Nsengo sa Vanandeje 9

USawuli ikulukha

(Nsengo sa Vanandeje 22:6-16; 26:12-18)

1 Uluhaavi ulo, uSawuli akhandi apikiyitenekha kivakhakhafya avahuvililaaji va Mutwa uYeesu, kiija asivabude. Wáaluta kwa mutambule umukhome, 2 wámulomba amupeele ibalula isa kimukhoona kwa vakhome va nanda sa kifuunyila sina sikwali mu lijumbi lya Damesiki. Ibalula iso samutawulaga kiija, avaanu va Nsila ya Mutwa uYeesu, vave vagoosi awu vashimaayi, avadindile na kivatwala ku Yelusalemu.

3 Baheene uSawuli wálungama insila ya kiluta ku Damesiki. Wáganile kivejeela, shitu baaho ulungʼali kihuma kushaanya lwamungʼalikha mandu imbali soona. 4 Wáagwa pansi, wápulikha ishawuti yikimujova yiija, “Sawuli! Sawuli! Kwashi ukinilafya?” 5 USawuli wáaposa wáaja, “Owe yuuwe naani mutwa?” Wámugomosesa wáaja, “One yuune Yeesu, yuna owe ukinilafya. 6 Yiima! Ulute mu lijumbi, umo mumwene umuunu yumonga asikujovele gina wisakulwa kigaha.”

7 Avagoosi vina vashuulaga lumo nu Sawuli vayiima, vasisima tototo kwa kiswiga, kwa kiiva woope vapulikhaga ishawuti iyo, leelo vasikhayimeenye. Khanji vasikhamwajile umuunu yuna ilogola. 8 Baheene uSawuli wáyiima, wádaamula ameeho, wáawona asiloleela. Avayine vamukhata iliwokho na kimulongosa, vamutwala ku Damesiki. 9 Umo, wáakhala nsiku sitatu asiloleela, khanji asiilya na asiingʼwa shoshoona.

10 Lino, ku Damesiki kukhandi nu muhuvililaaji wa Yeesu yumonga, ilitaawa lyakwe akhandi itambulwa Ananiya. UMutwa uYeesu wámushemeela mu mahilu wáaja, “Wee Ananiya!” Woope wáaja, “Wee Mutwa, one nili panu.” 11 UMutwa wámujovela wáaja, “Ulute mu nanda ya Yuuda yina yili mu nsila yina yitambulwa Nsila Ngolofu. Ukho, upose nda kuna muunu uwa lijumbi lya Taliso, ilitaawa lyakwe yu Sawuli. Lino ikimufuunya uNguluvi, 12 wágaaga amahilu. Mu mahilu ago, wámwagaga umuunu yuna itambulwa Ananiya ihuluta mu nanda muna akwali, ikimuviishila amawokho pa mutwe, kiija ayanse kiloleela khanji.”

13 UAnaniya wámugomosesa wáaja, “Wee Mutwa, loleela avaanu vinshi vanijoveele uSawuli uyo shina wávagahilaga uwuvi avabaagule vaakho ava ku Yelusalemu! 14 Lino ali panu, avatambule avakhome vamutawiile kiija, avadindile woona vina vikilihuviilila ilitaawa lyakho.” 15 Leelo uMutwa wámujovela uAnaniya wáaja, “Lutaga hela! Umuunu uyo, namubaagula ave muvanda wangu, amanyise ilitaawa lyangu kwa vala vina vasili Vayahuudi, kwa vatwa vaanave, khanji na kwa Vayahuudi vaveene. 16 One nisimuwonense shina yisakulwa kiija, alave mandu kwa kiiva ya litaawa lyangu.”

17 Baheene uAnaniya wáaluta, wáhuluta mu nanda muna akhandi uSawuli. Wámuviishila amawokho pa mutwe, wámujovela wáaja, “Lukholo lwangu Sawuli, uMutwa uYeesu anifiliishe kunyaakho kiija, uyanse kiloleela na kimemesewa uNumbula uMunofu. Uyo uYeesu yumwene wákutwiwushilaga mu nsila pina ukhandi wiyinsa apa.” 18 Baaho ifiinu fina fili ngaja magagala fyagwa kihuma mu meeho ga Sawuli, wáyansa kiloleela. Baheene wáyiima, wátwinisiwa. 19 Wáganile kiilya ishakiilya, wáava ni ngufu khanji.

USawuli iyansa kikhoma ku Damesiki

USawuli wákhalaga nsiku ndoodo mu lijumbi ilyo lya Damesiki, akhandi lumo na vahuvililaaji va Mutwa uYeesu. 20 Baaho wáyansa kiluta mu nanda sa kifuunyila, akhandi iikhoma iija, “UYeesu Lusawo lwa Nguluvi.” 21 Avaanu woona vina vakhandi vipuliisa amamanyiso gaakwe ago, vaswigaga mandu. Vaposania vaaja, “Wuli, umuunu uyu, asili yumwene yula yuna akhandi ikivalafya avahuvililaaji va Yeesu ava ku Yelusalemu? Wuli, uyu asiyinsile kiija avakhate avaanu ngaja awo pa Damesiki panu na kivatwala kwa vatambule avakhome?” 22 Hata ndeeno, uSawuli wáyonjelela kiiva ni ngufu isa kikhoma, akhandi ikivajumya aVayahuudi vina vakhandi viikhala ku Damesiki kwa kivawonensa kiija, uYeesu yu Mukulusaaji yuna uNguluvi wátahisaaga kimufilikha, mbakha vagombola kimukhaana.

23 Saganile kishila nsiku nyinshi, aVayahuudi awo vapulinkheene kiija vamubude. 24 Vakhandi vikimutegama pa fikwilo ifya lijumbi lila paashilo na paminsi, baheene vamubude. Leelo, ulugulumilo ulo ulwa kimubuda, uSawuli wálupulikha. 25 Paashilo avamanyisiwa vaakwe vamuviikha mu litunduti ilikhome, vamushisa pa ndwi ku luhengo luna lukhandi lupiliime ilijumbi, vamuhumya kunja.

USawuli iiluta ku Yelusalemu

26 Baheene uSawuli wáaluta ku Yelusalemu, akhandi iijesa kiiva lumo na vahuvililaaji va Yeesu. Leelo woona vamutiilaga, kwa kiiva vasikhahuviliile kiija, shiyooli wáava mwanandeje wa Yeesu. 27 Leelo uBalinaaba wámutwala uSawuli kwa vanandeje va Yeesu. Wávataviilila shina uSawuli wámwagaga uMutwa uYeesu mu nsila ya kiluta mu lijumbi lya Damesiki na shina uMutwa wálogolaga nawo. Khanji wávataviilila shina uSawuli wávakhomaga avaanu ava ukho, ulwa mola sa Yeesu kwa wujimfu.

28 Baheene uSawuli wásigala lumo na vanandeje. Akhandi ipilima mu Yelusalemu, kuno iikhoma avaanu ulwa mola sa Mutwa uYeesu kwa wujimfu. 29 Akhandi ilogola na kikhaanania na Vayahuudi vamonga vina valogolaga ishilogolo sha Shiyunaani ulwa Yeesu, leelo aveene vaajesa kiija vamubude. 30 Baheene avahuvililaaji va Yeesu vaamanya ago, vamusindihisa vamufisa mu lijumbi lya Kayisaliya, vamulekha alute kunyaakwe ku Taliso.

31 Mu nsiku iso, ishipuga sha vahuvililaaji va Yeesu ava ku Yudeya, ku Galilaya na ku Samaliya, vaava nu wulindamafu na kikhangala mu lihuuvi. Khanji ishipuga sha vahuvililaaji vakhandi vikimuyinatila uMutwa uYeesu, woope uNumbula uMunofu wáava ikivajinia. Ndeeno avahuvililaaji vakhandi vapiyonjelela mandu.

UPetulo ikimuponia uAyineya

32 Mu luhaavi ulo, uPetulo akhandi iishila kuno na ukho, wáafikha mu lijumbi lya Lida, kiija avahunjile avahuvililaaji vina vakhandi viikhala ukho. 33 Mu lijumbi ilyo, wámwaga umuunu yuna akhandi itambulwa Ayineya. Uyo akhandi atengelemwishe, agonile pa mushekha kwa luhaavi lwa maakha munaana. 34 UPetulo wámujovela wáaja, “Wee Ayineya, uYeesu Kilisito wákuponia. Yiima! Gonja umushekha gwakho.” Baaho uAyineya wáyiima. 35 Avaanu woona vina vikhalaga mu lijumbi lya Lida na mu lunyikha lwa Saloni, vaganile kimwaga uAyineya ijenda, woona vamuhuviilila uMutwa uYeesu.

UPetulo ikimufyusa uDolikasi

36 Akhandi akwali uwashimaayi yumonga, muhuvililaaji wa Yeesu mu lijumbi lya Yopa. Ilitaawa lyakwe akhandi itambulwa Tabita, kwa Shiyunaani yu Dolikasi. UDolikasi akhandi ikivatanjilisa avapiina na kisenga insengo isinji inofu. 37 Mu nsiku iso, uDolikasi wáatamwa uwutamu, wáafwa. Avaanu vaguyoosa umufimba gwakwe, vagugonia mu wudaama wa mu juulu. 38 Uluhaavi ulo avahuvililaaji vayine vapulikha kiija, uPetulo ali mu lijumbi lya Lida. Baheene vavafilikha kwa mwene avaanu vavili, kiiva ilijumbi ilyo likhandi nkholeela ni lijumbi lyanave ilya Yopa. Avaanu vina vafilikhwagwa vamulomba mandu uPetulo vaaja, “Tikikulomba uyinse kunyeesu, usikhadiilaga!”

39 Baheene uPetulo wáaluta lumo na woope. Vaganile kifikha ku Yopa, vamutwala mu wudaama wa mu juulu. Avafwile woona vamukungaanila kuno vikhoola. Vamuwonensa inkhansu na menda aganji gina uDolikasi wávahonelaga pina akhandi muumi.

40 UPetulo wávahumya avaanu woona kunja, wáfugama, wámufuunya uNguluvi. Baheene wáguloleela umufimba gula wáaja, “Wee Tabita, lamukha!” UTabita wádaamula ameeho. Wáganile kimwaga uPetulo, wáakhala. 41 UPetulo wámukhata iliwokho, wámuyiimya. Wávashemeela avafwile vala, na avahuvililaaji vamonga va Yeesu, wávawonensa uTabita kiija muumi. 42 Imola iso sayalaalila mu majumbi goona aga Yopa, avaanu vinshi vamuhuviilila uMutwa uYeesu. 43 UPetulo wásigala ku Yopa nsiku nyinshi, akhandi iikhala mu nanda ya muunu yuna akhandi iinosa inkwembe, akhandi itambulwa Simoni.