Maluko 9

1 UYeesu wáyonjelesa kijova wáaja, “Shiyooli nikivajovela kiija, avamonga vina vakwali panu vasikhafwa mbakha pina vakhawaaga uWutwa wa Nguluvi wuyinsa kwa ngufu.”

UYeesu ihambukha umuvili

(Mataayo 17:1-13; Luuka 9:28-36)

2 Saganile kishila nsiku mutanda, uYeesu wávatoolile uPetulo, uYaakobo nu Yohana. Wálutile nawo ku shidunda ishitali mandu, ukho vakhandi veene. Baheene pina vali pala, uYeesu wáhambukha umuvili gwakwe paveene, 3 amenda gaakwe gaava mavalafu gingʼaala mandu, na kusiina umukhansaaji wa menda panja panu yuna akwiliile kigavalasa ngaja amenda ga Yeesu.

4 Baheene vatwiwukha avakuwamalago uEliya nu Musa, vaava vilogola nu Yeesu. 5 UPetulo wámujovela uYeesu wáaja, “Mumanyisaaji, lunofu ose tive tiikhala bahanu. Lino tisenje ingono sitatu. Yimo yive yaakho, yimonga ya Musa, iyinji yive ya Eliya.” 6 UPetulo asikhamanyile iijova shishi, kiiva umwene na vayine vaali viswigaga.

7 Baheene lyayinsile ilifunde, lyavagubikha, ishawuti yapuliisikha kihuma mu lifunde yina yiijova, “Uyu yumwene Lusawo lwangu. Nimuganile, mumupulisaaje!” 8 Baaho vaganile kiloleela kuno na kuno vasamwajile umuunu uyunji, leelo vamwajile uYeesu mwene duguli.

9 Pina vakhandi viyiikha kihuma ku shidunda, uYeesu wávakhaana kiija, “Musikhamujovelaji umuunu yoyoona gina mwagaaga kuno, mbakha uluhaavi luna uLusawo lwa Muunu, akhafyukha kihuma kwa vina vafwile.” 10 Na vaveene vayinatilaga iliswi lina wájovile uYeesu, kuno vapiposania veene kwa veene kiija, “Kihuma mu mfwa lulwene luganulo lushi?”

11 Vamuposa, uYeesu vaaja, “Kwashi avamanyisaaji va ndaji sa Musa viija mbakha ayinse tangusiina uEliya, baheene kuunyuma uKilisito?” 12 UYeesu wáajova wáaja, “Shiyooli, uEliya asilongole tangusiina, kinosa injowo soona. Khanji, kwashi yiyandiikhwe mu Mayandikhwa aManofu kiija, uLusawo lwa Muunu akhalafisiwa mandu na kisalwa? 13 Leelo nikivajovela kiija, uEliya shi wáyinsaga, vamugahilaga fivi ngaja shina yiyandiikhwe ulwa mwene mu Mayandikhwa aManofu.”

UYeesu ikimuponia umudiimi umunya lilungu

(Mataayo 17:14-21; Luuka 9:37-43)

14 UYeesu, uPetulo, uYaakobo nu Yohana vafishile uluvala luna vakhandi vakwali avamanyisiwa vala avanji. Vashaajile ishipuga ishikhome sha vaanu baaho. Avamanyisaaji avamonga va ndaji sa Musa vaali vikhananiaga na vamanyisiwa va Yeesu. 15 Avaanu vala pina vamwajile uYeesu vaswijile mandu, vamulutiile luvilo, vamuhunjila. 16 UYeesu wávaposiise wáaja, “Shiinu shishi shina mukhaanania?”

17 Umuunu yumonga mukhati mu shipuga shila, wámuyanshile wáaja, “Mumanyisaaji, naava nimuleetile umuswamu wangu kunyaakho umuponie, ana lilungu lina likimupeela kiiva mbwibwi. 18 Wiila pina likimukhata, likimugwisa pansi, likimugaha ahumye ilimfulu mu mulomo na kigegejula ameeno, nagu muvili gwiyuuma. Nivalombile avamanyisiwa vaakho kiija validaje ililungu, leelo vagombola.”

19 UYeesu wávayankha wáaja, “Omwe vaanu va shisafi ishi muna musikinihuviilila! Wuli, nisiikhale noomwe mbakha payooli? Nisivagugumile omwe mbakha payooli? Muleeti panu umudiimi uyo.” 20 Vamutwala umudiimi yula kwa Yeesu. Baaho ililungu lyaganile kimwaga uYeesu, lyamugwisiise umudiimi, wáava na malibisi, wáyansa kigalaganda, na kihumya ilimfulu ku mulomo. 21 Baheene uYeesu wámuposiise uwiihe wa mudiimi wáaja, “Ulu lwamuyansaaga yooli?” Uwiihe wa mudiimi wámuyanshile wáaja, “Kihuma pa waana. 22 Wilawiila likimugwisa mu mooto na mu malenga, ulugulumilo lwakwe limubude. Leelo nda ukwiliile kigaha ishiinu shoshoona, utusungupile na kitutanga.” 23 UYeesu wámuyanshile wáaja, “Kwashi wiijova nda nikwiliile? Shila shiinu shikwiliile kwa muunu yula yuna ikiyihuviilila.” 24 Baaho uwiihe wa mudiimi yula wátansiise ishawuti wáaja, “Nayihuviilila! Kiiva ilihuuvi lyangu linangʼana, unitanje niyihuviilile mandu.”

25 UYeesu wáganile kiloleela ishipuga sha vaanu shiyonjelela, baheene wálikhajila ililungu wáaja, “Owe lilungu yuna ukimugaha umudiimi kiiva mbwibwi na mudinde, nikikutawula kiija, muhuma umudiimi uyu, usikhamuyinjilaga khanji!” 26 Ililungu ilyo lyakhoolile inkhoolo, lyamugwisa pansi umudiimi, lyamudegensa mandu, lyahuma. Umudiimi yula wásilikha, avanji vaaja, “Wáafwa!” 27 Leelo uYeesu wámukhata iliwokho, wámunyenyula, umudiimi wáyiima.

28 UYeesu na vamanyisiwa vaakwe vayinjila mu nanda yimonga, pina vakhandi veene duguli vamuposiise vaaja, “Kwashi ose taakunya kilidaga ililungu lila?” 29 UYeesu wámugomosesa wáaja, “Ililungu ngaja lila lisikwiliile kihuma kwa liswi shiishi, mbakha kifuunya.”

UYeesu ilogola khanji shina hambi iifwa na kifyukha

(Mataayo 17:22-23; Luuka 9:43-45)

30 UYeesu na vamanyisiwa vaakwe vawuushile pala pina vaali vakwali, vashiliile ku Galilaya. Umwene asadobokhaga umuunu uyunji amanye pina akwali, 31 kiiva akhandi ikivawulanisa vamanyisiwa vaakwe veene duguli. Wávajovela wáaja, “One Lusawo lwa Muunu, nisidoolelwe na kitawulwa ku vaanu vina hambi vikinibuda, leelo ilijuva lya wutatu nikhafyukha.” 32 Avamanyisiwa vaakwe vasamanyaga lina iijova, leelo vatiilaga kimuposa injowo isa kiifwa na kifyukha umwene.

Yu naani yuna mukhome mu Wutwa wa Nguluvi

(Mataayo 18:1-5; Luuka 9:46-48)

33 UYeesu na vamanyisiwa vaakwe vafishile mu lijumbi lya Kapelinawumu. Pina vakhandi mu nanda yimonga, uYeesu wávaposiise wáaja, “Mwava mukhaanania shishi pina mwava mu nsila?” 34 Leelo aveene vasisimaga tototo, kiiva pina vaali mu nsila vaali vikhaanania kiija yu naani yuna mukhome kuveene.

35 UYeesu wákheele pansi, wávashemeela avamanyisiwa vala ishumi na vavili, wávajovela wáaja, “Umuunu yuna isakula kiiva mukhome isakulwa kiiva munangʼana ku woona, khanji isakulwa avasenjele woona.” 36 Baheene wámutoola umwana umunangʼana, wámuyiimya paakhati, wámukumbaatila, wávajovela wáaja, 37 “Umuunu yoyoona yuna ikimusaajisa umwana umunangʼana ngaja uyu kwa litaawa lyangu, iiva ikinisaajisa one. Khanji yuna ikinisaajisa one, asiiva ikinisaajisa yuune duguli hela, leelo iiva ikimusaajisa yuna wánifilikha one.”

Umuunu yuna asili mulugu weesu ali lubali lwesu

(Luuka 9:49-50)

38 UYohana wámujovile uYeesu wáaja, “Mumanyisaaji, tamwaga umuunu yumonga ikigadaga amalungu kwa litaawa lyakho, leelo ose tamukhaana kiiva asili wa shipuga sheesu.” 39 UYeesu wáaja, “Musikhamukhaanaji, kiiva kusiina yuna isenga amabikha kwa litaawa lyangu, kuno khanji ikinilogola wuvi one. 40 Umuunu yoyoona yuna asili mulugu weesu, uyo ali lubali lwesu. 41 Umuunu yoyoona yuna ikivapeela ikhoomasi ya malenga kiiva omwe muli vaanu va Mukulusaaji, shiyooli nikivajovela kiija, uNguluvi akhamupeela ulutono lwakwe.”

UYeesu imanyisa aga kiyivavala na kihuluta mu wuumi wa shiluta

(Mataayo 18:6-9; Luuka 17:1-2)

42 Avaanu avanangʼana vina vikinihuviilila one, umuunu nda amupinse umunyaayumo waanave agahe uwunansi, yiiva shiba umuunu uyo apinyilisiwe mu nsingo ilyala ilikhome ilya kihawulila na kitaagwa mu shoogo ishitali isha bahali, kulikho kihigwa nu Nguluvi. 43 Iliwokho lyakho nda likikupinsa kigaha uwunansi, lidumula! Shiba kihuluta mu wuumi wa shiluta ni liwokho limo, kulikho kihuluta na mawokho gavili mu malafyo ga mooto gwa shiluta. [ 44 Umo mumwene muna mangʼonyo gaanave gasiifwa, nu mooto gwa shiluta.] 45 Iligulu lyakho nda likikupinsa kigaha uwunansi, lidumula! Shiba kihuluta mu wuumi wa shiluta ni ligulu limo, kulikho kitaagwa na magulu gavili mu malafyo ga mooto gwa shiluta. [ 46 Umo mumwene muna mangʼonyo gaanave gasiifwa, nu mooto gwa shiluta.] 47 Khanji, iliiho lyakho nda likikupinsa kigaha uwunansi, lijodola! Shiba kihuluta mu Wutwa wa Nguluvi ni liiho limo, kulikho kiiva na meeho goona gavili na kitaagwa mu malafyo ga mooto gwa shiluta. 48 Umo mumwene muna mangʼonyo gaanave gasiifwa, nu mooto gwa shiluta.

49 “Shila muunu akhavalasiwa nu mooto ngaja shadanda shina shivalasiwa nu muunyo. 50 Umuunyo munofu, leelo nda gunanjishe, usiiponye shishi baheene gukhole? Muveesaje muna muunyo mukhati seenyu, baheene musipulinkhane yuumwe kwa yuumwe.”