Luuka 17

Amamanyiso ga kisajilana

(Mataayo 18:6-7, 21-22; Maluko 9:42)

1 UYeesu wávajovela avamanyisiwa vaakwe wáaja, “Shiyooli gakhayinsa gina gipinsa avaanu vagahe uwunansi, leelo aka kwa muunu uyo yuna ikigapinsa ago! 2 Yiiva shiba umuunu uyo apinyilisiwe ilyala ilya kihawulila mu nsingo na kitaagwa mu bahali, kulikho kihigwa nu Nguluvi, kwa kiiva ya kimupinsa umunyaayumo mu vanangʼana ava kigaha uwunansi! 3 Lino, yivavalaji baheene muleshe kisenga ilyo!

“Ulukholo lwakho nda akunanjiile, mujovaga, nda alambiisile musajilaga. 4 Hata nda akunanjiile khavili khavili mu lijuva limo na kitina kunyaakho khavili khavili iijova, ‘Nilambiisila,’ owe musajilaga!”

Ingufu iya lihuuvi

5 Baheene avanandeje vala vamujovela uMutwa vaaja, “Tuyonjelesa ilihuuvi!” 6 UMutwa wávayankha wáaja, “Nda mwali muve ni lihuuvi lidoodo hata ngaja mbeyu ya mujombe inangʼana mandu kishila soona, mwali mukwiliile kigujova umujombe ugu kiija, ‘Kuulikha ulute usimikhwe mu bahali,’ goope gwali gukwiliile kivatiila.

Avavanda va Yeesu vasisakulwa kiyituna

7 “Tijove, umuunu yumonga mu shipuga sheenyu ana muvanda yuna iilima awu kidiima inkholo. Yu naani yuna akwiliile kimujova umuvanda pina ahumile kisenga insengo, kiija, ‘Yinsa nyangu ukhale ulye ishakiilya’? 8 Ndaali! Leelo asiijove, ‘Neleshela ishakiilya, khanji unisunje mbakha nimale kiilya na kiingʼwa. Pina naamala, baheene na yuuwe ulye na kiingʼwa.’ 9 Aasi! Asimuhonjese umuvanda, kwa kiiva wáagaha gina akhandi amulajiise? Ndaali! 10 Shilushwali na kunyeenyu, nda mumale kisenga goona gina uNguluvi avalajiise, baheene jovaji, ‘Ose tili vavanda hela, tisenjile gina tisakulwa kisenga.’”

UYeesu ikivaponia avanya nyawulova ishumi

11 UYeesu pina iiluta ku Yelusalemu, wáshilila insila yina yashililaga mu nsala ya nyi ya Samaliya ni ya Galilaya. 12 Pina akhandi iyinjila mu lujinji lumonga, wátangaanaga na vaanu ishumi avanya nyawulova. Avaanu vala, vayiima kwa kutali nu mwene, 13 vamushemeela kwa ngufu vaaja, “Wee Yeesu, Mutwa weesu, utusungupile!” 14 UYeesu wáganaga kivaaga, wávajovela wáaja, “Lutaji, muyiwonense kwa vatambule.” Pina vakhandi mu nsila viiluta, vavalasiwa inyawulova.

15 Umunyaayumo mu veene, wáganile kiwona wáapona, wáatina nyangu kwa Yeesu, kuno ikimusufya mandu uNguluvi. 16 Wáganile kifikha, wáagwa wáfugama pa magulu ga Yeesu na kimuhonjesa. Umuunu uyo akhandi Musamaliya. 17 UYeesu wáaposa wáaja, “Vasavalasiwa vaanu woona ishumi? Avanji gonja vali kwi? 18 Kusiina yuna wáatina kimutupikha uNguluvi, leelo yu muyinsano uyu hela?” 19 Baheene uYeesu wámujovela wáaja, “Yiima, ulutaje, waapona kwa kiiva wanihuviilila!”

Kiyinsa kwa Lusawo lwa Muunu

(Mataayo 24:23-28, 37-41)

20 Ilijuva limonga aVafalisaayo vamuposaaga uYeesu vaaja, “UWutwa wa Nguluvi wukhayinsa yooli?” UYeesu wávayankha wáaja, “UWutwa wa Nguluvi wusiyinsa kwa fimanyilo fina fiwonekha kwa meeho. 21 Avaanu vasikhajova, ‘Loleela! Wuli panu!’ awu ‘Wuli pala!’ Puliisi, uWutwa wa Nguluvi wuli munyeenyu.”

22 Baheene uYeesu wávajovela avamanyisiwa vaakwe wáaja, “Sikhayinsa insiku sina mukhadobokha kiiva lumo nu Lusawo lwa Muunu hata lijuva limo, leelo musikhalyaga. 23 Avaanu vakhava vikivajovela viija, ‘Loleela! Yula pala!’ awu ‘Uyu panu!’ Musikhavahuvililaji wala kivafwata. 24 Navajovela ago, kwa kiiva pina nikhava niitina one Lusawo lwa Muunu, nikhayinsa ngaja lumuli lwa noonya pina luyinsa nyangu nyangu na kimulikha imbali soona mu wulanga. 25 Pina gashaanali ago kiwonekha, tangusiina one Lusawo lwa Muunu nisilongole kilava mu malava minshi na kikhaanwa na vaanu va shisafi ishi.

26 “Ngaja shina yikhandi mu nsiku sa Nuhu, shiisho ndeeno shina yikhava uluhaavi lwa kitina one Lusawo lwa Muunu. 27 Mu luhaavi lwa Nuhu, avaanu vakhandi viilya na kiingʼwa, vitoola na kitoolwa, mbakha ilijuva lila pina uNuhu iyinjila mu shipugo ishikhome. Apo, inoonya inkhome yatoonyaga, yavabuda avaanu woona.

28 “Khanji mu luhaavi lwa Looti, yikhandi shiisho ndeeno. Avaanu vakhandi viilya na kiingʼwa, viigula na kigusa, vivyala na kisenga. 29 Leelo, ilijuva lila uLooti pina wáhumile ku Sodoma, umooto mukhali kihuma kushaanya gwayiishile ngaja noonya, gwavabuda avaanu woona. 30 Shiyooli, shiisho ndeeno shina yikhava ilijuva lila, one Lusawo lwa Muunu pina nikhava niyinsa.

31 “Ilijuva ilyo, umuunu yuna ali pashaanya ya nanda asikhayiikhaga kitoola shoshoona mukhati, leelo ayiikhaje na kisiga. Woope yuna ali ku mugunda, asikhatinaga kukhaaya kitoola shoshoona. 32 Mukumbukhaje gina gamupataga umudala wa Looti. 33 Umuunu yoyoona yuna isakula kiwusaajila uwuumi waakwe, uyo asiwuyase. Leelo umuunu yoyoona yuna ikiwuyasa, uyo asiwupate.

34 “Nikivajovela kiija, ilijuva ilyo avaanu vavili vakhava vagonile pa wusaga wumo. Yumo akhahigwa, uyunji akhalekhwa. 35 Khanji kukhava na vashimaayi vavili vakhava vihaawula lumo. Yumo akhatoolwa nu Nguluvi, uyunji akhalekhwa. [ 36 Avaanu vavili vakhava visenga insengo ku mugunda, yumonga akhatoolwa, uyunji akhalekhwa.]”

37 Avamanyisiwa vamuposa uYeesu vaaja, “Mutwa, ago gakhasenjekha kwi?” Wávayankha kwa lufitikho wáaja, “Kuna yifwiliile inkhanu, ukho kukwene inumbusi sikungaana.”