, rɩ́wɔ́ zésú wɩ́bʋlɛ́.
2 Farɩzɩɛ̃wa rɩ́ Wɩɩsɛ kɛŋzɩnna sɩɛ́ ŋmúŋmurmi wɩ́ɛ́ bʋlɛ́:
«Báálɔ né lóó málbɔma tɩ́náwa lɩ́lɛ́lʋ́, a lo ʋ rɩ́wɔ́ dídí ɓɩɛ má.»
3 Ɛ́ nɛ́ Zeezi sʋ́ɔ́lɛ sɩ́ŋsʋ́ɔ́lɔ pɔ́wɔ́ bʋlɛ́:
4 «Rɩ nɛ́ŋ kéŋ pieŋse zɔlɔ, rɩ́ balá yʋ́ksɛ, ʋ wɩ pieŋse mɛɛ́sɩbaná rɩ́ fí rí nɛ́mɛ́ ná tá, rɩ́wɔ́ dídí, ká rʋ́ʋ́ bɩ́rmʋ́ ja peyʋ́ksɛ ná, déŋdéŋ rɩ́ɩ́ mʋ́ʋ́ túkú mí?
5 Ʋ sɩɛ́ há kúé túkú mí, ʋ tɛŋ wuú de pɔrɛ nɛ́, ʋ pi pieŋso ná báásʋ́ vapara mɛ́,
6 a kaa mʋ́ jaa, a yɩ́rʋ́ naŋnɔ́ŋsɛ rɩ́rʋ́ kénnináŋa, a bʋ́lwɔ́ rɩ́ bʋlɛ́:
‹Ɩ́ a ráá jʋɔsɛ, bee wɩ́ɛ́ ŋ náŋ pieŋso ná fa há yʋ́ksɛ́.›
7 Ŋ bʋ́lɔ́ aá pɛ́ɩ́wa, ʋ sɩɛ́ ká ɛ́ nɛ́, rɩ wɩ́bɔŋ'aarɔ balá léŋ ní bɩ́rsɛ́, rɩ́ɩ́ lo wɩ́bɔma ɛɛ, ʋ sɩ́ a satɔrɔ́ Wɩɩsɛ rɩ́, bána nyúú, a kɩ́llɛ nɩpiŋe mɛɛ́sɩbaná rɩ́ fí rí nɛ́mɛ́ há bɩ́ɩ́nɛ́ rɩ ɓa ká nɩtékétékéwa, a wɩ bɩ́rsɛ́ ja.
Meéwíyʋ́ksɛ sɩ́ŋsʋ́ɔ́lɔ
8 «Ɛ́ rá má, rɩ hál rɩ́ kéŋ meéwícaáka fí, rɩ́ balá yʋ́ksɛ, ʋ wɩ caanɔ́ nyɩkɛ rɩ́ɩ́ ti jaa rɩ́ɩ́ ja meéwíyʋ́ksɛ ná rɩ́ taŋá, rɩ́ɩ́ mʋ́ʋ́ túkú mí?
9 Ʋ sɩɛ́ há túkú mí, ʋ sɩ́ yɩ́rʋ́ taŋnɔ́ŋsɛ rɩ́rʋ́ kénnináŋa a bʋ́lwɔ́ rɩ́ bʋlɛ́:
‹Ɩ́ a ráá jʋɔsɛ, bee wɩ́ɛ́ ŋ meéwí ná fa há yʋ́ksɛ́, ŋ nóú.›
10 Ŋ bʋ́lɔ́ aá pɛ́ɩ́wa, ʋ sɩɛ́ ká ɛ́ nɛ́, rɩ wɩ́bɔŋ'aarɔ balá léŋ ní bɩ́rsɛ́, rɩ́ɩ́ lo wɩ́bɔmɔ ɛɛ, ʋ sɩ́ a satɔrɔ́ a pá Wɩɩsɛ malɩ́kawa.»
Biyʋ́ksɛ sɩ́ŋsʋ́ɔ́lɔ
11 Zeezi baa sʋ́ɔ́lɛ pɔ́wɔ́ bʋlɛ́:
«Báálɔ oro rí ráŋ, a ka bɛlɛ bɛllɛ.
12 Ɓa sɩɛrʋ ɓɩwie sɩɛ́ bʋ́lʋ́ áná rɩ́ bʋlɛ́:
‹Ŋ áná, tɛ́ŋ liwe ker.›
Ɛ́ nɛ́ ɓa áná ná kánʋ́ ɓɩɛ ná ɓáwɔ́.
13 «Ʋ wɩ dáánɛ́, ká bio ɓɩwie ná de isi pɔ́ʋ́ ɓɩɛ wuu yɛ́llɛ, a lɩɩ mʋ́ tɔ́bólí.
Ʋ há mʋ́ ráŋ, ʋ zɔ́kɛ́ ɛ́ meéwíé wuu basabasa.
14 Ʋ sɩɛ́ há zɔ́kwɔ́ wuu ɛ́, losu ɓɩzeno oro kúó zʋ tɔ́ɔ́ ná, ʋ báá fa wɩ óŋ wuu kené aá dí.
15 Ɛ́ nɛ́ ʋ isi mʋ́ a tɔ́ɔ́ ná nɩɛ nɔ́ŋɔ púú, a hóú, ʋ nʋ́nʋ́ɔ́lʋ́ keru ʋ baka mɛ́.
16 Losu kánʋ́, ʋ fa cólli rʋ́ʋ́ dí keru ná ɓɩdííle má tɩɩ, ká nɛ́ŋ wuu wʋ́ʋ́ ŋmɛ́nɔ pɛ́ɩ́ rʋ́ʋ́ díwó.
17 «Ɛ́ nɛ́ ʋ sɩɛ́ ké bɩ́ɩ́nʋ́ tɩɩ mɛ́ a bʋlɛ́:
‹Tʋtʋnna bɛŋmŋmɛ rɛ́ ŋ áná jaa mɛ́, a dí ɓɩɛ kaá tá, káŋ mɩŋ rɛɛ́ aá sʋwɛ losu!
18 Ŋ sɩ́ isi mʋ́ŋ áná rɩ́, a bʋ́lʋ́ mɛ́ bʋlɛ́:
Ŋ áná, ŋ ɔ́ɔ́ zɔkɛ Wɩɩsɛ mɛ́, a aa zɔ́kɩ́ má mɛ́;
19 ŋ báá wɩ mɔhɛ̃́ rɩ́ɩ́ píŋ mákɩ́ bíí; píŋ mákɩ́ tʋtʋnna nɔ́ŋɔ.›
20 Ɛ́ nɛ́ ká, ʋ de isi zʋ ŋmɛ́nɔ, aá mʋ́ʋ́ áná rɩ́.
«Ʋ háá kué, ʋ áná tɩ́ɛ́nɛ nóú dɩbólí rʋʋ́ kó, ʋ susu wuu kenú kɩ́ŋkáŋ; ʋ fá cémú, a vɔ́wʋ́ baŋ mɛ́, a kórmú.
21 «Ɛ́ nɛ́ bio ná bʋ́lʋ́ áná ná mɛ́ bʋlɛ́:
‹Ŋ áná, ŋ ɔ́ɔ́ zɔkɛ Wɩɩsɛ mɛ́, a aa zɔ́kɩ́ má mɛ́; ŋ báá wɩ mɔhɛ̃́ rɩ́ɩ́ píŋ makɩ́ bíí.›
22 «Ɛ́ nɛ́ áná ná bʋ́lʋ́ tʋtʋnna rɩ́ bʋlɛ́:
‹Ɩ́ a kɩ́kɛ́lɛ́, a zʋʋ pi gɛrɔ ná wér há kɛ gɛnnɛ wuu, a kaa ko súú; ɩ ja nénípɩr hóú néní mí, a ja natɔɔsɛ hóú naasɛ mɛ́.
23 Ɩ́ mʋ́ ka nɔɔ ná há vʋ́ɛ́ wérí, a kaa ko ɓʋ́, ráá dí a jʋɔsɛ;
24 bee wɩ́ɛ́ ŋ bio né fa nɩhɩ̃́ anɛ ʋ sʋ́wɔ́ rɛ́, ká bɩr'isi; ʋ fa yʋ́ksɔ́ rɛ́ ká ŋ bɩrnóú.›
Háya!
Jʋɔsɛ́ cana púló.
25 «Ɛ́ tɛ́ŋ mɛ́ wuu, rɩ bio ɓɔhɔ̃́ ná mɩŋ baka mɛ́.
Ʋ sɩɛ́ há lɛ́ baka aá ko, a ko peri jaa, rʋʋ́ nɛ ɓɩɛ dúí arɩ́ gʋɔla.
26 Ɛ́ nɛ́ ʋ yɩ́rɛ tʋtʋnna ná nɔ́ŋɔ a bɔsɛ:
‹Beé rí ɓaá a nyɛ jaa mɛ́?›
27 Ɛ́ nɛ́ tʋtʋnnɔ ná sɛ́:
‹Ɩ maábio ná nɛ́ bɩ́rɛ́ ko, ɩ áná ka nɔvʋ́ʋ́lɛ ná ɓʋ́, bee wɩ́ɛ́ ʋ há bɩ́rɛ́ nóú bio rí tɛŋfɩ́ɛ́l.›
28 «Ɛ́ nɛ́ bio ɓɔhɔ̃́ ná cɔ́ɛ́ wɛ, ʋ vɛ jaa zʋɩ.
Ʋ áná lɛ, a sʋ́lʋ́ rʋ́ʋ́ zʋ jaa.
29 Ɛ́ nɛ́ ʋ bʋ́lʋ́ áná rɩ́ bʋlɛ́:
‹Bɩŋsɛ ɓɩkana nɛ́ ŋ háá tʋ́mɩ́ mɛ́, ŋ ha wɩ́ɩ́ nʋɔ vɛ́ɛ́.
Ká ɩ ha wɩ bʋwie má tɩɩ kené páŋ, rɩ́ŋ rɩ́rɩ́ŋ naŋnɔ́ŋsɛ dí cana a jʋɔsɛ.
30 Ká, ɩ bio né há lɛ́ɩ́ ɓɩɛ kaa mʋ́ zɔkɛ tuútuúwa nyúú mí há bɩ́rɛ́ ko, ɩ ɓʋ́ nɔvʋ́ʋ́lɛ nɛ́ pɔ́ʋ́.›