Nsengo sa Vanandeje
Imola yina yilongola
Ilitaafili ili lyayandikhwagwa nu Luuka, yumwene yuna wáyandikhaga na ilitaafili lya Mola iNofu iya Luuka. Mu litaafili ili itaviilila kiija, uYeesu wáganaga kitupulwa kiluta kushaanya, avamanyisiwa vaakwe vayansa kikhoma iMola iNofu kwa Vayahuudi ava mu nyi yaanave. ULuuka itaviilila shina avamanyisiwa woona, vamuposheelaga uNumbula uMunofu ulwamwandi, na shina uNumbula uyo wáyitenekhaga kivalongosa na kivakhangasa aveene, mu nsengo yaanave iya kikhoma iMola ya Yeesu.
Mu mulyango ugwa 1-12, uLuuka itaviilila gina umwanandeje uPetulo wágahaga kwa vahuvililaaji ava ku Yelusalemu. Khanji uNumbula uMunofu shina wávatangaga mandu kimanya kiija, uNguluvi isakula iMola iNofu iya Yeesu yiyalalisiwe kwa vaanu va nyi soona. Imola iyo yisili ya Vayahuudi veene duguli. Khanji umulyango gwa 13-28, uLuuka itaviilila shina uNumbula uMunofu wámulongosaaga umwanandeje uPawulo kiluta kivakhoma iMola iNofu mu mbali nyinshi isa Asiya na ku Wulaya, na kimaliisisa ku lijumbi lya Luumi. Mu litaafili ili, wáyandikhaga amaswi gamonga gina umwanandeje uPawulo wákhomaga. Ago gikitutanga ose kimanya shina vakhomaga iMola iNofu iya Yeesu kwa vaanu paayo paayo, na gina vatangaanaga nago pina vakhandi viikhoma.
| Umulyango | Gina gakwali mu litaafili ili |
| 1:1–5:42 | Ishiyanso sha shipuga sha vahuvililaaji va Yeesu |
| 6:1–9:31 | Amalava ga vahuvililaaji pina viikhoma iMola iNofu |
| 9:32–12:25 | Insengo iya Petulo |
| 13:1–14:28 | Ulushuulo lwa Pawulo ulwa wutasi kiluta kikhoma |
| 15:1-41 | Ishiwungu isha ku Yelusalemu |
| 16:1–18:22 | Ulushuulo lwa Pawulo ulwa wuvili kiluta kikhoma |
| 18:23–21:14 | Ulushuulo lwa Pawulo ulwa wutatu kiluta kikhoma |
| 21:15–28:31 | Kikhatwa uPawulo nu lushuulo ulwa kiluta ku Luumi |