Mataayo 17

UYeesu ihambukha umuvili

(Maluko 9:2-13; Luuka 9:28-36)

1 Saganile kishila nsiku mutanda, uYeesu wávatoolile uPetulo, uYaakobo nu Yohana umunangʼana wa Yaakobo. Wálutile nawo ku shidunda ishitali mandu, ukho vakhandi veene. 2 Baheene pina vali pala, uYeesu wáhambukha umuvili gwakwe paveene. Uweeni waakwe wangʼaala ngaja lijuva, amenda gaakwe gaava mavalafu mandu ngaja uwuvalafu wa lijuva. 3 Baaho vatwiwukha avakuwamalago uMusa nu Eliya, vaava vilogola nu Yeesu. 4 Baheene uPetulo wámujovela uYeesu wáaja, “Wee Mutwa, lunofu ose tive tiikhala bahanu. Lino nda wisakula, nisenje ingono sitatu. Yimo yive yaakho, yimonga ya Musa, iyinji yive ya Eliya.”

5 UPetulo pina akhandi ashaanali apilogola, baaho ilifunde ilivalafu lyavagubikha woona. Baheene vapulikha ishawuti kihuma mu lifunde ilyo yiijova, “Uyu yumwene Lusawo lwangu. Nimuganile, ikinishendeefya, mumupulisaaje!” 6 Avamanyisiwa vaakwe vaganile kipulikha ago, vaagwa pansi vagubama, vatungumala mandu. 7 UYeesu wávejeela nkholeela, wávapyasa, wávajovela wáaja, “Yiimi, musikhatiilaji!” 8 Baaho vaganile kiloleela kushaanya, vasamwajile umuunu uyunji, leelo vamwajile uYeesu mwene duguli. 9 Pina vakhandi viyiikha kihuma ku shidunda shila, uYeesu wávapavila wáaja, “Musikhamujovelaji umuunu yoyoona gina mwagaaga kuno, mbakha uluhaavi luna uLusawo lwa Muunu, akhafyukha kihuma kwa vina vafwile.”

10 Avamanyisiwa vala vamuposa uYeesu vaaja, “Kwashi avamanyisaaji va ndaji sa Musa viija mbakha ayinse tangusiina uEliya, baheene kuunyuma uKilisito?” 11 UYeesu wávagomosesa wáaja, “Shiyooli, uEliya asilongole tangusiina, kinosa injowo soona. 12 Leelo nikivajovela kiija, uEliya shi wáyinsaga, avaanu vasikhamumanyile, vamugahilaga fivi. Shiisho ndeeno, uLusawo lwa Muunu vasimulemase.” 13 Ndeeno avamanyisiwa vala, vamanyaga kiija uYeesu akhandi ilogola isa Yohana uMutwiniaji.

UYeesu ikimuponia umudiimi umunya lilungu

(Maluko 9:14-29; Luuka 9:37-43)

14 Baheene uYeesu na vamanyisiwa vaakwe vala vatatu, pina vatinile pa shipuga shila sha vaanu, umuunu yumonga wálutile wáfugama pa Yeesu. 15 Wámujovela wáaja, “Wee Mutwa, nilomba umusungupile umuswamu wangu, kwa kiiva ana wutamu wa malibisi. Uwutamu uwo, wukimulafya mandu. Wiila pina wukimukhata wukimugwisisa mu mooto na mu malenga. 16 Namuleeta kwa vamanyisiwa vaakho, leelo vagombola kimuponia.”

17 UYeesu wávayankha wáaja, “Omwe vaanu va shisafi ishi muna musikinihuviilila! Wuli, nisiikhale noomwe mbakha payooli? Nisivagugumile omwe mbakha payooli? Muleeti panu umudiimi uyo!” 18 Vaagana kimutwala, uYeesu wálikhajila ililungu lila, lyope lyahuma. Baaho, umudiimi yula wáapona.

19 Paanyuma avamanyisiwa vaaluta kwa Yeesu pina ali mwene, vamuposa vaaja, “Kwashi ose taakunya kilidaga ililungu lila?” 20 Umwene wávayankha wáaja, “Kwa kiiva ilihuuvi lyenyu lidoodo, shiyooli nikivajovela kiija, hata nda muna lihuuvi lidoodo ngaja mbeyu ya mujombe inangʼana mandu kishila soona, musishijove ishidunda ishi kiija, ‘Wuukha apa, ulute pala,’ shoope shisiwuushe. Ndeeno kusiina ishiinu shina shisivapoote. [ 21 Leelo amalungu ndawuli ago, musikwiliile kigadaga shiishi, mbakha kwa nsila ya kimufuunya uNguluvi na kilekha kiilya kwa kiiva ya mafuunyo.]”

UYeesu ilogola khanji shina hambi iifwa na kifyukha

(Maluko 9:30-32; Luuka 9:43-45)

22-23 Ilisiku limonga uYeesu pina akhandi ku Galilaya lumo na vamanyisiwa vaakwe, wávajovelaga wáaja, “One Lusawo lwa Muunu nisidoolelwe na kitawulwa ku vaanu vina hambi vikinibuda, leelo ilijuva lya wutatu nikhafyukha.” Avamanyisiwa vaakwe vaganile kipulikha ago, vasugumiilwe mandu.

Kihomba ikhoodi ya nanda imbaagule iya kifuunyila

24 UYeesu na vamanyisiwa vaakwe, vaganile kifikha ku Kapelinawumu, avatofya khoodi vina vakhandi viitofya kwa kiiva ya nanda imbaagule iya kifuunyila, vamulutila uPetulo, vamuposa vaajova, “Wuli, umumanyisaaji weenyu woope ihomba ikhoodi iya nanda imbaagule iya kifuunyila?” 25 UPetulo wávayankha wáaja, “Eena, ihomba.” Baheene uPetulo wáyinjila mu nanda. Leelo uPetulo pina asinalogole lyolyona, uYeesu wáyansa kimuposa wáaja, “Wee Petulo, owe wihiiva wuli? Avatwa va mu nyi, viitofya ikhoodi kwa vaanu vashi? Ku vaanu vaanave awu kwa vahensa?” 26 UPetulo wáyankha wáaja, “Viitofya kwa vahensa.” UYeesu wámujovela wáaja, “Nda luli ndeeno, viiva vavasajiile avaanu vaanave kihomba ikhoodi. 27 Leelo nda tisakula tisikhavakhalasaaga avaanu ava, luta utoose indovano mu lilamba. Baheene inswi yina hambi wiitala kiyisipusa, yigabadulaga umulomo, usiyaaje ihela mukhati. Uyitoole ihela iyo, baheene ulute uhombe ikhoodi yangu ni khoodi yaakho.”