Zeezi dúóri nɛ́sʋwɩ́ tɩ́na fɩɛlɛ́ tápʋl
3
1 Ká Zeezi baa bɩrko zʋ Zuwifiwa cémejaa.
* Báálɔ oro má fa mɩŋ ráŋ ʋ nɛ́sɛ sʋwɛ.
2 Ɛ́ nɛ́ nɩɛ náŋa de firki sɩ́ɛ́ cɔ́ Zeezi mí, aá bel rɩ́wɔ́ ná ʋʋ́ váárɛ nɛ́sʋwɩ́ ná tɩ́na rɛ́ fɩɛlɛ́ tápʋl,* a makɛ rɩ́wɔ́ tɩŋ ɛ́ mɛ́ a bʋlʋ́ zɔ́kɛ́ wɩ́ɩ́.
3 Ɛ́ nɛ́ Zeezi bʋl báálɔ ná nɛ́sɛ há sʋ́wɛ́ rɩ́ a bʋlɛ́:
«Isi cɩ́ dahá sɩ́sɩ́ɛ́nnʋ́wa ráŋ ná.»
4 Ká sɩɛ́ bɔ́sɩ́wɔ́ bʋlɛ́:
«Fɩɛlɛ́ tápʋl ʋ mɔhɔ̃́ rɩ́wɔ́ a wɩ́wero ní yáá, ʋ mɔhɔ̃́ rɩ́wɔ́ a wɩ́bɔmɔ nɛ́?
La nɩbííno mɩɩsɛ tá nɛ́ weré ɛ́ tápʋl yáá, nɩbííno ɓʋ́ɩ́ nɛ́ weré?»
Ɓa ké síkísíkí.
5 Ɛ́ nɛ́ Zeezi sɩɛ́ gɩ́ɛ́nɩ́wɔ́ rɩ́ cɔwɩɩlɔ́.
Ʋ sɩɛrʋ má zɔkɛ, ɓa dɩlhɔɔ ná wɩ́ɛ́.
Ɛ́ nɛ́ ʋ bʋl báálɔ ná rɩ́:
«Tɛ́rɩ́ nɛ́sɛ!»
Ʋ kaa tɛrɛ, nɛ́sɛ ná de dúóri, a bɩrnʋ́ nɩɩsɔ.
6 Ɛ́ nɛ́ Farɩzɩɛ̃wa ná fa há mɩŋ ráŋ, ɓa isi lɛ a mʋ́ ná kuóro Erodi* naanɩɛ, ɓa tʋŋ nʋɔ mɛ́ aá vʋʋrɛ rɩ́wɔ́ ná ɓa háá a ɛ́, káá ɓʋ́ Zeezi.
Nɩɛ ɓɩkana kó Zeezi rí
7 Zeezi rɩ́rʋ́ karmɩbɛlɛ isi tuwi mʋʋ nʋɔ.
Nɩɛ ɓɩkana lɛ Galiile* tɔ́nɛ, a fá púwó.
8 Náŋa lɛ́ Ziide tíé, náŋa lɛ Zerizalɛmɛ,* náŋa lɛ Idume dɩtɩ́llɛ, ká náŋa má lɛ Zʋrdɛŋ fuo daarɛ́ tɔ́nɛ ná há kíl Tiiri* rɩ́ Sɩdɔŋ.
* Ɛ́ nɩkana wuu nɛ́ Zeezi wɩ́'állɛ nɛ́, a ko rɩ́wɔ́ nóú.
9 Ɛ́ nɛ́ ʋ bʋ́lʋ́ karmɩbɛlɛ rɩ́, rɩ́wɔ́ ja nyiidaborwie bil tɛ́sɩ́ɩ́, a makɛ rɩ nɩkana ná yíkí náŋá ko aá zɩ́nʋ́ má, rʋ́ʋ́ zʋʋ cɩ́ ráŋ.
10 Zeezi ɓɩɛ́na váárɛ nɩkana; a tɩŋ ɛ́ wɩ́ɛ́, pʋɔla má wuu có rʋʋ túó peri tɩ́kʋ́ mɛ́.
11 Rɩ kaŋtɔmɔ nɩzɩ́nɛ nɛ́ dé ná Zeezi wuu, ɓaá tuwi ɓírmi tíé ní ʋ sɩ́ɛ́, ká kɩ́ɩ́lɛ bʋlɛ́:
«Ɩ nɛ́ ká Wɩɩsɛ Bio.»
12 Ká Zeezi wɩ sáŋɛ́ aá pɔ́wɔ́.
Ʋʋ́ fɛ́l sɩ́ɩ́ bɛ́sɩ́wɔ́ mɛ́ bʋlɛ́:
«Ɩ́ sɩ́ á rɩ́wɔ́ zɩ́mɩ́ŋ há ká nɛ́ŋ ná.»
Zeezi tʋ́ɔ́sʋ́ karmɩbɛlɛ fí rí bɛllɛ
13 Ɛ́ nɛ́ Zeezi isi mʋ́ zɩ́ paalɔ, ká yɩ́rɛ nɩɛ ná ʋ há có, ɓa kóú rí.
14 Ʋ tʋ́ɔ́sɩ́wɔ́ nɩɛ fí rí bɛllɛ, rɩ́wɔ́ mɩ́nʋ́ laka, rʋ́ʋ́ tʋ́ŋwɔ́ rɩ́wɔ́ mʋ́ bʋl Wɩɩsɛ wɩ́ɛ́ aá pá nɩɛ,
15 ká pɔ́wɔ́ dóé rɩ́wɔ́ wólli kaŋtɔmɔ aá kiri.
16 Ná nɩɛ ná fí rí bɛllɛ ʋ há tʋ́ɔ́sɛ́:
Sɩmɔŋ* ná ʋ há kené aá yɩ́rɛ Pɩɛrɛ,*
17 Zebede bɛlɛ Zakɛ rɩ́rʋ́ maábio Zaŋ, ɓa ná ʋ há kené aá yɩ́rɛ Zuwifiwa liŋó mí:
«|iBʋanɛzɛsɛ|d,» ʋ mʋ́l nɛ́ ká: «Duóɓɛɛlɔ́ naŋsɩ́ɛ́ bɛlɛ.» 18 Aŋdɩrɩ, Filipi, Bartelemi, Matie, Toma, Alfe bio Zakɛ,* Tade, kajáŋtɩɩnɔ Sɩmɔŋ,*
19 arɩ́ Zɩdaasɛ* há lɛ́ Isikariyo, Zeezi kaapáárɔ.
Zeezi jaa nɩɛ kúó rɩ́wɔ́ kánʋ́ mʋ́ jaá
20 Ká Zeezi rɩ́rʋ́ karmɩbɛlɛ bɩrmʋ́ jaa.
Nɩɛ ɓɩkana baa ko cúwó mí, ɓa wɩ gbel wuo ná aá díwó ɓɩdííli má tɩɩ.
21 Zeezi jaa nɩɛ nʋ́ʋ́ wɩ́'állɛ, arɩ́ nɩɛ ná há cúú mí ní, a isi ko rɩ́wɔ́ kánʋ́, ká bʋlɛ́:
«Ʋ nyúú cʋ́rɔ́.»
Zeezi dóé lɛ́ Wɩɩsɛ nɛ́
22 Ká Wɩɩsɛ kɛŋzɩnna* ná há lɛ́ Zerizalɛmɛ ko, má sɛ́:
«Kaŋtɔmɔ kuóro ná ɓa háá yɩ́rɛ Belzebil* zɩ́nʋ́ rɛ́, ʋ yɩr mɛ́ nɛ́ ʋ wólli kaŋtɔmɔ aá kiri.»
23 Ɛ́ nɛ́ Zeezi yɩ́rwɔ́ a sʋ́ɔ́lɛ pɔ́wɔ́ a bʋlɛ́:
«Sɩtaanɛ* sɩ́ wóllú tɩɩ gɩrɛ kiri?
24 Rɩ kuóro dɩtɩ́llɛ nɩɛ nɛ́ wɩ nʋtʋmɛ kené, ʋ kuorí waá cɔ.
25 Rɩ nʋbámmá nɛ́ kúé zʋ jaa, ɛ́ jaa máá yɛ́rkʋ́ nɛ́.
26 Ɛ́ wɩ́ɛ́, rɩ Sɩtaanɛ nɛ́ ísé gɩrɛ aá yóú tɩɩ, ʋ cáksʋ́ jaa nɛ́, ʋ sɩɛ́ waá cɔ, ʋ wɩ́ɛ́ zɔ́kɔ́ nɛ́ ɛ́.
27 Rɩɩ nɩ́ɩ́ já rɩ́ɩ́ zʋʋ dí nɩduo jaa, ʋ mɔhɔ̃́ rɩ́ɩ́ dóé ní kɩ́llʋ́, rɩ́ɩ́ wóllú vɔwɛ bil ká sɩɛ́ zʋʋ dúú jaa.
28 «Taŋá nɛ́ ŋ bʋl aá pɛ́ɩ́wa, nɩbííne há á wɩ́ɛ́ ná wuu zɔkɛ Wɩɩsɛ mɛ́, Wɩɩsɛ wówó wuu suúri ní aá hé.
29 Amá rɩ nɛ́ŋ tʋ́ksɛ́ Wɩɩsɛ Sabɩɩna* é, wɩ́bɔ́ŋ rɛ́; ɛ́ wɩ́bɔŋ é wɩ suúri kené a kaá mʋ́ wuu.»
30 Ɓa há sɛ́ kaŋtɔŋbɔ́ŋ rɩ́ mɩŋ Zeezi mí, a kánʋ́ aá a ná nɛ́ tɛ, ʋ bʋl ɛ́.
Zeezi maá rɩ́rʋ́ maábɛlɛ
31 Ɛ́ nɛ́ Zeezi maá rɩ́rʋ́ maábɛlɛ ko cɩ́ pʋmmɔ rɩ́, ká tʋŋ rɩ́wɔ́ zʋʋ yɩ́rʋ́ rʋ́ʋ́ ko lɛ.
32 Nɩɛ ɓɩkana fa kénó a kíl Zeezi, ká ɓa ko zʋʋ bʋ́lʋ́ rɩ́ bʋlɛ́:
«Ná, ɩ maá rɩ́rɩ́ maábɛlɛ nɛ́ pʋmmɔ, aá yɩ́rɩ́.»
33 Ɛ́ nɛ́ ʋ bʋ́lwɔ́ rɩ́ bʋlɛ́:
«Ŋ maábɛlɛ nɛ́ ká áŋwa?»