Yohana 13

UYeesu ikivayoosa amagulu avamanyisiwa vaakwe

1 Lino, pina shisinaafishe ishiwungo sha Pasaakha, uYeesu wáamanya kiija, uluhaavi lwakwe lwafikha ulwa kiwuukha mu nyi iyi kiluta kwa Daada. Uluhaavi loona pina ali mu nyi iyi, wávaganaga avaanu vaakwe, khanji wávaganaga mbakha kuwudugo.

2 UYeesu na vamanyisiwa vaakwe vaakhala kiilya ishakiilya isha pashaamihe. Uluhaavi ulo uShetaani akhandi ayinjiile mu numbula ya Yuuda umwana wa Simoni uIsikaliyoote, baheene amudoolele uYeesu. 3 UYeesu wámanyaga kiija, uwiihe wámupeelaga uwutawulilwa uwa kifilongosa ifiinu fyona, khanji kiija wáhumile kwa Nguluvi, na asiitine khanji kwa Nguluvi. 4 Lino uYeesu wáalekha kiilya, wáyiima wáviikha umutote gwakwe palubali, wátoola ilitaawulo wáyipinya mu shigudi. 5 Wáaponya amalenga mu sebeti. Ino wáyansa kivayoosa amagulu avamanyisiwa vaakwe na kivafyangula ni litaawulo lina wáyipinyaga.

6 UYeesu wáganile kifikha pina akhandi akwali uSimoni Petulo, uPetulo wámuposa wáaja, “Wee Mutwa, wuli, wisakula owe kiniyoosa amagulu gangu?” 7 UYeesu wámugomosesa wáaja, “Owe usigameenye gina nisenga uluhaavi ulu, leelo usigamanye paanyuma.” 8 UPetulo wámugomosesa wáaja, “Usikwiliile kaa kiniyoosa amagulu gangu!” Lino uYeesu wámugomosesa wáaja, “Nda nisikuyosiise owe, usikwiliile kiiva lumo noone khanji.” 9 Lino uSimoni Petulo wámugomosesa wáaja, “Wee Mutwa, nda gali ndeeno, usikhaniyosaaga amagulu geene duguli, leelo naga mawokho gangu lumo nu mutwe gwangu.” 10 UYeesu wámugomosesa wáaja, “Umuunu yuna ayiyoojile, asisakulwa kiyiyooga khanji, ila kiyiyoosa amagulu geene duguli. Umuunu uyo, iiva avaleele. Omwe muvaleele, leelo yumonga mu omwe asivaleele.” 11 UYeesu akhandi ameenye yuna asimudoolele, lulwene wájovile kiija, “Yumonga mu omwe asivaleele.”

12 UYeesu pina wáamala kivayoosa amagulu avamanyisiwa vaakwe, wátoola umutote gwakwe, wáakhala khanji pina vakhandi viilya ishakiilya, wávajovela wáaja, “Wuli, mwamanya gina navagahila omwe? 13 Omwe mukinijova one mwija, ‘Mumanyisaaji,’ khanji mwijova, ‘Mutwa.’ Mwijova ga shiyooli, kwa kiiva one nili Mumanyisaaji, khanji nili Mutwa. 14 One yuna nili Mumanyisaaji, khanji yuna nili Mutwa navayoosa amagulu geenyu. Shiisho ndeeno na yuumwe muveesaje muyoosania amagulu geenyu. 15 Navasoonela ishihwano, baheene na yuumwe mugahilanaje ngaja shina one navagahila omwe. 16 Shiyooli nikivajovela, umuvanda asili mukhome kishila umutwa waakwe, khanji yuna ifilikhwa asili mukhome kishila yuna ikimufilikha. 17 Nda mwamanya ago na nda mwifwata ishihwano ishi, lino uNguluvi asivayimiilile.

18 “Nisiijova aga, kwa omwe woona. Nivameenye kihuma pashiyanso avaanu vina nivabagwile kiiva, vamanyisiwa vangu. Leelo naajova aga baheene gakwilane gina gayandiikhwe mu Mayandikhwa aManofu kiija, ‘Umumanyi wangu yuna akhandi iilya ishakiilya lumo noone, wáseetukha kiiva mulugu wangu.’ 19 Nikivajovela goona aga pina gasinawoneshe, baheene pina gakhava giwonekha, mukhahuviilila kiija, ‘One Yuune.’ 20 Shiyooli nikivajovela, umuunu yoyoona yuna ikimuposheela yuna namufilikha, ikiniposheela one. Shiisho ndeeno, yuna ikiniposheela one, ikimuposheela yuna wánifilikha one.”

UYeesu ilogola ulwa yuna asimudoolele

(Mataayo 26:20-25; Maluko 14:17-21; Luuka 22:21-23)

21 UYeesu wáganaga kilogola ago, wásugumilwa mandu mu numbula yaakwe, wáajova bahawuvalafu wáaja, “Shiyooli nikivajovela kiija, umunyaayumo weenyu, asinidoolele.” 22 Lino avamanyisiwa vaakwe vayansa kiloleelana, kwa kiiva vasikhameenye kiija ikimulogola yu naani. 23 Akhandi akwali umumanyisiwa yumonga yuna uYeesu akhandi amugeene mandu. Umwene wákhalaga nkholeela nu Yeesu pina viilya. 24 Lino uSimoni Petulo wámusinisa umumanyisiwa uyo, wámujovela wáaja, “Muposa uYeesu, wuli, ikimulogola yu naani paakhati yeesu.” 25 Lino umumanyisiwa yula wámuyegamila uYeesu, wámuposa wáaja, “Wee Mutwa, yu naani yuna asikudoolele?”

26 UYeesu wámugomosesa wáaja, “Yula yuna nisimupeele ishipilije sha mukhaate shina nadabisa.” Lino wátoola ishipilije sha mukhaate wádabisa, wámupeela uYuuda, umwana wa Simoni uIsikaliyoote. 27 UYuuda pina wáyanushila ishipilije shila sha mukhaate, baaho uShetaani wámuyinjila. Lino uYeesu wámujovela wáaja, “Gina ugulumiile kigagaha, gagaha nyangu!” 28 Leelo avaanu woona vina vakhandi viilya, vasikhamanyile kiija kwashi uYeesu wálogola ngaja ndeeno.

29 Avanji vahiivaga kiija uYeesu wámujovela kiija, alute agule ifiinu fina fisakulwa pa shiwungo, awu avapeele avapiina ihela simonga, kwa kiiva uYuuda yumwene akhandi iikhata umufukho gwa hela. 30 Lino uYuuda pina wáyanushila ishipilije shila, baaho wáahuma panja. Uluhaavi ulo yikhandi shilo.

UYeesu ikivapeela avamanyisiwa vaakwe indaji imya

31 Lino uYuuda pina ahumile panja, uYeesu wávajovela avamanyisiwa vaakwe wáaja, “Lino uwutupikho wangu one Lusawo lwa Muunu wuhejeelile kiwonekha bahawuvalafu. Khanji, uwutupikho wa Nguluvi wukhawonekha bahawuvalafu kishilila mu nsengo yangu. 32 Nda wiwonekha uwutupikho waakwe kishilila mu nsengo yangu, lino woope uNguluvi ikivawonensa avaanu uwutupikho wangu one Lusawo lwa Muunu, khanji iigaha ndeeno, lilino ndeeni.

33 “Omwe vanangu, nisiive noomwe kwa luhaavi lufupi hela. Ngaja shina nikhandi nivajoveele avakhome va Vayahuudi, shiisho ndeeno nikivajovela na yuumwe lino kiija, mukhanisakula leelo musikwiliile kiyinsa kuna nikhava. 34 Leelo lino nikivapeela indaji imya, nikivalajisa kiija, ‘Mugananaje. Ngaja shina one nivageene omwe, shiisho ndeeno na yuumwe mugananaje.’ 35 Nda mwiganana, lino avaanu woona vasiimanye kiija, omwe muli vamanyisiwa vangu.”

UYeesu ikimujova uPetulo kiija akhamukhaana

(Mataayo 26:31-35; Maluko 14:27-31; Luuka 22:31-34)

36 Lino uSimoni Petulo wámuposa uYeesu wáaja, “Owe Mutwa, wiiluta kwi?” UYeesu wámugomosesa wáaja, “Niiluta kuna owe usikwiliile kinifwata uluhaavi ulu, leelo usinifwate paanyuma.” 37 UPetulo wámuposa wáaja, “Owe Mutwa, wuli, kwashi nisikwiliile kikufwata lino? One niyipinyile kiwuyasa uwuumi wangu kwa kiiva yaakho!” 38 UYeesu wámugomosesa wáaja, “Petulo, wuli, ukwiliile kiwuyasa uwuumi waakho kwa kiiva ya one? Shiyooli nikikujovela, pina injogolo yisinaavishe, usiive wanikhaana mala khatatu kiija, usinimeenye.”