Sɩ́ɩ́ náŋa sarɩ́ya dí
7
1 «Ɩ́ sɩ́ nɩɛ sarɩ́ya dí, a makɛ rɩ́ Wɩɩsɛ má sɩ́ɩ́wa sarɩ́ya dí.
2 Bee wɩ́ɛ́ ɛ́ ná ɩ́ háá dí nɩɛ sarɩ́ya, Wɩɩsɛ máá dííwa sarɩ́ya ɛ́ nɛ́.
Oŋ'máŋsɛ ná ɩ́ há píé máŋsɛ aá pá nɩɛ, Wɩɩsɛ máá pi ɛ́ omo tɩɩ nɩ́ɩ́ máŋsɩ́ pɛ́ɩ́wa.
3 «Ɛrɛ́ rɛ́ ɩ sɩ́ wólli bel ná mɔ́wie ɩ nɔ́ŋɔ sɩ́ɩ́ mɛ́, ká dol mɩ́nɩ́ tɩɩ sɩ́ɩ́ mɛ́ ká ɩ wʋ́ʋ́ ná?
4 Ɛrɛ́ rɛ́ ɩ sɩ́ wólli bʋ́lɩ́ maábinɔ́ŋɔ rɩ́ bʋlɛ́:
‹Ná mɔ́wie ní ɩ sɩ́ɩ́ mɛ́, lóŋ kaa lɩ́sɛ tá,› ká dol mɩ́nɩ́ tɩɩ sɩ́ɩ́ mɛ́?
5 Ɩ ká nɩbínʋŋmɔ́ŋyɔ́ɔ́, la sɩ́ɛ́ lɩ́sɛ dol ná há mɩ́nɩ́ sɩ́ɩ́ mɛ́ kɛ́rɛ́, a makɛ rɩ́ɩ́ sɩ́ɛ́ nɩ́ná ráŋ wérí, rɩ́ɩ́ wóllí maábinɔ́ŋɔ sɩ́ɩ́ mɔ́wie kaa lɩ́sɛ.
6 «Ɩ́ sɩ́ Wɩɩsɛ ɓɩɛ píí pá nɩɛ ná há nɩhɩ̃́ vásɛ, rɩ́wɔ́ háá mɩl bɩ́rɛ dʋ́sɩ́wa.
Ɩ́ sɩ́ɩ́wa oŋwere má píí bil nɩɛ ná há nɩhɩ̃́ keru sɩ́ɛ́, rɩ́wɔ́ háá mɩl nʋɔsɛ.
Wɩɩsɛ wɩ sʋlɛ́ vɛ
7 «Ɩ́ sʋl, Wɩɩsɛ sɩ́ pɛ́ɩ́wa; ɩ́ ja, ɩ́ sɩ́ ná; ɩ́ ŋmɔwɛ boro mí, ɓa sɩ́ wúri pɛ́ɩ́wa.
8 Bee wɩ́ɛ́ nɛrɔ ná wuu háá sʋlɛ́, Wɩɩsɛ sɩ́ pɛ́ɩ́; ɩ ná háá jɛɛ́, ɩ sɩ́ ná; ká, ɩ ná má háá ŋmɔwɛ boro mí, ɓa sɩ́ wúri pɛ́ɩ́.
9 «Ɩ́ sɩɛrʋ orí rí, rʋ́ʋ́ bio sʋl dɩpɛ́ŋ rʋ́ʋ́ saŋ pi dɔ́wɩ́ pɔ́ʋ́?
10 Ɛ́ rá má rʋʋ bio ní sʋ́l náŋwʋlɩ́, ʋ sɩ́ saŋ pi dʋŋ pɔ́ʋ́?
11 Ɩ́ sɩɛ́ há ká nɩbɔ́má ká zɩŋ oŋwere pii pɛ́ɩ́wa bɛlɛ, ɩ́ zɩŋ rɩ́ɩ́wa Ana Wɩɩsɛ ná há mɩŋ bána nyúú, ʋ waá sáŋ vɔŋ oŋwere ná nɩɛ háá sʋ́lʋ́ rɩ́.
12 Wɩ́ɛ́ ná wuu ɩ́ há có rɩ nɩɛ ɔ́ɔ́ pɛ́ɩ́wa, ɩ́ má ɔ́wɔ́ pá nɩɛ; Wɩɩsɛ kíŋse* kɛnɔ rɩ́ Wɩɩsɛ wɩ́laabʋlla* kɛnnɛ nɛ́ mákɛ́ ɛ́.
Zeezi sɛ́ nɩɛ tɩŋ dánnʋfɩ́kɩ́kɛ́
13 «Ɩ́ tɩŋ dánnʋfɩ́kɩ́kɛ́ zʋ.
Bee wɩ́ɛ́ dánnʋjɛlɔ arɩ́ ŋmɛ́ŋjɛlɔ, ɓa dɩtenní, zɔ́krʋ ɓɩzeno ní; ká nɩɛ káŋ aá tɩ́ŋwɔ́.
14 Amá dánnʋfɩ́kɩ́kɛ́ arɩ́ ŋmɛ́ŋcʋ́mʋ́mʋ́, ɓa dɩtenní ní ká mɩɩsɛ ná há waá tenni dɩhɩ̃́; ká nɩɛ mʋɔ́ nɩ́ɩ́ túkwó mí.
Tuu rɩ́rʋ́ nɔnɔ
15 «Ɩ́ kánɩ́wa tɩɩ arɩ́ nyɛtɩɩna ná há sɩ́ ɓa ká Wɩɩsɛ wɩ́laabʋ́llá.
* Ɓa sɩ́ kóíwa rɩ́ anɛ pieŋse, amá ɓa sɩɛnnɛ é dé nɛ kaadíhuorúwa nɛ́.
16 Ɩ́ sɩ́ tɩ́ŋwɔ́ wɩ́'állɛ mɛ́ a zɩ́ŋwɔ́.
Ɓa wɩ ɛ́llɛ́wá ɓɔ́rɛ sɔɔ nyúú, a wɩ piro máá ɓɔ́rɛ saamɔ nyúú.
17 Tuwero é wuu, ʋʋ́ nɔŋ nɔŋwere ní; ká tubɔmɔ máá nɔŋ nɔŋbɔma.
18 Tuwero wɩ nɔŋbɔma wuó nɔŋ; tubɔmɔ má wɩ nɔŋwere wuó nɔŋ.
19 Tuu ná wuu há wɩ nɔŋweré nɔŋ, ɓaá ɓá coki ní, a pii yoo hé níŋ mí.
20 Ɛ́ wɩ́ɛ́, nyɛtɩɩna ná há sɩ́ ɓa ká Wɩɩsɛ wɩ́laabʋ́llá, ɩ́ sɩ́ tɩ́ŋwɔ́ wɩ́'állɛ mɛ́ a zɩ́ŋwɔ́.
Nɩɛ wuu ra wɩ Wɩɩsɛ kuótɔ́ɔ́ ná zʋ
21 «Nɩɛ ná wuu háá yɩ́rɩ́ŋ, ‹Nyuutɩna, Nyuutɩna!›
Ɓa wuu ra waá a rɩ́wɔ́ zʋ Wɩɩsɛ kuótɔ́ɔ́ ná sɩɛrʋ, amá ɓa ná háá tʋ́mɩ́ŋ Ana Wɩɩsɛ ná há mɩŋ bána nyúú cólle, ɓa dʋŋɔ nɩ́ɩ́ zʋ ráŋ.
22 Wɩɩsɛ sarɩ́ya kal díí, nɩɛ ɓɩkana sɩ́ bʋ́lɩ́ŋ rɩ́ bʋlɛ́:
‹Nyuutɩna, Nyuutɩna!
Á lá Wɩɩsɛ nʋɔ wɩ́ɛ́ bʋl ɩ yɩr mɛ́, á kírí kaŋtɔmɔ ɓa lɛ nɩɛ mɛ́ ɩ yɩr mɛ́, á á wɩ́nyáŋsɛ ɓɩkana ɩ yɩr mɛ́.›
23 Ɛ́ nɛ́ sɩɛ́ rɩ́ŋ bʋl pɔ́wɔ́ nyaamɩ́ bʋlɛ́:
‹Ŋ wɩ́ɩ́wa ɛ̃ má wuu; ɩ́ tuu lɩ́ŋ laka, ɩ́ nɩɛ ná háá tʋŋ bɔ́ŋbɔ́ŋ.›
Jɩsɔɔra bɛllɛ sɩ́ŋsʋ́ɔ́lɔ
24 «Ɛ́ wɩ́ɛ́, nɛrɔ ná wuu há zésí wɩ́ɛ́ nyáŋ ŋ há bʋ́lɛ́, aá tɩ́ŋwɔ́, tɩ́na nɩhɩ̃́ wɩ́zɩnnɔ há sɔ́ʋ́ jaa bʋ́ɩ́ nyúú ní.
25 Ɛ́ nɛ́ duóŋ ko, nyii gíri, polnaasɛ sú a lɩɩ waalɛ dɩhɩ̃́ wuu, poo lú arɩ́ dóé a cɩ́ jaa ná mɛ́, ká ʋ wɩ yɛ́rkɛ́, bee wɩ́ɛ́ ɓa bílú mʋ́l bʋ́ɩ́ daha nɛ́.
26 Amá nɛrɔ ná wuu há zésí wɩ́ɛ́ nyáŋ ŋ há bʋ́lɛ́, ká wʋ́ɔ́ tɩŋ, tɩ́na nɩhɩ̃́ nɩcʋʋlɛ́ há sɔ́ʋ́ jaa hɩɛl daha nɛ́.
27 Ɛ́ nɛ́ duóŋ ko, nyii gíri, polnaasɛ sú a lɩɩ waalɛ dɩhɩ̃́ wuu, poo lú arɩ́ dóé a cɩ́ jaa ná mɛ́, ʋ yɛ́rkɛ búkébúké.»
Zeezi kéŋ tíŋ