Luuka 9

UYeesu ikivafilikha avanandeje vaakwe ishumi na vavili

(Mataayo 10:5-15; Maluko 6:7-13)

1 UYeesu wávashemeela avanandeje vaakwe ishumi na vavili. Wávapeela ingufu nu wutawulilwa uwa kigadaga amalungu, na kiponia amatamu. 2 Khanji wávafilikha kiluta kikhoma uWutwa wa Nguluvi na kivaponia avatamu. 3 Wávajovela wáaja, “Mu lushuulo lwenyu, musikhasumulaji shoshoona, hata nkwegu, hata mbukuli, hata shakiilya, hata ihela, hata mwenda gwa kipyanisa. 4 Ilitembe lina musiyinjile, mukhalaje muumo mbakha pina muwuukha mu lijumbi ilyo. 5 Leelo mu lijumbi lina avaanu vasikhavasaajisa, wuukhaji na kikungʼuuna amankundi gina gali mu nsayo sa magulu geenyu, yive shimanyilo sha kihigwa kwa kiyikhaana iMola iNofu.” 6 Baheene avanandeje vala vaaluta mu njinji viikhoma iMola iNofu, na kivaponia avatamu mu mbali soona sina vakhandi viiluta.

UHelode iilava ni nsengo sa Yeesu

(Mataayo 14:1-12; Maluko 6:14-29)

7 Insengo soona sina uYeesu akhandi isenga, umutwa uHelode akhandi ipulikha imola saakwe. Ago gamugaha kiiva nu muninu, kwa kiiva avaanu avanji vakhandi viija uYeesu yu Yohana uMutwiniaji wáfyukha kihuma kwa vina vafwile. 8 Avanji vakhandi viija, “Umukuwamalago uEliya wáyinsa khanji.” Avanji vaajova, “Yuyuumo wa vakuwamalago ava paanyuma wáfyukha.” 9 Leelo uHelode wáajova, “One namudumulaga umutwe uYohana! Lino, yu naani yuna iigaha aga gina nipulikha?” Baheene uHelode, wáava isakula mandu kitangaana nu Yeesu.

UYeesu ikivaliisa avaanu magana mashumi gasaanu (5,000)

(Mataayo 14:13-21; Maluko 6:30-44; Yohana 6:1-14)

10 Avanandeje vala vawuyaga kwa Yeesu, vamutavililaga goona gina vagahaga. Baheene wávatoola vaaluta ku lijumbi lina likhandi litambulwa Betisayida, kiija vave veene duguli pa luvala lwa shipata. 11 Leelo, avaanu vinshi vaganaga kimanya kuna wáaluta, vamufwataga. UYeesu wávaposheela wunofu, wáyansa kivamanyisa imola isa Wutwa wa Nguluvi. Khanji wáava ikivaponia avatamu.

12 Pashinyiijuva, avamanyisiwa vaakwe valutile kwa Yeesu vamujovela kiija, “Uvahwese avaanu valute mu njinji na mu magunda gina gali nkholeela, kiija vasakule ifyakiilya na pa kigona, kwa kiiva panu lunyikha hela, pagaya shiinu sha kivatanga.” 13 UYeesu wávajovela wáaja, “Omwe, muvapeele yuumwe ishakiilya!” Vamugomosesa, “Ose tisiina shiinu, leelo tina makhaate gasaanu ni nswi sivili hela. Pamonga tilute tigule ishakiilya, baheene shisikwilane avaanu ava woona?” 14 Vakhajovile ago, kwa kiiva avaanu vina vakhandi vakwali pala, avagoosi veene vakhandi magana mashumi gasaanu (5,000). Baheene uYeesu wávajovela avamanyisiwa vaakwe wáaja, “Vakhasi avaanu mu fipuga, vave mashumi gasaanu gasaanu ndeeni.” 15 Vaagaha ngaja shina wávajovela, vavakhasa pansi avaanu woona. 16 Baheene uYeesu wátoola amakhaate gala gasaanu ni nswi sila sivili wáloleela kushaanya, wámuhonjesa uNguluvi. Baheene wámenyulania wávapeela avamanyisiwa vaakwe vavagavile avaanu. 17 Avaanu woona vaalya, vayikuta. Avamanyisiwa vaakwe vakungaania amamenyulanie, gaamema matunduti ishumi na gavili.

UPetulo ikimubedela uYeesu kiija Mukulusaaji

(Mataayo 16:13-19; Maluko 8:27-29)

18 Ilijuva limonga, uYeesu na vamanyisiwa vaakwe, vakhandi lumo pa luvala lumonga ulwa shipata. UYeesu akhandi ifuunya kwa Nguluvi. Kuunyuma wávaposa avamanyisiwa vaakwe wáaja, “Avaanu viija one yuune naani?” 19 Vamugomosesa vaaja, “Vamonga viija yuuwe Yohana Mutwiniaji, avanji viija yuuwe Eliya mukuwamalago. Avanji viija owe uli yuyuumo na vakuwamalago ava pawukuulu yuna wáfyukha.”

20 UYeesu wávaposa khanji, “Omwe mwijova one yuune naani?” UPetulo wámugomosesa wáaja, “Owe yuuwe Mukulusaaji yuna uNguluvi wátahisaaga kimufilikha.” 21 UYeesu wávapavila na kivakhaana wáaja, vasikhamujovelaga muunu yoyoona kiija, umwene Mukulusaaji.

UYeesu itaviilila shina hambi iifwa na kifyukha

(Mataayo 16:20-28; Maluko 8:30–9:1)

22 UYeesu wávajovela avavanda vaakwe wáaja, “One Lusawo lwa Muunu nisakulwa kiiva na malava minshi na kikhaanwa na vakhome va Vayahuudi, avatambule avakhome na vamanyisaaji va ndaji sa Musa. Nikhabudwa, leelo ilisiku lya wutatu, nikhafyukha.”

23 Kuunyuma, uYeesu wávajovela woona wáaja, “Umuunu yoyoona nda isakula kinifwata one, aleshe gina agadobweshe, ayihumye anifwate shila lisiku hata nda yive kiifwa. 24 Kwa kiiva umuunu yoyoona yuna isakula kiwusaajila uwuumi waakwe, uyo asiwuyase, leelo umuunu yuna ikiwuyasa uwuumi waakwe kwa kiiva ya one, uyo asiwupate. 25 Wuli, umuunu akwiliile kipata lutono lushi kwa kiwupata uwusi woona wa nyi, na kiwuyasa uwuumi wa shiluta? 26 Umuunu yoyoona yuna ikiniwonela nsoni one na mamanyiso gangu, na yuune yuna nili Lusawo lwa Muunu, pina nikhava niyinsa mu wutupikho wangu, nu wa Daada lumo na vamalayikha vaakwe, nikhamuwonela nsoni umuunu uyo. 27 Shiyooli nikivajovela kiija, avamonga vina vakwali panu, vasikhafwa mbakha pina vakhawaaga uWutwa wa Nguluvi.”

UYeesu ihambukha umuvili

(Mataayo 17:1-8; Maluko 9:2-8)

28 Pina sashilile ngaja nsiku munaana kihuma ajove injowo iso, uYeesu wávatoola uPetulo, uYohana nu Yaakobo, wátaana na woope ku shidunda kifuunya. 29 Pina ifuunya, wáhambukha uweeni, amenda gaakwe gaava mavalafu gingʼaala mandu. 30-31 Uluhaavi luulo, vatwiwukha vagoosi vavili vingʼaala mu wutupikho wa Nguluvi. Avagoosi awo vakhandi vava Musa nu Eliya, vakhandi vilogola nu Yeesu. Vakhandi vilogola nu mwene shina hambi iimala gina uNguluvi akhandi agulumiile, imola isa kiifwa kula ku Yelusalemu.

32 UPetulo na vayine vakhandi vagonile utulo. Leelo pina vilamukha, vakhamwajile uYeesu ingʼaala. Khanji vakhavaajile avagoosi vavili vayiimile lumo nu mwene. 33 Avaanu vala vavili pina vakhandi viwuukha, uPetulo wámujovela uYeesu wáaja, “Wee Mutwa, lunofu ose tive tiikhala bahanu. Lino tisenje ingono sitatu. Yimo yive yaakho, yimonga ya Musa, iyinji yive ya Eliya.” UPetulo asikhamanyile iijova shishi.

34 UPetulo pina iijova injowo iso, lyayinsa ilifunde lyavagubikha. Apo vatiila mandu. 35 Ishawuti yapuliisikha kihuma mu lifunde yiija, “Uyu yumwene Lusawo lwangu yuna nimubagwile, mumupulisaaje!” 36 Ishawuti iyo pina yasisimaga kipuliisikha, uYeesu wáwonekha ali mwene duguli. Ago goona gina vagaagaga apo avamanyisiwa vaakwe, kusiina muunu yuna vamutavililaga mu nsiku iso.

UYeesu ikimuponia umudiimi umunya lilungu

(Mataayo 17:14-18; Maluko 9:14-27)

37 Ilijuva lya wuvili, uYeesu na vamanyisiwa vala vatatu pina viyiikha kihuma ku shidunda, vatangaana ni shipuga sha vaanu vinshi. 38 Kihuma mu shipuga shila umuunu yumonga wákhosiise mandu ishawuti wáaja, “Wee Mumanyisaaji, nikikulomba umutanje umwanangu, kwa kiiva ninawo yuuyu hela. 39 Ililungu ilyo, pina liiva likimukhata, baaho ilyova ilyowo mandu. Khanji likimudegensa na kimugwisa pansi iiva ngaja munya malibisi, kuno ilimfulu likimuhuma mu mulomo. Ililungu ilyo lisikimuleshela nyangu likiyitenekha kimulafya mandu. 40 Navalomba avamanyisiwa vaakho kiija validaje, leelo vagombola.” 41 UYeesu wávayankha wáaja, “Omwe vaanu va shisafi ishi muna musikinihuviilila! Wuli, nisiikhale noomwe mbakha payooli? Nisivagugumile omwe mbakha payooli? Muleeta umwanaakho panu.”

42 Umwana yula pina iiluta, ililungu lila lyamugwisa pansi, lyamudegensa. Baheene uYeesu wálikhajila, wámuponia umwana yula, wámugomosa kwa wiihe. 43 Avaanu woona pina vasaagaga ingufu inkhome sa Nguluvi ngaja shina sishwali, vaswigaga mandu.

UYeesu itaviilila khanji isa kiifwa umwene

(Mataayo 17:22-23; Maluko 9:30-32)

Avaanu vala pina viswigaga goona gina akhandi isenga uYeesu, wávajovela avamanyisiwa vaakwe wáaja, 44 “Pulisaaji wunofu gina nisakula kivajovela! One Lusawo lwa Muunu, nisidoolelwe na kitawulwa ku valugu.” 45 Leelo avamanyisiwa vaakwe, vasamanyaga uluganulo lwa gala gina akhandi iijova, kwa kiiva vakhandi vafihiilwe, kiija valeshe kigamanya. Woope vaava vitiila kimuposa.

Yu naani yuna mukhome mu Wutwa wa Nguluvi

(Mataayo 18:1-5; Maluko 9:33-37)

46 Avamanyisiwa va Yeesu vayansa kikhaanania kiija yu naani yuna mukhome mu veene. 47 UYeesu wáamanya amahiiva gaanave. Baheene wámutoola umwana umunangʼana, wámuvejeesa nkholeela nu mwene, 48 wávajovela wáaja, “Umuunu yuna ikimusaajisa umwana umunangʼana ngaja uyu kwa litaawa lyangu, iiva ikinisaajisa one. Khanji yuna ikinisaajisa one, iiva ikimusaajisa yuna wánifilikha one. Kwa kiiva yuna mudoodo ku omwe woona, uyo yu mukhome.”

Umuunu yuna asili mulugu weesu ali lubali lwesu

(Maluko 9:38-40)

49 UYohana wámujovela uYeesu wáaja, “Wee Mutwa, tamwaga umuunu yumonga ikigadaga amalungu kwa litaawa lyakho, leelo ose tamukhaana, kiiva asili mumanyisiwa waakho lumo noose.” 50 UYeesu wámugomosesa wáaja, “Musikhamukhaanaji, kwa kiiva umuunu yoyoona yuna asili mulugu weenyu, uyo ali lubali lwenyu.”

AVasamaliya vamonga vikhaana kimuyanushila uYeesu

51 Insiku sa Yeesu isa kiluta kushaanya pina saali nkholeela, umwene wálamwile kiluta ku Yelusalemu. 52 Baheene wávafilikha avaanu valongole ku lujinji lwa Vasamaliya kiija, vamunosese uluvala ulwa kifishila. 53 Leelo avaanu va kula vakhaana kimuyanushila, kwa kiiva akhandi iiluta ku Yelusalemu. 54 Avamanyisiwa vaakwe, uYaakobo nu Yohana, vaganaga kilyaga ilyo vaaja, “Wee Mutwa weesu, wisakula tilajise umooto guyiishe kihuma kushaanya guvanyaanye, [ngaja uEliya shina wágahile]?” 55 Leelo uYeesu wávasetushila, wávakhajila. [Wáajova, “Musimeenye kiija omwe muli vaanu va wuli wuli, kwa kiiva uLusawo lwa Muunu asikhayinsile kibuda, leelo akhayinsile kivakulusa avaanu.”] 56 Vawuukha vaaluta ku lujinji ulunji.

Amaswi gina gisakulwa kwa vina vikimufwata uYeesu

(Mataayo 8:19-22)

57 UYeesu na vamanyisiwa vaakwe pina vakhandi mu nsila vishuula, umuunu yumonga wámujovela uYeesu wáaja, “Nisikufwate kokoona kuna hambi wiiluta!” 58 UYeesu wáaja, “Insheve sina malindi, inyuni sina fiwanso, leelo one Lusawo lwa Muunu, nimungaya litembe.”

59 UYeesu wámujovela umuunu uyunji, wáaja, “Unifwataje!” Umuunu yula wáajova, “Wee Mutwa, unitawule tangusiina niwuye kukhaaya, nimuhepelese uwiheesu mbakha afwe nimusiile.” 60 UYeesu wámuyankha wáaja, “Valekha vina vafwile vavasiile vina vafwile vaanave. Leelo owe, ulute kikhoma imola sa Wutwa wa Nguluvi.”

61 Woope uyunji wámujovela uYeesu wáaja, “Wee Mutwa, nisikufwate. Lino unitawule tangusiina nilute nivahwese ava kukhaaya.” 62 UYeesu wámujovela wáaja, “Umuunu yoyoona, yuna wáyansa kilima ni ngʼombe, nda aseetushe aloleele kunyuma, uyo asifwaya kiiva muvanda wa Wutwa wa Nguluvi.”