Maluko 8

UYeesu ikivaliisa avaanu magana mashumi gana (4,000)

(Mataayo 15:32-39)

1 Mu nsiku sila, ilisiku ilinji ishipuga shikhome sha vaanu shakungaanile kwa Yeesu. Avaanu vala pina vakhandi vakheele nu Yeesu nsiku sitatu, ishakiilya shaanave shasilaga. Baheene uYeesu wávashemeela avamanyisiwa vaakwe wáajova, 2 “Nikivasungupila avaanu ava, kiiva vakheele noose nsiku sitatu, lino vagaya shakiilya. 3 Nda nivatawule kiija vawuye kukhaaya saanave pina vana njala, vasisilishe mu nsila, khanji avanji viihuma kutali.”

4 Avamanyisiwa vaakwe vamugomosesa vaaja, “Tisigaaje kwi amakhaate pa lunyikha panu aga kivakwila avaanu woona ava?” 5 UYeesu wávaposa wáaja, “Muna makhaate galinga?” Vamugomosesa vaaja, “Gali fungati.” 6 Baheene uYeesu wávalajisa avaanu kiija vakhale pansi. Wátoola amakhaate gala fungati, wámuhonjesa uNguluvi. Wámenyulania, wávapeela avamanyisiwa vaakwe, woope vavagavila avaanu woona. 7 Khanji vakhandi nu tuswi tusheefu. UYeesu wáhonjesa, wávajova avamanyisiwa vaakwe kiija, soope vavagavile avaanu. 8 Avaanu valiisaga, vayikuta. Baheene avamanyisiwa vakunganiaga amakhaate amamenyulanie gina gasigalaga, gamemile matunduti fungati. 9 Avaanu vina valiisaga ishakiilya shila, vakhandi ngaja magana mashumi gana (4,000). 10 Baaho uYeesu wávahwesa, wáyangala mu shipugo lumo na vamanyisiwa vaakwe, wáaluta ku mbali isa ku Dalimanuta.

AVafalisaayo visakula uYeesu agahe amabikha

(Mataayo 12:38-42; 16:1-4)

11 AVafalisaayo valutile kwa Yeesu, vayansa kikhaanania na woope. Vakhandi vikimujela vikimusakula avawonense ishimanyilo, kiwonensa kiija afiliikhwe nu Nguluvi. 12 UYeesu wásugumilwa mu numbula, wáaja, “Ishisafi ishi shisakula ishimanyilo, shiyooli nikivajovela musikhashaaga shimanyilo shoshoona.” 13 Wávalekha, wáyinjila khanji mu shipugo valowokha mu lilamba ilikhome vaaluta ku mwambwa yinji.

UYeesu ipavila ulwa lihelu lya Vafalisaayo nu mutwa uHelode

(Mataayo 16:5-12)

14 Pina vakhandi vilowokha, vakhandi vana mukhaate gumo mu shipugo, kwa kiiva avamanyisiwa vaakwe vakhandi vasamiilwe kitoola amakhaate. 15 UYeesu wávasimila wáaja, “Nikivajovela kiija muyivavalaje ni lihelu ilya Vafalisaayo ni lihelu ilya mutwa uHelode.” 16 Avamanyisiwa vala vayansa kijovelana veene viija, “Ilogola ndeeno kwa kiiva tisatoola amakhaate.”

17 UYeesu wáamanya gala gina viijova, wáaja, “Kwashi mwikhaanania yuumwe kiija mungaya makhaate? Mushaanali musinakumbushe na kimanya? Inumbula seenyu nyuumu? 18 Muna meeho, leelo kwashi musiloleela? Khanji muna makutu, leelo kwashi musipulikha? Musikumbukha, 19 uluhaavi lula luna namenyulaga amakhaate gasaanu, valiisaga vaanu magana mashumi gasaanu (5,000), mwakunganiaga matunduti galinga gina vasigasaaga?” Vaaja, “Matunduti lishumi na gavili.”

20 “Pina nimenyulaga amakhaate fungati, valiisaga vaanu magana mashumi gana (4,000), mwakunganiaga amasigase matunduti galinga?” Vaaja, “Takunganiaga matunduti fungati.” 21 Wávaposiise wáaja, “Wuli, mushaanali musinaamanye?”

UYeesu ikimuponia umupofu ku Betisayida

22 UYeesu na vamanyisiwa vaakwe vafishile ku Betisayida. Kula avaanu vamutwaliile umupofu yumonga, vamulombile amupyase, ulugulumilo lwanave apone. 23 UYeesu wámukhata iliwokho umupofu yula, wáhumile nawo mu lujinji lula. Wámufuunyila amata ku meeho, baheene wámuviishila amawokho, wámuposa wáaja, “Ukishaaga shimonga?” 24 Umupofu yula wáloleelile, wáaja, “Nikivaaga avaanu vijenda, leelo viwonekha ngaja mapishi.”

25 UYeesu wáwuyansaaga khanji, wáviikha amawokho gaakwe ku meeho ga mupofu. Apo umupofu yula wákhangasa kiloleela. Ameeho gaakwe gaponaga, wáloleelaga wunofu ifiinu fyona. 26 UYeesu wámutawulaga awuyaje kukhaaya, wáajova, “Pina wiiwuya usikhashililaga mu lijumbi.”

UPetulo ikimubedela uYeesu kiija Mukulusaaji

(Mataayo 16:13-20; Luuka 9:18-21)

27 UYeesu na vamanyisiwa vaakwe, vawuushile vayansa kiluta ku booma ya Kayisaliya-Filipi. Pina vakhandi mu nsila wávaposa wáajova, “Avaanu viija one yuune naani?” 28 Vamugomosesa vaaja, “Vamonga viija yuuwe Yohana Mutwiniaji, avanji viija yuuwe Eliya mukuwamalago, avanji viija mukuwamalago ngaja vakuwamalago ava paanyuma.” 29 Wávaposiise wáaja, “Omwe mwijova one yuune naani?” UPetulo wámugomosesa wáaja, “Owe yuuwe Mukulusaaji yuna uNguluvi wátahisaaga kimufilikha.” 30 UYeesu wávakhaana vasikhamujovelaga muunu yoyoona kiija, umwene Mukulusaaji.

UYeesu itaviilila shina hambi iifwa na kifyukha

(Mataayo 16:21-28; Luuka 9:22-27)

31 UYeesu wáyansiise kivawulanisa avamanyisiwa vaakwe kiija, umwene Lusawo lwa Muunu, isakulwa kiiva na malava minshi na kikhaanwa na vakhome va Vayahuudi, avatambule avakhome na vamanyisaaji va ndaji sa Musa. Akhabudwa, leelo ilisiku lya wutatu akhafyukha. 32 UYeesu wájovaga amaswi ago bila kifiha. UPetulo wámutoolaga uYeesu wáaluta na woope palubali, wáyansa kimukhajila kiija, asikhalogolaga amaswi ngaja ago. 33 Leelo uYeesu wásetukhaga, wávaloleela avamanyisiwa vaakwe, wámukhajila uPetulo wáaja, “Wuukha kumwandi yangu owe Shetaani, kiiva amahiiva gaakho gasili ga Nguluvi, leelo wihiiva ga vaanu.”

34 Baheene uYeesu wáshishemeela ishipuga sha vaanu na vamanyisiwa vaakwe, wávajovela wáaja, “Umuunu yoyoona nda isakula kinifwata one, aleshe gina agadobweshe, ayihumye anifwate hata nda yive kiifwa. 35 Kiiva, umuunu yoyoona yuna isakula kiwusaajila uwuumi waakwe, uyo akhawuyasa. Leelo umuunu yuna ikiwuyasa uwuumi waakwe kwa kiiva ya one na kwa kiiva ya Mola iNofu, uyo asiwupate uwuumi wa shiluta. 36 Poona umuunu akhayambulila shishi, kipata uwusi woona wa nyi na kiwuyasa uwuumi wa shiluta? 37 Lino, umuunu ahumye shishi kipyanisa uwuumi waakwe? Kusiina shiinu shoshoona. 38 Umuunu yoyoona yuna ikiniwonela nsoni one na mamanyiso gangu mu vaanu va shisafi ishi, vina viigaha uwushemi nu wunansi uwunji, na yuune yuna nili Lusawo lwa Muunu, pina nikhava niyinsa mu wutupikho wa Daada lumo na vamalayikha vaakwe, nikhamuwonela nsoni umuunu uyo.”