Ibalula ya Pawulo kwa
Valuumi
Imola yina yilongola
Umwanandeje uPawulo wáyandikhaga ibalula iyi kwa vahuvililaaji ava ku lijumbi lya Luumi. UPawulo isakulaga kivataviilila iMola yina wákhomaga mu nyi isinji. Ikivataviilila kiija, iMola iNofu iya Yeesu yiwonensa shina uNguluvi ikivavasisa kiiva vagolofu avaanu va mu nyi soona, kwa nsila ya lihuuvi. Ikivajovela aVayahuudi avahuvililaaji kiija, imola iyi yikwali khanji mu Lufingo uLukuulu. Ikivajovela vina vasili Vayahuudi kiija, iMola iyo yikivalingaania nu Nguluvi na kivagaha kiiva vaanu vaakwe. UPawulo iijova kiija, kwa lihuuvi uNguluvi atuvasiise kiiva vagolofu pamwene. Ndeeno uNguluvi asikituvasa kiiva vagolofu kwa nsila ya kisiyinatila indaji saakwe. Leelo nda tikimulekha uNumbula uMunofu ikitulongosa mu wiikhasi weesu, baheene hambi tiikhala ngaja shina isakula uNguluvi.
Uwudugo wa balula iyi (umulyango gwa 12-15), uPawulo itaviilila injendo sa vahuvililaaji sina visakulwa kiiva naso mu wiikhasi waanave. Imanyisa ulwa kivagana avaanu avanji. Imaliisa (umulyango gwa 16) kwa kivahunjila avamanyi vaakwe ava ku Luumi, ikimuhunjila yumo yumo kwa litaawa lyakwe.
| Umulyango | Gina gakwali mu litaafili ili |
| 1:1-15 | Imola ya muyandikhaaji na vina ikivayandishila ilitaafili ili |
| 1:16–4:25 | UNguluvi ikivavasa kiiva vagolofu avaanu kwa nsila ya lihuuvi lyene duguli |
| 5:1–8:39 | Amamanyiso ga wuumi wupya uwa vahuvililaaji va Yeesu Kilisito |
| 9:1–11:36 | UNguluvi akhandi avabagwile aVayahuudi, kiija akhavakulusa |
| 12:1–15:33 | Injendo sa vahuvililaaji, ni nsengo ya Pawulo |
| 16:1-27 | Inyunjila kwa vahuvililaaji avanji ava mu shipuga sha vahuvililaaji |