Sɩtaanɛ díŋ Zeezi
4
1 Ɛ́ nɛ́ Wɩɩsɛ Sabɩɩna ka Zeezi zʋ gɩrbétéke sɩɛrʋ, rɩ́ Sɩtaanɛ* díŋú.
2 Zeezi vɔ́wɛ́ nʋɔ* ráŋ wɔhɔ rɩ́ tɩ́taŋ wuu, tápʋlpírme mɛɛ́sɛllɛ, losu sɩɛ́ kánʋ́.
3 Ɛ́ nɛ́ Sɩtaanɛ tuu pérú a díŋú bʋlɛ́:
«Rɩɩ nɛ́ ɓɩɛ́na ká Wɩɩsɛ Bio, ɩ a rɩ́ dɔ́wʋ́ɔ́ nyáŋ bɩrmɛ ɓɩdííli.»
4 Ɛ́ nɛ́ Zeezi bʋl pɔ́ʋ́ bʋlɛ́:
«Ɓa pʋ́ŋsɛ Wɩɩsɛ Kɛnɔ sɩɛrʋ bʋlɛ́:
‹Ɓɩdííli dʋŋɔ rá nɩbííno dí aá hiẽsi,
amá Wɩɩsɛ nʋɔ wɩ́bʋlɛ́ wuu níí pá nɩbííno hiẽsó.› »
5 Ɛ́ nɛ́ Sɩtaanɛ ka Zeezi mʋ́ Zerizalɛmɛ, tɔ́ɔ́ ná há wɩ busunnu kené, a kánʋ́ zɩ́ Wɩcʋɔlɩjɩzeno* nyúú rí ɓóŋɓóŋ,
6 ká bʋ́lʋ́ rɩ́ bʋlɛ́:
«Rɩɩ nɛ́ ɓɩɛ́na ká Wɩɩsɛ Bio, ɩ cɩ́ rɛɛ́, ká ɓéri cíksi tíé, bee wɩ́ɛ́ ɓa pʋ́ŋsɛ Wɩɩsɛ Kɛnɔ sɩɛrʋ bʋlɛ́:
‹Wɩɩsɛ sɩ́ tʋ́mʋ́ malɩ́kawa rɩ́wɔ́ pɔ́ɩ́ mɛ́,
a céŋ kánɩ́, a makɛ rɩ́ɩ́ naa sɩ́ dɔ́wɩ́ ŋmɔ́wʋ́.› »
7 Ɛ́ nɛ́ Zeezi bʋl pɔ́ʋ́ bʋlɛ́:
«Ɓa pʋ́ŋsɛ Wɩɩsɛ Kɛnɔ cɔɔ nɔ́ŋɔ má bʋlɛ́:
‹Sɩ́ Nyuutɩna ɩ Wɩɩsɛ sáánʋ́.› »
8 Sɩtaanɛ baa ka Zeezi zɩ́ paalɔ oro nyúú, há ísé wérí, a makɛ dúníé kuorí wuu rɩ́rʋ́ píŋ a pá Zeezi,
9 ká bʋ́lʋ́ rɩ́ bʋlɛ́:
«Rɩɩ nɛ́ ɓírmíŋ sɩ́ɛ́ rɩ́ɩ́ cʋ́ɔ́lɩ́ŋ, ŋ sɩ́ píwó wuu pɛ́ɩ́.»
10 Ɛ́ nɛ́ Zeezi bʋl pɔ́ʋ́ bʋlɛ́:
«Sɩtaanɛ, kaa mʋ́ ráŋ!
Bee wɩ́ɛ́ ɓa pʋ́ŋsɛ Wɩɩsɛ Kɛnɔ sɩɛrʋ bʋlɛ́:
‹Cʋɔlɛ Nyuutɩna ɩ Wɩɩsɛ dʋŋɔ léŋ, káá tɩ́ŋʋ́ sɛ́.› »
11 Ɛ́ nɛ́ Sɩtaanɛ lo Zeezi, ká Wɩɩsɛ malɩ́kawa tuu pérú, a sáŋʋ́ mɛ́.
Zeezi púlú tʋtʋmɛ́ Galiile dɩtɩ́llɛ
12 Zeezi há nɩ́ɛ́ rɩ ɓa kéŋ Zaŋ tɔ́ bɩnajaa mɛ́, ɛ́ nɛ́ ʋ mʋ́ Galiile* dɩtɩ́llɛ.
13 Ʋ wɩ Nazarɛtɛ mɛ́ kéné, amá ʋ mʋ́ɔ́ ké Kapɛrnayimi* mí ní, Galiile* mʋʋ laka, Zabɩlɔŋ rɩ́ Nɛfɩtalɩ tíé mí.
14 Ɛ́ ɔ́ɔ́ Wɩɩsɛ wɩ́laabʋllɔ Ezayi* fa há bʋ́l wɩ́ɩ́ ná nʋɔ sú; ʋ sɛ́:
15 «Zabɩlɔŋ tíé rí Nɛfɩtalɩ tíé há mɩŋ mʋʋ laka,
Zʋrdɛŋ fuo daarɛ́,
Galiile dɩtɩ́llɛ ná, nɩɛ ná há to Zuwifiwa há kéné;
16 ɩ́ nɩɛ ná há ké bíno mí, ɩ́ sɩ́ ná pʋmmɔ ɓɩzeno,
ká nɩɛ ná há mɩŋ tɔ́ɔ́ ná há bíínó mí, sʋʋ cɩ́ tɩ́kwɔ́,
pʋmmɔ sɩ́ wáálɩ́wɔ́ má.»
17 A kaa pɔ́ ɛ́ tɛ́ŋ mɛ́, Zeezi púló bʋl Wɩɩsɛ wɩ́ɛ́ aá pá nɩɛ a bʋlɛ́:
«Ɩ́ bɩ́rsɛ, a báá sɩ́ áá zɔkɛ Wɩɩsɛ mɛ́, bee wɩ́ɛ́ Wɩɩsɛ kuótɔ́ɔ́ ná péríwa.»
Zeezi yɩ́rɛ náŋwʋ́ɓʋ́ʋ́ra baná
18 Zeezi há cɛ́l Galiile* mʋʋ nʋɔ vɩ́va, ʋ ná báála bɛllɛ:
Sɩmɔŋ* ná ɓa háá yɩ́rɛ Pɩɛrɛ* rɩ́rʋ́ maábio Aŋdɩrɩ; ɓa fa ká náŋwʋ́ɓʋ́ʋ́rá rɛ́.
Ɓa sɩɛ́ fa mɩŋ mʋʋ ná sɩɛrʋ a yo fíílé aá ɓʋ́ náŋwʋlɛ́.
19 Ɛ́ nɛ́ Zeezi bʋ́lwɔ́ rɩ́ bʋlɛ́:
«Ɩ́ ko tɩ́ŋɩ́ŋ mɛ́, ŋ sɩ́ mákɩ́wa rɩ́ɩ́wa bʋl kɛsɛ nɩbííne ní ko aá páŋ.»
20 Ɓalaɓala, rɩ ɓa pí fííléwa ná tá ráŋ ká isi tɩ́ŋʋ́ mɛ́.
21 Ʋ válɔ́ mʋ́ sɩ́ɛ́ mʋɔ́, rʋʋ báá ná báála bɛllɛ, Zebede bɛlɛ:
Zakɛ* rɩ́rʋ́ maábio Zaŋ,* rɩ ɓa rɩ́wɔ́ áná Zebede fa mɩŋ nyiidabore sɩɛrʋ aá bɩ́rmɩ́wɔ́ fííléwa.
22 Ɛ́ nɛ́ Zeezi yɩ́rwɔ́, ɓa de isi ɓalaɓala a tɩ́ŋʋ́ mɛ́, ká tɔ́wɔ́ áná rɩ́ nyiidabore ná.
23 Zeezi gʋɔrɛ Galiile* dɩtɩ́llɛ wuu, aá karmɛ nɩɛ Zuwifiwa cémejɩɩsɛ* mɛ́, ká bʋl Wɩɩsɛ kuótɔ́ɔ́ Labaarɩwero ná wɩ́ɛ́ pɩ́pá nɩɛ, a dúdúóri nɩɛ dɩwɩ́l rɩ́rʋ́ duó wuu, arɩ́ nɩɛ ná tɛŋ há kéŋ dɩkɔŋsa.
24 Ʋ yɩr lɛ Sɩɩrɛnɛ* tíé wuu mí.
Ɛ́ nɛ́ ɓa pa nɩɛ ná wuu dɩwɩ́l rɩ́rʋ́ duó wuu há kené ɓaá ná wɩɩla, arɩ́ kaŋtɔmɔ nɩzɩ́nɛ, rɩ́ ɓuŋɓúŋɓalla, arɩ́ nɩɛ ná há gbɛ́rkɛ́, a káŋwɔ́ wuu kóú rɩ́, ʋ dúóríwó.
25 Nɩɛ ɓɩkana ɓɩkana tɩŋ Zeezi mí, ɓa náŋa lɛ́ Galiile dɩtɩ́llɛ, náŋa lɛ Dekapol,* náŋa lɛ Zerizalɛmɛ, náŋa lɛ Ziide dɩtɩ́llɛ, ká náŋa má lɛ Zʋrdɛŋ fuo daarɛ́.