Zeezi dúóri dayalmɔ
8
1 Zeezi há lɛ́ paalɔ ná nyúú tuwi, nɩɛ ɓɩkana tɩ́ŋʋ́ mɛ́.
2 Ɛ́ nɛ́ dayalmɔ oro tuu peri Zeezi, a ɓírmú sɩ́ɛ́ ká bʋlɛ́:
«Karmɩ'ana, rɩɩ nɛ́ có, ɩ wóŋ aá dúóri rɩ́ŋ zʋ nɩɛ sɩɛrʋ.»
3 Ɛ́ nɛ́ Zeezi lɩ́sʋ́ nɛ́sɛ a tɩ́kʋ́ mɛ́ ká bʋlɛ́:
«Ŋ có ɛ́ rɛ́, dúóri a zʋ nɩɛ sɩɛrʋ.»
Mʋ́l ná tɩɩ tɩɩ mɛ́, rɩ dayálmʋ* ná lɛ́ báálɔ ná tɛŋ mɛ́.
4 Ká Zeezi bʋl pɔ́ʋ́ bʋlɛ́:
«Pɔ́ rɩ́ɩ́ sɩ́ bʋ́l pá nɛ́ŋ wuu.
Amá kánɩ́ tɩɩ mʋ́ cáánɛ Wɩɩsɛ vʋk'ɔɔsɔ, ká ɔsɛ dayálmʋ dúóre vʋk ná Moyizi* há mákɛ́ ɓaá ɔsɛ, rɩ́ nɩɛ wuu zɩŋ rɩ́ɩ́ dúóró.»
Zeezi dúóri Romi tɩ́náwa sóójiwa zɔlɔ nɔhɔ̃́ tʋtʋnnɔ
5 Tɛ́ŋ ná mɛ́ Zeezi há mʋ́ɛ́ aá zʋ Kapɛrnayimi,* Romi* tɩ́náwa sóójiwa zɔlɔ nɔhɔ̃́ oro túó peri Zeezi a sʋ́lʋ́ bʋlɛ́:
6 «Nyuutɩna, ŋ tʋtʋnnɔ nɛ́ pɩ́ jaa mɛ́.
Ʋ gbɛ́rkɔ́ nɛ́, a de caasɛ aá ná wɩɩla wérí.»
7 Ɛ́ nɛ́ Zeezi bʋl pɔ́ʋ́ bʋlɛ́:
«Ŋ sɩ́ mʋ́ dúórú.»
8 Amá sóójiwa zɔlɔ nɔhɔ̃́ ná sɛ́:
«Nyuutɩna, ŋ wɩ mɔhɛ̃́ rɩ́ɩ́ zʋ́ŋ jaa sɩɛrʋ, amá ɩ é ha de wúrí nʋɔ dʋŋɔ bʋl wɩ́ɩ́, ŋ tʋtʋnnɔ ná sɩ́ dúóri.
9 Bee wɩ́ɛ́ ŋ tɩɩ kéŋ sɩ́dííre rí, ká sóójiwa mɩ́nɩ́ŋ har aá tɩ́ŋɩ́ŋ sɛ́.
Rɩŋ nɛ́ sɛ́ oro mʋ́, ʋʋ́ mʋ́ nɛ́; rɩŋ nɛ́ sɩɛ́ báá sɛ́ oro ko má, ʋʋ́ kó ní; rɩŋ sɛ́ rɩ́ŋ tʋtʋnnɔ a nyɛ, ʋʋ́ á nɛ́.»
10 Zeezi há nɛ́ ɛ́ wɩ́ɛ́ ko tenni, ɓa dé vɔ́kʋ́ nɛ́.
Ɛ́ nɛ́ ʋ bʋl nɩɛ ná há tɩ́ŋʋ́ mɛ́ rɩ́ bʋlɛ́:
«Taŋá nɛ́ ŋ bʋl aá pɛ́ɩ́wa, ŋ ha wɩ yardá né duo néé ná, Ɩzɩrayɛl duo* nɩɛ má tɩɩ sɩɛrʋ.
11 Ŋ sɩɛ́ bʋ́lɔ́ aá pɛ́ɩ́wa, nɩɛ ɓɩkana sɩ́ lɛ tɔ́ɔ́ mʋ́bʋɔ rɩ́ tɔ́ɔ́ nyúú rí a ko, rɩ́wɔ́ rɩ́ Abɩrahaŋ* rɩ́ Ɩzakɛ* arɩ́ Zakɔbɛ* hé náŋá mɛ́ dí ɓɩɛ, Wɩɩsɛ kuótɔ́ɔ́ ná sɩɛrʋ.
12 Amá nɩɛ ná fa há mɔhɛ̃́ rɩ́wɔ́ tɩ́llɛ kuótɔ́ɔ́ ná, ɓa sɩ́ yówó tá har rɩ́, bíno sɩɛrʋ; ráŋ ná ɓa há sɩ́ wi, a dʋŋ nɛ́sɛ aá mɩ́sɛ.»
13 Ká Zeezi sɩɛ́ bʋl sóójiwa zɔlɔ nɔhɔ̃́ ná rɩ́ bʋlɛ́:
«Mʋ́mʋ́ jaa; ɩ há á yardá aá ja wɩ́ɩ́ ná, ʋ sɩ́ ɔsɛ.»
Mʋ́l ná mɛ́, rɩ sóójiwa zɔlɔ nɔhɔ̃́ tʋtʋnnɔ ná dúóró.
Zeezi dúóri Pɩɛrɛ hɩɩlɩmaá arɩ́ nɩɛ ɓɩkana
14 Ʋ har rɩ́ mɛ́, Zeezi mʋ́ Pɩɛrɛ* jaa.
Ʋ mʋ́ɔ́, rɩ Pɩɛrɛ hɩɩlɩmaá tɛŋ lʋ́mɔ́ ʋ pɛ́.
15 Ɛ́ nɛ́ Zeezi tɩ́kʋ́ nɛ́sɛ mɛ́, tɛŋlʋmɛ ná tenni, ká ʋ isi a ɓɩdííle pɔ́ʋ́ ʋ dí.
16 Gbaanɛ há gbáánɛ́, ɓa kéŋ kaŋtɔmɔ nɩzɩ́nɛ ɓɩkana ko Zeezi rí, ʋ tɩ́ŋʋ́ nʋɔ wɩ́bʋlɛ mɛ́, a kiri kaŋtɔmɔ ná ɓa lɛ nɩɛ ná mɛ́, a dúóri pʋɔllɛ má wuu.
17 Ɛ́ há tʋ́mɛ́, Wɩɩsɛ wɩ́laabʋllɔ Ezayi* fa há bʋ́lʋ́ ná nʋɔ súó; ʋ fa sɛ́:
«Ʋ nɛ́ cɩ́krá dɩwɩɩla wuu cɩ́ɩ́nʋ́ tɩɩ,
a dúórírá tɛŋ dɩkɔŋsa.»
Zeezi mí tɩŋɛ́
18 Zeezi há néé rɩ nɩɛ ɓɩkana kúó kílú, ɛ́ nɛ́ ʋ bʋ́lʋ́ karmɩbɛlɛ mɛ́, rɩ́wɔ́ a rɩ́wɔ́ kuosi daarɛ mʋʋ cɔɔ nɔ́ŋɔ.
19 Ɛ́ nɛ́ Wɩɩsɛ kɛŋzɩnnɔ oro tuu pérú a bʋlɛ́:
«Karmɩ'ana, ŋ sɩ́ tɩ́ŋɩ́ mɛ́ a mʋ́ɩ́ háá mʋ́ ráŋ ná wuu.»
20 Ɛ́ nɛ́ Zeezi bʋl pɔ́ʋ́ bʋlɛ́:
«Kílowa kéŋ bʋɔnnɛ aá zʋ, diíwiisi má ka dallɛ aá zʋ; amá Nɩbiino Bio,* ʋ wɩ dɩpɩ́fɩɛlɩ́ kené.»
21 Nɩɛ ná há tɩ́ŋ Zeezi mí, ɓa sɩɛrʋ nɔ́ŋɔ má bʋ́lʋ́ rɩ́ bʋlɛ́:
«Nyuutɩna, lo rɩ́ŋ mʋ́ húŋ áná kɛ́rɛ́.»
22 Amá Zeezi bʋ́lɔ́ pɔ́ʋ́ bʋlɛ́:
«Tɩ́ŋɩ́ŋ mɛ́, ká lo rí sʋsɛ húwó sʋsɛ.»
*f4*
Zeezi ɔ́ɔ́ pozeno siki
23 Ɛ́ nɛ́ Zeezi zʋ nyiidaborwie sɩɛrʋ, ʋ karmɩbɛlɛ má tɩŋ zʋ, ɓa kuosi aá va.
24 Naasɩ́ balá, rɩ pozeno dé isi mʋʋ ná daha a ka nyii híkli aá tɔ́ nyiidaborwie ná mɛ́; ká Zeezi é pɩ́ dóŋ.
25 Ɛ́ nɛ́ ʋ karmɩbɛlɛ tuu pérú, a íllú bʋlɛ́:
«Nyuutɩna, fárá búŋse!
Áá ráá sʋsɛ nɛ́!»
26 Ɛ́ nɛ́ Zeezi bɔ́sɩ́wɔ́ bʋlɛ́:
«Beé rí tɛ héwíŋ kánɩ́wa mɔ nyɛ?
Ɩ́ yardá ɓɩɛ́na múúró.»
Ká sɩɛ́ isi a bɛsɛ pozeno ná rɩ́ mʋʋ ná mɛ́, ɓa wuu pɔrɛ cɩ́m.
27 Ʋ de máánʋ́ karmɩbɛlɛ ná nʋʋsɛ wérí, ɓa gɩrɛ aá bʋl náŋá rɩ́ bʋlɛ́:
«Nɩbíbeéduó má rɩ́ nyɛ, poo rɩ́ mʋʋ má tɩɩ saŋ, aá ɔ́ʋ́ ná ʋ há sɛ́?»
Zeezi kírí kaŋtɔmɔ ɓa lɛ báála bɛllɛ mɛ́
28 Zeezi há mʋ́ɛ́ kéri mʋʋ ná cɔɔ nɔ́ŋɔ Gadara dɩtɩ́llɛ, báála bɛllɛ lɛ́ lɛlbulli dɩhɩ̃́ a ko cémú.
Kaŋtɔmɔ nɛ́ zɩ́ŋwɔ́, ɓa pii nyáásɛ, nɛ́ŋ wuu báá wɩ ɛ́ ŋmɛ́nɔ kɔwɛ aá tɩŋ.
29 Ɓa há ná Zeezi ɛ́, ɓa de ŋmɔwɛ búŋse bʋlɛ́:
«Wɩɩsɛ Bio Zeezi, beé rí ɩ jɩ́ja rɩ́ɩ́ pii tʋ́ŋrá mɛ́?
Tɛ́ŋ ha há wɩ péré, ká ɩ ko rɛɛ́ rɩ́ɩ́ kɛ́rɩ́rá mɛ́?»
30 Rɩ keru ɓɩkana má fa mɩŋ sɩ́ɛ́rɩ́ aá dí.
31 Ɛ́ nɛ́ kaŋtɔmɔ ná jɛnnɛ Zeezi bʋlɛ́:
«Rɩɩ nɩ́ɩ́ já rɩ́ɩ́ kírírá, ɩ lo ráá mʋ́ zʋ keru nyáŋ.»
32 Ɛ́ nɛ́ Zeezi sɛ́:
«Ɩ́ lɛ!»
Ɓa de lɛ báála ná mɛ́ a mʋ́ zʋ keru ná, ɓa de giŋ lɛ nyúú rí wulli tuwi ɓallɛ mʋʋ sɩɛrʋ, a nyɔ nyii sʋsɛ.
33 Nɩɛ ná fa háá nʋɔlɛ keru ná de pusi fá zʋ tɔ́ɔ́ sɩɛrʋ, a cesi wɩ́ɛ́ ná wuu, a máŋsɛ tʋtʋmɩ́ ná há tʋ́ŋ báála ná bɛllɛ kaŋtɔmɔ fa há zɩ́nɛ́ mɛ́.
34 Ɛ́ nɛ́ tɔ́ɔ́ ná nɩɛ wuu lɩɩ mʋ́ rɩ́wɔ́ ná Zeezi.
Ɓa há nóú, ɓa sʋ́lʋ́ rʋ́ʋ́ lɩ́wɔ́ tíé mí.