UPawulo iilumwa ni njokha ku Melita
28
1 Taganaga kifikha wunofu ku nyi inyuumu,
tajovelwa kiija tili ku shigunguli shina shitambulwa Melita.
2 Avakhaaya va pala vatuposheela wunofu mandu,
hata nda vakhandi vasitumeenye.
Vatupembela umooto,
vaajova tiyoote,
kwa kiiva inoonya yikhandi yitoonya,
khanji kukhandi kuna mepo.
3 UPawulo wáteenya inyanjala nsheefu.
Pina ikisiviikha mu mooto,
injokha inya wanga yaahuma mu nyanjala iso kwa kiiva ya lifushe lya mooto,
yaliluma iliwokho ilya Pawulo na kingʼangʼaanila.
4 Avakhaaya va pala,
vaganile kiwona kiija injokha yila yilembeela mu liwokho lya Pawulo,
vajovelana vaajova,
“Yingava shiyooli kiija umuunu uyu,
mubudaaji.
Wáapona mu bahali,
leelo ilinguluvi lyesu ‘Lya Shiyooli’a asamuyiitikha kiija ave muumi.”
5 Baheene uPawulo wáyikungʼunila injokha yila mu mooto,
asilemeele hata padoodo.
6 Avaanu vala vakhandi vikimuloleela uPawulo,
vahuviliile kiija asifimbe,
awu asiigwe pansi shitu,
afwe.
Leelo vaganaga kimala uluhaavi lutali vasilwajile lujowo loloona,
woope vaseetula amahiiva gaanave.
Vayansa kilogola na woope,
wáava munyaayumo mu manguluvi gaanave.
UPawulo iiponia avatamu
7 Uluvala lula lukhandi nkholeela na magunda ga mukhome wa shigunguli shila.
Ilitaawa lyakwe akhandi itambulwa Pubiliyo.
Wátuposheela wunofu kunyaakwe,
taagona nsiku sitatu munyaakwe.
8 Uluhaavi ulo,
uwiihe wa Pubiliyo wáali agonile pa wusaga,
kwa kiiva akhandi mutamu nsegema na akhandi ipwaga idanda.
UPawulo wáhuluta mukhati mwa mutamu.
Wámufuunyila kwa Nguluvi,
wáviikha amawokho pashaanya pa mutamu,
wámuponia.
9 Wáganile kimuponia umutamu yula,
baheene avatamu avanji woona mu shigunguli isho,
vaava viiluta kwa Pawulo,
woope wáava ikivaponia.
10 Avaanu va pala vakhandi vikitugota.
Pina tikiyipinyanga kishuula kwa shipugo ishikhome,
vatutanga kiyangasa mu shipugo ifiinu fina tikhandi tisakula kiluta nafyo.
UPawulo iifikha mu lijumbi lya Luumi
11 Taganile kimala meesi gatatu mu shigunguli isho,
tawuukha ni shipugo shina shikhandi shiheepile kiija uluhaavi lwa shimfulumbwe lushile.
Ishipugo isho shikhandi sha lijumbi lya Alekisandiliya,
shikhandi ni sanaamu sa manguluvi amapasa.b
12 Kuunyuma,
taafikha ku lijumbi lya Silakusa mu shigunguli sha Sisiliya.
Taganile kimala nsiku sitatu umo,
tawuukha,
13 taashila ku lijumbi lya Legiyo.
Kwaganile kiisha,
ilipepo lyahuma kulubali lwa nyagamo.
Baheene tawuukha,
tayitenekha kishuula,
ilipepo lyatutanjilisa.
Pamulaawu njine taafikha mu lijumbi lya Puteholi.
14 Apo tatangaana na vahuvililaaji vamonga,
vatulomba kiija tikhale nawo nsiku fungati.
Paanyuma,
tayansa kishuula mu nyi inyuumu kiluta ku lijumbi lya Luumi.
15 Avahuvililaaji ava ku Luumi,
vaganile kipulikha kiija tili mu nsila kiluta kunyaanave,
vayinsa.
Avanji vatuhepelesa pa Munaada gwa Apiyo,
avanji vatuhepelesa pina pitambulwa Nanda Sitatu sa Vahensa,
kiija vatuposheele.
UPawulo wáganile kivaaga,
wáhonjesa kwa Nguluvi,
wáyijinia mu numbula.
16 Taganile kifikha mu lijumbi lya Luumi,
uPawulo wátawulilwa kiija ave iikhala mu nanda yaakwe mwene nu musulukhali yumo uwa kimuyangalila.
UPawulo ikivakhoma aVayahuudi ku Luumi
17 Wáganile kimala nsiku sitatu,
wávashemeela avakhome va Vayahuudi ava pala.
Vaganile kikungaana,
wávajovela wáaja,
“Omwe valukholo lwangu,
kusiina avaanu veesu vina nivananjiile lyolyona.
Hata ingʼoma sina avambuyeesu vatuleshelaga,
kusiina sina nisinanjile.
Hata ndeeno,
avakhome veesu vanikhata ku Yelusalemu,
vanitwala kwa Valuumi.
18 AValuumi vala vaganile kiniposa wunofu,
visakulaga kinidindulila,
kwa kiiva vasikhawuweene uwunansi wowoona wuna nagahaga,
wuna nikwiliile kibudwa.
19 Leelo,
aVayahuudi vamonga vaganile kikhaana kiija nisikhadindulilwagwa,
nagombolaga ilya kigaha.
Nalomba kiija umukhole gwangu guhigwe kwa mutwa umukhome uKayisaali,
hata nda nisikhandi ni shiinu isha kivasitaakha aVayahuudi vayeesu.
20 Kwa kiiva ya ago,
navashemeela,
kiija nilogole noomwe.
Nipinyiilwe na manyololo aga,
kwa kiiva ya luhuviililo lwa Vaisilahelic woona.”
21 Baheene avakhome va Vayahuudi vamugomosesa uPawulo vaajova,
“Ose tisiina ibalula yina taposheelaga kihuma ku Yudeya yina yikikulogola.
Khanji kusiina kihuma ukho yuna wátujovela amaswi amavi gogoona aga owe.
22 Leelo,
tisakula kipulikha amahiiva gaakho,
kwa kiiva insila ya Mutwa uYeesu yina ukiyifwata,
timeenye kiija yiijowa fivi popoona pala.”
23 Baheene vapulinkhana nu Pawulo ilijuva lina vakhakungaana mu nanda yina akhandi iikhala.
Ilijuva lila lyaganile kifikha,
aVayahuudi vala vakungaana kwa winshi kishila ilijuva lina lyashilaga.
UPawulo wávaganulila na kivabedela imola sa Wutwa wa Nguluvi,
kihuma ulwamilaawu mbakha shaamihe.
Khanji akhandi ikivamanyisa imola sa Yeesu kihuma mu ndaji sa Musa na Mayandikhwa ga vakuwamalago,
kiija avakhofye kimuhuviilila uYeesu.
24 Amaswi ago gina uPawulo wálogwele,
aVayahuudi vamonga vagahuviilila,
leelo avamonga vasikhagahuviliile.
25 Baheene vakhaanania,
pina viyansa kipalankhana,
uPawulo wávajovela wáaja,
“UNumbula uMunofu wávajoveele avambuyeenyu aga shiyooli,
pina wálogwele kwa nsila ya mukuwamalago uIsaaya kiija,
26 ‘Lutaga kwa vaanu ava uvajovele ndeeni,
“Mukhapulikha mandu,
leelo musikhamanya.
Mukhaloleela mandu,
leelo musikhamanya.
27 Kwa kiiva inumbula sa vaanu ava nyuumu,
amakutu gaanave gasipulikha,
ameeho gaanave gasiloleela,
kiija ameeho gaanave gasaali galoleele,
amakutu gaanave gasaali gapulishe
ni numbula saanave sisaali simanye,
vasaali vaseetushe,
baheene nivakuluse.”’d”
28 UPawulo wáyitenekha kilogola wáaja,
“Lino!
Mumanyaje kiija uwukulukho uwu wuna wuhumile kwa Nguluvi,
wutwaliilwe kwa vaanu vina vasili Vayahuudi,
woope vakhawupuliisa.”
[
29 UPawulo wáganile kimala kilogola amaswi ago,
aVayahuudi vala vawuukha kuno vikhaanania mandu.]e