IMola iNofu ya Yeesu Kilisito
ngaja shina yayandiikhwe nu
Yohana
Imola yina yilongola
UYohana akhandi munyaayumo mu vanandeje ishumi na vavili va Yeesu. Wáyandikhaga ilitaafili ili kiija, avatanjilise avahuvililaaji woona, aVayahuudi na vaanu avanji vina vamuhuviliile uYeesu. Asiyandiishe imola ya wiikhasi wa Yeesu, leelo itaviilila imola sa mabikha minshi gina uYeesu wágahaga, na mamanyiso gina wámanyisaaga. Aga giwonensa kiija, uYeesu asikhandi muunu hela, leelo akhandi Nguluvi.
Muwutasi wa litaafili ili, likuviilisa kiija uYeesu Liswi lya Nguluvi, khanji liijova umwene Mukulusaaji yuna wátahisiwaagwa kifilikhwa nu Nguluvi. Imfwa ya Yeesu sadaakha yina yikivakulusa avaanu mu wunansi waanave. Mu mulyango gwa 13-17 itaviilila amaswi aga lugano lwakwe kwa vamanyisiwa vaakwe na kivajovela amaswi aga kivajinia pashaamihe pina akhandi asinaakhatwe. Ilitaafili limaliisisa kitaviilila ulwa kihigwa uYeesu na kikhomeelelwa pa musalaaba, na shina wáfyukhaga kihuma kwa vina vafwile na kivatwiwushila khavili khavili avamanyisiwa vaakwe.
| Umulyango | Gina gakwali mu litaafili ili |
| 1:1-18 | UYeesu Liswi lya Nguluvi yuna wáava muunu |
| 1:19–4:54 | UYeesu iyansa insengo yaakwe ni fimanyilo na mamanyiso ga wutasi |
| 5:1–8:11 | UYeesu iyonjelesa amamanyiso na mabikha minshi |
| 8:12–10:42 | UYeesu itangaana na Vafalisaayo na kiwonensa uwutawulilwa waakwe |
| 11:1–12:50 | Gina uYeesu wágahaga pina ali mu nsila kiluta ku Yelusalemu |
| 13:1–17:26 | UYeesu ikivapeela avamanyisiwa vaakwe amamanyiso, pina ali nkholeela kiifwa |
| 18:1–19:42 | UYeesu iikhatwa na kibudwa pa musalaaba |
| 20:1–21:25 | UYeesu ifyukha mu mfwa na kivatwiwushila avamanyisiwa vaakwe |