Nsengo sa Vanandeje 8

1-2 Woope uSawuli akhandi baaho pina vipulinkhana kiija, uSitefano abudwe.

Avahuvililaaji va Yeesu vilafisiwa

Wáganile kiifwa uSitefano, avaanu vina vamuyinatilaga uNguluvi vamusiila uSitefano. Vaava vasugumiilwe mandu ni mfwa yaakwe.

Ilijuva lilila lina vamubudaga uSitefano, ishipuga sha vahuvililaaji va Yeesu ava ku Yelusalemu vayansa kilafisiwa mandu, woona vapalankhana kiluta ku nyi ya Yudeya ni ya ku Samaliya. Avanandeje veene duguli, vasigalaga ku Yelusalemu. 3 USawuli wáyansa kilafya ishipuga sha vahuvililaaji va Yeesu. Akhandi ihuluta mu nanda sa vaanu, akhandi ikivaduluuna avagoosi na vashimaayi, akhandi ikivadindila mu shifungo.

UFilipo iikhoma mu Samaliya

4 Avaanu awo vaganile kipalankhana, vayansa kiyalaalisa iMola iNofu. 5 UFilipo woope wáaluta mu lijumbi limonga ilya Samaliya, wáyansa kikhoma imola sa Mukulusaaji. 6 Vaganile kipulikha amaswi ga Filipo, na kigaaga amabikha gina akhandi iigaha, avaanu vakhandi vikimupuliisa mandu. 7 Akhandi iidaga amalungu kwa vaanu vinshi, gakhandi gikivahuma kuno gilyova. Akhandi ikivaponia vinshi vina vatengelemwishe lubali, na vina vakhandi valema amagulu. 8 Baheene mu lijumbi ilyo kwava nu wushendeefu mandu.

UPetulo ikimukhajila uSimoni umuhavi

9 Mu lijumbi ilyo lya Samaliya, kukhandi nu muhavi yumonga, akhandi itambulwa Simoni. Uyo akhandi iigaha uwuhavi. Akhandi ikivajumya avaanu woona ava lijumbi ilyo kwa wuhavi waakwe, khanji akhandi ikiyihala kiija, umwene muunu mukhome. 10 Avaanu avanji woona na vakhome, vakhandi vikimupuliisa, kuno viija, “Umuunu uyu, Ngufu sa Nguluvi, sina sitambulwa Ngufu Nkhome.” 11 Avaanu vakhandi vikimupuliisa kwa kiiva, nsiku nyinshi akhandi ikivajumya kwa nsengo saakwe isa wuhavi.

12 Leelo uFilipo wáganile kivajovela avagoosi na vashimaayi iMola iNofu ya Wutwa wa Nguluvi, nu lwa litaawa lya Yeesu Kilisito, vakhandi vihuviilila na vakhandi vitwinisiwa. 13 USimoni woope wámuhuviilila uYeesu, wátwinisiwa, wáyansa kilongosania kokoona nu Filipo. Wáganaga kigaaga amabikha makhome ago gina uFilipo akhandi iigaha, wáswigaga.

14 Avanandeje vina vasigalaga ku Yelusalemu, vaganile kipulikha kiija, avaanu ava ku Samaliya woope valihuviilila iLiswi lya Nguluvi, vavafilikha uPetulo nu Yohana ukho. 15 Vaganile kifikha, vavafuunyila avaanu vala kiija, woope vamuyanushile uNumbula uMunofu. 16 Vagahaga ndeeno kwa kiiva, kusiina umuunu yoyoona mu awo yuna uNumbula uMunofu akhandi amuyinsiile, leelo vakhandi vitwinisiwa hela kwa litaawa lya Mutwa uYeesu. 17 UPetulo nu Yohana vavaviishila amawokho vavayimiilila, baheene woope vamuyanushila uNumbula uMunofu.

18 USimoni wáganile kiloleela kiija, avaanu vala vamuyanushila uNumbula uMunofu kwa nsila ya kivaviishila amawokho ga vanandeje, wáajesa kivapeela ihela uPetulo nu Yohana, wávajovela wáaja, 19 “Ingufu iso, munipeele na yuune, baheene umuunu yoyoona yuna nisiive nikimuviishila amawokho, woope ave ikimuyanushila uNumbula uMunofu.”

20 UPetulo wámugomosesa wáaja, “Owe lumo ni hela saakho, mufwile kutali, kwa kiiva wihiiva kiija, usiigule ishipeelwa sha Nguluvi ni hela! 21 Owe tisili lumo noose mu nsengo iyi, kwa kiiva inumbula yaakho mbi pa Nguluvi. 22 Lambiisila uwunansi waakho uwo na kimufuunya uMutwa uYeesu kiija, akusaajile amahiiva gaakho amavi gina gali mu numbula yaakho. 23 Kiiva naawona kiija una jiila mandu, uwunansi waakho wukukhatiliile.” 24 USimoni wámugomosesa wáaja, “Omwe munifuunyile kwa Mutwa uYeesu, baheene lisikhanipataga hata limonga mu ago gina mwalogola!”

25 UPetulo nu Yohana pina vahumiise uwubedelo na kikhoma iMola iNofu iya Mutwa uYeesu ukho, vaawuya ku Yelusalemu. Mu nsila vakhandi viikhoma iMola iNofu mu njinji nyinshi isa Samaliya.

UFilipo ilogola nu mukhome wa ku Esiyopiya

26 Ilisiku limonga umalayikha wa Mutwa uNguluvi wámujovile uFilipo wáaja, “Ulute ulubali lwa kunyagamo insila iya ku luvanda yina yiihuma ku Yelusalemu kiluta ku Gasa.” 27 Baheene uFilipo wáwuukha, wáyansa kijenda mu nsila iyo, wátangaana nu mukhome yumonga wa nyi ya Esiyopiya yuna akhandi muyiipe. Uyo yumwene wáyimililaga ifiinu fya galama ifya Kandake, uluganulo lwakwe, umutwa wa shidala uwa nyi iyo ya Esiyopiya. Umukhome uyo akhandi alutile ku Yelusalemu kimufuunya uNguluvi. 28 Pina akhandi iitina kukhaaya, wáyangalaga mu mutukha yaakwe yina yikwehwa ni falaasi, akhandi iyimba mu litaafili lya mukuwamalago uIsaaya.

29 UNumbula uMunofu wámujovela uFilipo wáaja, “Ulute uyifwate imutukha yila, uyifishe.” 30 Baheene uFilipo wáyisijila, wáyifikha. Wámupulikha umukhome uyo iyimba mu litaafili lya mukuwamalago uIsaaya. Wámuposa wáaja, “Amaswi ago gina wiyimba, wuli, ukigamanya?” 31 Wámugomosesa wáaja, “Nisigamanye shihwana wuli nda kusiina umuunu wa kiniganulila amaswi aga?” Wámulomba uFilipo kiija, ayinjile mu mutukha yaakwe mula, vakhale lumo. 32 AMayandikhwa aManofu ago gina umukhome yula akhandi iyimba, giijova,

“Wálongosewaagwa ngaja nkholo yina yiiluta kishinjwa.

Wásisimaga tototo, ngaja nyana nkholo,

yina yisisima pina yidumulwa uwaaji.

33 Vamuyegulaga na kimuhiga fivi.

Kusiina umuunu yuna angataviilila imola sa vanaakwe,

kwa kiiva vawuwusaaga uwuumi waakwe mu nyi.”

34 Umuyiipe yula wámujovela uFilipo wáaja, “Unijovele, umukuwamalago uyu ilogola njowo saakwe yumwene awu sa yunji?” 35 Baheene uFilipo wáyansisa mu maswi ago aga mu Mayandikhwa aManofu kikhoma ulwa Mola iNofu ya Yeesu.

36 Pina vakhandi mu nsila vapiyiteneeshe kishuula, vaafikha uluvala pina pakhandi na malenga. Umuyiipe yula wámujovela uFilipo wáaja, “Loleela! Amalenga aga gakwali apa. Shiinu shishi shisinikhaane kiija, nisikhatwinisiwaagwa?” [ 37 UFilipo wámugomosesa wáaja, “Nda umuhuviilile uYeesu Kilisito kwa numbula yaakho yoona, ukwiliile kitwinisiwa.” Umuyiipe yula wámugomosesa wáaja, “Nikiyihuviilila kiija, uYeesu Kilisito, Lusawo lwa Nguluvi.”] 38 Baheene umuyiipe uyo wáyiimya imutukha yila, vayiikha, vahuluta mu malenga, uFilipo wámutwinia. 39 Vaganile kihuma mu malenga mula, baaho uNumbula uMunofu wa Mutwa uNguluvi wámutupula uFilipo. Umuyiipe yula asikhamwajile khanji, wáyitenekha kishuula kuno ashendeevile mandu. 40 UFilipo wáawona ali mu lijumbi lya Asoto. Wáwuukha apo, pina ishuula akhandi ishilila mu majumbi goona ga mu nsila, akhandi ikivakhoma avaanu iMola iNofu, baheene wáafikha mu lijumbi lya Kayisaliya.